ចំហាយនៃជ័យជំនះលោកដូណាល់ ត្រាំ ជះលើបរិយាកាសនៅរុស្ស៊ី
ចុះផ្សាយនៅថ្ងៃ៖
ស្តាប់ - ០៦:៥០
លោកដូណាល់ ត្រាំ ដែលតាំងពីនៅជាបេក្ខជនខាងបក្សសាធារណរដ្ឋម្ល៉េះ ក្នុងយុទ្ធនាការឃោសនាបោះឆ្នោត រមែងថ្លែងថាសម្រាប់ស.រ.អា.ល្អជាង កុំចងសត្រូវជាមួយរុស្ស៊ីអី តែគឺសហការជាមួយប្រទេសនេះទៅ ហើយពួតដៃគ្នាវាយកំទេចពួកភេរវជនគ្រប់ស្បែកមុខនៅក្នុងលោក។ ម៉្លោះហើយបានជាជ័យជំនះរបស់គាត់ត្រូវបានម៉ូស្គូសាទរនៅតាមអង្គការ ប្លែកៗនៃរដ្ឋអំណាចរុស្ស៊ី ប៉ុន្តែ ដោយនៅចាំអ៊ុតមើលនៅឡើយ តើក្នុងការអនុវត្តន៍ជាក់ស្តែង គាត់នឹងបំពេញឬទេតាមពាក្យសន្យារបស់គាត់។
ជាបឋម វិមានក្រេមឡាំង៖ ថ្ងៃ៩វិច្ឆិកា នាពិធីទទួលសារតាំងពីឯកអគ្គរដ្ឋទូតនិងរាជទូតថ្មីៗនៃ១៩ប្រទេស ក្នុងនោះមានទាំងរាជទូតកម្ពុជាផង ដែលបានប្រព្រឺត្តទៅក្នុងមហាសាលនៃវិមានក្រេមឡាំង លោកប្រធានាធិបតីរុស្ស៊ី វ្ល៉ាឌីមៀរ ពូទីន ដោយស្រដីអំពីស្ថានការណ៍នៅស.រ.អា.បានថ្លែងទៅកាន់បណ្តាតំណាងពេញសមត្ថកិច្ចនៃរដ្ឋទាំងនោះ ដើម្បីឲ្យគេពាំនាំដល់រដ្ឋាភិបាលគេរៀងៗខ្លួន ហើយតាមរយៈប្រព័ន្ធផ្សព្វផ្សាយ គឺដល់សហគមន៍ពិភពលោកតែម្តងអំពីគោលជំហររុស្ស៊ី។ លោកពូទីនបានលើកឡើងដូចតទៅ ៖
-ប៉ុន្មានម៉ោងមុន នៅស.រ.អា. ការបោះឆ្នោតប្រធានាធិបតីបានចប់សព្វគ្រប់ទៅហើយ។ យើងតែងបានតាមដានដោយយកចិត្តទុកដាក់អំពីការបោះឆ្នោតនេះ។ ខ្ញុំសូមអបអរសរសើរប្រជាជនអាមេរិកដែលបានធ្វើការជ្រើសរើសរបស់ខ្លួន និងសូមអបអរសាទរលោកដូណាល់ ត្រាំ ដែលបានទទួលជ័យជំនះក្នុងការបោះឆ្នោតនេះ។ យើងបានឮសេចក្តីថ្លែងការណ៍របស់គាត់តាំងពីនៅជាបេក្ខជនប្រធានាធិបតីនៅឡើយក្នុងសម័យឃោសនាបោះឆ្នោត ថ្លែងដើម្បីការស្តារឡើងវិញទំនាក់ទំនងរវាងរុស្ស៊ី និងស.រ.អា។
យើងក៏យល់ដឹងក្នុងចិត្តដែរថា ផ្លូវដែលត្រូវដើរនោះ មិនមែនងាយស្រួលឡើយ បើគន់គិតអំពីការស្រុតចុះអាក្រក់មែនទែនទៅហើយនៃទំនាក់ទំនងនេះ។ ដូចដែលយើងតែងបានថ្លែងជាច្រើនលើកទៅហើយ ការដែលទំនាក់ទំនងរុស្ស៊ី-អាមេរិក ស្ថិតក្នុងស្ថានភាពបែបនេះ មិនមែនមកពីកំហុសរុស្ស៊ីឡើយ។
ប៉ុន្តែរុស្ស៊ីត្រៀមហើយ ចង់ស្តារទំនាក់ទំនងឲ្យបានពេញលេញជាមួយស.រ.អា. ទោះបីដូចដែលខ្ញុំបាននិយាយទៅហើយថាផ្លូវនេះមិនមែនងាយស្រួលក្តី។ ប៉ុន្តែរុស្ស៊ីត្រៀមដើរឲ្យបានផុតចំណែកផ្លូវរបស់ខ្លួន ដើម្បីបង្វែរទំនាក់ទំនងរុស្ស៊ី-អាមេរិក ឲ្យអភិវឌ្ឍយ៉ាងស្ថិតស្ថេរ។
ការនេះមុខជានឹងនាំមកនូវកុសលទាំងសម្រាប់ប្រជាជនអាមេរិក ទាំងសម្រាប់ប្រជាជនរុស្ស៊ី ហើយនឹងជះឥទ្ធិពលជាវិជ្ជមានទៅលើបរិយាកាសទូទៅក្នុងកិច្ចការពិភពលោក បើគន់គិតអំពីនាទីទទួលខុសត្រូវពិសេសរបស់សហព័ន្ធរុស្ស៊ី និងស.រ.អាចំពោះការទ្រទ្រង់ឲ្យមានស្ថិរភាព និងសន្តិសុខនៅក្នុងលោក។
ក្នុងសភាឌូម៉ា ជាសភាជាន់ក្រោមនៃរដ្ឋសភារុស្ស៊ី៖ ដំណឹងស្តីអំពីជ័យជំនះលោកដូណាល់ ត្រាំ ត្រូវបានតំណាងរាស្ត្រទាំង៤៤៩នាក់នៃសភាឌូម៉ាទទួលយកដោយទះដៃសាទរលាន់ទ្រហឹង។ ដំណឹងនេះប្រកាសក្នុងសម័យប្រជុំពេញអង្គនៃសភា ព្រឹកថ្ងៃ៩វិច្ឆិកា ដោយប្រធានគណៈកម្មាធិការសភាខាងបញ្ហាអប់រំ លោកVyacheslav Nikonov។ គាត់ថាលោកស្រីហ៊ីឡារី គ្លិនតុន ទើប៣នាទីមុន បានទទួលស្គាល់បរាជ័យខ្លួន។ ហើយមុននេះបន្តិច លោកដូណាល់ ត្រាំ បានថ្លែងសុន្ទរកថាលើកដំបូងរបស់ខ្លួន ក្នុងឋានៈជាអ្នកជាប់ឆ្នោតជាប្រធានាធិបតីស.រ.អា។
រីឯលោកប្រធានសភាឌូម៉ា Vyacheslav Volodine រំពឹងថា ជ័យជំនះលោកត្រាំ មុខជានឹងផ្តល់លក្ខណៈបានស្ថាបនាឡើងដល់ការសន្ទនារវាងរុស្ស៊ីនិងអាមេរិក ។ ពីព្រោះទំនាក់ទំនងរុស្ស៊ី-អាមេរិកសព្វថ្ងៃ មិនអាចត្រូវចាត់ទុក”ជាមិត្តនឹងគ្នា”ឡើយ។ តាមសម្តីគាត់ រដ្ឋសភារុស្ស៊ីនឹង“ សាទរហើយគាំទ្រដល់ជំហានណាក៏ដោយ“នៅតាមទិសដៅនេះ”។ លោកប្រធានសភាគូសបញ្ជាក់ថា ទំនាក់ទំនងត្រូវតែកសាងឡើងដោយឈរលើ”មូលដ្ឋាននៃការគោរពគ្នាទៅវិញទៅមក និងភាពជាដៃគូស្មើសិទ្ធិគ្នា” ចំណែកសហប្រតិបត្តិការត្រូវតែផ្តិតជាប់ដោយលក្ខណៈនាំជាគុណប្រយោជន៍ទៅវិញទៅមក”។
ប្រធានបក្សជាតិនិយមLDPR ដែលមាន៣៩អាសនៈប្រចាំនៅសភាឌូម៉ានីតិកាលថ្មី គឺលោកVladimir Zhirinovski ដែលបានទាយត្រូវមែនថា លោកស្រីហ៊ីឡារី គ្លិនតុន មុខជាចាញ់ឆ្នោតក្នុងចន្លោះពេលសម្រាកនៃសម័យប្រជុំនោះ បានរៀបចំកូនពិធីជប់លៀងមួយ ដោយលើកកែវស្រាChampagne អបអរសាទរជ័យជំនះលោកត្រាំ។ គាត់សំដែងសេចក្តីសង្ឃឹមថា ថាចាប់ពីអំណើះតទៅ ស.រ.អាមុខជានឹងមិនសូវលូកដៃជ្រៀតជ្រែកទៀតឡើយ ចូលកិច្ចការផ្ទៃក្នុងប្រទេសរុស្ស៊ី។ គាត់បានឲ្យដឹងថា សម្រាប់ទិញស្រាChampagne និងគ្រឿងក្លែមប្លែកៗ គាត់បានចំណាយប្រាក់ផ្ទាល់ខ្លួនអស់១សែនរូប្ល ឬជិត១.៦០ដុល្លារ។
លោកConstantin Kocachev ប្រធានគណៈកម្មាធិការព្រឹទ្ធសភារុស្ស៊ី ខាងកិច្ចការអន្តរជាតិ ក្នុងបទអន្តរាគមន៍តាមទូរទស្សន៍ជាតិ បានថ្លែងថា ក្នុងដំណាក់ឥឡូវ គប្បីស្ងប់ស្ងាត់ក្នុងចិត្តសិនទៅ កុំអាលអរជ្រុល។ ដំណើរវិវឌ្ឍន៍ទៅថ្ងៃមុខនៃទង្វើលោកត្រាំចំពោះរុស្ស៊ី នឹងបង្ហាញឲ្យឃើញពីធាតុពិតនៃប្រធានាធិបតីថ្មីនេះរបស់ស.រ.អា។
ក្រសួងការបរទេសរុស្ស៊ី៖ លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ្រ៉ូវ ថ្លែងថា សហព័ន្ធរុស្ស៊ីនឹងវាយតម្លៃដល់ការងារប្រធានាធិបតីថ្មីនៃស.រ.អា.គឺទៅតាមសាច់ការរបស់គាត់ ហើយរុស្ស៊ីឆ្លើយទៅវិញដោយសាច់ការដែរ។
ប្រមុខការទូតរុស្ស៊ីគូសបញ្ជាក់ថា រុស្ស៊ីមិនលើកនរណាខ្ពស់ជាងនរណាឡើយ ហើយត្រៀមធ្វើការងារជាមួយមេដឹកនាំអាមេរិកាំងណាក៏ដោយ ដែលត្រូវប្រជាជនបោះឆ្នោតជ្រើសរើស។ តាមប្រសាសន៍គាត់ គោលជំហរនេះរបស់រុស្ស៊ី ស្ថិតនៅដដែលឥតប្រែប្រួលសោះឡើយ។
អ្នកការទូតកំពូលនេះរបស់រុស្ស៊ីទាញយកសេចក្តីសន្និដ្ឋាន៖
-ខ្ញុំមិនអាចនិយាយឡើយថា គ្រប់តែមេដឹកនាំអាមេរិកាំងលើកមុនៗដែលជាដៃគូយើង ទោះក្នុងស្ថានការណ៍ណាក៏ដោយ សុទ្ធតែជាមនុស្សដែលយើងអាចទស្សន៍ទាយជាមុន -គេជាភាគមួយនៃជីវិត គេជាភាគមួយនៃនយោបាយ។ វោហារដែលគេបានពោលមកគឺច្រើន ប៉ុន្តែយើងនឹងវិនិច្ឆ័យសម្តីគេ គឺទៅតាមកិច្ចការជាក់ស្តែង ហើយយើងនឹងឆ្លើយតបវិញដោយកិច្ចការបែបនេះដែរ។
អ្នកនាំពាក្យផ្លូវការនៃក្រសួងការបរទេសរុស្ស៊ី លោកស្រី Maria Zakharova បានឆ្លើយតបនឹងសម្តីលោក Michael McFaul អតីតឯកអគ្គរដ្ឋទូតអាមេរិកនៅរុស្ស៊ី ដែលថាលោកប្រធានាធិបតីរុស្ស៊ីពូទីនបានជះឥទ្ធិពលទៅលើលទ្ធផលនៃការបោះឆ្នោតនៅស.រ.អា.តាមរយៈការលូកដៃចូលក្នុងការបោះឆ្នោតអាមេរិកាំង ហើយចេះ”សម្រេចបានដូចចិត្តមែន”។ អតីតអ្នកការទូតអាមេរិកថែមទាំងបានហៅមេដឹកនាំរុស្ស៊ីជាពាក្យរុស្ស៊ីថា“Molodets“ ដែលមានន័យថា” ចំជាគ្រាន់បើមែន“។
រីឯចម្លើយលោកស្រីអ្នកការទូតរុស្ស៊ីគឺថា៖
-មុនដំបូង រដ្ឋបាលលោកObama បានតែងតាំង“ពពួកជនMcFaul l” បែបនេះឲ្យកាន់តំណែង ទទួលខុសត្រូវទាំងផ្ទុកផ្តាក់ពួកគេឲ្យគ្រប់គ្រងមិនគ្រាន់តែលើប្រទេសខ្លួនប៉ុណ្ណោះទេ តែក៏លើប្រទេសចំណុះជាច្រើន រួចបន្ទាប់មក កាលដែលស្ថានការណ៍ធ្លាក់ក្នុងភាពទ័លច្រក ក៏ចាប់ផ្តើមស្រែកថាគឺម៉ូស្គូដែលជាប់ពិរុទ្ធក្នុងគ្រប់កិច្ចការរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ