កូរ៉េខាងត្បូងស្នើកិច្ចចរចាថ្នាក់មន្ត្រីជាន់ខ្ពស់រវាងកូរ៉េទាំងពីរនៅខែមករា
កូរ៉េខាងត្បូងនៅថ្ងៃចន្ទ២៩ធ្នូនេះ បានធ្វើសំណើដល់កូរ៉េខាងជើងសុំឲ្យមានកិច្ចចរចាថ្នាក់មន្ត្រីជាន់ខ្ពស់រវាងកូរ៉េទាំងពីរនៅខែមករាខាងមុខស្តីអំពីបញ្ហាប្រមូលជួបជុំក្រុមគ្រួសារកូរ៉េដែលបានបែកបាក់គ្នាដោយសារសង្គ្រាម។ គំនិតផ្តួចផ្តើមនេះ ត្រូវបានប្រព្រឹត្តទៅនៅខណៈពេល ដែលការរំលោភសិទ្ធិមនុស្សនៅកូរ៉េខាងជើងកាន់តែធ្លាក់ចុះដុនដាបនិងរងការចោទប្រកាន់របស់អាមរិកនៅក្នុងការវាយប្រហារប្រព័ន្ធព័ត៌មានវិទ្យារបស់ក្រុមហ៊ុនផលិតភាពយន្តSONY។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៨
រដ្ឋមន្ត្រីក្រសួងបង្រួបបង្រួមកូរ៉េទទួលបន្ទុកសំណុំរឿងកូរ៉េខាងជើង លោក Ryoo Kuhl-Jae, បានថ្លែងនៅក្នុងសន្និសីទកាសែតមួយនៅថ្ងៃចន្ទនេះ-ថាលោកបានត្រៀមជាសេ្រចដើម្បីជួបចរចាជាមួយអ្នកតំណាងរបស់កូរ៉េខាងជើង នៅទីណាក៏បាន គឺនៅសេអ៊ូលឬក៏ព្យុងយ៉ាង។ រដ្ឋមន្ត្រីកូរ៉េខាងត្បូង បានបន្តទៀតថា«លោក សង្ឃឹមថាកូរ៉េខាងជើងពិតជានឹងយល់ព្រមតាមសំណើររបស់កូរ៉េខាងត្បូង ដោយបានបញ្ជាក់ដែរ-ថាសំណើជាផ្លូវការដើម្បីជំរុញកិច្ចចរចានេះ ត្រូវបានបញ្ជូនទៅកាន់លោក Kim Yang-Gon សមភាគីកូរ៉េខាងជើងដែរ។
ក្រៅពីបញ្ហាជំនួបរវាងក្រុមគ្រួសាកូរ៉េ កិច្ចចរចានឹងត្រូវផ្តោតផងដែរទៅលើការប្រារព្ធព្រឹត្តិការណ៍នានា ដូចជាពិធីរំលឹកខួប៧០ឆ្នាំនៃការបែងចែកឧបទ្វីបកូរ៉េ ក្រោយពីចប់សង្គ្រាមលោកលើកទីពីរនៅឆ្នាំ១៩៤៥ គឺ៥ឆ្នាំ មុនសង្គ្រាមនៅកូរ៉េ ១៩៥០-១៩៥៣។
“យើងត្រូវការចាំបាច់កិច្ចចរចានិងសហប្រតិបត្តិការជាមួយកូរ៉េខាងជើង ដើម្បីអាចឲ្យយើង មានលទ្ធភាពក្នុងការប្រារព្ធព្រឹត្តិការណ៍សំខាន់ៗបែបនេះបាន” មិនតែប៉ុណ្ណោះ កិច្ចចរចានេះ ក៏អាចនឹងអាចជួយសម្រាលផងដែរ សេចក្តីទុក្ខសោករបស់ក្រុមគ្រួរសាកូរ៉េ នៅមុនចូលឆ្នាំចិនខាងមុខនេះ”-នេះជាការបញ្ជាក់របស់រដ្ឋមន្ត្រីកូរ៉េខាងត្បូង។
កាលពីខែតុលាមុន ប្រទេសគូសត្រូវទាំងពីរ បានសំរេចចិត្តរៀបចំកិច្ចចរចាជាមួយគ្នាឡើងវិញ បន្ទាប់ពីថ្នាក់ដឹកនាំកូរ៉េខាងជើង៣រូប បានទៅបំពេញទស្សនកិច្ចនៅក្រុងសេអ៊ូល។ ក៏ប៉ុន្តែ បន្ទាប៉ពីមានភាពតានតឹងនៅតំបន់ព្រំដែន គម្រោងកិច្ចចរចានេះ ក៏ត្រូវអាក់ខានវិញ ។
ស្ថានភាពនៅព្រំដែន ក៏មិនងាយធូស្រាលដែរ ដោយហេតុសកម្មជនកូរ៉េខាងត្បូង បានបង្ហោះខិតប័ណ្ណឥតស្រាកស្រាន្តប្រឆាំងនឹងរបបព្យុងយ៉ាង។ កូរ៉េខាងជើង បានទាមទារឲ្យកូរ៉េខាងត្បូង ចាត់វិធានការ បញ្ចប់សកម្មភាពបង្ហោះខិតប័ណ្ណប្រឆាំងខ្លួនសិន មុននឹងចាប់ផ្តើមកិច្ចចរចាជាថ្មីឡើងវិញ តែកូរ៉េខាងត្បូង បានឆ្លើយបដិសេធ ថា គ្មានមូលដ្ឋានច្បាប់ណាមួយហាមប្រាមការបង្ហោះខិតប័ណ្ណទេ។
ម្យ៉ាងទៀត យោងតាមយោបល់របស់អ្នកវិភាគម្នាក់នៅវិជ្ជាស្ថាន Sejong “ របបព្យុងយ៉ាង មិនច្បាស់ជាយល់ព្រមស្រួលៗ តាមសំណូមពរកូរ៉េខាងត្បូងឡើយនៅក្នុងការរៀបចំកិច្ចចរចានៅពេលខាងមុខ ពីព្រោះ កូរ៉េខាងត្បូង ពុំបានឆ្លើយតបជាវិជ្ចមានណាមួយឡើយចំពោះកូរ៉េខាងជើងនៅលើដំណោះស្រាយការបង្ហោះខិត្តបណ្ណប្រឆាំងកូរ៉េខាងជើង។
ក៏ប៉ុន្តែ របបកូរ៉េខាងជើង នាពេលនេះ មានអារម្មណ៍ដឹងថា ខ្លួនកំពុង តែជាប់កុននៅក្នុងវិបត្តិមួយជាមួយអាមេរិក ចាប់តាំងពីអាមេរិក បានចោទរបបព្យុងយ៉ាងថា ជាអ្នកវាយប្រហារក្រុមហ៊ុនSONY មក។ ដូច្នេះ កូរ៉េ ខាងជើងអាចនឹងហុចដៃទៅសេអ៊ូលដែរ ដើម្បីប៉ុនប៉ងរិះរកការបន្ធូរស្រាលនូវភាពតានតឹងទាំងនេះ-នេះជាការយល់ឃើញរបស់អ្នកវិភាគនៃវិជ្ជាស្ថាន Sejong របស់កូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ