ហេតុអ្វីបានជាកម្លំាងជីហាតរបស់អង្គការរដ្ឋអ៊ីស្លាមកាន់តែឡើងឥទ្ធិពលនៅក្បែរស្រុកកូបាណេក្នុងទឹកដីស៊ីរី?
ចុះផ្សាយនៅថ្ងៃ៖
ស្តាប់ - ០៦:០០
ចំពេលដែលកម្លំាងអន្តរជាតិដឹកនំាដោយអាមេរិកកំពុងបន្តវាយប្រហារលើទីតំាងរបស់ពួកជីហាតក្នុងប្រទេសអ៊ីរ៉ាក់ និងស៊ីរី កម្លំាងរបស់ពួកជីហាតនៃអង្គការរដ្ឋអ៊ីស្លាមក៏កំពុងបន្តរុលឆ្ពោះទៅកាន់ព្រំដែនប្រទេសតួកគីគួរឲ្យព្រួយបារម្ភ។ ខណៈនេះ កម្លំាងប្រដាប់អាវុធគៀដក្នុងស្រុកកូបាណេប្រទេសស៊ីរីកំពុងប្រយុទ្ធទប់យ៉ាងវេទនាទល់នឹងឥទ្ធិពលរបស់កម្លំាងជីហាត។ ការប្រយុទ្ធគ្នាបានលាតសន្ធឹងនៅប៉ែកខាងលិច និងខាងត្បូងនៃស្រុកកូបាណេ។ ក្រុមអ្នកសង្កេតការណ៍សិទ្ធិមនុស្សក្នុងប្រទេសស៊ីរីបានបញ្ជាក់ថា សម្បីតែប្រជាជនគៀដដែលរស់ក្នុងទឹកដីតួកគីជាប់ព្រំដែននឹងស្រុកកូបាណេក្នុងប្រទេសស៊ីរីក៏កំពុងស្រឡំាងកំាងនឹងកម្លំាងខ្លំាងក្លារបស់ពួកជីហាតដែរ។
ការប្រយុទ្ធគ្នាកំពុងបន្តមានរវាងកម្លំាងជីហាតនៃអង្គការរដ្ឋអ៊ីស្លាម និងកម្លំាងប្រដាប់អាវុធគៀរក្នុងស្រុកកូបាណេ ប្រទេសស៊ីរីដែលជាប់នឹងព្រំដែនប្រទេសតួកគីប៉ែកខាងជើង។ ខណៈនេះ ពួកជីហាតបានវាយចូលកាន់កាប់តំបន់មួយចំនួននៅប៉ែកខាងត្បូង និងប៉ែកខាងលិចនៃស្រុកកូបាណេ។ តែអ្វីដែលគ្រប់គ្នាកំពុងបារម្ភពេលនេះ គឺក្លាយតែស្រុកកូបាណេទំាងមូលនឹងធ្លាក់ទៅក្នុងកណ្តាប់ដៃរបស់អង្គការរដ្ឋអ៊ីស្លាម។ គួរជម្រាបជូនថា តំាងពី ៣សប្តាហ៍មកហើយដែលស្រុកកូបាណេបានស្ថិតក្រោមការឡោមព័ទ្ធរបស់ពួកជីហាត។ នៅក្រោមការគំរាមកំហែងរបស់ពួកជីហាត មានប្រជាជនគៀដក្នុងស្រុកកូបាណេជិត ៩០% ពោលជិត ៣០០ ០០០នាក់បានបានរត់ភៀសខ្លួនទៅកាន់ព្រំដែនជាប់នឹងប្រទេសតួកគី ក្នុងនោះមាន ១៨០ ០០០នាក់បានចូលទៅជ្រកកោនក្នុងទឹកដីតួកគី។ អ្វីដែលគួរឲ្យកត់សម្គាល់ មានប្រជាជនគៀដ-ស៊ីរីសឹងតែគ្រប់ស្រទាប់វណ្ណៈបានផ្តើមកាន់អាវុធដើម្បីប្រយុទ្ធទល់នឹងពួកជីហាត ពោលមិនមែនមានតែកម្លំាងប្រដាប់អាវុធប៉ុណ្ណោះទេ។ ទន្ទឹមគ្នានេះ ថ្នាក់ដឹកនំាគៀដក្នុងស្រុកកូបាណេក៏បានអំពាវនាវសុំជំនួយបន្ទាន់ពីសហគមន៍អន្តរជាតិ ពិសេសជំនួយសព្វាវុធ។ នៅព្រលឹមស្រាងៗព្រឹកមិញ គេសង្កេតឃើញមានអន្តរាគមន៍ទម្លាក់គ្រាប់បែកលើទីតំាងរបស់ពួកជីហាតពីសំណាក់កម្លំាងអន្តរជាតិដឹកនំាដោយសហរដ្ឋអាមេរិក។
មូលហេតុនៃការរុលទៅមុខយ៉ាងលឿនរបស់កម្លំាងជីហាតនៅក្បែរស្រុកកូបាណេ-ស៊ីរី
មានមូលហេតុសំខាន់ពីរដែលបញ្ជាក់ពីការរុលទៅមុខយ៉ាងលឿនរបស់ពួកជីហាតនៅក្បែរស្រុកកូបាណេក្នុងទឹកដីស៊ីរី។ ទី១ គឺគម្លាតដាច់គ្នាឆ្ងាយទំាងធនធានមនុស្ស និងសម្ភារៈសឹករវាងកម្លំាងគៀដ ស៊ីរីក្នុងស្រុកកូបាណេ និងកម្លំាងជីហាតរបស់អង្គការរដ្ឋអ៊ីស្លាម។ កម្លំាងជីហាតមានបំពាក់ទៅដោយអាវុធសង្រ្គាមពេញធឹង ដូចជារថក្រោះ និងកំាភ្លើងធំធុនធ្ងន់គ្រប់ប្រភេទ ចំណែកកម្លំាងគៀដ ស៊ីរីវិញ មានបំពាក់តែអាវុធតូចតាចកំប៉ិកកំប៉ុកប៉ុណ្ណោះ។ មួយវិញទៀត ពួកជីហាតក៏សុទ្ធសឹងជាយុទ្ធជនជ្រុលនិយម និងមានមនោគមន៍វិជ្ជាដាច់ខាត។ មូលហេតុទី២ គឺមកពីកង្វះជំនួយ ឬមួយក៏ការវាយប្រហារតាមផ្លូវអាកាសរបស់កម្លំាងអន្តរជាតិដឹកនំាដោយអាមេរិកនៅស្ទើរដែលមិនអាចរារំាងដំណើររុលទៅមុខរបស់កម្លំាងជីហាតទៅកាន់ស្រុកកូបាណេ។
នៅពេលនេះ កម្លំាងយុទ្ធជនគៀដ-ស៊ីរី ក៏ដូចជាកម្លំាងឧទ្ទាមស៊ីរីមិនញញើតនឹងធ្វើការទិតៀនសហគមន៍អន្តរជាតិពេញមាត់ ពិសេសសហរដ្ឋអាមេរិកដែលមិនបានជួយគំាទ្រកម្លំាងរបស់គៀដក្នុងស្រុកកូបាណេឲ្យបានពេញទំហឹងក្នុងការប្រឈមទប់នឹងពួកជីហាត។ ទន្ទឹមគ្នានេះ ពួកគេក៏បានស្តីបន្ទោសរដ្ឋបាលអាមេរិកំាងរបស់លោកប្រធានាធិបតីអូបាម៉ាពីភាពយឺតយ៉ាវក្នុងការផ្តល់អាវុធទំនើបៗឲ្យពួកគេ។ គឺភាពយឺតយ៉ាវ ឬមួយក៏ការពិចារណាវែងឆ្ងាយរបស់លោកអូបាម៉ានេះហើយដែលត្រូវបានលោកអតីតរដ្ឋមន្រ្តីការពារអាមេរិកឡេអុង ប៉ាណេតាក្នុងអាណត្តិទី១ របស់លោកអូបាម៉ាចេញមុខរិះគន់លោកអូបាម៉ាតាមរយៈសៀវភៅមួយរបស់លោកចេញផ្សាយក្នុងថ្ងៃនេះ។
យោងតាមលោកប៉ាណេតា គឺកំហុសរបស់លោកអូបាម៉ាមិនព្រមវាយប្រហារស៊ីរីកាលពីឆ្នំាទៅមិញនោះឯងដែលជាដើមចមនៃការលេចរូបរាងអង្គការរដ្ឋអ៊ីស្លាមដ៏សាហាវពេលនេះ និងដែលបានធ្វើឲ្យសហគមន៍អន្តរជាតិលែងជឿទុកចិត្តអាមេរិកមកដល់សព្វថ្ងៃ។ សម្រាប់លោកប៉ាណេតា បើអាមេរិកវ៉ៃស៊ីរីតំាងពីមុននោះ ម្ល៉េះពិភពលោកមិនធ្លាក់ក្នុងស្ថានការណ៍ដូចថ្ងៃនេះទេ។ លោកអតីតរដ្ឋមន្រ្តីការពារជាតិអាមេរិករូបនេះដដែលបានប្រមើលមើលថា សង្រ្គាមប្រឆំាងពួកជីហាតនៅអ៊ីរ៉ាក់ និងស៊ីរីពេលនេះ ជាសង្រ្គាមដែលនឹងត្រូវអូសបន្លាយរយៈពេល ៣០ឆ្នំា។
សហគមន៍គៀដបានអំពាវនាវឲ្យមានសាមគ្គីភាពផ្ទៃក្នុង
គួរជម្រាបជូនថា ប្រជាជនគៀដភាគច្រើនកំពុងរស់នៅរប៉ាត់រប៉ាយក្នុងប្រទេសចំនួន ៤ គឺតួកគី ស៊ីរី អ៊ីរ៉ាក់ និងប្រទេសអ៊ីរ៉ង់។ នេះដោយមិនរាប់បញ្ចូលពីចំនួនជនភៀសខ្លួនគៀដតិចតួចនៅក្នុងប្រទេសផ្សេងៗទេ។ នៅពេលនេះ ការអំពាវនាវឲ្យមានសាមគ្គីភាពរវាងប្រជាជនគៀដត្រូវបានធ្វើឡើងដោយគណបក្សគំាទ្រគៀដក្នុងប្រទេសតួកគី។ ជាលទ្ធផល មានការប្រមូលផ្តុំគ្នានៅតាមតំបន់ផ្សេងៗក្នុងទីក្រុងអ៊ីស្តង់ប៊ូលដើម្បីជួយគំាទ្របុព្វហេតុរបស់ប្រជាជនគៀដ។ ការគំាទ្រស្រដៀងគ្នានេះក៏មាននៅក្នុងប្រទេសអឺរ៉ុប មានបារំាង អាល្លឺម៉ង់ បែលហ្ស៊ិក ឬមួយក៏ប្រទេសហូឡង់។ ចំណែកលោកអគ្គលេខាធិការអង្គការសហប្រជាជាតិបាន គីមូនក៏បានអំពាវនាវឲ្យមានជំនួយជាបន្ទាន់មួយដើម្បីបញ្ចៀសទង្វើសម្លាប់រង្គាលលើប្រជាជនគៀដនៅស្រុកកូបាណេដោយពួកជីហាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ