តុលាការខ្មែរក្រហមបើកសវនាការលើបញ្ហាសុខភាពរបស់ នួន ជា និងអៀង ធីរិទ្ធ
តុលាការខ្មែរក្រហមបានប្រកាស នៅថ្ងៃសុក្រនេះថា បញ្ហាសុខភាព និងកាយសម្បទារបស់លោកស្រី អៀង ធីរិទ្ធ និងលោក នួន ជា នឹងត្រូវធ្វើឡើងរួមគ្នា នៅថ្ងៃទី២៩ ដល់ថ្ងៃទី៣១ សីហាខាងមុខ។ សវនាការរយៈពេល ៣ ថ្ងៃនោះ នឹងលើកឡើងពីការវាយតម្លៃរបស់គ្រូពេទ្យជំនាញ លើបញ្ហាសុខភាព និងកាយសម្បទា ដូចជា ការអង្គុយ និងរាងកាយរបស់អតីតមេខ្មែរក្រហមចាស់ជរា សម្រាប់ចូលរួមសវនាការលើអង្គសេចក្តី ក្នុងសំណុំរឿង០០២ ដែលគ្រោងធ្វើឡើង នៅចុងឆ្នាំ២០១១នេះ។
ចុះផ្សាយនៅថ្ងៃ៖
ស្តាប់ - ០២:៤៥
តាមពិត សំណុំរឿង០០២ មានជនជាប់ចោទ ៤ រូប គឺនួនជា ខៀវសំផន អៀងសារី និងអៀង ធីរិទ្ធ។ ក៏ប៉ុន្តែ អ្នកនាំពាក្យសាលាក្តីខ្មែរក្រហម លោក នេត ភ័ក្ត្រា អះអាងថា សម្រាប់សុខភាពរបស់លោក អៀងសារី និងលោកខៀវសំផន ត្រូវបានអ្នកជំនាញវាយតម្លៃថា អ្នកទាំងពីរ មានសុខភាពគ្រប់គ្រាន់ ក្នុងការចូលរួមសវនាការ ដែលនឹងត្រូវធ្វើឡើងក្នុងត្រីមាសទី៤ ចុងឆ្នាំ២០១១។
របាយការណ៍លម្អិតពីបញ្ហាសុខភាព និងកាយសម្បទារបស់មេខ្មែរក្រហមចាស់ជរាទាំង ៤ រូប មិនត្រូវបានសាលាក្តីប្រកាសឲ្យដឹងនោះឡើយ។ ក៏ប៉ុន្តែអ្នកនាំពាក្យបញ្ជាក់ថា សវនាការរយៈពេល ៣ថ្ងៃ ចាប់ពីថ្ងៃ២៩សីហាខាងមុខ មានសារៈសំខាន់ សម្រាប់ឲ្យតុលាការកំណត់កាលវិភាគជាក់លាក់ ដើម្បីបើកសវនាការលើអតីតមេខ្មែរក្រហមទាំង ៤ រូប ក្នុងបទឧក្រិដ្ឋសម្លាប់មនុស្សសម័យខ្មែរក្រហមជិត ២លាននាក់។
យ៉ាងណាក៏ដោយ ក្នុងដីកាកំណត់កាលបរិច្ឆេទសវនាការ ស្តីពីបញ្ហាកាយសម្បទារបស់ជនជាប់ចោទ ក្នុងការចូលរួមសវនាការ ចុះថ្ងៃទី១១សីហា ឆ្នាំ២០១១ លោកចៅក្រម និល ណុន ប្រធានអង្គជំនុំជម្រះសាលាដំបូងរបស់តុលាការខ្មែរក្រហម បានសម្រេចថា អង្គជំនុំជម្រះនឹងបើកសវនាការនៅថ្ងៃច័ន្ទ ទី២៩សីហា ឆ្នាំ២០១១ និងថ្ងៃបន្តបន្ទាប់ រហូតដល់ថ្ងៃពុធ ទី៣១សីហា ឆ្នាំ២០១១ ប្រសិនបើចាំបាច់ ដើម្បីអនុញ្ញាតឲ្យមេធាវីការពារក្តី អៀង ធីរិទ្ធ និង នួន ជា សហព្រះរាជអាជ្ញា និងសហមេធាវីនាំមុខតំណាងដើមបណ្តឹងរដ្ឋប្បវេណី សួរសំណួរដល់អ្នកជំនាញ និងបង្ហាញនូវអំណះអំណាងផ្សេងៗ អំពីការធ្វើសេចក្តីសន្និដ្ឋាន នៅក្នុងរបាយការណ៍របស់អ្នកជំនាញ ទាក់ទងនឹងជនជាប់ចោទ នួន ជា និងអៀង ធីរិទ្ធ។ សវនាការនោះនឹងត្រូវធ្វើឡើងរួមគ្នា ក្នុងពេលតែមួយ។
តុលាការបញ្ជាក់ថា គោលបំណងនៃសវនាការនាចុងខែសីហា គឺធ្វើឡើង ដើម្បីពិចារណាតែត្រឹមបញ្ហាដែលមាននៅក្នុងរបាយការណ៍កោសល្យវិច័យរបស់សាស្ដ្រចារ្យ John CAMPBELL វេជ្ជបណ្ឌិតជំនាញខាងព្យាបាលថែទាំជំងឺមនុស្សចាស់ នៅទីក្រុង Dunedin ប្រទេសនូវែលសេឡង់ និងដើម្បីផ្ដល់ឱកាសឲ្យភាគីលើកទឡ្ហីករណ៍តទល់ ពាក់ព័ន្ធនឹងបញ្ហាសុខភាពអតីតមេខ្មែរក្រហមចាស់ជរាប៉ុណ្ណោះ។
តាមរយៈសវនាការបឋម កាលពីចុងខែមិថុនា ឆ្នាំ២០១១ អតីតមេខ្មែរក្រហមចាស់ជរាទាំង ៤ រូប គឺលោកខៀវសំផន អាយុ ៨០ ឆ្នាំ, លោក នួនជា អាយុ ៨៥ ឆ្នាំ, លោក អៀងសារី អាយុ ៨៥ ឆ្នាំ និងលោកស្រី អៀង ធីរិទ្ធ អាយុ ៧៩ ឆ្នាំ បានលើកឡើងពីបញ្ហាសុខភាពមិនល្អ និងបានដើរចេញពីបន្ទប់សវនាការជាបន្តបន្ទាប់ មិនអាចអង្គុយចូលរួមតាមដានសវនាការបានយូរឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ