លោក ដូណាល់ ត្រាំ ថ្លែងពីការរីកចម្រើនជឿនលឿនរបស់អាមេរិក ដ៏អស្ចារ្យ មិនធ្លាប់ជួប
ចុះផ្សាយនៅថ្ងៃ៖
ស្តាប់ - ០៦:២៥
មួយថ្ងៃមុនការជំនុំជម្រះសំណុំរឿងទម្លាក់ពីតំណែងនៅព្រឹទ្ធសភា, លោក ដូណាល់ ត្រាំ ពីអង្គារទី៤កុម្ភៈ បានថ្លែងសារទៅកាន់ប្រជាជាតិ ពីការរីកចម្រើនសេដ្ឋកិច្ចនិងការជឿនលឿនរបស់អាមេរិក ដ៏អស្ចារ្យមិនធ្លាប់ជួបនៅក្រោមការដឹកនាំរបស់លោក។ ការថ្លែងសារនេះក៏ស្ថិតនៅក្នុងទម្រង់នៃការឃោសនារកសំឡេងឆ្នោតបន្ថែម ដើម្បីឈ្នះឆ្នោតកាន់អំណាចប្រធានាធិបតីជាថ្មី។ នៅចំពោះមុខសមាជិកសភា លោកដូណាល់ ត្រាំ ស្រាប់តែប្រកាសស្រេចឱ្យហើយថា លោកនឹងកាន់អំណាចបួនឆ្នាំទៀត!ទោះយ៉ាងនេះក្តី នៅក្នុងរដ្ឋសភាសហព័ន្ធនេះ គឺមានការផ្ទុះសញ្ញាណបែកបែកគ្នាជាខ្លាំង រវាងក្រុមដឹកនាំបក្សនយោបាយធំៗទាំងពីររបស់អាមេរិក។ ឧប្បត្តិហេតុនេះ កើតឡើងនៅពេលដែលលោក ដូណាល់ត្រាំ បានធ្វើព្រងើយកន្តើយ មិនព្រមទទួលការគោរពចាប់ដៃស្វាគមន៍របស់អ្នកស្រីប្រធានសភា ដែលមកពីបក្សប្រជាធិបតេយ្យ ជាបក្សប្រឆាំង ហើយជាការសងសឹកភ្លាមៗ អ្នកស្រី Nancy Pelosi ក៏បានហែកក្រដាសសុន្ទរកថារបស់លោកប្រធានាធិបតី ត្រាំ នៅចំពោះមុខ ទាំងដឹងថាកំពុងតែមានគេថតផ្សាយផ្ទាល់ទៀតផង។
តើសហរដ្ឋអាមេរិកក្រោមការដឹកនាំរបស់ ដូណាល់ ត្រាំ មានរីកចម្រើនយ៉ាងណាខ្លះទៅ?
នៅចំពោះមុខសមាជិកអង្គសភា អ្នកតំណាងរាស្ត្រ និងអ្នកនយោបាយគ្រាក់ៗរបស់អាមេរិក, លោកប្រមុខរដ្ឋអាមេរិក ដូណាល់ ត្រាំ បានថ្លែងសរសើរពីការដឹកនាំរបស់ខ្លួន ថាមានជោគជ័យនិងរីកចម្រើនខ្លាំង ទៅលើគ្រប់ទិដ្ឋភាពទាំងអស់។
ផ្នែកសេដ្ឋកិច្ច លោក ដូណាល់ ត្រាំ បានអះអាងថា បីឆ្នាំមុន លោកបានផ្តើមប្រកាសពីគោលនយោបាយសេដ្ឋកិច្ច និងការគិតគិតពីសហរដ្ឋអាមេរិកអាទិភាព។ បីឆ្នាំក្រោយ គឺការសន្យានេះបានជោគជ័យជាផ្លែផ្កា ដោយសហរដ្ឋអាមេរិកបានចុះកិច្ចព្រមព្រៀងជាមួយចិន កាណាដា និងម៉ិចស៊ិក (បើទោះបីការចុះកិច្ចព្រមព្រៀងពាណិជ្ជកម្មខ្លះ គឺចុះដោយផ្នែកៗនិងជាមួយជំហានម្តងៗក៏ដោយក្តី)។ ចំនួនការងារធ្វើ ក៏បង្កើតបានច្រើន។ ប្រាក់ខែអ្នកធ្វើការ ក៏កើនខ្ពស់ ហើយកម្រិតអត្រាភាពក្រីក្រ ក៏ថយចុះ គួរឱ្យកត់សម្គាល់។ នេះបើតាមការគូសបញ្ជាក់របស់ប្រធានាធិបតីអាមេរិក។
ផ្នែកសន្តិសុខ ក៏ប្រសើរ ដ្បិតអត្រាឧក្រិដ្ឋកម្មនិងបទល្មើសក្នុងស្រុក បានចុះថយ។ ឯវិស័យ យោធាអាមេរិកវិញ ក៏រីកចម្រើន ហើយបើតាមលោក ដូណាល់ ត្រាំ គឺជឿនលឿនខ្លាំងសម្បើមណាស់។ ចំពោះសន្តិសុខតាមព្រំដែនទៀតសោត ក៏មានសុវត្ថិភាពល្អ ព្រោះលោកបានសម្រេចសន្យាសាងសង់ជញ្ជាំងបិទខ្ទប់ កុំឲ្យក្រុមជនភៀសខ្លួនហូរចូលតាមច្រកព្រំដែនប្រទេសម៉ិចស៊ិក មកក្នុងទឹកដីអាមេរិកបាន។ នេះបើតាមសុន្ទរកថារបស់លោក ដូណាល់ ត្រាំ។
អ្នកតំណាងបក្សប្រឆាំង យល់ថា ប្រសាសន៍របស់លោក ដូណាល់ ត្រាំ សុទ្ធតែជាការកុហក។ តើហេតុអ្វី?
ចំពោះសមាជិកសភាមកពីបក្សប្រជាធិបតេយ្យ ដែលបានយល់ព្រមចូលស្តាប់នៅក្នុងអង្គសភាយប់មិញ គឺគេឃើញមួយចំនួនច្រើន មិនបានទះដៃសាទរ ឬពេលខ្លះ មិនបានក្រោកឈរស្រែកហ៊ោដូចសមាជិកសភាមកពីបក្សសាធារណរដ្ឋរបស់ ត្រាំ នោះទេ។ នេះជាការកត់សម្គាល់មួយ។
មួយទៀត គឺមានសមាជិកសភារបស់បក្សប្រឆាំងច្រើនដែរ ដែលមិនចូលស្តាប់លោក ត្រាំ នោះមានអាទិ៍ អ្នកស្រី Alexandria Ocasio-Cortez ដែលជាអ្នកតំណាងរាស្ត្រវ័យក្មេងជាងគេរបស់បក្សប្រជាធិបតេយ្យ។ បើតាមអ្នកតំណាងរាស្ត្ររូបនេះ គឺសុន្ទរកថារបស់លោក ដូណាល់ ត្រាំ គឺជាការកុហកបោកប្រាស់សុទ្ធសាធ។ ថែមពីនោះ Alexandria Ocasio-Cortez បានចាត់ទុកថា លោក ដូណាល់ ត្រាំ កំពុងតែកាន់ដំណែងដោយមិនស្របច្បាប់នោះឡើយ ព្រោះតែលោកបានរំលោភអំណាច។
ទោះយ៉ាងនេះក៏ដោយ លោកត្រាំ អះអាងថា «លោកគឺជាអ្នកនយោបាយដែលគោរពក្តីសន្យារបស់ខ្លួនណាស់»។ បើតាមការស្ទង់មតិចុងក្រោយ របស់វិទ្យាស្ថាន Gallup គឺកំពុងតែមានប្រជាប្រិយភាពខ្លាំង ដល់ទៅ៤៩ភាគរយនៃមតិដែលពលរដ្ឋស្រឡាញ់ចូលចិត្ត។ បើតាមវិទ្យាស្ថានដដែល ចំនួននេះ គឺច្រើនមិនធ្លាប់មាន សម្រាប់លោក ត្រាំ។
«ថ្នាក់ដឹកនាំនយោបាយអាមេរិក ហាក់ដូចជាបែកបាក់គ្នាខ្លាំងណាស់!»
ឧប្បត្តិហេតុនេះ ត្រូវបណ្តាញព័ត៌មានជាតិនិងអន្តរជាតិ ច្រឹបយក រូបភាពនិងវីដេអូ ទៅផ្សាយយ៉ាងសម្បើមណាស់។ ហេតុការណ៍នេះ គឺ កើតឡើងនៅពេលដែលប្រធានាធិបតីអាមេរិក ដូណាល់ ត្រាំ ពេលដើរចូលទៅកន្លែងកិត្តិយស បែរជាបានធ្វើកន្តើយ មិនព្រមទទួលការស្វាគមន៍ចាប់ដៃគារវកិច្ច ពីសំណាក់ប្រធានសភា អ្នកស្រី Nancy Pelosi ដែលមកពីបក្សប្រឆាំង។ លោក ត្រាំហាក់ធ្វើមិនដឹង យ៉ាងព្រងើយ ពេលអ្នកស្រី Pelosi ហុចដៃរកលោក។ ភ្លាមៗ ជាការសងសឹក អ្នកស្រីប្រធានសភា ក៏ហែកសុន្ទរកថារបស់ប្រធានាធិបតី ទាំងដែលដឹងថាកំពុងតែមានគេថតផ្សាយផ្ទាល់ទៀតផង។ បន្ទាប់មក អ្នកស្រី ប្រកាន់មុខក្រញ៉ូវជាប់ និងមិនព្រមងើបឈរទះដៃសាទរលោក ត្រាំ ឡើយពេលលោកថ្លែងពីការរីកចម្រើន ឬនិយាយអ្វីៗដែលជាការអួតសរសើររបស់លោក ត្រាំ។
អ្នកស្រី Kayleigh McEnany អ្នកនាំពាក្យយុទ្ធនាការបោះឆ្នោត របស់ លោក ដូណាល់ ត្រាំ បានសរសេរប្រតិកម្មឆ្ពោះទៅអ្នកស្រី Nancy Pelosi ថា«នេះហើយជាចរិតរបស់អ្នកដឹកនាំជាន់ខ្ពស់» និងថា «ការស្អប់ខ្ពើមលោកត្រាំ ពីសំណាក់អ្នកស្រី Pelosi គឺស្អប់ទាំងងងឹតងងុលទទឹកទិសតែម្តង»។
ចំណែក អ្នកស្រីប្រធានសភា ក៏បានសរសេរនៅក្នុងបណ្តាញសង្គមផ្ទាល់ខ្លួនដែរ វាយបកដែរថា «ក្រុមបក្សប្រជាធិបតេយ្យបានព្យាយាម ក្នុងពង្រឹងមិត្តភាព ដើម្បីភាពចាំបាច់នៃប្រយោជន៍ជាតិ។ ហើយយើងតែងបើកផ្លូវសម្រាប់ការចរចាជជែកគ្នា បើអាចធ្វើបាន តែយើងក៏ចាំបាច់ត្រូវការពារប្រយោជន៍ក្រុមយើងដែរ»។
ទិដ្ឋភាពនៃការប្រេះឆារបស់ថ្នាក់ដឹកនាំបក្សប្រឆាំងនិងបក្សកាន់អំណាចនេះ គឺផ្ទុះខ្លាំង ខណៈពេលដែលលោកប្រធានាធិបតី នឹងត្រូវជំនុំជម្រះ ពីបទរំលោភអំណាច ដែលរដ្ឋសភាសហព័ន្ធ មានតំណាងរាស្ត្រភាគច្រើនមកពីបក្សប្រឆាំងបានបោះឆ្នោត ចោទប្រកាន់ និងបញ្ចូនទៅព្រឹទ្ធសភា។ ព្រឹទ្ធសភា ចាត់ការចេញសេចក្តីសម្រេច នៅថ្ងៃពុធ ទី៥កុម្ភៈ នៅម៉ោង៤រសៀល នៅម៉ោងអាមេរិក។ ទោះយ៉ាងណាក្តី គេយល់ឃើញថាក្នុងដំណាក់កាលព្រឹទ្ធសភានេះ លោក ដូណាល់ ត្រាំ ទំនងជាអាចនឹងឈ្នះក្តី ព្រោះ ព្រឹទ្ធសភា មានសំឡេងភាគច្រើនមកពី បក្សសាធារណរដ្ឋ ដែលគាំទ្រ លោក ដូណាល់ ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ