ជំនួបអន្តរជាតិនៅក្រុងម៉ូស្គូ ឧទ្ទិសដល់ដំណោះស្រាយជម្លោះអ៊ីស្រាអែល-ប៉ាឡេស្ទីន
ចូលរួមក្នុងជំនួបអន្តរជាតិ ដែលប្រព្រឹត្តទៅថ្ងៃទី១កក្កដា នៅក្រុងម៉ូស្គូ ដើម្បីរកដំណោះស្រាយដោយសន្តិវិធី ឲ្យជម្លោះអ៊ីស្រាអែល-ប៉ាឡេស្ទីន គឺបណ្តាមន្ត្រីទទួលខុសត្រូវ នៃរដ្ឋអំណាចប៉ាឡេស្ទីន នៃសម្ព័ន្ធរដ្ឋអារ៉ាប ជាពិសេសរូបលោកអគ្គលេខាធិការនៃសម្ព័ន្ធនេះ និងតំណាងរបស់អង្គការសហប្រជាជាតិ ដែលជាមួយប្រតិភូជាន់ខ្ពស់ទាំងនេះ លោករដ្ឋមន្ត្រីការបរទេសរុស្ស៊ី ធ្វើការជួបពិភាក្សាផ្ទាល់។ ប៉ុន្តែ ជាបឋម លោកប្រមុខការទូតរុស្ស៊ី ជាប្រទេសម្ចាស់ផ្ទះ បានផ្ញើសារអបអរទៅកាន់បណ្តាប្រតិភូ នៃជំនួបអន្តរជាតិនេះ។
ចុះផ្សាយនៅថ្ងៃ៖
សេចក្តីនៃសារលោកប្រមុខការទូតរុស្ស៊ី ស៊ែរហ្គៃ ឡាវ៉្រូវ ដែលត្រូវបានអានពីលើវេទិកា នៃជំនួបនៅក្រុងម៉ូស្គូថ្ងៃនេះ ចាត់ចែងឡើង ក្រោមការឧបត្ថម្ភរបស់អង្គការសហប្រជាជាតិ ដើម្បីគាំទ្រដល់អភិក្រមស្វែងរក សន្តិភាពសម្រាប់អ៊ីស្រាអែល និង ប៉ាឡេស្ទីន កត់សម្គាល់ជា ពិសេសថា ៖
-ប្រទេសរុស្ស៊ី នឹងបន្តជំរុញ ដល់ការស្តារឡើងវិញ ទាំងកិច្ចចរចាទ្វេភាគី រវាងអ៊ីស្រាអែល និង ប៉ាឡេស្ទីន ទាំងពហុភាគីក្នុងជាន់ថ្នាក់អន្តរជាតិប្លែកៗ ជាបឋម គឺ ក្នុងរូបមន្ត “ចតុភាគី” ខាងរៀបរយស្ថានការណ៍នៅមជ្ឈឹមបូព៌ា ដែលផ្សំឡើងពី ៤ អន្តរការីអន្តរជាតិ គឺ សហព័ន្ធរុស្ស៊ី សហភាពអឺរ៉ុប សហរដ្ឋអាមេរិក អង្គការសហប្រជាជាតិ។
-ម៉ូស្គូ តែងប្រកាន់យ៉ាងខ្ជាប់ខ្ជួនគោលជំហរ សម្រាប់ជា “គុណប្រយោជន៍ នៃការដោះស្រាយ ឲ្យបានដោយយុត្តិធម៌ត្រឹមត្រូវនិងយ៉ាងឆាប់បំផុត ជម្លោះអ៊ីស្រាអែល-ប៉ាឡេស្ទីន ដោយឈរ លើបទដ្ឋាននៃច្បាប់អន្តរជាតិ ដែលគេទទួលស្គាល់ជាទូទៅ។
-កិច្ចចរចាលើកចុងក្រោយ រវាង អ៊ីស្រាអែល និង ប៉ាឡេស្ទីន ចាត់ចែងឡើង ដោយអន្តរការី ស.រ.អា.បានប្រព្រឹត្តទៅតាំងពី៩ខែមុនម៉្លេះ ហើយបានចប់ទៅដោយគ្មានលទ្ធផលអ្វីណាទេ។ បន្ទាប់ពីបរាជ័យនោះ ក៏មានផ្ទុះឡើងជាអំពើហិង្សា នៅលើត្រើយខាងលិចនៃទន្លេ Jourdain ហៅថា Cisjordanie និងក្នុងក្រុង Jerusalem ផ្ទាល់ ហើយជាពិសេស គឺនៅតំបន់ Gaza។
ដោយផ្សាយដំណឹងនេះ ទីភ្នាក់ងារព័ត៌មានរដ្ឋរុស្ស៊ី Itar-tass ថ្ងៃនេះ រំលឹកថា ពិតជាខកចិត្ត នឹងទស្សនវិស័យ នៃដំណោះស្រាយតាមផ្លូវចរចា ដែលភាគីប៉ាឡេស្ទីន បានសាកល្បងរំដោះ តំបន់ក្រោមការកាន់កាប់អ៊ីស្រាអែល និងសមិទ្ធិឲ្យបាននូវទ្រង់ទ្រាយរដ្ឋ តាមរយៈការដាក់ពាក្យ ទៅ ស្ថាប័នអន្តរជាតិនានា បូកទាំង ទៅកាន់ក្រុមប្រឹក្សាសន្តិសុខ អ.ស.ប.។ ក្នុងឋានៈ ជាចម្លើយបកវិញ រដ្ឋាភិបាលអ៊ីស្រាអែល បានដាក់ទណ្ឌកម្មសេដ្ឋកិច្ច ខ្ទប់ដង្ហើមប៉ាឡេស្ទីន ហើយដោយបបូរមាត់ លោកនាយករដ្ឋមន្ត្រីអ៊ីស្រាអែលតែម្តង មានប្រកាសថា ក្នុងស្ថានការណ៍ជាក់ស្តែងបច្ចុប្បន្ននេះ រាល់សម្បទានណាក៏ដោយខាងបញ្ហាដែនដី គឺមានន័យថា ជាគ្រោះថ្នាក់ដល់ សន្តិសុខជាតិអ៊ីស្រាអែល។
មកពីមូលហេតុនេះឬ ដែលគ្មានអ៊ីស្រាអែល ចូលរួម ក្នុងជំនួបថ្ងៃនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ