សភាបារាំងអនុម័តច្បាប់ជំរុញអោយបុរសជាឳពុកសម្រាកពីការងារដើម្បីជួយមើលកូន
ចុះផ្សាយនៅថ្ងៃ៖
ស្តាប់ - ០៥:៤៥
នៅថ្ងៃចន្ទម្សិលមិញ សភាបារាំងបានសិក្សាលើគម្រោងច្បាប់ស្តីពីសមភាពរវាងស្ត្រីនិងបុរស ដែលព្រឹទ្ធសភាបានអនុម័ត កាលពីខែកញ្ញា ឆ្នាំ២០១៣។ អ្នកតំណាងរាស្រ្តបារាំងបាននាំគ្នាបោះឆ្នោតលើកំណែទម្រង់ស្តីពីពេលវេលាឈប់សម្រាកពីការងាររបស់ឳពុកម្តាយ ពេលដែលកូនខ្លួនប្រសូតមក។ សភាបារាំងចង់ជំរុញអោយឳពុកកាន់តែច្រើន បានឈប់សម្រាកពីការងារ ដើម្បីមើលថែកូនដែលកើតមកនោះ។
គម្រោងច្បាប់សមភាពរវាងបុរសនិងស្ត្រី-ពេលវេលាឈប់សម្រាករបស់ឳពុកម្តាយ នៅបារាំង ពេលកូនចាប់កំណើតក្នុងគ្រួសារ
ជាទូទៅ នៅប្រទេសបារាំង ពេលក្រុមគ្រួសារមួយ មានកូនកើតមក បើសិនជាកូនដំបូង រឺយើងអាចថា បើគ្រួសារនោះមានកូនតែម្នាក់ នោះឳពុកម្តាយ មានសិទ្ធិឈប់សម្រាក មិនធ្វើការងារ រយៈពេល៦ខែ។ នៅយប់ថ្ងៃចន្ទ អ្នកតំណាងរាស្ត្របារាំងបានបោះឆ្នោត អនុញ្ញាតអោយឳពុកម្តាយ មានពេលឈប់សម្រាក៦ខែថែមទៀត ដូច្នេះ ពួកគេអាចឈប់សម្រាកពីការងារបានមួយឆ្នាំ បើសិនពួកគេមានកូនដំបូង។ ប៉ុន្តែ ពេលវេលាមួយឆ្នាំសម្រាកពីការងារដើម្បីមើលថែកូននេះ គឺម៉ែនិងឳនោះ ត្រូវចែករំលែកជាមួយគ្នា ពោលគឺម្នាក់អាចឈប់បាន៦ខែប៉ុណ្ណោះ។ ពេលវេលានេះ គឺគិតក្នុងពេលកូនកើតរហូតដល់អាយុបាន៣ឆ្នាំ។
ហើយបើសិនជាគ្រួសារមួយ មានកូនចាប់ពី២នាក់ឡើងទៅ ពួកគេអាចឈប់សម្រាកពីការងារ បាន៣ឆ្នាំ។ ប៉ុន្តែ គឺចែកគ្នាថា បើម្នាក់យកពេល២ឆ្នាំកន្លះ ម្នាក់ទៀតអាចយកបានត្រឹម៦ខែប៉ុណ្ណោះ។ បើឳពុកនៅតែសម្រេចថា ខ្លួននៅតែទៅធ្វើការ ហើយទុកពេលអោយប្រពន្ធនៅផ្ទះមើលកូន នោះប្រពន្ធនោះមានសិទ្ធិឈប់ត្រឹមពីរឆ្នាំកន្លះប៉ុណ្ណោះ។
ក្នុងកំណែទម្រង់ផ្តល់ពេលវេលាច្រើន ឈប់សម្រាកពីការងារ ដើម្បីមើលថែទាំកូននេះ សភាបារាំងចង់ជំរុញអោយឳពុកកាន់តែច្រើន បានឈប់សម្រាក មើលថែទាំបីបាច់កូន ដូចជាម្តាយផងដែរ ព្រោះថា ជាទូទៅ ពេលមានកូនកើត អ្នកដែលឈប់ធ្វើការដើម្បីមើលកូននោះ ច្រើនជាម្តាយទៅវិញទេ។ បុរសជាឳពុកគេនោះកម្រឈប់ណាស់ គឺត្រូវធ្វើការលំបាកចិញ្ចឹមគ្រួសារ។ បើស្ត្រីមានអាទិភាពមើលថែកូនចៅ បុរសក៏មានសិទ្ធិដូចគ្នាដែរ។
បច្ចុប្បន្ននេះ មានឳពុកម្តាយ៥សែន៤ម៉ឺននាក់នៅបារាំង ដែលឈប់សម្រាកពីការងារ ដើម្បីថែទាំកូនកើតមកនោះ ក្នុងនោះមានបុរសជាឳពុកត្រឹមតែ១ម៉ឺន៨ពាន់នាក់ ប៉ុណ្ណោះដែលយកពេលឈប់នៅផ្ទះមើលកូន។ រដ្ឋាភិបាលបារាំងមានទិសដៅ សម្រេចអោយបាននូវតួលេខឳពុក១សែននាក់ ឈប់សម្រាកការងារពេលកូនកើតមក នៅឆ្នាំ២០១៧ខាងមុខ។
ក្នុងរយៈពេលឈប់សម្រាកនេះ ឳពុកម្តាយទាំងនោះមិនបានទទួលប្រាក់កំរៃនោះទេ។ ដោយឡែក ប្រាក់បំណាច់ដែលរដ្ឋបារាំងផ្តល់អោយដល់ឳពុកម្តាយ ក្នុងមួយខែ ចន្លោះពី៣២៩អឺរ៉ូ ទៅ៥៧៣អឺរ៉ូ ប្រាក់នោះត្រូវគេដាក់ឈ្មោះអោយថ្មីថា ជា ប្រាក់ចែកគ្នាក្នុងការស្វាគមន៍បុត្រធីតា។
កំណែទម្រង់នេះ នឹងត្រូវអនុវត្តសម្រាប់ឳពុកម្តាយណាដែលមានកូនប្រសូត្រមក ក្នុងខែកក្កដា ឆ្នាំ២០១៤ រឺក៏សម្រាប់អ្នកយកកូនមកចិញ្ចឹមបីបាច់ ចាប់ពីខែកក្កដា ឆ្នាំ២០១៤ដូចគ្នាដែរ។
ក្រៅពីសមភាពបុរស-ស្ត្រី ក្នុងការបីបាច់ថែទាំកូននោះ គំរោងច្បាប់ស្តីពីសមភាពបុរសស្ត្រីនេះ ក៏ផ្តោតលើចំណុចសំខាន់ផ្សេងៗទៀតផងដែរ ដូចជា ការធានាផ្តល់ប្រាក់សោធនផ្នែកចំណីអាហារ ជួយដល់ស្ត្រីដែលចិញ្ចឹមកូនតែម្នាក់ឯង។ ការការពារស្ត្រី រឺក៏បុរសពីអំពើហិង្សា វាយតប់ ក្នុងគ្រួសារ។ ការដាក់ពិន័យសហគ្រាសដែលមិនផ្តល់សិទ្ធិសើ្មគ្នាដល់បុរសនិងស្ត្រី មិនអោយសហគ្រាសនោះបានចូលក្នុងទីផ្សាររដ្ឋ។ ហើយក៏មានការការពាររូបភាពសង្គមផ្សេងៗ ដូចជាការហាមឃាត់មិនអោយមានការប្រកួតសម្រស់កុមារីអាយុក្រោម១៣ឆ្នាំជាដើម។
សភាបារាំងចង់អោយមានការអនុវត្តន៍ជាក់ស្តែងលើគោលការណ៍សមភាពបុរស-ស្ត្រីនេះ ពោលគឺមិនមែនមានចែងត្រឹមតែក្នុងក្រដាសនោះទេ។ ការដែលបុរសជាឳពុកបានឈប់សម្រាកនៅផ្ទះ នោះអាចជួយអោយស្ត្រីជាម្តាយ បញ្ចេញសមត្ថភាពការងារក្នុងសហគ្រាស ក្នុងសង្គម ក្នុងផ្នែកប្រឹក្សារដ្ឋបាលនានា បានរស់រវើកដូចជាបុរសគ្រប់រូបផងដែរ។ គម្រោងច្បាប់នេះគឺស្របតាមពាក្យចំនួន៣ ក្នុងបាវចនាបារាំង គឺ៖ សេរីភាព ភាពស្មើគ្នា និងភាពជាបងប្អូនគ្នាជួយគ្នាទៅវិញទៅមក។ បារាំងជាប្រទេសគំរូដោយសារតែពាក្យស្លោកទាំង៣នេះឯង។
បក្សសង្គមនិយមស្នើវិសោធនកម្មច្បាប់ស្តីពីការរម្លូតកូន ធ្វើអោយមនុស្សជិត២ម៉ឺននាក់ធ្វើបាតុកម្ម នៅទីក្រុងប៉ារីស ថ្ងៃអាទិត្យ១៩មករា
បាតុករទាំងអស់នោះ ចង់អោយបារាំងយកគំរូតាមប្រទេសអេស្ប៉ាញ ដែលបានបំបិទមិនអោយមានការរម្លូតកូនក្នុងស្រុក។ យប់ថ្ងៃចន្ទម្សិលមិញ សភាបារាំងបានបញ្ចប់ការជជែកគ្នាលើគម្រោងច្បាប់សមភាពបុរស-ស្ត្រី ត្រឹមមាត្រាទី៥ មានខ្លឹមសារទាក់ទងការរម្លូតកូន។ បារាំងមានច្បាប់មួយ ចេញប្រើនៅឆ្នាំ១៩៧៥ អនុញ្ញាតអោយស្ត្រីធ្វើការរម្លូតកូន ជាច្បាប់របស់ស្ត្រីរដ្ឋមន្ត្រី មួយរូប គឺលោកស្រី ស៊ីមន វៃ។ ច្បាប់នោះចែងថា ប្រសិនបើស្ត្រីកំពុងមានផ្ទៃពោះ មានបញ្ហាបែបយ៉ាងបញ្ហាសុខភាព រឺក៏រងនូវការរំលោភផ្លូវភេទ ស្ត្រីនោះអាចរម្លូតកូនបាន។
គណបក្សសង្គមនិយមកំពុងកាន់អំណាចសព្វថ្ងៃ បានស្នើវិសោធនកម្មលើច្បាប់រម្លូតកូននេះ ជាថ្មី។ បក្សកាន់អំណាចបារាំងចង់អោយច្បាប់នេះចែងលើសពីនេះទៀតថា ស្ត្រីម្នាក់អាចរម្លូតកូនបាន ប្រសិនបើស្ត្រីនោះចង់។ រដ្ឋមន្ត្រីទទួលបន្ទុកសិទ្ធិស្ត្រី លោកស្រីណាចាត វ៉ាឡូ បេលកាសេម បានលើកឡើងថា ក្នុងច្បាប់ស្តីពីការរម្លូតកូនឆ្នាំ១៩៧៥នោះ ការដែលតំរូវអោយស្ត្រីបង្ហាញថា ខ្លួនកំពុងមានបញ្ហា មិនអាចទុកកូនក្នុងពោះបានទៀតនោះ គឺជាភាពហួសសម័យហើយ។ បក្សកាន់អំណាច ចង់ផ្តល់សិទ្ធពេញលេញដល់ស្ត្រីតែម្តង ក្នុងការសម្រេចចិត្តអ្វីមួយ។
គំរោងវិសោធនកម្មរបស់បក្សកាន់អំណាចបានបង្កភាពចម្រូងចម្រាស នៅសភា។ បក្សស្តាំនិយម រណសិរ្សជាតិ បានលើកឡើងថា វិសោធនកម្មនេះ អាចធ្វើអោយការរម្លូតកូន ក្លាយជាទង្វើសាមញ្ញក្នុងសង្គម។ រីឯបក្សស្តាំនិយម UMP ដែលចាញ់ឆ្នោត កាលពីឆ្នាំ២០១២នោះ បានសំដែងជំហរប្រុងប្រយ័ត្នចំពោះការជជែកលើច្បាប់នេះ ឡើងវិញ។
នៅថ្ងៃអង្គារនេះ សភាបារាំងនឹងបន្តការជជែកគ្នាលើខ្លឹមសារទាក់ទងនឹងការរម្លូតកូននេះ បន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ