ចលនាតវ៉ារាលដាលនៅអ៊ុយក្រែន ប្រធានាធិបតីប្រកាសរុះរើរដ្ឋាភិបាលនិងធ្វើវិសោធនកម្មច្បាប់ថ្មី
ចលនាបាតុកម្មប្រឆាំងរដ្ឋាភិបាល នៅអ៊ុយក្រែន មិនបានថមថយចុះនោះទេ។ បាតុកម្ម បានរាលដាលដល់តំបន់ជាច្រើននៅភាគខាងលិចប្រទេស បង្កសម្ពាធដល់រដ្ឋាភិបាល។ ប្រធានាធិបតីវ៉ិចទ័រ យ៉ានូកូវិច បានបន្ទន់ជំហរ ដោយបានប្រកាសរុះរើរដ្ឋាភិបាល និងធ្វើវិសោធនកម្មច្បាប់ថ្មី ដើម្បីបន្ថយភាពតានតឹងជាមួយក្រុមប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ចលនាតវ៉ាប្រឆាំងរដ្ឋាភិបាល នៅអ៊ុយក្រែន បានរាលដាលដល់តំបន់ចំនួន៦ នៅភាគខាងលិចប្រទេស។ នៅទីនោះ បាតុករបានចូលកាន់កាប់អគាររដ្ឋបាលជាច្រើនកន្លែង។
នៅក្រុងខៀវ ថ្ងៃសុក្រម្សិលមិញ ក្រុមបាតុករនិងប៉ូលិសបានបញ្ចេញភាពតានតឹងដាក់គ្នា នៅទីកន្លែងដែលប៉ូលិសបានប្រើហិង្សាបង្ក្រាបបាតុកម្ម ធ្វើអោយមានមនុស្សស្លាប់៥នាក់ និងរបួសច្រើននាក់ កាលពីថ្ងៃពុធនោះ។
ដោយសារតែសម្ពាធរបស់ចលនាបាតុកម្ម និងសម្ពាធពីបណ្តាប្រទេសអឺរ៉ុបជាច្រើននោះ ប្រធានាធិបតីវ៉ិចទ័រ យ៉ានូកូវិច បានប្រកាសថា នៅសម័យប្រជុំសភា ថ្ងៃអង្គារ២៨មករានេះ នឹងរុះរើរដ្ឋាភិបាល ដោះលែងសកម្មជនបាតុកម្មដែលបានចាប់ខ្លួន ហើយក៏នឹងធ្វើវិសោធនកម្មច្បាប់ចែងប្រឆាំងសកម្មភាពតវ៉ា ដែលបានអនុម័តកាលពីសប្តាហ៍មុនផងដែរ។
ច្បាប់ប្រឆាំងសកម្មភាពតវ៉ានេះ មានទិសដៅពង្រឹងទណ្ឌកម្មប្រឆាំងបាតុករ រហូតដាក់អោយបាតុករអោយជាប់ពន្ធនាគារទៀតផង។ គួរបញ្ជាក់ឡើងវិញថា សកម្មភាពបាតុកម្មប្រឆាំងរដ្ឋាភិបាល បានកើតឡើង កាលពីខែវិច្ឆិកាឆ្នាំមុន ដំបូងឡើយ គឺដោយសារតែ រដ្ឋាភិបាលអ៊ុយក្រែន ស្ថិតក្រោមសម្ពាធរបស់រុស្ស៊ី បានផ្អាកការចុះហត្ថលេខាបង្កើតដៃគូយុទ្ធសាស្ត្រជាមួយសហភាពអឺរ៉ុប។ សប្តាហ៍មុន ក្រោយពេលអ៊ុយក្រែនបានអនុម័តច្បាប់ប្រឆាំងសកម្មភាពតវ៉ាមក បាតុករប្រឆាំងរដ្ឋាភិបាល បានធ្វើបាតុកម្មកាន់តែខ្លាំង។
ថ្វីបើប្រធានាធិបតីអ៊ុយក្រែនប្រកាសបន្ទន់ជំហរ ដោយប្រកាសរុះរើរដ្ឋាភិបាល និងធ្វើវិសោធនកម្មបែបនេះក្តី ក្រុមបាតុករនៅតែមិនទុកចិត្ត ហើយនៅតែបន្តការតវ៉ាដដែល។
ការប្រកាសរុះរើរដ្ឋាភិបាល និងធ្វើវិសោធនកម្មច្បាប់ប្រឆាំងបាតុកម្ម គឺជាការព្រមានដល់ក្រុមប្រឆាំងផងដែរ ព្រោះថា បើរដ្ឋាភិបាលមិនអាចរកឃើញកិច្ចព្រមព្រៀងជាមួយបក្សប្រឆាំងទេ រដ្ឋាភិបាលនឹងប្រើគ្រប់មធ្យបាយស្របតាមច្បាប់ ដើម្បីដោះស្រាយបញ្ហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ