ឥណ្ឌា និងប៉ាគីស្ថានបានព្រមព្រៀងបើកឲ្យមានកិច្ចចរចាសន្តិភាពជាថ្មី
នៅថ្ងៃពុធ ទី៩ ធ្នូ ប្រទេសឥណ្ឌា និងប៉ាគីស្ថានបានប្រកាសឲ្យដឹងពីការផ្តើមបើកឡើងវិញនូវកិច្ចចរចាសន្តិភាពរវាងគ្នានាថ្ងៃខាងមុខ។ ដំណឹងនេះត្រូវបានធ្វើឡើងនៅក្នុងសេចក្តីប្រកាសព័ត៌មានរួមគ្នារវាងមហាអំណាចនុយក្លេអ៊ែរជិតខាងទាំងពីរដែលធ្លាប់បានធ្វើសង្រ្គាមនឹងចំនួន ៣លើកនាពេលកន្លងមក។ គួរជម្រាបជូនថា កិច្ចចរចាសន្តិភាពរវាងឥណ្ឌា និងប៉ាគីស្ថានធ្លាប់បានធ្វើជាហូរហែ តែត្រូវបានផ្អាកជាច្រើនដង ហើយភាពតានតឹងក៏បានផ្ទុះជាថ្មី ពិសេសនារយៈពេលប៉ុន្មានឆ្នាំចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ការព្រមព្រៀងឲ្យចាប់បើកជាថ្មីនូវកិច្ចចរចាសន្តិភាពរវាងឥណ្ឌា និងប៉ាគីស្ថានត្រូវបានធ្វើឡើងនៅក្នុងការបិទបញ្ចប់សន្និសីទបេះដូងនៃតំបន់អាស៊ី Heart of Asia ដែលបានរៀបចំក្នុងទីក្រុងអ៊ីស្លាម៉ាបាត ប្រទេសប៉ាគីស្ថាន។ ជាសន្និសីទតំបន់ដែលចូលរួមដោយសមាជិក ១៤ប្រទេស ក្នុងនោះក៏មានឥណ្ឌា និងប៉ាគីស្ថានដែរ។ នាឱកាសសន្និសីទតំបន់ លោកប្រមុខការទូតឥណ្ឌា និងសមភាគីប៉ាគីស្ថានបានជួបសន្ទនាគ្នា រួចក៏បានឯកភាពគ្នាបើកឲ្យមានកិច្ចចរចាសន្តិភាពរវាងគ្នាឡើងវិញ។ តែប្រមុខការទូតនៃប្រទេសទាំងពីរនឹងត្រូវជួបគ្នាជាថ្មីដើម្បីកំណត់ពីថ្ងៃខែឆ្នាំ និងទីកន្លែងជំនួប។
បើយោងតាមសេចក្តីប្រកាសព័ត៌មានរួម ប្រធានរឿងនៃកិច្ចចរចានឹងផ្តោតសំខាន់លើដំណើរស្វែងរកសន្តិភាព បញ្ហាសន្តិសុខ និងជម្លោះដែនដី ពិសេសនៅតំបន់ Cachemire ដែលមហាអំណាចនុយក្លេអ៊ែរអាស៊ីជិតខាងទាំងពីរធ្លាប់បានធ្វើសង្រ្គាមនឹងគ្នាចំនួន ៣ដងតាំងពីទទួលបានឯករាជ្យរៀងៗខ្លួនក្នុងឆ្នាំ ១៩៤៧។ នៅក្រោយអំពើភេរវកម្មក្នុងទីក្រុងប៊ុមបៃនាខែវិច្ឆិកា ឆ្នាំ ២០០៨ ឥណ្ឌាបានសម្រេចព្យួរកិច្ចចរចាជាមួយប៉ាគីស្ថាន ព្រោះឥណ្ឌាយល់ថា អំពើភេរវកម្មនោះបានរៀបចំចេញពីទឹកដីប៉ាគីស្ថាន។
៣ឆ្នាំក្រោយមក ពោលក្នុងឆ្នាំ ២០១១ គូសត្រូវទាំងពីរក៏បានសម្រេចបើកកិច្ចចរចាសន្តិភាពជាថ្មី តែទំនាក់ទំនងរវាងគ្នាហាក់ដូចជាកាន់តែធ្លាក់ដុនដាបនារយៈពេលប៉ុន្មានឆ្នាំចុងក្រោយនេះ ពិសេសតាំងពីលោកណារ៉េនដ្រា ម៉ូឌីឡើងកាន់តំណែងជានាយករដ្ឋមន្រ្តីឥណ្ឌាក្នុងឆ្នាំ ២០១៤។ តាំងពីឆ្នាំ ២០១៤ មានការប៉ះទង្គិចផ្លូវអាវុធជាច្រើនដងរវាងកងទ័ពនៃប្រទេសទាំងពីរដែលប្រចាំការនៅតាមព្រំដែនតំបន់ Cachemire។ គឺទើបតែនៅក្រោយជំនួបរយៈពេលខ្លីរវាងលោកណារ៉េនដ្រា ម៉ូឌី និងសមភាគីប៉ាគីស្ថានណាវ៉ា ស្ហារី្វនាឱកាសបើកសន្និសីទអន្តរជាតិស្តីពីអាកាសធាតុក្នុងប្រទេសបារាំងកាលពីថ្ងៃទី៣០ វិច្ឆិកាថ្មីៗនេះទេដែលភាពតានតឹងហាក់ដូចជាធូរស្រាលបន្តិច និងរហូតមានការឯកភាពគ្នាឲ្យបើកកិច្ចចរចាជាថ្មីនៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ