ប្រធានាធិបតីដូណាល់ ត្រាំ រៀបចំក្រុមការងារដើម្បីទទួលតំណែង ខណៈបាតុកម្មប្រឆាំងកំពុងបន្ត
ចុះផ្សាយនៅថ្ងៃ៖
ស្តាប់ - ០៧:៤៥
៣ថ្ងៃបន្ទាប់ពីបានឈ្នះការបោះឆ្នោតប្រធានាធិបតីសហរដ្ឋអាមេរិកថ្មី លោកដូណាល់ត្រាំ បានចាប់ផ្តើមពន្លឿនល្បឿនការងារ ដោយបានចាត់តាំងក្រុមការងារ ដើម្បីធ្វើការទទួលសំណុំឯកសារពីក្រុមការងាររបស់លោកប្រធានាធិបតីអូបាម៉ា។ ដោយឡែក បាតុកម្មប្រឆាំងនឹងលោកដូណាល់ត្រាំ ប្រធានាធិបតីទើបឈ្នះឆ្នោតថ្មី នៅតែបន្តធ្វើឡើងនៅតាមទីក្រុងធំៗ ទូទាំងសហរដ្ឋអាមេរិក និងកាន់តែធំៗទៅ។ វាសនាសហរដ្ឋអាមេរិក សំណុំរឿងអន្តរជាតិ និងកិច្ចព្រមព្រៀងពាណិជ្ជកម្ម ជាច្រើន កំពុងស្ថិតក្នុងភាពស្រពេចស្រពិល ដោយសារគ្រប់គ្នា មិនអាចស្មានចិត្តដឹងពីគោលជំហររបស់លោកដូណាល់ ត្រាំ។
ចាប់ពីពេលនេះទៅ លោកដូណាល់ ត្រាំ មានពេល២ខែ ដើម្បីទទួលការងារ ផ្ទេរឲ្យដោយរដ្ឋបាលរបស់លោកអូបាម៉ា មុនឈានទៅចូលកាន់តំណែងជាផ្លូវការនៅថ្ងៃទី២០ មករាខាងមុខនេះ។ រដ្ឋាភិបាលរបស់លោកអូបាម៉ា ត្រូវធ្វើការផ្ទេរសំណុំឯកសារការងារ ព្រមទាំងធ្វើការប្រជុំពន្យល់ឲ្យបានក្បោះក្បាយ ទៅឲ្យក្រុមការងាររបស់ប្រធានាធិបតីថ្មី។ កាលពីថ្ងៃព្រហស្បតិ៍ លោកដូណាល់ ត្រាំ បានចូលទៅជួបលោកអូបាម៉ា នៅសេតវិមាន ហើយលោកអូបាម៉ា បានសន្យាថារដ្ឋបាលលោក និងចាត់ចែងធ្វើការផ្ទេរការងារទាំងអស់ ឲ្យរលូនតាមសំរួល ដោយល្អបំផុត ដើម្បីឲ្យរដ្ឋាភិបាលថ្មី អាចចាប់ផ្តើមការងារ ដឹកនាំប្រទេស យ៉ាងមានប្រសិទ្ធិភាព។
ដូណាល់ ត្រាំតែងតាំង Mike Penceជាប្រធានក្រុមការងារអន្តរកាល តែមិនភ្លេចកូនប្រុសស្រី៖
កាលពីល្ងាចថ្ងៃសុក្រ ទី១១ វិច្ឆិកា លោកដូណាល់ ត្រាំ បានចាប់ផ្តើមពន្លឿនល្បឿនការងារ។ គាត់បានចេញលិខិតប្រកាសមួយ ដោយបានប្រកាសពីការបង្កើតក្រុមការងារសម័យអន្តរកាល ដើម្បីទទួលការងារពីរដ្ឋបាលលោកអូបាម៉ា។ តាមការឲ្យដឹង លោកដូណាល់ ត្រាំ បានប្រគល់កិច្ចការនេះ ទៅឲ្យលោក Mike Pence ដែលនឹងក្លាយជាអនុប្រធានាធិបតី ជាអ្នកដឹកនាំ។ នៅក្នុងក្រុមការងារនេះ មានមនុស្សសំខាន់ៗ ជំនិតរបស់លោកដូណាល់ ត្រាំផ្សេងទៀត ដូចជា លោក Rudy Giuliani អតីតអភិបាលក្រុង New York លោក Newt Gingrich អតីតប្រធានសភាតំណាង លោកReince Priebus ប្រធានគណបក្សសាធារណរដ្ឋ និងលោក Jeff Sessions សមាជិកព្រឹទ្ធសភានៅរដ្ឋAlabama។
ក្រៅពីមនុស្សជំនិតរបស់លោកដូណាល់ ត្រាំ ដែលជាអ្នកនយោបាយធំៗទាំងនេះ គឺនៅមានកូនប្រុសស្រីគាត់ គឺលោក Donald Trump Jr លោក Eric Trump លោកស្រី Ivanka Trump និងកូនប្រសារប្រុសគាត់ ផងដែរ ដែលមានឈ្មោះនៅក្នុងក្រុមការងារ ចាត់ចែងការទទួលអំណាចនេះ។ ក្នុងខណៈពេលនេះ យើងនៅមិនទាន់ដឹងអំពីសមាសភាពរដ្ឋាភិបាលថ្មី ថាអុ្នកណានឹងធ្វើជារដ្ឋមន្ត្រីអីនៅឡើយទេ តែបើតាមការស្មាន មនុស្សទាំងអំបាលម៉ាណខាងលើនេះ សុទ្ធតែជាមនុស្សស្និទ នឹងគាំទ្រលោកត្រាំពេញទំហឹង។ ដូច្នេះ មនុស្សទាំងអស់នេះ អាចនឹងមានឈ្មោះនៅតាមក្រសួងធំៗ មិនខានទេ។
ដូណាល់ត្រាំ ក្រោយជាប់ឆ្នោត ស្លូតជាងមុន?
តាមការសង្កេត គេយល់ថា លោកដូណាល់ ត្រាំ បានផ្លាស់ប្តូរឥរិយាបថច្រើន ក្រោយពេលជាប់ឆ្នោត ពោលគឺលោកដូណាល់ ត្រាំពេលឃោសនា បោះឆ្នោតដែរជាមនុស្សសម្តីខ្លាំងៗ សម្តីរើសអើងប្រកាន់ពូជសាសន៍ សម្តីបែបកោងកាចនោះ ហាក់បន្ទន់មកស្លូតបន្តិចវិញ។
ជាការពិតមែន ជាពិសេសក្នុងឱកាសជួបប្រជុំជាមួយលោកអូបាម៉ា លោកដូណាល់ ត្រាំ ដែលធ្លាប់តែជេរប្រមាថ រិះគន់លោកអូបាម៉ា កប់ៗមាត់ បែរជាអង្គុយនិយាយបែបយ៉ាងស្លូតបូត ព្រមទាំងបាននិយាយថាខ្លួនមានកិត្តិយសណាស់ ដែលបានជួបប្រាស្រ័យជាមួយលោកអូបាម៉ា ហើយថែមទាំងនិយាយទៀតថា លោកត្រូវការជួបលោកអូបាម៉ា ច្រើនដងទៀត ដើម្បីប្រឹក្សាយោបល់។ ក្នុងឱកាសនោះ ទាំងអ្នកសារព័ត៌មាន ទាំងអ្នកនយោបាយ មានការភ្ញាក់ផ្អើលយ៉ាងខ្លាំង ព្រោះលោកដូណាល់ ត្រាំ មិនបានសម្តែងអាកប្បកិរិយាក្រអឺតក្រទម បែបកោងកាច រឺមានពាក្យសម្តីជ្រុលហួសហេតុ ដូចដែលគាត់ធ្លាប់ធ្វើកន្លងមក ក្នុងពេលឃោសនាទេ។
ចំណុចមួយទៀតនោះ គឺលោកដូណាល់ ត្រាំ បានធ្វើសន្ទរកថា បន្ទាប់ពីបានទទួលលទ្ធផលឆ្នោត ដោយនិយាយថា លោកនឹងប្រឹងប្រែងធ្វើការងារឲ្យអស់ពីសមត្ថភាព ក្នុងនាមជាប្រធានាធិបតីរបស់ប្រជាជនអាមេរិកទាំងអស់គ្នា។ គឺពាក្យចុងក្រោយ “ទាំងអស់គ្នា” ដែលធ្វើឲ្យគេចាប់អារម្មណ៍ខ្លាំង។ កាលពីពេលឃោសនាបោះឆ្នោត លោកត្រាំ បានញុះញ៉ង់ ឲ្យមានការបែកបាក់ ឲ្យមនុស្សស្អប់គ្នា ដោយគាត់ចង់ឲ្យអាមេរិកវិលត្រលប់ទៅរកអតីតកាលវិញ ដែលជាប្រទេសមានតែមនុស្សស្បែកសជាអ្នកមានសិទ្ធិអំណាច ឯមនុស្សស្បែកខ្មៅ គឺជាទាសករ។ តែពេលនេះ គាត់ថា គាត់ចង់ធ្វើជាប្រធានាធិបតីរបស់ប្រជាជនអាមេរិកទាំងអស់គ្នា ដែលវាមានខ្លឹមសារប្រមូលផ្តុំ ឱបក្រសោបនិងសាមគ្គីគ្នា ជាជាងការបែកបាក់។
ដូណាល់ត្រាំ អាចប្តូរចិត្ត មិនលប់ច្បាប់ Obamacare៖
ចំណុចមួយទៀតដែរ គឺទាក់ទិនទៅនឹង ច្បាប់ធានារ៉ាប់រងសុខភាពរដ្ឋ រឺហៅថា Obamacare ដែលលោកដូណាល់ត្រាំ បានស្រែកហើយស្រែកទៀតថា លោកនឹងលប់ចោល នៅពេលឡើងកាន់អំណាច តែពេលនេះ គាត់បែរជានិយាយថា កាត់កំពុងពិចារណា ថានឹងមិនលប់ចោលទេ ដោយគ្រាន់តែធ្វើការកែប្រែខ្លឹមសារ នៃមាត្រាមួយចំនួន តែប៉ុណ្ណោះ។ លោកដូណាល់ត្រាំនិយាយបែបនេះ គឺនៅក្រោយពេលបានជួបជាមួយលោកអូបាម៉ា ហើយគាត់ថា លោកអូបាម៉ា បាននិយាយពន្យល់គាត់ច្រើន អំពីសារៈសំខាន់នៃច្បាប់នេះ ដែលអនុញ្ញាតិឲ្យប្រជាជនអាមេរិកក្រីក្រប្រមាណ២២លានអ្នក អាចមានលទ្ធភាពទទួលសេវាសុខភាពរបស់រដ្ឋ។ លោកអូបាម៉ា បានសុំឲ្យលោកត្រាំពិចារណាឲ្យបានល្អិតល្អន់ មុននឹងសម្រេចចិត្តលប់ច្បាប់នេះ ហើយដោយការគោរពចំពោះលោកអូបាម៉ា លោកដូណាល់ ត្រាំ បានសន្យាថាលោកនឹងពិចារណាឲ្យបានច្បាស់។
បាតុកម្មប្រឆាំងលោកត្រាំ មានកាន់តែច្រើន និងកាន់តែធំ៖
យើងឃើញថា ចំណុចទាំងអស់នេះ បង្ហាញថា លោកត្រាំពីមុន នឹងលោកត្រាំឥឡូវមិនដូចគ្នាប៉ុន្មានទេ។ តែយ៉ាណាក៏ដោយ ការផ្លាស់ប្តូរឥរិយាបថបន្តិចបន្តួចនេះ នៅមិនទាន់ធ្វើឲ្យប្រជាជនអាមេរិកមួយចំនួនធំ ស្ងប់ចិត្តបានទេ។ ជាក់ស្តែងបាតុកម្មនៅតែបន្តធ្វើ នៅតាមទីក្រុងធំៗនានា។ បាតុកម្មទាំងនោះ មិនមែនគេតវ៉ា ពីលទ្ធផលបោះឆ្នោតទេ តែគេតវ៉ាឲ្យលោកដូណាល់ ត្រាំ ធ្វើការកែប្រែគោលជំហរ ព្រោះកម្មវិធីនយោបាយគាត់ក្នុងពេលឃោសនា គឺគេមិនអាចទទួលយកបានទេ។ វាសនារបស់សហរដ្ឋអាមេរិក កំពុងស្ថិតក្នុងកណ្តាប់ដៃគាត់។ ប្រជាជនដែលមកធ្វើបាតុកម្ម គេមានការព្រួយបារម្ភ ពីវាសនារបស់សហរដ្ឋអាមេរិក បើសិនជាលោកត្រាំ អនុវត្តកម្មវិធីនយោបាយដូចដែលគាត់បានឃោសនា។
កិច្ចព្រមព្រៀងពាណិជ្ជកម្មសេរីអន្តរប៉ាស៊ីហ្វិក TPP ស្ថិតក្នុងកណ្តាប់ដៃរដ្ឋាភិបាលថ្មី៖
ក្នុងពេលឃោសនា លោកត្រាំ បានសន្យាថានឹងលប់ចោលកិច្ចព្រមព្រៀងពាណិជ្ជកម្មធំៗ ទាំងអាចុះហត្ថលេខាហើយ ទាំងអាកំពុងតែចរចា។ ឧទាហរណ៍ កិច្ចព្រមព្រៀងពាណិជ្ជកម្មសេរីទ្វីបអាមេរិកខាងជើង ហៅកាត់ថា Alena រវាងអាមេរិក កាណាដា និងមិចស៊ិចកូ ដែលបានអនុម័តរួចហើយ និង កិច្ចព្រមព្រៀងពាណិជ្ជកម្មសេរី អន្តរប៉ាស៊ីហ្វិក ហៅកាត់ថា TPP ដែលកំពុងគ្រោងរៀបចំអនុម័តផ្តល់សច្ចាប័ន ជាដើម។
កាលពីថ្ងៃសុក្រ ទី១១ វិច្ឆិកា លោកអូបាម៉ា ទើបបានប្រកាសថា រដ្ឋាភិបាលលោក បានសម្រេចព្យួរនីតិវិធីអនុម័តកិច្ចព្រមព្រៀងអន្តរប៉ាស៊ីហ្វិកTPP ហើយប្រគល់ការងារនេះ ទៅឲ្យរដ្ឋាភិបាលថ្មីរបស់លោកត្រាំជាអ្នកធ្វើ។ នៅសប្តាហ៍ក្រោយ លោកអូបាម៉ា នឹងធ្វើដំណើរទៅប្រទេសប៉េរូ ដើម្បីចូលរួមជំនួបកំពូលជាមួយបណ្តាថ្នាក់ដឹកនាំប្រទេសចំនួន១១ប្រទេស ដែលជាប្រទេសសាម៉ី នៃកិច្ចព្រមព្រៀងនេះ ក្នុងនោះក៏មានចិនដែរ។ លោកអូបាម៉ា នឹងព្យាយាមពន្យល់ពីបញ្ហានេះ ទៅកាន់ប្រទេសដែលជាប់ទាក់ទង ហើយថា ចាប់ពីពេលនេះទៅ វាសនានៃកិច្ចព្រមព្រៀងពាណិជ្ជកម្មសេរី អន្តរប៉ាស៊ីហ្វិក គឺស្ថិតក្នុងកណ្តាប់ដៃរបស់លោកដូណាល់ត្រាំ និងសភាទាំងពីររបស់អាមេរិក។
កិច្ចព្រមព្រៀងស្តីពីអាកាសធាតុ៖លោកបាន គីមូន មានសុទិដ្ឋិនិយមលើលោកត្រាំ
ទាក់ទិនទៅនឹង កិច្ចព្រមព្រៀងទីក្រុងប៉ារីស ស្តីពីអាកាសធាតុ លោកបាន គីមូន អគ្គលេខាធិការអង្គការសហប្រជាជាតិ បានថ្លែងថាលោកមានសុទិដ្ឋិនិយមច្រើន ដោយលោកជឿថា លោកដូណាល់ត្រាំ ប្រាកដជាយល់ពីសារៈសំខាន់នៃកិច្ចព្រមព្រៀងនេះ ហើយនឹងធ្វើការប្តូរគំនិត មិនដូចពេលឃោសនាបោះឆ្នោតទេ។
លោកបាន គីមូន បានទូរស័ព្ទទៅនិយាយពីបញ្ហានេះ ជាមួយលោកដូណាល់ ត្រាំ ដោយបានពន្យល់លោកត្រាំថា បើអាមេរិកដកខ្លួនចេញពីកិច្ចព្រមព្រៀងស្តីពីអាកាសធាតុ នោះអាមេរិកនឹងបំផ្លាញកិច្ចប្រឹងប្រែងរបស់ប្រទេសដ៏ទៃ ហើយអាមេរិកត្រូវទទួលខុសត្រូវចំពោះមុខប្រវត្តិសាស្ត្រមនុស្សជាតិ។ លោកបាន គីមូន ក៏បានបន្ថែមថា លោកនឹងជួបលោកដូណាល់ត្រាំ ដោយផ្ទាល់ ក្នុងពេលឆាប់ៗនេះ មុនដាច់ឆ្នាំ២០១៦ ពោលគឺមុនពេលអគ្គលេខាធិការថ្មីរបស់អង្គការសហប្រជាជាតិ ចូលកាន់តំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ