វិបត្តិអ៊ុយក្រែនធ្វើឲ្យជំនួបកំពូលសហភាពអឺរ៉ុប និងរុស្ស៊ីបើកធ្វើឡើងនៅក្នុងបរិយាកាសដ៏អាប់អួរ
ចុះផ្សាយនៅថ្ងៃ៖
ស្តាប់ - ០៥:០៧
នៅថ្ងៃអង្គារទី ២៨ មករានេះ ជំនួបកំពូលសហភាពអឺរ៉ុប និងរុស្ស៊ី បានបើកធ្វើឡើង នៅទីក្រុងព្រុចស៊ែល ប្រទេសបែលហ្សិក។ នៅក្នុងជំនួបកំពូល ថ្នាក់ដឹកនាំ កំពូលៗរបស់សហភាពអឺរ៉ុប ដូចជា លោកអ៊ែរម៉ាន់ វ៉ាន់រុមពុយ ប្រធានក្រុមប្រឹក្សាអឺរ៉ុប ជាដើម បានជួបពិភាក្សា ជាមួយលោកប្រធានាធិបតីរុស្ស៊ី វ្លាឌីមៀរ ពូទីន។ ជំនួបកំពូលអឺរ៉ុប និងរុស្ស៊ីត្រូវបានកាត់បន្ថយពីពីរថ្ងៃ មកមួយថ្ងៃ ទៅតាមការទាមទាររបស់ទីក្រុងព្រុយស៊ែល ត្រូវប្រឈមនឹងភាពតានតឹង ដោយសារវិបត្តិនយោបាយ នៅអ៊ុយក្រែន។
ភាគីម្ខាងៗ សហភាពអឺរ៉ុប និងរុស្ស៊ី បានចោទ ចង្អុលដាក់គ្នា ថាបានលូកដៃ ក្នុងកិច្ចការនយោបាយផ្ទៃក្នុងរបស់ប្រទេសអ៊ុយក្រែន រហូតធ្វើឲ្យមានបាតុកម្មហិង្សា សម្លាប់មនុស្សនៅអ៊ុយក្រែន។ សម្រាប់ម៉ូស្គូ សហភាពអឺរ៉ុបជាប្រភពដើមបង្កឲ្យមានអស្ថិរភាពនយោបាយនៅអ៊ុយក្រែន ជា អ្នកអុជអាលឲ្យក្រុមប្រឆាំងធ្វើបាតុកម្មប្រឆាំងនឹងរដ្ឋាភិបាលស្របច្បាប់របស់លោកប្រធានាធិបតីអ៊ុយក្រែនបច្ចុប្បន្ន។ ត្រូវដឹងថា រហូតមកដល់ថ្ងៃនេះ ទីក្រុងម៉ូស្គូនៅតែបន្តគាំទ្រ គ្មានវៀចវេ លោកប្រធានាធិបតីអ៊ុយក្រែន យ៉ានូកូវិច ដែលធ្លាប់បានបែរខ្នងដាក់សហភាពអឺរ៉ុប និងត្រលប់មកចុះកិច្ចព្រមព្រៀងជាមួយរុស្ស៊ី កាលពីខែវិច្ចិកាកន្លងទៅ។
នៅភាគី សហភាពអឺរ៉ុបវិញ មេដឹកនាំនៅ អឺរ៉ុបបានសំដែងការថ្កោលទោសជាបន្តបន្ទាប់ ទៅលើការបង្រ្កាបដ៏ហិង្សារបស់អាជ្ញាធរអ៊ុយក្រែន ដែលបានសម្លាប់មនុស្ស និងធ្វើឲ្យរងរបួស នៅទីក្រុងគៀវ កាលពីសប្តាហ៍មុន។ សហភាពអឺរ៉ុបធ្លាប់បានពន្លយពាក្យថា ទីក្រុងម៉ូស្គូអាចនៅពីក្រោយក្រុមអាជ្ញាធរអ៊ុយក្រែន និងជាអ្នកញុះញង់ឲ្យអាជ្ញាធរបើកការបង្រ្កាបយ៉ាងហិង្សា ទៅលើបាតុករអ៊ុយក្រែន ដែលតាមពិតបានចុះថ្នល់ដើម្បី ទាមទារឲ្យរដ្ឋាភិបាលអ៊ុយក្រែនត្រលប់ទៅចូលរួមជាមួយសហភាពអឺរ៉ុប ប៉ុន្តែ មិនមែនរុស្ស៊ីនោះ។
តាមលោកឯកអគ្គរដ្ឋទូតរុស្ស៊ី ជំនួបនៅថ្ងៃនេះ មិនមែនជាជំនួបដែលត្រូវនិយាយពីអ៊ុយក្រែន ប៉ុន្តែ អ្នកនាំពាក្យរបស់សហភាពអឺរ៉ុបវិញ បានបញ្ជាក់ថា នៅក្នុងកិច្ចពិភាក្សាថ្ងៃនេះ គេនឹងលើកឡើងពី បញ្ហាសមាហរណកម្មនៅក្នុងតំបន់។ ដូច្នេះ វាប្រាកដណាស់ថា កិច្ចពិភាក្សា នឹងត្រូវនិយាយដោយចៀសមិនផុតពីវិបត្តិនយោបាយ នៅ អ៊ុយក្រែន ហើយភាគីចូលរួម ពោលគឺរុស្ស៊ី និងសហភាពអឺរ៉ុប ត្រូវធ្វើសារមួយ នៅក្រោយជំនួបកំពូល ដើម្បី បញ្ជាក់ជំហររបស់ខ្លួន ទៅលើវិបត្តិដែលកំពុងកើតមាននៅ អ៊ុយក្រែន។
បញ្ហាជាន់លើបញ្ហា
ទំនាក់ទំនងល្អក់កកររវាងសហភាពអឺរ៉ុប និងរុស្ស៊ីកើតមានតាំងពីយូរណាស់មកហើយ គឺតាំងពីមុនមានផ្ទុះវិបត្តិនៅ អ៊ុយក្រែនទៅទៀត។ រហូតមក ភាគីទាំងពីរអាចនិយាយគ្នាតែពីសំណុំរឿងបរទេស ដូចជាវិបត្តិនៅស៊ីរី ឬនុយក្លេអ៊ែររបស់អ៊ីរ៉ង់ ប៉ុន្តែ បើឲ្យនិយាយពីទំនាក់ទំនងទ្វេភាគី វិញ គឺគ្មានតែម្តង។ កិច្ចចរចាស្តីពីទំនាក់ទំនងទ្វេភាគីជាយុទ្ធសាស្រ្តរវាងសហភាពអឺរ៉ុប និងរុស្ស៊ីបានកប់ស្លាប់ តាំងពីឆ្នាំ ២០០៨ម្ល៉េះ។ ភាគីទាំងពីរនៅតែមិនទាន់ទុកចិត្តគ្នា ទៅវិញ ទៅមក និងធ្លាប់ថ្នាំងថ្នាក់ នឹងគ្នា ទៅលើសំណុំរឿងជាច្រើន ដូចជាសហភាពអឺរ៉ុបរិះគន់រនាំងពន្ធគយរបស់រុស្ស៊ី ទៅលើទំនិញនាំចូលពី អឺរ៉ុប។ សហភាពអឺរ៉ុប ធ្លាប់បានគំរាមប្តឹងរុស្ស៊ី ទៅអង្គការពាណិជ្ជកម្មពិភពលោក។ ចំណែកភាគីរុស្ស៊ីវិញ នៅតែបន្ទោសសហភាព អឺរ៉ុបថា គ្មានចេតនាចង់ពន្លឿនកិច្ចចរចាស្តីពីការលុបចោលទិដ្ឋាការរបស់ពលរដ្ឋរុស្ស៊ី ដែលចង់ចូលមកក្នុងសហភាពអឺរ៉ុប។
នៅក្នុងពេលទំនាក់ទំនងរវាងសហភាពអឺរ៉ុប និងរុស្ស៊ីកំពុងចុះល្អក់កករ បញ្ហាអ៊ុយក្រែនបានចូលមកបន្ថែម ធ្វើឲ្យរុស្ស៊ី និង មើលមុខគ្នាមិនសូវចំ។ ត្រូវដឹងថា សហភាពអឺរ៉ុបមិនសប្បាយចិត្តទេ រុស្ស៊ីអូសទាញ អ៊ុយក្រែន រហូតធ្វើឲ្យអ៊ុយក្រែនផ្អាកលែងចុះហត្ថលេខាលើកិច្ចព្រមព្រៀងបង្កើតដៃគូយុទ្ធសាស្រ្តជាមួយសហភាពអឺរ៉ុប។ កាលណោះ រុស្ស៊ីបានសន្យាផ្តល់ប្រាក់កម្ចីប្រមាណ ១៥ ពាន់លានដុល្លារ ដល់អ៊ុយក្រែន និងយល់ព្រមកាត់បន្ថយយ៉ាងច្រើនលើតម្លៃឧស្ម័នដែលអ៊ុយក្រែនត្រូវទិញពីរុស្ស៊ី។
ត្រូវដឹងថា សហភាពអឺរ៉ុបចង់ធ្វើកិច្ចព្រមព្រៀងជាមួយអ៊ុយក្រែន ព្រោះវា ជាផ្នែកមួយ នៃយុទ្ធសាស្រ្តរបស់សហភាពអឺរ៉ុប ដែលចង់បង្កើតភាពជាដៃគូទាំងខាងនយោបាយ និងពាណិជ្ជកម្ម ជាមួយប្រទេសនៅអឺរ៉ុបខាងកើត រួមមាន អ៊ុយក្រែន ម៉ុលដាវី ហ្សកហ្ស៊ី អាមេនី អាស៊ែបៃហ្សង់ និងបេឡារុស ដែលភាគច្រើនជាប្រទេសធ្លាប់ស្ថិតក្រោមអតីតសហភាពសូវៀត។
តាំងពីមុនជំនួបបើកនៅថ្ងៃនេះ សហភាពអឺរ៉ុបធ្លាប់អះអាងថា ចង់ឲ្យរុស្ស៊ីបកស្រាយ ពីសហភាពពន្ធគយ ដែលរុស្ស៊ីបានបង្កើតឡើង ដែលបើតាមសហភាពអឺរ៉ុប គឺរុស្ស៊ីមានមហិច្ឆតាចង់ត្រលប់ទៅរកសហភាពសូវៀត គឺចង់ប្រមូលអតីតរដ្ឋក្នុងសហភាពសូវៀត ឲ្យត្រលប់មករួមគ្នា នៅក្រោមឥទ្ធិពលដឹកនាំរបស់រុស្ស៊ី ជាថ្មីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ