នៅប្រទេសបារាំង ដើមខែមករានេះ រឿងរ៉ាវស្នេហាលួចលាក់រវាងប្រធានាធិបតីហ្វ្រង់ស៊័រ ហូឡង់ និងតារាកំប្លែង Julie Gayet ហ្ស៊ុយលី ហ្កៃយេត បានធ្វើអោយមានការចោទសួរជុំវិញលក្ខន្តិកៈរបស់ជំទាវទី១ នៅបារាំង ពិសេសគឺលោកស្រី Valérie Trierweiler វ៉ាឡេរី ទ្រីយាលវេលឡឺ ដែលជាគូជីវិតផ្លូវការរបស់ប្រធានាធិបតីបារាំងតែម្តង ព្រោះថា លោកស្រីវ៉ាឡេរី មិនបានរៀបការជាមួយលោកហូឡង់នោះឡើយ។ គួររំលឹកថា ក្នុងប្រវត្តិសាស្ត្របារាំង មានតែលោក ល្វី ណាប៉ូឡេអុង បូណាប៉ាក់ និងលោកហ្វ្រង់ស៊័រ ហូឡង់ ប៉ុណ្ណោះ ដែលមិនបានរៀបការ ក្នុងពេលកាន់កាប់តំណែងប្រធានាធិបតី។
នៅប្រទេសបារាំង សប្តាហ៍នេះ រឿងរ៉ាវអាស្រូវស្នេហាលួចលាក់រវាងប្រធានាធិបតីបារាំង ហ្វ្រង់ស៊័រ ហូឡង់ និងតារាកំប្លែង ហ្ស៊ុយលី ហ្កៃយេត អាចជាមូលហេតុនាំអោយលោកស្រី Valérie Trierweiler វ៉ាឡេរី ទ្រីយាលវេលឡឺ ដែលជាគូជីវិតផ្លូវការប្រធានាធិបតីបារាំង ចូល សម្រាកក្នុងមន្ទីរពេទ្យ។ ការផ្ទុះរឿងរ៉ាវស្នេហាលួចលាក់នេះ បានធ្វើអោយអ្នកនយោបាយមួយចំនួន ចោទសំណួរជុំវិញលក្ខន្តិកៈរបស់ជំទាវទី១នៅបារាំង ពិសេសលក្ខន្តិកៈលោកស្រី វ៉ាឡេរី តែម្តង ព្រោះថា គូស្នេហាប្រធានាធិបតីបារាំងអាណត្តិនេះ មានលក្ខណៈពិសេសខុសពីប្រធានាធិបតីដទៃទៀត ពោលគឺថា លោកហ្វ្រង់ស៊័រ ហូឡង់ មិនដែលបានរៀបការនោះទេ។
មុនក្លាយជាប្រធានាធិបតីបារាំង ក្នុងឆ្នាំ២០១២ លោកហូឡង់មានកូន៤នាក់ ជាមួយអតីតគូកំណាន់របស់លោក គឺលោកស្រី សេហ្កូឡែន រយយ៉ាល់។ ប៉ុន្តែ អ្នកទាំង២បានចែកផ្លូវគ្នា ក្នុងឆ្នាំ២០០៧។ នៅឆ្នាំ២០១០ លោកហូឡង់ បានបង្ហាញដល់សាធារណជនជាផ្លូវការថា គូប្រចាំជីវិតថ្មីរបស់លោក គឺលោកស្រី វ៉ាឡេរី ទ្រីយាលវេលឡឺ។ គឺជាមួយលោកស្រីទ្រីយាលវេលឡឺនេះហើយ ដែលលោកហូឡង់ បានចាប់ដៃ ចូលកាន់តំណែងជាប្រធានាធិបតីបារាំងជាផ្លូវការ កាលពីឆ្នាំ២០១២។
កាលពីយប់ថ្ងៃអង្គារ ក្នុងសន្និសីទសារព័ត៌មាន លោកហ្វ្រង់ស៊័រ ហូឡង់ មិនបានឆ្លើយតបទៅអ្នកសារព័ត៌មានដែលបានចោទសួរលោកថា តើលោកស្រីវ៉ាឡេរី នៅតែជាជំទាវទី១នៅបារាំងរឺក៏យ៉ាងណានោះឡើយ។ លោកហូឡង់ គ្រាន់តែប្រាប់ថា ពេលនេះ ជីវិតឯកជនរបស់លោក និងលោកស្រីវ៉ាឡេរី កំពុងឆ្លងកាត់ពេលវេលាដ៏លំបាកមួយ។ ប្រធានាធីបតីបារាំងសន្យាថា នឹងបំភ្លឺរឿងផ្ទាល់ខ្លួនលោក នៅមុនថ្ងៃ១១កុម្ភៈខាងមុខនេះ មុនពេលលោកទៅបំពេញទស្សនកិច្ចនៅអាមេរិក។
ការជជែកវែកញែក ជុំវិញលក្ខន្តិកៈជំទាវទី១បារាំង បានចោទជាសំណួរឡើង ក៏ព្រោះតែលោកស្រីវ៉ាឡេរី មិនបានរៀបការ ធ្វើជាភរិយារបស់លោកហូឡង់នេះឯង។ នៅបារាំងពាក្យថា ជំទាវទី១ ត្រូវបានសារព័ត៌មានអោយនិយមន័យថា ជាភរិយា រឺក៏ជាគូជីវិតរបស់ប្រធានាធិបតីបារាំង។ អស់ច្រើនទសវត្សកន្លងមក ធ្លាប់មានគេដាក់ឈ្មោះអោយជំទាវទី១ថា លោកស្រីប្រធានាធិបតី គឺជាពាក្យសំដៅលើភរិយា រឺក៏គូប្រចាំជីវិតរបស់ប្រធានាធិបតីនោះហើយ។ ដោយឡែក ក្រៅពីពិធីសារ នៅបារាំង គ្មានច្បាប់ណាមួយបានចែងពីលក្ខន្តិកៈជំទាវទី១នេះ អោយបានពិតប្រាកដផ្លូវការនោះទេ។ ក្នុងមុខរបរការងារ ពាក្យថា ជំទាវទី១នេះ គ្មានចែងក្នុងច្បាប់នោះឡើយ ហើយច្បាប់បារាំងក៏មិនផ្តល់អាទិភាពអ្វីដល់ជំទាវទី១នោះដែរ។
ឆ្លងកាត់ច្រើនទស្សវត្ស ច្រើនឆ្នាំមក តួនាទីជំទាវទី១នៅបារាំងបានខិតខំលេចចេញមុខមាត់ គួរអោយចាប់អារម្មណ៍។ ដំបូងឡើយ ភរិយា រឺក៏គូជីវិតប្រធានាធិបតី បានចេញមុខមាត់ជាសាធារណៈ តាមរយៈកម្មវិធីផ្សេងៗ ដូចជាកម្មវិធីមនុស្សធម៌ រឺដំណើរទស្សនកិច្ច ទាំងក្នុងនិងក្រៅប្រទេស។ អ្វីដែលគួរអោយកត់សម្គាល់ដែរនោះគឺថា ភរិយា ប្រធានាធិបតីមួយចំនួន ធ្លាប់បានប្រឡូកក្នុងឆាកនយោបាយរួចមកហើយដែរ។ ជាក់ស្តៃង លោកស្រីអាន អៃមន ជាភរិយារបស់អតីតប្រធានាធិបតី វ៉ាឡេរី ហ្ស៊ិសស្កា ដេស្តាំង ធ្លាប់បានធ្វើជាអ្នកប្រឹក្សាក្រុងមួយ នៅភាគកណ្តាលប្រទេស។ ហើយលោកស្រីប៊ែរណាដែត ជាភរិយារបស់អតីតប្រធានាធិបតី ហ្សាក់ ស្ហ៊ីរ៉ាក់ ក៏ជាអ្នកប្រឹក្សាទូទៅនៅតំបន់ កររ៉ែហ្ស Corrèze ភាគខាងត្បូងបារាំងផងដែរ។ ប៉ុន្មានឆ្នាំចុងក្រោយនេះ ទំព័រអ៊ីនថឺនេតបានចាប់ផ្តើមបង្ហាញពីសកម្មភាពផ្សេងៗរបស់ភរិយាប្រធានាធិបតីបារាំង។ នៅឆ្នាំ២០១០ ទំព័រអ៊ីនថឺនេតប្រធានាធិបតី បានចុះផ្សាយពីកម្មវិធីប្រចាំថ្ងៃផ្សេងៗរបស់ភរិយាប្រធានាធិបតី។ ក្នុងខៃកញ្ញា កន្លងមក ជំទាវទី១ក៏មានវត្តមានក្នុងទំព័រទ្វីតថឺ ផងដែរ។
ថ្វីបើជំទាវទី១បារាំង គ្មានលក្ខន្តិកៈអ្វីពិសេសតាមផ្លូវច្បាប់ក្តី ប៉ុន្តែ តួនាទីជំទាវទី១ស្តែងចេញពីរបៀបរបបភរិយាបារាំង ក្នុងសង្គម តាំងតែពីដើមរៀងមក។ នៅវិមានប្រធានាធិបតីអេលីហ្សេ ទោះរៀបការរឺមិនរៀបការជាមួយប្រធានាធិបតីក៏ដោយ ក៏ជំទាវទី១ជាអ្នកសំរេចថា តើខ្លួនត្រូវធ្វើសកម្មភាពអ្វី ក្នុងពេលដែលប្រធានាធិបតីកំពុងកាន់កាប់ប្រទេស។ ជំទាវទី១មិនបានទទួលប្រាក់ខែអ្វីទេ។ ប៉ុន្តែ គាត់មានខទ្ទកាល័យផ្ទាល់ខ្លួនមួយកន្លែង ក្នុងវិមានប្រធានាធិបតី មានអ្នកបំពេញការងារក្រោមបង្គាប់ ៤ទៅ៥នាក់។ វិមានប្រធានាធិបតី ទទួលបន្ទុកលើការចាយវាយរបស់ខទ្ទការល័យនេះទាំងស្រុង។ ខទ្ទកាល័យលោកស្រីវ៉ាឡេរី ទ្រីយាលវេឡឺ ដែលជាគូជីវិតរបស់ប្រធានាធិបតីហូឡង់ មួយខែៗ បានចំណាយប្រមាណជិត២ម៉ឺនអឺរ៉ូ។ អាស្រ័យហេតុនេះហើយ ទើបនៅពេលផ្ទុះរឿងស្នេហាលួចលាក់រវាងលោកហូឡង់និងតារាកំប្លែងបារាំង ការជជែកជុំវិញលក្ខន្តិកៈជំទាវទី១ បានផ្ទុះឡើងវិញផងដែរ។ មានទាំងពាក្យថាជំទាវទី២ផុសឡើងទៀតផង។ ជនមួយចំនួន មិនបានពេញចិត្តនឹងរដ្ឋាភិបាលបារាំងដែលចំណាយថវិកាឥតប្រយោជន៍ដល់សកម្មភាពជំទាវទី១ ដែលគ្មានមុខងារតាមច្បាប់នោះទេ។
ដោយសារតែលោកស្រីវ៉ាឡេរី មិនបានរៀបការជាប់ផ្លូវច្បាប់អ្វីជាមួយប្រធានាធិបតីហូឡង់ កន្លងមក មានបុរសម្នាក់បានប្តឹងថា លោកស្រីបានបន្លំថវិការរដ្ឋ ព្រោះថា រដ្ឋបារាំងបានចាយវាយលើសកម្មភាពការងារផ្សេងៗរបស់លោកស្រី។ ជនមួយចំនួនក៏ធ្លាប់លើកឡើងដែរថា ទ្រព្យសម្បត្តិរបស់លោកហូឡង់និងលោកស្រីវ៉ាឡេរី ប្រសិនបើប្រកាសដាក់រួមគ្នា អាចអោយអ្នកទាំងពីរនេះ បង់ពន្ធទ្រព្យសម្បត្តិស្របតាមច្បាប់រដ្ឋចៀសមិនរួច។ ថ្វីបើលក្ខន្តិកៈជំទាវទី១បារាំង មិនមានចែងក្នុងច្បាប់ជាផ្លូវការ ប៉ុន្តែអ្នកនយោបាយមួយចំនួនចង់អោយបារាំងលុបចោលលក្ខន្តិកៈអរូបិយនេះចេញ ព្រោះថាអ្នកកាន់កាប់ប្រទេសពិតប្រាកដ គឺប្រធានាធិបតី មិនមែនជំទាវទី១នោះទេ។ ពួកគេប្រហែលចង់សំដៅថា រដ្ឋមិនត្រូវខ្ជះខ្ជាយប្រាក់កាសចំពោះសកម្មភាពជំទាវទី១នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ