តួកគីមានកំហុស ក្នុងយុទ្ធនាការប្រយុទ្ធប្រឆាំងនឹងអង្គការរដ្ឋអ៊ីស្លាម ?
ចុះផ្សាយនៅថ្ងៃ៖
ស្តាប់ - ០៤:១១
អង្គការរដ្ឋអ៊ីស្លាមមិនថមថយកម្លាំងទេ និងកំពុងចង់ក្តោបយកក្រុងកូបាណេ របស់ស៊ីរី ដែលនៅជិតបង្កើយជាប់ព្រំដែនតួកគី បើទោះពីជាប្រតិបត្តិការផ្លូវអាកាសរបស់សម្ព័ន្ធអន្តរជាតិអាមេរិកនិងអារ៉ាប់ កំពុងបន្តវាយប្រហារយ៉ាងសន្ធាប់ក៏ដោយ។ ចំណែកឯរដ្ឋាភិបាលតួកគីដែល ព្រងើយកន្តើយរហូតមកឈរមើលពួកអង្គការរដ្ឋអ៊ីស្លាមវាយលុកក្រុងកូបាណេ មិនចូលជួយបែរបានទាមទារឱ្យមានអន្តរាគមន៍ទ័ពថ្មើរជើងបន្ថែម។ ហេតុអ្វីតួកគីទើបចង់ឃើញអន្តរាគមន៍ពេលនេះ ? តួកគីពិតជាបានធ្វើខ្លួនជាឧបសគ្គក្នុងការប្រយុទ្ធប្រឆាំងនឹងអង្គការរដ្ឋអ៊ីស្លាមឬ ?
មិនត្រឹមតែមិនសូវអើពើលូកដៃជាមួយសម្ព័ន្ធអន្តរជាតិក្នុងប្រតិបត្តិការប្រយុទ្ធប្រឆាំងនឹងចលនាជីហាតរដ្ឋអ៊ីស្លាម តួកគីបានថែមទាំងខាខាំងមិនឱ្យពលរដ្ឋគួដនៅតួកគីចូលជួយក្រុមគួដនៅស៊ីរីទៀត និងមិនធ្វើអ្វីទាំងអស់សម្រាប់ទប់ស្កាត់ពួកជីហាត។ មូលហេតុនៃការរើអើងនេះ គឺក្រៅពីតួកគីមាននយោបាយមិនទម្លាប់ចូលប្រយុទ្ធក្នុងជម្លោះណាមួយជាមួយប្រទេសជិតខាងឡើយ តាំងពីសង្គ្រាមលោកលើកទីមួយមក ម្យ៉ាងទៀត អង្គការរដ្ឋអ៊ីស្លាមមិនមែនទិសដៅទីមួយដែលតួកគីត្រូវប្រឆាំងឡើយ តួកគីចង់ឃើញតែម្យ៉ាងគឺរបបលោកបាស្ហា អាល់អាសាដដួលរលំ។ តួកគីបានចាត់ទុកពួកគួដជាក្រុមភេរវនិយម មិនចង់ឃើញមានតំបន់ស្វយ័តគួដ តាមបណ្តោយព្រំដែនតួកគី ដែលងាយផ្តល់ជម្រកដល់ក្រុមប្រឆាំងគួដនៅតួកគី PKK មានសំអាងទេ។
ប៉ុន្តែនយោបាយនេះ កំពុងបង្កសោកនាដកម្មពីរយ៉ាង ៖ សម្រាប់តំបន់ និងផ្ទៃក្នុងប្រទេសតួកគី។ ព្រោះបើអង្គការរដ្ឋអ៊ីស្លាមអាចដណ្តើមក្រុងកូបាណេបាន នោះចលនាជីហាតអាចនឹងត្រួតត្រាផ្លូវតាមបណ្តោយព្រំដែនស៊ីរី-តួកគី ពង្រឹងបានដែនដីរបស់ពួកគេផង និងពង្រីកសកម្មភាពជួញដូរបំប៉នចលនាជីហាតរដ្ឋអ៊ីស្លាម។ បន្ទាប់មកទៀត តួកគីនឹងក្លាយជាមុខព្រួញទីមួយរបស់ពួកជីហាតនេះតែម្តង ទឹកដីមួយចំរៀករបស់តួកគីក្នុងដែនដីស៊ីរី ក៏ត្រូវរងការគំរាមកំហែងដោយផ្ទាល់តែម្តងនាពេលនេះ។ ចំណែកនៅក្នុងប្រទេសបាតុកម្មរបស់ក្រុមគួដ បានក្លាយជាអំពើហិង្សាមានស្លាប់យ៉ាងហោចណាស់១៤នាក់កាលពីថ្ងៃអង្គារ អាចនឹងបញ្ចេះវិបត្តិ៣០ឆ្នាំមុន ឱ្យផ្ទុះឡើងវិញ បំណងប្រាថ្នាចង់បើកការចរចាជាមួយPKK ទំនងត្រូវបញ្ចប់។ ទំនងដោយហេតុនេះហើយឬបានជាតួកគីរបស់ Recep Tayyip Erdogan ភ្ញាក់ខ្លួនយល់ថាដល់ពេលត្រូវបើកកម្លាំងទ័ពថ្មើរជើង ដើម្បីទប់ពួកជីហាតកុំឱ្យរាលដល់តួកគីទាន់ ?!
ម្យ៉ាងវិញ បារាំងនិងតួកគី បានសន្យាធ្វើសហប្រតិបត្តិការរវាងគ្នា ដើម្បីប្រយុទ្ធ ប្រកបដោយប្រសិទ្ធិភាព ប្រឆាំងនឹងបណ្តាញជ្រើសរើសជនជីហាត ទៅបំប៉នកម្លាំងអង្គការរដ្ឋអ៊ីស្លាម នៅស៊ីរី និងអ៊ីរ៉ាក់ តាមរយៈការផ្តោះប្តូរព័ត៌មានគ្នាទៅវិញទៅមកជាដើម។ នៅថ្ងៃទី ២៦កញ្ញា រដ្ឋមន្ត្រីក្រសួងមហាផ្ទៃបារាំង បានសម្រេចដឹកនាំទស្សនកិច្ច ដោយរូបផ្ទាល់ខ្លួន ទៅកាន់ក្រុងអង់ការ៉ា ដើម្បីស្តារទំនាក់ទំនងជាមួយអាជ្ញាធរតួកគីឱ្យប្រសើរឡើងបន្ទាប់ពីមានភាពប្រទាំងប្រទើសដោះលែងជនជីហាតបីនាក់ឱ្យដល់ដៃអាជ្ញាធរបារាំងត្រឹមត្រូវមក។
ហេតុដូច្នេះហើយបានជា ការបង្ហើបទម្លាយព័ត៌មាន កាលពីថ្ងៃចន្ទទី ៦ តុលា របស់សារព័ត៌មានអង់គ្លេស The Times បានធ្វើឱ្យក្រសួងមហាផ្ទៃបារាំងខឹងច្រឡោតខ្លាំង។ បើតាមកាសែតអង់គ្លេស ចំណាប់ខ្មាំងជនជាតិតួកគី ៤៦នាក់ក្នុងដៃពួកអង្គការរដ្ឋអ៊ីស្លាម នៅភាគខាងជើងអ៊ីរ៉ាក់ ដែលបានត្រូវដោះលែងកាលពីថ្ងៃទី ២០ កញ្ញា បានទទួលសេរីភាពជាថ្នូរនឹងការផ្តោះប្តូរអ្នកទោស ជាជនជីហាតចំនួន១៨០នាក់ ជាប់ឃុំឃាំងក្នុងប្រទេសតួកគី។ ក្នុងចំណោមជនជីហាតដែលតួកគីបានប្រគល់ទៅឱ្យអង្គការរដ្ឋអ៊ីស្លាមនៅស៊ីរី នោះមានបីនាក់ជាជនជាតិបារាំង ពីរនាក់អង់គ្លេស ពីរនាក់ស៊ុយអែត ម៉ាសេដ័នពីរនាក់ ស្វីសម្នាក់ និងម្នាក់ទៀតជាជនជាតិប៊ែលហ្សិក។
ព័ត៌មានទាំងអស់នេះត្រូវបានបញ្ជាក់ក្នុងទំព័រកាសែតបារាំង Le Monde ដោយប្រភពការទូតបារាំង។ ប៉ុន្តែតុលាការនិងប៉ូលិសបារាំងទទួលបន្ទុកប្រយុទ្ធប្រឆាំងនឹងភេរវនិយម នៅប៉ារីស ហាក់ដូចជាមិនបានដឹងអំពីវត្តមានជនជីហាតបារាំងទាំងបីក្នុងពន្ធនាគារតួកគីឡើយ។ នេះក៏ព្រោះតែ ប្រទេសនីមួយៗការពារផលប្រយោជន៍ជាតិរៀងខ្លួនៗ គឺជាគោលការណ៍នៃការរក្សាបូរណភាពដែនដី ប៉ុន្តែវាបានធ្វើឱ្យខូចខាតខ្សែនយោបាយខាងផ្នែកស៊ើបការណ៍សម្ងាត់ និងទំនុកចិត្ត ដែលគ្រប់គ្នាខំស្វែងរក និងធ្វើឱ្យប្រសើរឡើង។
ក្នុងចំណោមជនជីហាតដែលតួកគីបានដោះលែង មួយភាគស្ថិតនៅក្នុងចង្ក្រោមភេរវនិយម អាប៊ូ បាក្រ អាល់អ៊ីរ៉ាគី ដែលមេកើយត្រូវបានពួកឧទ្ទាមស៊ីរីសម្លាប់បានកាលពីខែមករាឆ្នាំ២០១៤។ ចំណែកក្រុមជីហាតអឺរ៉ុបវិញ មានតែជនជាតិអង់គ្លេសពីរនាក់នោះទេ ដែលមានឈ្មោះក្នុងបញ្ជីផ្តោះប្តូរព័ត៌មានរបស់បណ្តាញស៊ើបការណ៍សម្ងាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ