ក្រុងកូបាណេ ជាប់ព្រំដែនតួកគីកំពុងរងគ្រោះធ្លាក់ក្នុងកណ្តាប់ដៃអង្គការរដ្ឋអ៊ីស្លាម
កូបាណេ នឹងត្រូវធា្លក់ក្នុងកណ្តាប់ដៃពួកអង្គការរដ្ឋអ៊ីស្លាមឬ ? ក្រុមយុទ្ធជនគួដកំពុងតស៊ូប្រយុទ្ធយ៉ាងស្វិតស្វាញតែម្នាក់ឯងប្រឆាំងនឹងក្រុមចលនាជីហាតរដ្ឋអ៊ីស្លាម ដែលបើទោះបីមានប្រតិបត្តិការផ្លូវអាកាសពីសំណាក់កម្លាំងសម្ព័ន្ធអន្តរជាតិយ៉ាងសន្ធាប់យ៉ាងណាក្តី ក៏អាចជ្រៀតចូលទៅអុកឡុក និងកាប់កាប់សង្កាត់មួយចំនួនក្នុងក្រុងកូបាណេ។ ប្រឈមមុខនឹងស្ថានការណ៍បែបនេះ តំណាងអង្គការសហប្រជាជាតិនៅស៊ីរីបានអំពាវនាវឱ្យសហគមន៍អន្តរជាតិទាំងមូល បញ្ចេញសកម្មភាពរួមការពារក្រុងកូបាណេ។ ចំណែកឯប្រធានាធិបតីតួកគីវិញ ចង់ឃើញមានការធ្វើអន្តរាគមន៍យោធានៅលើដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
កូបាណេ ក្រុងគួដទីបីក្នុងប្រទេសស៊ីរី ដែលស្ថិតនៅចម្ងាយប្រមាណតែ៣០គីឡូម៉ែត្រពីប្រទេសតួកគី កំពុងក្លាយជាសមរភូមិយ៉ាងក្តៅគគុក។ យុទ្ធជនគួដ កំពុងទប់ខ្លួន ការពារក្រុងយ៉ាងត្រដាបត្រដួសប្រឈមនឹងការវាយសម្រុករបស់ពួកជីហាតនៃអង្គការរដ្ឋអ៊ីស្លាម។ មានស្លាប់និងរបួសជាច្រើននាក់នៅក្នុងការប្រយុទ្ធគ្នានោះ។ ចំណែកជនស៊ីវិល នាំគ្នាសម្រុករត់ភៀសខ្លួនចេញ សំដៅទៅកាន់ប្រទេសតួកគីជិតខាង។ បើតាមប្រភពព័ត៌មានខ្លះ អះអាងថាគ្មានជនស៊ីវិលបន្តរស់នៅក្នុងក្រុងកូបាណេទៀតទេ ប៉ុន្តែប្រភពខ្លះទៀតសន្និដ្ឋាននៅមានពលរដ្ឋស៊ីវិលរាប់ពាន់នាក់កំពុងជាប់កុននៅឡើយ។
ប្រឈមមុននឹងស្ថានការណ៍បែបនេះ និងដូចជាហួសពេលបន្តិចហើយដែល តំណាងអង្គការសហប្រជាជាតិប្រចាំប្រទេសស៊ីរី បានអំពាវនាវពីប្រទេសស្វីស សូមឱ្យអន្តរជាតិទាំងមូលរួមគ្នាបញ្ចេញសកម្មភាពជាបន្ទាន់ ធ្វើយ៉ាងណាក៏ការពារក្រុងកូបាណេ កុំឱ្យធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាម។ ទង់ជាតិខ្មៅ បានដោតបង្ហោះក្នុងក្រុងនេះរួចជាស្រេចទៅហើយ នៅថ្ងៃម្សិលមិញក្នុងសង្កាត់ខ្លះ មុននឹងត្រូវដកទៅវិញ ដោយការសម្រុកវាយប្រហារខ្លាំងតាមផ្លូវអាកាសពីសំណាក់កម្លាំងសម្ព័ន្ធអន្តរជាតិ។ តាំងពីម្សិលមិញ និងនៅព្រឹកថ្ងៃពុធនេះ សម្ព័ន្ធអន្តរជាតិដឹកនាំដោយសហរដ្ឋអាមេរិក បានបើកយុទ្ធនាការទម្លាក់គ្រាប់ ដៅទិសលើពួកជីហាតនៅជុំវិញនិងនៅក្នុងក្រុងកូបាណេ។ សម្ពាធមានកាន់តែធ្ងន់លើក្រុមប្រទេសមហាអំណាច លោកប្រធានាធិបតីអាមេរិក បារ៉ាក់ អូបាម៉ា ត្រូវជួបពិភាក្សាជាមួយអគ្គមេបញ្ជាការកងទ័ព ថ្ងៃពុធនេះដើម្បីបូកសរុបប្រតិបត្តិការផ្លូវអាកាសនៅអ៊ីរ៉ាក់និងស៊ីរី។
ភាពតានតឹងបានរាលដាលដល់ប្រទេសតួកគី ប្រឈមមុខនឹងការបាត់បង់ក្រុងកូបាណេ បណ្តាជនគួដនៅតួកគីបាននាំគ្នាបះបោរធ្វើបាតុកម្ម បរិហារភាពស្ពឹកស្រពន់របស់រដ្ឋាភិបាលតួកគីដែលមិនបញ្ចេញសកម្មភាពអ្វី បណ្តោយពួកអង្គការរដ្ឋអ៊ីស្លាមជ្រៀតចូលក្រុងកូបាណេបាន។ តែនាឱកាសចុះសួរសុខទុក្ខជនភៀសខ្លួននៅភាគខាងត្បូងប្រទេស ប្រធានាធិបតីតួកគី លោក Recep Tayyip Erdogan ដែលទើបបានទទួលការអនុញ្ញាតពីសភាឱ្យចូលធ្វើអន្តរាគមន៍ជាមួយសម្ព័ន្ធអន្តរជាតិ បានព្រមានថាក្រុងកូបាណេ អាចនឹងត្រូវធ្លាក់ក្នុងកណ្តាប់ដៃពួកជីហាត និងបានប្រកាសគួរឱ្យភ្ញាក់ផ្អើលថា ប្រតិបត្តិការផ្លូវអាកាសមិនគ្រប់គ្រាន់ទេ ត្រូវតែមានអន្តរាគមន៍ទ័ពថ្មើរជើងទៀត ទើបអាចយកឈ្នះលើចលនាជីហាតនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ