ទស្សនកិច្ច លោកនាយករដ្ឋមន្ត្រីអ៊ីស្រាអែល នៅរុស្ស៊ី
លោកនាយករដ្ឋមន្ត្រីអ៊ីស្រាអែល Benjamin Netanyahou ដែលថ្ងៃនេះ ចាប់ផ្តើមទស្សនកិច្ចផ្លូវការ នៅក្រុងម៉ូស្គូ នៅថ្ងៃស្អែកទី៧មិថុនា នឹងត្រូវទទួលជួបចរចា ដោយលោកប្រធានាធិបតីរុស្ស៊ី វ៉្លាឌីមៀរ ពូទីន។ ដំណឹងនេះ ប្រកាសដោយវិមានក្រេមឡាំង ដែលសង្កត់ធ្ងន់ថា ទស្សនកិច្ចនេះ ដែលជាលើកទី២ ទៅហើយ បើគិតក្នុង២ខែកន្លងទៅ គឺឧទ្ទិសដល់ខួប២៥ ឆ្នាំ នៃការស្តារឡើងវិញទំនាក់ទំនងការទូត រវាងសហព័ន្ធរុស្ស៊ី និង រដ្ឋអ៊ីស្រាអែល។ គូភាគីនឹងពិភាក្សាទៅលើប្រធានបទ បែបយ៉ាង ស្ថានការណ៍នៅស៊ីរី បញ្ហាប្រយុទ្ធទល់នឹងភេរវនិយម អន្តរជាតិ សភាពការណ៍ នៃទំនាក់ទំនាក់រវាងប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ជាការរំលឹក គឺក្នុងខែឧសភាឆ្នាំ១៩៤៨ ដែលសហភាពសូវៀត និង អ៊ីស្រាអែល បានតាំងទំនាក់ទំនងការទូតនឹងគ្នា។ ប៉ុន្តែក្នុងឆ្នាំ១៩៦៧ ទំនាក់ទំនងនេះ ត្រូវបានផ្តាច់ទៅ។ លុះ ២០ឆ្នាំក្រោយមក ក្នុងឆ្នាំ១៩៨៧ គូភាគីបានស្តារទំនាក់ទំនងនឹងគ្នា ត្រឹមថ្នាក់កុងស៊ុល។ ហើយ នៅខែតុលាឆ្នាំ១៩៩១ ទំនាក់ទំនងការទូត ត្រូវបានស្តារឡើងវិញ បានពេញទំហំ ដោយការបើកក្នុងខែធ្នូឆ្នាំនោះឯង គឺស្ថានទូតអ៊ីស្រាអែលនៅម៉ូស្គូ និង ស្ថានទូតរុស្ស៊ី នៅក្រុង Tel-Aviv។
ក្នុងសម្ភាសន៍ទៅទីភ្នាក់ងារព័ត៌មានរុស្ស៊ី RIA Novosti ឯកអគ្គរដ្ឋទូតអ៊ីស្រាអែល ប្រចាំសហព័ន្ធរុស្ស៊ី បានថ្លែងថា ជាតុល្យាការនៃកិច្ចចរចា នៅថ្ងៃ៧មិថុនា ប្រមុខរដ្ឋរុស្ស៊ី និង អ៊ីស្រាអែល នឹងចេញសេចក្តីថ្លែងការណ៍រួម ឧទ្ទិសដល់ខួប២៥ឆ្នាំ នៃការស្តារឡើងវិញ ទំនាក់ទំនងរវាងរដ្ឋទាំងពីរ។
អ្នកការទូតអ៊ីស្រាអែលក៏បានឲ្យដឹងថា ក្នុងក្របខ័ណ្ឌទស្សនកិច្ចដែលនឹងពន្យារទៅ រហូតដល់ ថ្ងៃទី៨មិថុនា លោកនាយករដ្ឋមន្ត្រីអ៊ីស្រាអែល Netanyahou នឹងអញ្ជើញចូលរួម ក្នុងពិធី សម្ពោធ ពិព័រណ៌ពហុប្រព័ន្ធផ្សព្វផ្សាយអ៊ីស្រាអែល នៅក្រុងម៉ូស្គូ ក្រោមឈ្មោះថា “អ៊ីស្រាអែល បើកទ្វារចំហ” ដែលនឹងប្រព្រឹត្តទៅ ពីថ្ងៃទី៦ដល់ទី១២មិថុនា។
នឹងទទួលការចុះហត្ថលេខា ក៏ទាំងកិច្ចព្រមព្រៀងស្តីអំពី ការបង់ប្រាក់រ៉ឺត្រែតដោយរុស្ស៊ី ឲ្យទៅអតីតពលរដ្ឋរុស្ស៊ីរាប់ពាន់ពាន់នាក់ ដែលបច្ចុប្បន្នក្លាយជាពលរដ្ឋអ៊ីស្រាអែលទៅហើយ ក្រោយពីគេភៀសខ្លួនទៅរស់នៅអ៊ីស្រាអែល ហើយបាត់បង់សញ្ជាតិរុស្ស៊ីទៅ។
នាកិច្ចចរចាលើកនេះ នៅវិមានក្រេមឡាំង នឹងមានលើកយកទៅពិភាក្សា គឺអំពីដំណើរបំពេញតាមកិច្ចព្រមព្រៀង ដែលត្រូវបានចុះលើកមុន ពេលលោក Netanyahou ធ្វើទស្សនកិច្ចនៅក្រុងម៉ូស្គូ កាលពីថ្ងៃ២១មេសាឆ្នាំនេះ ដែលនិយាយអំពីការសហការគ្នា ក្នុងវិស័យសន្តិសុខ ដើម្បីបញ្ចៀស កុំឲ្យមានការថ្លោះធ្លោយ ការយល់គ្នាមិនច្បាស់ ឬ ក៏ឧប្បត្តិហេតុកើតឡើងតែម្តង ក្នុងករណីដែលអ៊ីស្រាអែល ប្រតិបត្តិការនៅតំបន់ Golanតំបន់ដែលស៊ីរីទាមទារ ចង់បានវិញ ប៉ុន្តែ អ៊ីស្រាអែលចាត់ទុកវាជាភាគមួយនៃដែនដីរបស់ខ្លួន។
វិមានក្រេមឡាំង ក៏គូសបញ្ជាក់ថា ទន្ទឹមនឹងស្ថានការណ៍នៅស៊ីរី បញ្ហាប្រយុទ្ធទល់នឹងភេរវនិយម ស្ថិតក្នុងរបៀបវារៈគឺ ទស្សនវិស័យនៃដំណោះស្រាយជម្លោះ អ៊ីស្រាអែល-ប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ