អ៊ីស្រាអែល៖ នាយករដ្ឋមន្ត្រីផុតអាណត្តិ ស្នើសុំអភ័យឯកសិទ្ធិសភា ដើម្បី«បម្រើជាតិ» ឬ«គេចពីការកាត់ទោស»?
ចុះផ្សាយនៅថ្ងៃ៖
ចូលដល់ដើមឆ្នាំ២០២០ភ្លាម នាយករដ្ឋមន្ត្រីអ៊ីស្រាអែល លោក បេនយ៉ាមីន ណេតាន់យ៉ាហ៊ូ និងមេធាវីរបស់លោក បានដាក់សំណើសុំ«អភ័យឯកសិទ្ធិសភា» ទៅកាន់ប្រធានសភាអ៊ីស្រាអែល។ លោក ណេតាន់យ៉ាហ៊ូ ពន្យល់ថា ការស្នើសុំ«អភ័យឯកសិទ្ធិសភា» គឺដើម្បីបន្តបេសកម្ម«បម្រើជាតិ» តទៅទៀត។ ក៏ប៉ុន្តែ ចំពោះក្រុមអ្នកនយោបាយប្រឆាំង ទង្វើរបស់នាយករដ្ឋមន្ត្រីបណ្តោះអាសន្នរូបនេះ គឺដើម្បី«គេចផុតពីការកាត់ទោសផ្លូវតុលាការ» តែប៉ុណ្ណោះ។ សូមជ្រាបថា កាលពីខែវិច្ឆិកាកន្លងទៅ លោក នាយករដ្ឋមន្ត្រី បេនយ៉ាមីន ណេតាន់យ៉ាហ៊ូ បានត្រូវអគ្គរដ្ឋអាជ្ញាអ៊ីស្រាអែល ចោទប្រកាន់និងសម្រេចបញ្ចូនសំណុំរឿងទៅជំនុំជម្រះ លើបទល្មើសជាច្រើន ដូចជាបទពុករលួយ កេងចំណេញនយោបាយ និងរំលោភលើសេចក្តីទុកចិត្ត។ ផ្ទុយទៅវិញ លោក ណេតាន់យ៉ាហ៊ូ បានចាត់ទុកការចោទប្រកាន់នេះ ថាជាការឃុបឃិតគ្នាធ្វើរដ្ឋប្រហារ ក្នុងគោលបំណង រារាំងលោកមិនឱ្យបន្តតំណែងជានាយករដ្ឋមន្ត្រី។នៅពេលនេះ សភាអ៊ីស្រាអែល នៅមិនទាន់អាចសម្រេចអ្វីបាននៅឡើយ ព្រោះនយោបាយប្រទេសជាតិជាប់គាំង មួយឆ្នាំមកហើយ។ ចំណែក តុលាការកំពូល ក៏មិនទាន់ចេញសេចក្តីសម្រេចយ៉ាងណាដែរ។ ដូច្នេះ តើជីវិតនយោបាយរបស់លោក បេនយ៉ាមីន ណេតាន់យ៉ាហ៊ូ នឹងទៅជាយ៉ាងណា?
ដើមឆ្នាំថ្មីភ្លាម នាយករដ្ឋមន្ត្រីអ៊ីស្រាអែល លោក បេនយ៉ាមីន ណេតាន់យ៉ាហ៊ូ បានដាក់សំណើភ្លែតតែម្តង ដើម្បីសុំ«អភ័យឯកសិទ្ធិសភា»។ តើមានមូលហេតុអ្វីខ្លះនៅពីក្រោយរឿងនេះ?
លោក បេនយ៉ាមីន ណេតាន់យ៉ាហ៊ូ ជានាយករដ្ឋមន្ត្រីផុតអាណត្តិ កាន់អំណាចបណ្តោះអាសន្ន។ នៅក្នុងសុន្ទរកថាផ្លូវការ ថ្លែងទៅកាន់ប្រជាជាតិអ៊ីស្រាអែល នាថ្ងៃទី១មករា លោកបានពន្យល់ ថា «អភ័យឯកសិទ្ធិសភា» គឺជួយការពារអ្នកតំណាងរាស្ត្រ ដែលបានជ្រើសរើសដោយប្រជាពលរដ្ឋ ឱ្យគេចផុតពីការចោទប្រកាន់ព្រហ្មទណ្ឌ ដែលលោកយល់ថា«មិនត្រឹមត្រូវ» ។
គួររម្លឹក កាលពីខែវិច្ឆិកា២០១៩ អគ្គរដ្ឋអាជ្ញាអ៊ីស្រាអែល ចោទប្រកាន់ផ្លូវការលើលោក ណេតាន់យ៉ាហ៊ូ និងសម្រេចបញ្ចូនសំណុំរឿងទៅជំនុំជម្រះ លើបទល្មើសជាច្រើន ពាក់ព័ន្ធនឹងសំណុំរឿងពុករលួយ។ អយ្យការ ទុកពេលមកត្រឹមថ្ងៃទី២មករានេះ ដើម្បីឱ្យលោក បង្ហាញថានៅមានឬគ្មាន អភ័យឯកសិទ្ធិសភា។
ចំពោះក្រុមអ្នកនយោបាយប្រឆាំង ទង្វើរបស់នាយករដ្ឋមន្ត្រីបណ្តោះអាសន្នរូបនេះ គឺដើម្បី«គេចផុតពីការកាត់ទោសផ្លូវតុលាការ» តែប៉ុណ្ណោះ។ លោក បេនី ហ្កាន់ គូប្រជែងដ៏មុខស្រួចបំផុត បានប្រកាសថា «លោក បេនយ៉ាមីន ណេតាន់យ៉ាហ៊ូ ទទួលស្គាល់ថាខ្លួនបានប្រព្រឹត្តកំហុសហើយ ទើបដាក់សំណើសុំអភ័យឯកសិទ្ធិសភា ដើម្បីជៀសពីការជម្រះក្តីផ្លូវច្បាប់។ ដូច្នេះ អភ័យឯកសិទ្ធិសភា នឹងលែងមែនតម្លៃហើយ ព្រោះដើម្បីបម្រើប្រយោជន៍ការពារជនពុករលួយ។ ហេតុនេះ អភ័យឯកសិទ្ធិសភា ក៏លែងជាមូលដ្ឋាននៃរដ្ឋប្រជាធិបតេយ្យអីទៀតដែរ»។
ក៏ប៉ុន្តែ លោក បេនយ៉ាមីន ណេតាន់យ៉ាហ៊ូ បញ្ជាក់តបទៅវិញថា «ការសុំអភ័យឯកសិទ្ធិសភា គឺមិនមែនប្រឆាំងនឹងប្រជាធិបតេយ្យនោះទេ តែសមស្របតាមសិទ្ធិរបស់លោកដែលពលរដ្ឋបោះឆ្នោតឱ្យ ហើយបន្តឱ្យរូបលោក បន្តកិច្ចការបេសកម្មបម្រើជាតិ តទៅទៀត ដើម្បីដឹកនាំអ៊ីស្រាអែលនិងនាំពលរដ្ឋអ៊ីស្រាអែល ទៅកាន់អនាគតនៃភាពភ្លឺស្វាងរុងរឿង»។
តើនីតិវិធីស្នើសុំ«អភ័យឯកសិទ្ធិសភា»នេះ អាចប្រព្រឹត្តទៅយ៉ាងដូចម្តេច?
រឿងនេះ ពេលនេះ ឋិតក្នុងភាពស្រពិចស្រពិល តែអ្វីដែលច្បាស់ នោះគឺ ច្បាប់ព្រហ្មទណ្ឌអ៊ីស្រាអែល តម្រូវឱ្យ រដ្ឋមន្ត្រី ត្រូវតែលាចុះពីតំណែង នៅពេលរដ្ឋអាជ្ញាចោទប្រកាន់សំណុំរឿងព្រហ្មទណ្ឌ។ តែអំណាចច្បាប់នេះ លែកលែងតែករណីតំណែងនាយករដ្ឋមន្ត្រីមួយគត់ ដែលមានអាវក្រោះអភ័យឯកសិទ្ធិសភា ប៉ះពាល់មិនបាន។
ចំពោះលោក បេនយ៉ាមីន ណេតាន់យ៉ាហ៊ូ គឺគាត់កាន់តំណែងច្រើនណាស់ ក្នុងជួរដ្ឋាភិបាល ជានាយករដ្ឋមន្ត្រីផង និងជា រដ្ឋមន្ត្រីបីក្រសួងទៀត គឺក្រសួងកសិកម្ម ក្រសួងទទួលបន្ទុកអនិកជនជ្វីហ្វនៅបរទេស និងក្រសួងសុខាភិបាល។ ប្រឈមនឹងខចែងនៃក្រមព្រហ្មទណ្ឌ លោក ណេតាន់យ៉ាហ៊ូ ត្រូវបង្ខំចិត្តលាលែងបោះបង់តំណែងតួនាទីរដ្ឋមន្ត្រីទាំងបីក្រសួង ដោយរក្សាតែតំណែងនាយករដ្ឋមន្ត្រីមួយប៉ុណ្ណោះ។ តួនាទីនាយករដ្ឋមន្ត្រី នេះទៀតសោត ក៏ជាតំណែងបណ្តោះអាសន្នដែរ។ ហេតុនេះហើយ លោកចាំបាច់ត្រូវស្នើសុំសភា ឱ្យសម្រេចថាលោកនៅមានអភ័យឯកសិទ្ធិសភា នៅឡើយ។
ចំពោះករណីនេះ ត្រូវ រដ្ឋសភា ពិចារណាជាច្រើនខែតទៀត មើលទៅ ព្រោះថាពេលនេះ សភាគ្មានគណៈកម្មពិសេសណាមួយ អាចសម្រេចរឿងនេះបានឡើយ។ សូម្បីតែ ប្រធានសភាជាតិខ្លួនឯង ក៏ជាតំណែងបណ្តោះអាសន្ននៅឡើយដែរ។
ប្រឈមមុខនឹងពេលវេលាយូរយ៉ាងណានេះ ក្រុមអ្នកច្បាប់ ពិសេសតំណាងអយ្យការ បានដាក់សំណើសុំសេចក្តីសម្រេចពីតុលាការកំពូល ដើម្បីចាត់ចែងអូសខ្លួនលោក ណេតាន់យ៉ាហ៊ូ ទៅជម្រះក្តី។ នៅថ្ងៃទី២មករា ចៅក្រមពិសេសចំនួន៣នាក់ របស់តុលាការកំពូល គឺបានចាប់ផ្តើមពិនិត្យករណីនេះហើយ តែមិនទាន់ផ្តល់ដំណឹងថា សម្រេចយ៉ាងដូចម្តេច ហើយថានៅអាចសម្រេចនៅពេលណា ក៏ទេដែរ។
ការស្នើសុំ«អភ័យឯកសិទ្ធិសភា» និងសវនាការកាត់ទោសរឿងពុករលួយរបស់លោក ណេតាន់យ៉ាហ៊ូ ច្បាស់ជាត្រូវពន្យារពេល?
តួនាទីនាយករដ្ឋមន្ត្រី និងប្រធានសភា សុទ្ធតែផុតអាណត្តិទាំងអស់គ្នា។ ដូចគេបានដឹងស្រាប់ថា ការបោះឆ្នោតជ្រើសរើសសមាជិកសភា ដល់ទៅពីរលើកនៅឆ្នាំ២០១៩ គឺគ្មានបក្សណាមួយ អាចទទួលបានសំឡេងភាគច្រើន រៀបចំរដ្ឋសភា និងដើម្បីសម្រេចផ្តល់សេចក្តីទុកចិត្ត ក្នុងការតែងតាំងក្បាលម៉ាស៊ីនរដ្ឋាភិបាល បានដែរ។ ប្រធានាធិបតីអ៊ីស្រាអែល លោក Reuven Rivlin ធ្លាប់បានចាត់តាំង ឱ្យលោក ណេតាន់យ៉ាហ៊ូ ម្តងនិងម្តងទៀត ឱ្យលោក បេនី ហ្កាន់ គូប្រជែង ដើម្បីរៀបចំរដ្ឋាភិបាល តែគ្មាននរណាអាចប្រមូលសំឡេងសមាជិកសភាគ្រប់គ្រាន់ សម្រាប់ធ្វើកិច្ចការនេះទេ។ ដូច្នេះ ប្រធានាធិបតី នៅទីបំផុត តម្រូវឱ្យប្រធានាសភាបណ្តោះអាសន្ន រៀបចំការបោះឆ្នោតជាថ្មី បោះឆ្នោតជាលើកទី៣ នៅខែមីនា ២០២០។
ក្នុងដំណាក់កាលនេះ លោក ណេតាន់យ៉ាហ៊ូ នៅតែបន្តកាន់តំណែងបណ្តោះអាសន្ន ហើយនៅតែតែលោកជាប់បណ្តឹងនិងការចោទប្រកាន់ច្រើន។ ក្រៅពីបទចោទផ្លូវការរបស់រដ្ឋអាជ្ញា លោកត្រូវគេចោទក្រៅផ្លូវការថាទទួលលុយសំណូកពីផលិតករកុនហូលីវូដ និងសេដ្ឋីអូស្ត្រាលី ហើយលោកក៏ត្រូវគេចោទទៀត ថាជួយជ្រោមជ្រែងកាសែតមួយនៅក្នុងស្រុក ឱ្យល្បីល្បាញ ហើយជាថ្នូរនឹងផ្សាយរឿងល្អៗពីការដឹកនាំរបស់លោក។
សម្រាប់ពលរដ្ឋអ៊ីស្រាអែលមួយចំនួន និងជាអ្នកគាំទ្រលោកណេតាន់យ៉ាហ៊ូផង គេយល់ថា ក្នុងស្ថានការណ៍អ៊ីស្រាអែល ដែលត្រូវប្រឈមមុខនឹងសត្រូវជុំទិសនៅមជ្ឈិមបូព៌ាយ៉ាងដូច្នេះ គឺចាំបាច់បុរសរដ្ឋដ៏ខ្លាំង កាន់អំណាចកណ្តាប់ដៃដែក ដូចណេតាន់យ៉ាហ៊ូ អ៊ីចឹងទើបអាចទប់ទល់ឈ្នះសត្រូវ។ ទំនងដោយសារតែការយល់ដូច្នេះទេដឹង ទើប ណេតាន់យ៉ាហ៊ូ អាចកាន់អំណាចបានដល់ទៅ៤អាណត្តិឯណោះ គឺចាប់តាំងពីឆ្នាំ១៩៩៦-១៩៩៩, និង២០០៩។
អ្នកវិភាគស្ថានការណ៍នយោបាយអ៊ីស្រាអែល និងអ្នកនិយមប្រជាធិបតេយ្យ គឺថា ការកាន់អំណាចតែម្នាក់ឯង នាំឱ្យមានអំពើពុករលួយ ការបង្កើតបក្សពួក ក្រាញអំណាច ហើយជាសញ្ញាណមិនប្រសើរសោះឡើង។ សម្រាប់ប្រជាធិបេត្យនៃរដ្ឋមួយ ចាំបាច់ត្រូវមានការផ្លាស់ប្តូរវេនគ្នាកាន់កិច្ចការស្រុកទេស ក្នុងថេរវេលាកំណត់ណាមួយ។ ប៉ុន្តែ នាយករដ្ឋមន្ត្រីផុតអាណត្តិ ណេតាន់យ៉ាហ៊ូ លើកឡើងថា «ប្រទេសអ៊ីស្រាអែល គឺពលរដ្ឋអ៊ីស្រាអែលជាអ្នកសម្រេច»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ