បញ្ហាដីធ្លី និងសេវាសាធារណៈជាចំណុចស្លាប់រស់របស់គណបក្សកាន់អំណាច!
ចុះផ្សាយនៅថ្ងៃ៖
ស្តាប់ - ០៥:០៦
ដំណោះស្រាយបញ្ហាដីធ្លី និងការបម្រើសេវាសាធារណៈ គឺជាបញ្ហាអាទិភាព២ ក្នុងចំណោមបញ្ហាជាច្រើនដែលរដ្ឋាភិបាលគណបក្សកាន់អំណាច ត្រូវដោះស្រាយជាបន្ទាន់មុនគេដើម្បីស្តាប្រជាប្រិយភាពរបស់ខ្លួន។ ប៉ុន្តែ រយៈពេលមួយឆ្នាំកន្លងទៅនៃរដ្ឋាភិបាលអាណត្តិទី៥នេះ បញ្ហាស្លាប់រស់ទាំងពីរនៅតែបន្តដុតរោលប្រជាប្រិយភាពគណបក្សកាន់ អំណាចនៅឡើយ បើទោះជាលោកនាយករដ្ឋមន្ត្រី បានដាក់ចេញកំណែទម្រង់ជាច្រើនក៏ដោយ។ ប្រសិនបើបញ្ហាគន្លឹះទាំងនេះមិនអាចដោះស្រាយបានទេ គេមិនចាំបាច់និយាយពីកំណែទម្រង់អ្វីទៀតឡើយ។
ក្នុងចំណោមបញ្ហាជាច្រើនដែលធ្វើឲ្យរដ្ឋាភិបាលគណបក្សប្រជាជនកម្ពុជាបាត់បង់ប្រជាប្រិយភាព មានបញ្ហាសំខាន់២ដែលលេចធ្លាជាងគេ នោះគឺបញ្ហាដីធ្លី និងការទារកម្រៃសេវាកម្មក្រៅផ្លូវការពីសំណាក់អាជ្ញាធរដែនដី ដែលជាទម្រង់នៃអំពើពុករលួយដុះស្លែមួយនៅក្នុងរដ្ឋបាលសាធារណៈ។
វាពិតជាមិនមែនជារឿងចៃដន្យទេដែលគណបក្សកាន់អំណាចបាត់បង់សន្លឹកឆ្នោតអស់ ២២ កៅអីពីក្នុងរដ្ឋសភា។ នរណាក៏ដឹងដែរថាបញ្ហាដីធ្លី ដែលកើតមានក្នុងខេត្តក្រុងជាច្រើនបានបង្កផលប៉ះពាល់យ៉ាងខ្លាំងដល់ពលរដ្ឋក្រីក្រជាច្រើន។ គ្រាន់តែជម្លោះដីនៅបូរីកីឡា និងបឹងកក់ក្នុងរាជធានីភ្នំពេញ បានធ្វើឲ្យបក្សកាន់អំណាចរបូតសំឡេងឆ្នោតអស់មិនស្ទើរឡើយ។ នេះនៅមិនទាន់រាប់ការជះរូបភាពមិនល្អរបស់កម្ពុជានៅលើឆាកអន្តរជាតិផងទេ។ សូមកុំភ្លេចថា បញ្ហាបឹងកក់និងបូរីកីឡា បានក្លាយទៅជារឿងភាពយន្តឯកសារដែលអង្រួនសហគមន៍អន្តរជាតិយ៉ាងខ្លាំងផងដែរ។
តាមពិត បញ្ហាហាក់មិនពិបាកនឹងដោះស្រាយសោះ ប៉ុន្តែ «ការបណ្តែតបណ្តោយ» ឬស្ថានភាព «លេបស្លាក់ ខ្ជាក់ស្លែង» របស់អាជ្ញាធរបានធ្វើឲ្យបញ្ហាតូចតាចសោះប្រែក្លាយទៅជាព្យុះភ្លៀងស្ទើរគ្រប់ពេលវេលា។ វេទិកាសាធារណៈ ដែលបានបើកធ្វើកាលពីថ្ងៃទី១២សីហា អាចជាពន្លឺមួយក្នុងការឈានទៅបញ្ចប់សំណុំរឿងនេះ។ ប៉ុន្តែ សំណួរមួយបានចោទឡើងថា ប្រសិនបើអាជ្ញាធរពិតជាចង់ស្វែងយល់និងចង់ដោះស្រាយបញ្ចប់បញ្ហាមែននោះ គេប្រហែលជាមិនបាច់រង់ចាំវេទិកាសាធារណៈនៅថ្ងៃនេះទេ?
ជម្លោះដីនៅកន្លែងជាច្រើនទៀត ក៏មានលក្ខណៈស្រដៀងគ្នានេះដែរ។ ជាក់ស្តែង អ្នកដែលមកចូលរួមក្នុងមហាបាតុកម្មរបស់គណបក្សសង្គ្រោះជាតិ កាលពីពេលកន្លងទៅ ភាគច្រើនគឺជាអ្នកដែលមានកំហឹងជាមួយអាជ្ញាធរមូលដ្ឋាន បើមិនដោយសារបញ្ហាដីធ្លី ក៏បញ្ហាសេវាសាធារណៈ ឬក៏ការបំពានអំណាចផ្សេងៗទៀតដែរ។ នេះសបញ្ជាក់ពីការបម្រើពលរដ្ឋមិនបានល្អ របស់មន្ត្រីអាជ្ញាធរគ្រប់លំដាប់ថ្នាក់។ សូមកុំភ្លេចថា អ្នកក្រីក្ររំពឹងតែលើដីលំនៅដ្ឋាន និងដីកសិកម្មដើម្បីរស់។ ដូច្នេះ ប្រសិនបើបាត់បង់ដីធ្លី និងផ្ទះសម្បែង ពួកគេគ្មានជម្រើសអ្វីក្រៅពីងើបតស៊ូនោះឡើយ។
ចំណែកឯបញ្ហាពុករលួយ នៅក្នុងរដ្ឋបាលសាធារណៈវិញ ក៏បានក្លាយជាទម្លាប់ដុះស្លែមួយដែលពិបាកកែនិងបានប៉ះពាល់ដល់ជីវភាពប្រជាពលរដ្ឋយ៉ាងខ្លាំងផងដែរ។ តើអ្នកណាខ្លះដែលធ្លាប់ទទួលបានឯកសារអ្វីមួយពីអាជ្ញាធរដោយស្រួល និងដោយមិនបង់ប្រាក់ថ្លៃសេវាក្រៅផ្លូវការ? សំណួរដ៏សាមញ្ញនេះអាចបញ្ជាក់បានអំពីទុក្ខលំបាករបស់ពលរដ្ឋខ្មែរទូទៅ។ ការបោះឆ្នោតចុងក្រោយនេះជាសារច្បាស់ណាស់ ដែលបង្ហាញថា វាដល់ពេលដែលត្រូវគាស់រំលើងអំពើពុករលួយនៅក្នុងរដ្ឋបាលសាធារណៈ និងត្រូវដោះស្រាយបញ្ចប់ទំនាស់ដីធ្លីហើយ។
មេដឹកនាំរដ្ឋាភិបាលយល់ច្បាស់អំពីបញ្ហានេះ។ ជាក់ស្តែង តាំងពីមុនយុទ្ធនាការឃោសនាបោះឆ្នោតឃុំសង្កាត់ឆ្នាំ ២០១២ ម្ល៉េះ អង្គភាពប្រឆាំងអំពើពុករលួយបានប្រកាសប្រយុទ្ធប្រឆាំងនឹងទម្លាប់យកសេវាកម្មក្រៅផ្លូវការនៅក្នុងក្រុមប្រឹក្សាឃុំសង្កាត់។ ភ្លាមៗក្រោយការប្រកាសនេះ គណបក្សកាន់អំណាចក៏បានប្រកាសគាំទ្រ និងថែមទាំងបានចុះហត្ថលេខាលើអនុស្សារណៈស្តីពីកិច្ចសហការប្រឆាំងអំពើពុករលួយនៅថ្នាក់មូលដ្ឋានផងដែរ។ ប៉ុន្តែ នៅមិនទាន់មានការប្រែប្រួលធំដុំគួរឲ្យកត់សម្គាល់ទេរហូតមកដល់បច្ចុប្បន្ន។
ទាក់ទងនឹងទំនាស់ដីធ្លីវិញ រដ្ឋាភិបាលក៏បានដាក់ចេញកំណែទម្រង់ជាច្រើនដែរ។ ក្រសួងដែនដីនគរូបនីយកម្ម និងសំណង់ ក៏បានធ្វើកិច្ចការមិនតិចដែរដូចជាការវាស់វែងនិងចុះបញ្ជីដីជូនប្រជាពលរដ្ឋ និងការដោះស្រាយទំនាស់ផ្សេងៗទៀត។ រដ្ឋាភិបាលក៏បានបញ្ជូនក្រុមយុវជនចុះវាស់ដីមានទំនាស់ចែកជូនពលរដ្ឋបានជាច្រើនផងដែរ ប៉ុន្តែ វាមិនបានធ្វើឲ្យបញ្ហាដីធ្លីស្ងប់ស្ងាត់ឡើយ។ ជាញឹកញាប់ ពលរដ្ឋដែលមានបញ្ហាដីធ្លីតែងឡើងមកភ្នំពេញដើម្បីសុំអន្តរាគមន៍ពីប្រមុខរដ្ឋាភិបាល។
ដំណោះស្រាយមិនពិបាកតែមិនងាយធ្វើបានក៏ព្រោះតែមានមូលហេតុពិតប្រាកដរបស់វា៖ ការឃុបឃិតដើម្បីផលប្រយោជន៍ ការលូកដៃពីអ្នកមានឥទ្ធិពល និងទម្លាប់ប្រើអំណាចដើម្បីរកលាភសក្ការៈ គឺជាឫសគល់នៃបញ្ហាដែលត្រូវគាស់រំលើង។ ដូច្នេះ ទោះជាក្នុងតម្លៃណាក៏ដោយ គណបក្សកាន់អំណាចមិនអាចមើលស្រាលបញ្ហាទាំងនេះបានទៀតឡើយ។ ការយឺតយូរតែមួយជំហានទៀតវានឹងក្លាយជារឿងហួសពេលសម្រាប់រដ្ឋាភិបាលបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ