សវនាការលើកាយសម្បទាអតីតមេដឹកនាំខ្មែរក្រហមជាសញ្ញាអាសន្ន
ចុះផ្សាយនៅថ្ងៃ៖
ស្តាប់ - ០៤:០៦
អង្គជំនុំជម្រះវិសាមញ្ញក្នុងតុលាការកម្ពុជាឬហៅកាត់ថាសាលាក្តីខ្មែរក្រហមនឹងបើកសវនាការមួយនៅថ្ងៃទី២៩សីហាខាងមុខនេះដើម្បីពិនិត្យមើលកាយសម្បទារបស់អតីតមេដឹកនាំជាន់ខ្ពស់ខ្មែរក្រហម៣រូបថាតើពួកគេអាចចូលរួមក្នុងសវនាការកាត់ទោសនៅពេលខាងមុខនេះបានដែរឬទេ? អតីតមេដឹកនាំជាន់ខ្ពស់ខ្មែរក្រហមទាំងបីរូបមាននួន ជា អៀង សារី និងអៀង ធិរិទ្ធ។ សវនាការពិសេសនេះត្រូវបានគេគ្រោងនឹងធ្វើឡើងដោយហេតុថា ជនជាប់ចោទក្នុងសំណុំរឿង០០២ទាំងនោះមានវ័យចាស់ជរាណាស់ទៅហើយ។សវនាការនេះត្រូវគេចាត់ទុកជាសញ្ញាអាសន្នមួយសម្រាប់យុត្តិធម៌ក្នុងសំណុំរឿងខ្មែរក្រហម។
ដំណើរការស្វែងរកយុត្តិធម៌ក្នុងសំណុំរឿងខ្មែរក្រហមបានបង្ហាញសញ្ញាអាសន្នមួយគួរឲ្យព្រួយបារម្ភ។ នោះគឺភាពចាស់ជរារបស់ជនជាប់ចោទ៣នាក់កំពុងក្លាយជាប្រធានបទនៃចំណោទបញ្ហាសម្រាប់ដំណើរការតុលាការទាំងមូល។ ជនជាប់ចោទក្នុងសំណុំរឿង០០២៣នាក់ដែលមានបញ្ហាសុខភាពធ្ងន់ធ្ងរគឺ នួន ជា អតីតប្រធានសភាប្រជាជនខ្មែរក្រហមអាយុ ៨៥ឆ្នាំ, អៀង សារី អតីតឧបនាយករដ្ឋមន្ត្រី និងជារដ្ឋមន្ត្រីការបរទេស អាយុ ៨៦ឆ្នាំ និងអៀង ធីរិទ្ធ អតីតរដ្ឋមន្ត្រីសង្គមកិច្ចខ្មែរក្រហម អាយុ ៧៩ឆ្នាំ។
ចៅក្រមនិល ណុន ប្រធានអង្គជំនុំជម្រះសាលាដំបូងបានកោះហៅជនជាប់ចោទទាំងបីឲ្យចូលរួមសវនាការនៅថ្ងៃទី២៩សីហាខាងមុខដើម្បីពិនិត្យមើលអំពីកាយសម្បទារបស់ពួកគេថាតើជនជាប់ចោទទាំងនោះអាចចូលរួមសវនាការកាត់ក្តីនៅពេលខាងមុខនេះបានដែរឬទេ? សវនាការនេះធ្វើឡើងតាមសេចក្តីស្នើរបស់មេធាវីជនជាប់ចោទដោយសម្អាងលើសុខភាពដ៏ទ្រុឌទ្រោមនៃកូនក្តីរបស់ខ្លួន។ គួរកត់សម្គាល់ថា ការព្រួយបារម្ភជាទូទៅអំពីបញ្ហាសុខភាពអតីតមេដឹកនាំខ្មែរក្រហមគឺជាបញ្ហាសំខាន់ជាងគេមួយនៅក្នុងចំណោមបញ្ហាជាច្រើនដែលអាចបង្កឧបសគ្គក្នុងដំណើការរបស់តុលាការខ្មែរក្រហម។ ទោះបីជាបញ្ហានយោបាយចម្រូងចម្រាសនៃសំណុំរឿង០០៣ឬ០០៤បាននិងកំពុងបន្តកើតឡើងក៏ដោយ ក៏ប៉ុន្តែ នោះវាគ្រាន់តែជារឿងបន្ទាប់បន្សំសម្រាប់បំពេញបន្ថែមទៅលើសំណុំរឿងដែលមានស្រាប់តែប៉ុណ្ណោះ។ ដូច្នេះ បើទោះបីជាសំណុំរឿងថ្មីទាំងនោះចេញមិនរួចក៏វាមិនមែនមានន័យថា តុលាការខ្មែរក្រហមបរាជ័យនោះដែរ។ រឿងដែលសំខាន់ជាងគេបំផុតក្នុងដំណើរការនេះគឺសំណុំរឿង០០២នេះឯង។
ឥឡូវនេះ ដំណើរការរបស់សាលាក្តីខ្មែរក្រហមបានឈានចូលដំណាក់កាលសំខាន់ហើយ។ ប៉ុន្តែ ខណៈដែលមហាជនទូទៅដែលរងគ្រោះដោយសាររបបខ្មែរក្រហមកំពុងទន្ទឹងរង់ចាំស្តាប់ចម្លើយពន្យល់បកស្រាយការពិតរបស់អតីតមេដឹកនាំកំពូលៗខ្មែរក្រហមទាំងនោះ ពួកគេបែរជាកំពុងស្ថិតក្នុងស្ថានភាពព្រួយបារម្ភជាថ្មី។ ព្រួយបារម្ភទី១គឺដោយសារជនជាប់ចោទទាំងនោះហាក់មិនបានត្រៀមខ្លួនសហការជាមួយតុលាការក្នុងការស្វែងរកយុត្តិធម៌ឡើយ។ និងទី២ ជរាភាពរបស់ជនជាប់ចោទបានឈានដល់កម្រិតធ្ងន់ធ្ងរ។ សវនាការលើកាយសម្បទាជនជាប់ចោទនៅចុងខែនេះគឺជាសញ្ញាអាសន្នមួយ។
ជាការពិត តុលាការបានខិតខំត្រៀមលក្ខណៈជាស្រេចដើម្បីធ្វើឲ្យអង្គសវនាការកាត់ក្តីសំណុំរឿង០០២ប្រព្រឹត្តទៅដោយរលូន។ ជាក់ស្តែង ប្រសិនបើគ្រូពេទ្យជំនាញរកឃើញថា ពួកគេមិនអាចចូលរួមសវនាការដោយផ្ទាល់បានទេនោះ តុលាការនឹងអនុញ្ញាតឲ្យអតីតមេដឹកនាំខ្មែរក្រហមទាំងនោះចូលរួមសវនាការពីចម្ងាយពោលគឺពីបន្ទប់ពិសេសដែលភ្ជាប់ទៅអង្គសវនាការដោយប្រព័ន្ធបច្ចេកវិជ្ជា Video Conference ។ ប៉ុន្តែ បើក្នុងករណីធ្ងន់ធ្ងរជាងនេះ ដូចជាករណីបាត់ការចងចាំ ឬឈានដល់ដំណាក់កាលវង្វេង លែងមានការទទួលខុសត្រូវ ច្បាប់នឹងមិនអាចកាត់ក្តីពួកគេបានឡើយ។ នេះជាដំណាក់កាលធ្ងន់ធ្ងរបំផុតដែលអាចធ្វើឲ្យសាលាក្តីខ្មែរក្រហមជួបនឹងបញ្ហាធំកណ្តាលទី។
ក្នុងកិច្ចប្រជុំពេញអង្គរបស់ខ្លួនលើកចុងក្រោយកាលពីខែកក្កដាកន្លងទៅ តុលាការចម្រុះបានឈានរហូតដល់ការធ្វើវិសោធនកម្មវិធានផ្ទៃក្នុងទាក់ទងនឹងការធ្វើកោសលវិច័យសាកសពជនជាប់ចោទដែលស្លាប់ក្នុងពន្ធនាគារទៀតផង។ នេះជាសញ្ញាមួយរួចទៅហើយ អំពីភាពធ្ងន់ធ្ងរនៃបញ្ហាសុខភាពរបស់ជនជាប់ចោទដែលជាបុព្វហេតុនាំឲ្យមានសវនាការលើកាយសម្បទានៃជនជាប់ចោទទាំង៣នាក់។
នៅក្នុងស្ថានភាពបែបនេះ ប្រជាពលរដ្ឋខ្មែររងគ្រោះដោយរបបខ្មែរក្រហម ហើយដែលកំពុងទន្ទឹងរង់ចាំយុត្តិធម៌ពីរបបនេះ កំពុងនាំគ្នាបន់ស្រន់កុំអាលឲ្យជនជាប់ចោទទាំងនោះមានបញ្ហាអ្វីឲ្យសោះ។ ការបន់ស្រន់នេះ មិនមែនមានន័យថា ពួកគេបួងសួងឲ្យអតីតមេដឹកនាំខ្មែរក្រហមទាំងនោះមានអាយុយឺនយូរនោះឡើយ ប៉ុន្តែអ្នករង់ចាំយុត្តិធម៌គ្រាន់តែចង់ឲ្យអតីតមេដឹកនាំកំពូលខ្មែរក្រហមខ្ជាក់ចេញពីបបូរមាត់របស់ខ្លួននូវការពិត មុននឹងលាចាកលោកនេះទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ