លោកពូទីនបានអបអរសាទរលោកដូណាល់ ត្រាំ ដែលទើបឈ្នះឆ្នោតនៅស.រ.អា
ព្រឹកថ្ងៃ៩វិច្ឆិកានេះ លោកប្រធានាធិបតីរុស្ស៊ី វ្ល៉ាឌីមៀរ ពូទីន បានផ្ញើសារទូរលេខសំដែងការអបអរសាទរជូនលោកដូណាល់ ត្រាំ ដែលទើបឈ្នះឆ្នោតឡើងជាចៅហ្វាយថ្មីនៃសេតវិមានទាំងសង្ឃឹមស្តារ ទំនាក់ទំនងរុស្ស៊ី-អាមេរិក ឲ្យបានល្អឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ក្នុងសារទូរលេខនេះ លោកពូទីនបានសំដែងសេចក្តីសង្ឃឹមទៅលើការធ្វើការងាររួមគ្នា ដើម្បីស្រោចស្រង់ទំនាក់ទំនងរុស្ស៊ី-អាមេរិក ចេញពីស្ថានភាពវិបត្តិ ព្រមទាំងដើម្បីដោះស្រាយបញ្ហាអន្តរជាតិផងទាំងឡាយ ប្រកបដោយបច្ចុប្បន្នភាព និងស្វែងរកចម្លើយឲ្យបានស័ក្តិសិទ្ធិ តបនឹងការគម្រាមដល់សន្តិសុខពិភពលោក។
លោកពូទីនក៏សំដែងនូវជំនឿថា កិច្ចសន្ទនាស្ថាបនារវាងក្រុងម៉ូស្គូ និងវ៉ាស៊ីនតោន ដែលឈរលើគោលការណ៍ស្មើភាពគោរពគ្នាទៅវិញទៅមក គន់គិតជាក់លាក់មែនអំពីគោលជំហរម្ខាងៗ មុខជានឹងបម្រើដល់ផលប្រយោជន៍ប្រជាជនមហាប្រទេសទាំងពីរ និងផលប្រយោជន៍សហគមន៍អន្តរជាតិ។
បេក្ខជនខាងបក្សសាធារណរដ្ឋ លោកដូណាល់ ត្រាំ ដែលជាប់ឆ្នោតជាប្រធានាធិបតីទី៤៥នៃស.រ.អា.ក្នុងយុទ្ធនាការឃោសនាបោះឆ្នោតតែងបានត្រូវគូប្រជែងគាត់ខាងបក្សប្រជាធិបតេយ្យ លោកស្រី ហ៊ីឡារី គ្លិនតុន ចោទថាជា “ អាយ៉ង”របស់លោកវ្ល៉ាឌីមៀរ ពូទីន ដោយគ្រាន់តែគាត់ចង់សហការជាមួយរុស្ស៊ី ដើម្បីប្រយុទ្ធទល់នឹងពួកភេរវជននៃអង្គការ”រដ្ឋអ៊ីស្លាម”។
ម៉ូស្គូក៏ជាប់ក្នុងក្តីសង្ស័យរបស់វ៉ាស៊ីនតោនថាជួយចូកចែវឲ្យលោកដូណាល់ ត្រាំ ឈ្នះឆ្នោតតាមផ្លូវទម្លាយចេញនូវសារចំនួនជាង២ម៉ឺនច្បាប់របស់ពួកមន្ត្រីបក្សប្រជាធិបតេយ្យ។
លោកត្រាំពីចំណែកខ្លួន តែងបានស្ងើចសរសើរលក្ខណៈសម្បត្តិមេដឹកនាំរុស្ស៊ី ទាំងសង្ឃឹមថា នឹងមាន”ទំនាក់ទំនងល្អមែនទែន “ជាមួយលោកពូទីន។
លោកពូទីនបានហៅលោកត្រាំ ទៅហើយថាជា “ បុរសប្រកបដោយទេពកោសល្យយ៉ាងត្រចះត្រចង់” ដែលគាត់ត្រៀមតាំងជាមួយគឺទំនាក់ទំនងពេញលក្ខណៈរវាងរុស្ស៊ីនិងអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ