គីមជុងអ៊ុន ប្រមុខដឹកនាំកូរ៉េខាងជើងត្រៀមចូលចរចាជាមួយសេអ៊ូល
ចុះផ្សាយនៅថ្ងៃ៖
ស្តាប់ - ០៦:១៩
កូរ៉េខាងជើង បានស្វាគមន៍ឆ្នាំថ្មី ឆ្នាំសកល ២០១៥ ជាមួយនឹងការបោះដៃទៅរកកូរ៉េខាងត្បូង ជាបងប្អូនគូសត្រូវនឹងគ្នា។ នាឱកាសថ្លែងសារជូនពរឆ្នាំថ្មី ប្រមុខដឹកនាំ គីម ជុងអ៊ុន បានប្រកាសនៅថ្ងៃព្រហស្បតិ៍ទី ១ មករា នេះ ត្រៀមទៅចូលចរចា ជាន់ខ្ពស់ ជាមួយក្រុងសេអ៊ូល ដើម្បីបើកទំព័រប្រវត្តិសាស្ត្រថ្មី ចារអំពីទំនាក់ទំនងប្រទេសទាំងពីរ។ សេចក្តីថ្លែងការណ៍នេះ ធ្វើឡើងតែពីរបីថ្ងៃក្រោយ សំណើរបស់អាជ្ញាធរកូរ៉េខាងត្បូង។
ប្រមុខដឹកនាំរបបកុម្មុយនិស្តកូរ៉េខាងជើង គីមជុងអ៊ុន បានធ្វើសំណើ ថាត្រៀមទៅចរចាជាមួយកូរ៉េខាងត្បូង ក្នុងពេលថ្លែងសុន្ទរកថា ជាប្រពៃណី ជូនពរឆ្នាំថ្មី ឆ្នាំសកល ដែលគ្មាននរណាគិតស្មានដល់សោះ។ សុន្ទរកថាឆ្នាំថ្មី នៅកូរ៉េខាងជើង ជាទូទៅ ត្រូវបានគេចាត់ទុកជាប្រកាសផែនការ ឬបន្ទាត់នយោបាយ និងការដឹកនាំប្រទេស រយៈពេលមួយឆ្នាំខាងមុខ
នៅក្នុងសារនេះ ប្រមុខដឹកនាំព្យុងយ៉ាង បានបង្ហើបលក្ខខណ្ឌថា បើបរិបទ និងបរិយាកាសហុចឱ្យហើយ "គ្មានហេតុផលអ្វីដែលមិនត្រូវរៀបចំជំនួបជាន់ខ្ពស់ឡើយ"។ ប្រសិនបើអាជ្ញាធរកូរ៉េខាងត្បូង មានចេតនាពិតចង់ធ្វើឱ្យទំនាក់ទំនងកូរ៉េទាំងពីរប្រសើរឡើងមែន ការពិភាក្សាជាន់ខ្ពស់នឹងត្រូវមានឡើងវិញ” ! ពាក្យមួយឃ្លា ដែលសារព័ត៌មានកូរ៉េខាងត្បូង បកស្រាយថាជាការព្រមឱ្យមានជំនួបថា្នក់កំពូលជាមួយនឹងលោកស្រីប្រធានាធិបតី ប៉ាក់ គុនហេ តែម្តង។
ជំនួបជាន់ខ្ពស់ អន្តរ-កូរ៉េ ត្រូវបានអាក់ខានជាយូរឆ្នាំមកហើយ។ ជំនួបចុងក្រោយបង្អស់ ប្រព្រឹត្តទៅនៅឆ្នាំ ២០០៧ នៅទីក្រុងព្យុងយ៉ាង តាំងពីសម័យកូរ៉េខាងត្បូងដឹកនាំដោយ ប្រធានាធិបតី Roh Moo-Hyun (ដែលបានបាត់ជីវិតទៅហើយ) ជាមួយលោក គីម ជុងអ៊ីលអគ្គមគ្គុទេសក៍របបកុម្មុនិស្តកូរ៉េខាងជើង (ដែលទទួលមរណភាពនៅឆ្នាំ២០១១) និងទទួលស្នងតំណែងបន្តដោយលោក គីម ជុងអ៊ុន ជាកូននាពេលបច្ចុប្បន្ននេះ។
ព្យុងយ៉ាងក្នុងសំឡេងផ្សះផ្សា
លោកគីមជុនអ៊ុន បានត្រៀមទៅចរចាជាមួយកូរ៉េខាងត្បូង ប៉ុន្តែ បានដាក់លក្ខខណ្ឌមួយ ចង់ឃើញកូរ៉េខាងត្បូងបិទបញ្ចប់សមយុទ្ធជាមួយនឹងសហរដ្ឋអាមេរិក។ ប៉ុន្តែទាំងសារ និងទាំងភាសារបស់លោក គីម ជុងអ៊ុនហាក់ដូចជាមានសភាពស្រទន់ និង ផ្សះផ្សា ជាងមុន។ ព្យុងយ៉ាងចង់ឱ្យប្រទេសដែលជាគូសត្រូវ នៅមានសង្គ្រាមនឹងគ្នាបើនិយាយតាមភាសាបច្ចេកទេស មានភាពប្រសើរនឹងគ្នាឡើងវិញ តាមផ្លូវចរចា។ មិនតែប៉ុណ្ណោះ គីម ជុងអ៊ុន បានថែមទាំងអញ្ជើញវ៉ាស៊ីនតោនឱ្យ មានសេចក្តីក្លាហានប្តូរឥរិយាបថនិងទស្សនៈចំពោះរបបព្យុងយ៉ាង ក្នុងនាមជាមហាអំណាច ឱ្យដើរតួគោរពសិទ្ធិមនុស្ស និងបានលើកឡើងអំពីលក្ខខណ្ឌជីវិតប្រសើរឡើងនៅកូរ៉េខាងជើង ខុសកាលពី សុន្ទរកថានៅឆ្នាំ២០១១ នាពេលទើបឡើងកាន់អំណាចបន្តពីឪពុកភ្លាម លោក គីមជុងអ៊ុនបានសន្យាដឹកនាំប្រទេសបន្តនយោបាយអភិវឌ្ឍន៍នុយក្លេអ៊ែរ និងយោធា មិនគិតពីបញ្ហាសេដ្ឋកិច្ចឡើយ។
មួយរយៈចុងក្រោយនេះ របបដឹកនាំកុម្មុយនិស្តព្យុងយ៉ាង រងការរិះគន់ខ្លាំងណាស់ពីសំណាក់សហគមន៍អន្តរជាតិ។ ក្រុមប្រឹក្សាសន្តិសុខអង្គការសហប្រជាជាតិ បានចំណាយពេលស្ទើរពេញមួយខែធ្នូ ២០១៤ ពិចារណាលើសំណុំរឿងកូរ៉េខាងជើង ដោយចង់នាំរដ្ឋាភិបាល និងប្រមុខដឹកនាំប្រទេសនេះ ទៅកាត់ទោសនៅតុលាការព្រហ្មទណ្ឌអន្តរជាតិ ពីបទរំលោភសិទ្ធិមនុស្ស។ កូរ៉េខាងជើង ប្រទេសដ៏ឯកា និងបិទជិតឈឹងជាងគេនៅលើពិភពលោក បានរងការកាត់ផ្តាច់ប្រព័ន្ធអ៊ីនធ័រនែត យ៉ាងចម្លែកមិនធ្លាប់មាន ម្តងជាពីរដង បន្ទាប់ពីមានភាពមិនចុះសម្រុងគ្នាខ្លាំងជាមួយសហរដ្ឋអាមេរិក ៖ វ៉ាស៊ីនតោនចោទព្យុងយ៉ាង ថាបានលួចវាយប្រហារតាមអ៊ីនធ័រនែតក្រុមហ៊ុនភាពយន្តសូនី និងសន្យាសងសឹក…
ទំនាក់ទំនងជាមួយសហរដ្ឋអាមេរិក និងប្រទេសដទៃទៀត ពិបាកធ្វើឱ្យប្រសើរខ្លាំងណាស់ ! ដូច្នេះកូរ៉េខាងជើងគ្មានជម្រើសអ្វីទៀតទេ ! ក្រៅពីទទួលស្គាល់ការពិត ងាកទៅរក កូរ៉េខាងត្បូងជាបងប្អូនបង្កើតគូសត្រូវនឹងគ្នា។ កូរ៉េខាងជើងទំនងជាយល់ និងមើលឃើញការពិតថា អាចបំបែកភាពឯការបស់ខ្លួន ដោយចាំបាច់ត្រូវតែឆ្លងកាត់កូរ៉េខាងត្បូង។
តាំងពីបានជាប់ឆ្នោត ក្លាយជាប្រធានាធិបតីកូរ៉េខាងត្បូង នៅដើមឆ្នាំ២០១៣មក លោកស្រី ប៉ាក់ គុនហេ បានទន្ទេញពាក្យដដែលៗ ថាទ្វារបើកចំហចាំជានិច្ច ឱ្យព្យុងយ៉ាងសុខចិត្តចាត់វិធានការច្បាស់លាស់ឈានទៅរកការបោះបង់កម្មវិធីនុយក្លេអ៊ែរ។ ការចរចាផ្លូវការអន្តរកូរ៉េ កាលពីខែកុម្ភៈបានជំរុញឱ្យគ្រួសារបែកបាក់ព្រោះសង្គ្រាមបានជួបគ្នា ទោះបីកូរ៉េខាងត្បូងនិងសហរដ្ឋអាមេរិកចាប់ផ្តើមធ្វើសមយុទ្ធរួមគ្នា ក៏ការជួបជុំគ្រួសារនៅតែប្រព្រឹត្តទៅរហូតចប់ចុងចប់ដើម។ ជំនួយឯកជនពីកូរ៉េខាងត្បូងទៅខាងជើង ក៏ត្រូវបានអនុគ្រោះ មានជាហូរហែផង។ បន្ទាប់ពីដំណើរទស្សនកិច្ចដ៏កម្ររបស់មន្ត្រីជាន់ខ្ពស់កុម្មុយនិស្តបីរូបគ្រាក់ៗ នៅសេអ៊ូល កាលពីខែតុលាកូរ៉េទាំងពីរបានសុខចិត្តសុខកាយចាប់បើកការចរចាឡើងវិញ។
កាលពីថ្ងៃចន្ទ រដ្ឋមន្ត្រីក្រសួងបង្រួបបង្រួមកូរ៉េ របស់កូរ៉េខាងត្បូង បានប្រកាសត្រៀមជួបពិភាក្សាជាមួយតំណាងរបស់ខាងជើង និងបានអំពាវនាវឱ្យរដ្ឋាភិបាលកុម្មុយនិស្តនេះ ផ្តល់ចម្លើយឱ្យបានឆាប់រហ័ស។ ក្រោយពីបានឮសំដីរបស់ប្រមុខដឹកនាំកូរ៉េខាងជើងភ្លាម ក្រសួងបង្រួបបង្រួមកូរ៉េរបស់កូរ៉េខាងត្បូងបានសម្តែងការស្វាគមន៍ និងបានស្នើជួបពិភាក្សាគ្នា ចាប់ពីខែមករានេះទៅភ្លាមតែម្តង។ តំណាងសហរដ្ឋអាមេរិកក៏បានបង្ហាញឱ្យដឹងអំពីការគាំទ្រ នៅពេលឃើញកូរ៉េទាំងពីរមានទំនាក់ទំនងនឹងគ្នាប្រសើរឡើងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ