បក្សសាធារណរដ្ឋបោះឆ្នោតច្បាប់ស្តីពីថវិកាបន្ថែមសម្រាប់រដ្ឋាភិបាល
ចុះផ្សាយនៅថ្ងៃ៖
ស្តាប់ - ០៧:១២
កាលពីថ្ងៃសុក្រម្សិលមិញ សភាអាមេរិកាំង ដែលមានអ្នកតំណាងរាស្រ្ត ភាគច្រើនមកពីគណបក្សសាធារណរដ្ឋ បានបោះឆ្នោតច្បាប់ថវិកាថ្មីមួយ ដែលនឹងអនុញ្ញាតឲ្យរដ្ឋាភិបាលបន្តខ្ចីប្រាក់បំណុលបន្ថែមប្រមាណ៩៨៦ពាន់លានដុល្លារ។ ច្បាប់ថវិកានេះត្រូវបានអនុម័តដោយរលូន គឺដោយសំឡេងគាំទ្រ២៣០ នៅពេលមានអ្នកប្រឆាំង១៨៩។ នៅថ្ងៃទី ១ តុលា រដ្ឋាភិបាលអាមេរិកនឹងអស់ថវិកាពីហិប ដើម្បីបើកប្រាក់ខែដល់មន្រ្តីរដ្ឋការរបស់ខ្លួន។
មើលពីសំបកខាងក្រៅ រដ្ឋាភិបាលអាមេរិកនឹងអស់បញ្ហា លែងជួបឧបសគ្គខ្វះថវិកាទៀត ហើយ ព្រោះសភា និយាយឲ្យចំ គឺក្រុមសាធារណរដ្ឋបានយល់ព្រមបោះឆ្នោតលើថវិកាបន្ថែមដល់រដ្ឋាភិបាល។ ប៉ុន្តែ បើមើលឲ្យស៊ីជម្រៅ តាមពិត វាជាអំណោយដែលបង្កប់ដោយថ្នាំ ពិសពុល ព្រោះថា ក្រុមសាធារណរដ្ឋយល់ព្រមបើកផ្លូវឲ្យរដ្ឋាភិបាលខ្ចីប្រាក់បន្ថែមមែន ប៉ុន្តែ គឺគ្រាន់តែ ដើម្បីដោះទ័លតែប៉ុណ្ណោះ គឺរហូតដល់ចុងឆ្នាំនេះ។ ដូច្នេះ ចាប់ពីដើមឆ្នាំក្រោយទៅ រដ្ឋាភិបាលនឹងអាចជួបវិបត្តិថវិកាជាថ្មីទៀត នៅពេលចាយអស់លុយដែលសភាបានអនុម័ត។
ទីពីរទៀត នៅក្នុងច្បាប់ដែលអ្នកតំណាងរាស្រ្តសាធារណរដ្ឋបានបោះឆ្នោតអនុម័ត គេបានចងលក្ខខណ្ឌមួយភ្ជាប់ជាមួយ គឺគេត្រូវលុបចោលថវិកាសុខភាពរបស់លោកអូបាម៉ាចោល។ គឺរឿងលុបចោលថវិកាផ្គត់ផ្គង់សេវាសុខភាពនេះហើយ ដែលនឹងធ្វើឲ្យច្បាប់ថវិកានេះលែងទៅជាមានន័យទៅវិញ។ ប្រធានក្រុមតំណាងរាស្រ្តមកពីគណបក្សប្រជាធិបតេយ្យដែលមានសំឡេងភាគច្រើន នៅព្រឹទ្ធសភា បានអះអាងហើយថា នឹងបដិសេធរុញច្រានចោល នៅពេលច្បាប់មកដល់ព្រឹទ្ធសភា។ មានន័យថា ច្បាប់នឹងត្រូវបញ្ជូនត្រលប់មកឲ្យរដ្ឋសភាសិក្សា កែប្រែ ឡើងវិញ។ មួយវិញទៀត នៅតែប៉ុន្មានម៉ោងប៉ុណ្ណោះ ក្រោយការបោះឆ្នោតរបស់រដ្ឋសភា លោកអូបាម៉ាផ្ទាល់ ដែលជាអ្នកស្នើ ច្បាប់សុខភាពនេះ បានប្រកាសហើយថា លោកនឹងវេតូមិនឲ្យច្បាប់នេះ ចេញ បានជាដាច់ខាត។
បើសិនជាសភាអាមេរិកខកខានមិនព្រមអនុម័តចេញច្បាប់ថវិកានេះបន្ថែម គឺច្បាស់ណាស់ថា រដ្ឋនឹងគ្មានលុយនៅក្នុងហិបដើម្បីបើកប្រាក់ខែដល់មន្រ្តីរដ្ឋការ។ ជារួម សេវាសាធារណៈនឹងត្រូវផ្អាក ការិយាល័យរដ្ឋបាល ដូចជាកន្លែងធ្វើលិខិតឆ្លងដែន ឬសួនសាធារណៈនឹងត្រូវបិទទ្វារ ដោយសារគ្មានថវិកាសម្រាប់បុគ្គលិករដ្ឋ។
បុគ្គលិករដ្ឋមួយចំនួនដែលមានមុខងារមិនសំខាន់នឹងត្រូវព្យួរផ្អាកការងារ គឺដូចគ្នានឹងមន្រ្តីកងទ័ពមួយចំនួន។ តាមអ្នកតំណាងរាស្រ្តមកពីគណបក្សប្រជាធិបតេយ្យ បុគ្គលិករបស់FBI និងប៉ូលិសត្រួតពិនិត្យសុវត្ថិភាពក៏នឹងត្រូវផ្អាកការងារដោយសារតែរដ្ឋខ្វះថវិកានេះដែរ។ នេះបើនិយាយពីកញ្ចប់ថវិកាដែលគេត្រូវការបន្ទាន់ ឲ្យបានមុនថ្ងៃទី ១តុលាការ ជាថ្ងៃ ដែលរដ្ឋអាមេរិកអស់លុយពីហិបជាផ្លូវការ។
មួយវិញទៀត ក្រៅតែច្បាប់ថវិកាបន្ថែម នៅមានច្បាប់មួយដែលរដ្ឋាភិបាលចង់ឲ្យសភាអនុម័ត នោះគឺការដំឡើងចំនួនប្រាក់បំណុលព្រោះថា ពេលនេះ រដ្ឋាភិបាលបានខ្ចីប្រាក់បំណុលគេរហូតដល់ចំនួនដែលច្បាប់កំណត់ គឺប្រមាណ ១៦៧០០ពាន់លានដុល្លារ។ រដ្ឋាភិបាលកំពុងទាមទារឲ្យសភាទាំងពីរថ្នាក់ធ្វើច្បាប់នេះឲ្យឆាប់ គឺមុនពាក់កណ្តាលខែតុលាខាងមុខ។ បើមិនដូច្នោះទេ រដ្ឋមិនត្រឹមតែគ្មានប្រាក់ដើម្បីបើកប្រាក់ខែឲ្យបុគ្គលិករដ្ឋប៉ុណ្ណោះទេ ប៉ុន្តែ រដ្ឋក៏នឹងគ្មានប្រាក់ដើម្បីសងការប្រាក់ដល់ម្ចាស់បំណុលទៀត។ រដ្ឋមន្រ្តីសេដ្ឋកិច្ចអាមេរិកធ្លាប់ព្រមានហើយថា អាមេរិកនឹងអាចជួបវិបត្តិប្រាក់បំណុលជាថ្មី បើសិនជាសភាខកខានមិនធ្វើច្បាប់ដំឡើងប្រាក់បំណុលទាន់ពេល។ អាមេរិកជួបវិបត្តិថវិកា នឹងធ្វើឲ្យម្ចាស់ប្រាក់បំណុលលែងទុកចិត្ត ឲ្យប្រាក់ខ្ចី ឬបើឲ្យខ្ចី គឺជាមួយអត្រាការប្រាក់ខ្ពស់។ ផលវិបាកនេះមិនត្រឹមតែប៉ះពាល់ដល់សេដ្ឋកិច្ចអាមេរិកប៉ុណ្ណោះទេ ប៉ុន្តែ នឹងប៉ះពាល់ដល់ទីផ្សារសេដ្ឋកិច្ចពិភពលោកទាំងមូល។
រហូតមកដល់ពេលនេះ គេកំពុងបារម្ភពីរឿងនេះ ព្រោះថា ភាគីទាំងពីរ សភា មកពីគណបក្សសាធារណរដ្ឋ និងលោកប្រធានាធិបតីអូបាម៉ា នៅតែរឹងរូសនិយាយមិនត្រូវគ្នា។ ក្រុមប្រឆាំងបានបោះឆ្នោតច្បាប់នេះ មែន ប៉ុន្តែ គេទាមទារឲ្យលុបចោលច្បាប់សុខភាពរបស់លោកអូបាម៉ា។
លោកអូបាម៉ាវិញដែលជាបានចេញមុខការពារច្បាប់សុខភាពយ៉ាងដាច់ខាត បានបញ្ជាក់ហើយថា លោកនឹងមិនចរចា ឬក៏យល់ព្រមធ្វើសម្បទាន ជាមួយគណបក្សសាធារណរដ្ឋ ដូចដែលលោកធ្លាប់បានធ្វើ កាលពីវិបត្តិថវិកាឆ្នាំ ២០១១កន្លងមកនោះទេ។
កាលណោះ ដើម្បីឲ្យក្រុមគណបក្សសាធារណរដ្ឋ ដែលមានសំឡេងភាគច្រើននៅសភា យល់ព្រមបោះឆ្នោតឲ្យដំឡើងចំនួនប្រាក់បំណុលបន្ថែម ដែលរដ្ឋាភិបាលត្រូវការចាំបាច់ លោកអូបាម៉ាបានយល់ព្រមតាមការទាមទាររបស់គណបក្សសាធារណរដ្ឋ គឺសុខចិត្តអនុវត្តនយោបាយកាត់បន្ថយចំណាយសាធារណៈប្រមាណ ២១០០ពាន់លានដុល្លារ សម្រាប់រយៈពេល១០ឆ្នាំ។
លោកអូបាម៉ានឹងមិនចរចាដើម្បីនិយាយពីការលុបច្បាប់សុខភាព
ច្បាប់សុខភាពត្រូវបានអនុម័តជាផ្លូវការនៅឆ្នាំ២០១០។ ច្បាប់នេះដែលចូលជាធរមាន ចាប់ពីថ្ងៃទី១ខែតុលាបានចែងថា ប្រជាជនអាមេរិកាំងមានសិទ្ធិបានទទួលសេវាសុខភាព។ ច្បាប់នេះតម្រូវឲ្យក្រុមហ៊ុនដែលមានបុគ្គលិកចាប់ពីមនុស្ស៥០នាក់ឡើងទៅ ចូលរួមវិភាគទានដើម្បីសេវាធានាសុខភាពរបស់បុគ្គលិក។ ប្រជាពលរដ្ឋអាមេរិកាំងរាប់លាននាក់ ដែលគ្មានលទ្ធភាពបង់ថ្លៃសេវាធានារ៉ាប់រ៉ង សុខភាព នឹងបានទទួលប្រយោជន៍ពីច្បាប់សុខភាពរបស់លោកអូបាម៉ា។ ប៉ុន្តែ ក្រុមសាធារណរដ្ឋវិញយល់ថា ច្បាប់នេះធ្វើឲ្យសេដ្ឋកិច្ចអាមេរិកដើរថយក្រោយទៅវិញទ។ ពោល គឺម្ចាស់ក្រុមហ៊ុន នឹងកាត់បន្ថយបុគ្គលិក ឬមិនហ៊ានរើសបញ្ចូលបុគ្គលិកបន្ថែម ដោយគេខ្លាចបង់វិភាគទានច្រើនលើផ្នែកសុខភាពរបស់បុគ្គលិក។ ក្រុមសាធារណរដ្ឋដែលបានចូលកាន់កាប់សភា តាំងពីឆ្នាំ ២០១០អះអាងថា ប្រជាជនអាមេរិកាំងមិនចង់ឲ្យរដ្ឋាភិបាលជួបវិបត្តិថវិកា ហើយក៏មិនចង់បានច្បាប់សុខភាពរបស់លោកអូបាម៉ា។ ប្រធានក្រុមសាធារណរដ្ឋនៅរដ្ឋសភាបាននិយាយហើយថា លោកអូបាម៉ានឹងទទួលខុសត្រូវលើជោគវាសនាអាមេរិក និងមន្រ្តីដែលមិនបានទទួលប្រាក់ខែ បើសិនជាលោកមិនយល់ព្រមទទួលយកច្បាប់ថវិកាបោះឆ្នោត កាលពីថ្ងៃម្សិលមិញ។
ប៉ុន្តែ តាមការស្រង់មតិរបស់ទូរទស្សន៍ CNNប្រជាជនអាមេរិកាំងជាង ៥១ភាគរយបានយល់ថា គឺក្រុមសាធារណរដ្ឋទេ ដែលជាអ្នកទទួលខុសត្រូវលើការជាប់គាំងបញ្ហាថវិកាលើកនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ