រុស្ស៊ីប្រតិកម្មខ្លាំងដាក់ស៊ីរីជាសម្ព័ន្ធមិត្ត
ចុះផ្សាយនៅថ្ងៃ៖
ស្តាប់ - ០៦:៥០
នៅថ្ងៃសៅរ៍ទី ៨ តុលា មនុស្ស៥ម៉ឺននាក់បានចូលរួមក្នុងពិធីដង្ហែសពរបស់ មេដឹកនាំប្រឆាំងស៊ីរី ដែលត្រូវកម្លាំងរដ្ឋាភិបាលបាញ់សម្លាប់ កាលពីថ្ងៃសុក្រម្សិលមិញ។ ការបាញ់បង្រ្កាបខ្លាំងទៅលើក្រុមប្រឆាំង កើតមាន នៅតែបីថ្ងៃ ក្រោយ រុស្ស៊ី និងចិន ធ្វើវេតូ ដែលធ្វើឲ្យក្រុមប្រឹក្សាសន្តិសុខបរាជ័យ មិនអាចចេញសេចក្តីសម្រេចចិត្តដើម្បីដាក់ទណ្ឌកម្មទៅលើរដ្ឋាភិបាល ស៊ីរី។
សកម្មជនស៊ីរីនិយាយថា ប្រធានគណបក្សប្រឆាំងKurde ត្រូវជនបិទមុខ ៤នាក់ចូលបាញ់សម្លាប់ដល់ក្នុងផ្ទះ។ ប៉ុន្តែ ទីភា្នក់ងារព័ត៌មានរដ្ឋវិញបានសរសេរថា លោកMechaal Tamo ត្រូវគេបាញ់សម្លាប់នៅក្នុងរថយន្តរបស់គាត់។ នៅថ្ងៃសុក្រដដែល អតីតសមាជិកសភាស៊ីរី ដែលជាអ្នកដឹកនាំក្បួនប្រឆាំងនៅក្នុងទីក្រុងDamas ក៏ត្រូវកងកម្លាំងរដ្ឋាភិបាលស៊ីរីបាញ់សម្លាប់ទាំងកណ្តាលថ្ងៃត្រង់ នៅពេលលោកចេញពីសូត្រធម៌នៅក្នុងវិហារ។
ប្រធានគណបក្សប្រឆាំងKurde ដែលគេបាញ់សម្លាប់ ម្សិលមិញ គឺជាសមាជិករបស់ក្រុមប្រឹក្សាជាតិស៊ីរី ដែលទើបបង្កើតឡើងនៅក្នុងប្រទេសតួកគី កាលពីខែសីហា ដើម្បីប្រឆាំងនឹងរដ្ឋាភិបាលលោកBachar Al Assad។
រដ្ឋាភិបាលស៊ីរីកំពុងឆ្លៀតឳកាសដែលអង្គការសហប្រជាជាតិមិនអាចដាក់ទណ្ឌកម្មមកលើខ្លួន ដើម្បី បំបាត់ឲ្យរាបសូន្យចលនាទាមទារ របស់មហាជន ដែលពេលនេះ កំពុងផ្ទុះ នៅទូទាំងផ្ទៃប្រទេស។ ទាហានរដ្ឋាភិបាលហ៊ានបាញ់សម្លាប់មេដឹកនាំប្រឆាំងទាំងកណ្តាលថ្ងៃត្រង់ នៅចំពោះមុខហ្វូងមហាជន គឺដើម្បីបំបាក់ស្មារតីរបស់ក្រុមអ្នកប្រឆាំងស៊ីរីឲ្យឈប់តវ៉ា តទៅទៀត។ ប៉ុន្តែ ដូចជារាល់លើក រដ្ឋាភិបាលលោកAssad តែងនិយាយការពារខ្លួនថា ទាហានបាញ់សម្លាប់តែក្រុមភេរជន ពួកអ៊ីស្លាមជ្រុលនិយម ដែលកំពុងបង្កប់ខ្លួន នៅក្នុងចលនាអ្នកប្រឆាំងនៅស៊ីរីប៉ុណ្ណោះ។
ប៉ុន្តែ សម្រាប់ក្រុមប្រឹក្សាជាតិស៊ីរី រដ្ឋាភិបាលកំពុងបើកប្រតិបត្តិការធំ ដើម្បីសម្លាប់ចងអាឃាតជាមួយសមាជិកក្រុមប្រឹក្សាជាតិស៊ីរី ដែលកំពុងមានសកម្មភាពស្វែងរកការគំាទ្រ ពីសហគមន៍អន្តរជាតិ។
រុស្ស៊ីប្រតិកម្មខ្លាំង ក្រោយការបាញ់សម្លាប់មេដឹកនាំបក្សប្រឆាំងស៊ីរី
នៅក្នុងបទសម្ភាសន៍ជាមួយទូរទស្សន៍រុស្ស៊ី កាលពីថ្ងៃម្សិលមិញ ប្រធានាធិបតីរុស្ស៊ី លោក លោកមេដវេដេវបាននិយាយសង្កត់ថា បើសិនជាថ្នាក់ដឹកនាំស៊ីរីមិនអាចធ្វើកំណែទម្រង់នយោបាយ បានទេ ពួកគេគួរតែចាកចេញពីអំណាចទៅ។ ប៉ុន្តែ ប្រធានាធិបតីរុស្ស៊ីនៅតែបញ្ជាក់ថា ថ្នាក់ដឹកនាំស៊ីរីចាកចេញពីអំណាចទៅតាមឆន្ទះខ្លួនឯង និងរបស់ប្រជាជនស៊ីរី ប៉ុន្តែ មិនមែនទៅតាមការកំណត់បញ្ជារបស់ប្រទេសខាងក្រៅ ឬអង្គការសហប្រជាជាតិទេ។
សេតវិមានអាមេរិកវិញក៏បានថ្កោលទោសលើការបាញ់សម្លាប់មេគណបក្សប្រឆាំងស៊ីរី និងស្វាគមការប្រកាសរបស់ប្រធានាធិបតីរុស្ស៊ី។ ប៉ុន្តែ អ្នកនាំពាក្យរបស់ក្រសួងការបរទេសអាមេរិកបញ្ជាក់ថា គំនាបនយោបាយរបស់រុស្ស៊ី តែមួយមុខ នឹងមិនមានប្រសិទ្ធិភាពឲ្យរដ្ឋាភិបាលស៊ីរីបញ្ឈប់អំពើហិង្សាទេ។ រុស្ស៊ីគួរតែដាក់គំនាបផ្នែកសេដ្ឋកិច្ច ដូចជាបញ្ឈប់លក់អាវុធទៅឲ្យស៊ីរីជាដើម។
សេចក្តីថ្លែងរបស់ប្រធានាធិបតីរុស្ស៊ី ធ្វើឡើង ដើម្បីទាមទារឲ្យរដ្ឋាភិបាលស៊ីរី សន្យាធ្វើកំណែទម្រង់ ប៉ុន្តែមិនទាន់ដល់ថ្នាក់ ព្រមាន គម្រាម ឲ្យលោកBachar Al Assadចុះចេញពីអំណាចដូចអាមេរិកធ្វើដែរ។ ប្រតិកម្មខ្លាំងរបស់រុស្ស៊ីក៏ដើម្បីលើកមុខមាត់របស់ខ្លួនឡើងវិញ នៅក្នុងឆាកអន្តរជាតិ គឺបន្ទាប់ពីរុស្ស៊ីបានវេតូ ប្រឆាំងមិនឲ្យគេដាក់ទណ្ឌកម្មលើស៊ីរី។
ម្យ៉ាងទៀត រុស្ស៊ីក៏ចង់ស្តារកេរ្តិ៍ឈ្មោះរបស់ខ្លួន នៅក្នុងចំណោមប្រជាជនស៊ីរី ព្រោះនៅស៊ីរីបច្ចុប្បន្ន និន្នការស្អប់រុស្ស៊ីមានកាន់តែច្រើន ក្នុងចំណោមប្រជាជនស៊ីរី។ ប្រជាជនក្រុមអ្នកប្រឆាំងបានដុត ទង់ជាតិរុស្ស៊ី និងចិន ចាប់តាំងពីថ្ងៃអង្គារមក ពោលគឺចាប់តាំងពីរុស្ស៊ី និងចិនធ្វើវេតូ។ បកស្រាយប្រាប់ ប្រជាជនស៊ីរី លោកមេដវេឌេវប្រធានាធិបតីរុស្ស៊ីបានថ្លែងថា រុស្ស៊ីក៏ដូចប្រទេសដទៃទៀត គឺចង់ឲ្យគេបញ្ឈប់អំពើហិង្សា ការបង្ហូរឈាម នៅក្នុងប្រទេសស៊ីរី។ រដ្ឋាភិបាលទីក្រុងម៉ូស្គូជឿថា ប្រទេសស៊ីរីនឹងផ្លាស់ប្តូរ ហើយរដ្ឋាភិបាលលោកBachar Al Assad គ្រាន់តែត្រូវការពេលវេលាដើម្បីដោះស្រាយ។ ប៉ុន្តែ រុស្ស៊ីមិនអាចគាំទ្រប្រទេសលោកខាងលិចឲ្យប្រើសេចក្តីសម្រេចចិត្តរបស់ក្រុមប្រឹក្សាសន្តិសុខដើម្បីដាក់ទណ្ឌកម្មលើស៊ីរីដែរ។
ប្រធានាធិបតីរុស្ស៊ីបានពន្យល់ថា ការធ្វើវេតូ កន្លងមករបស់រុស្ស៊ី ធ្វើឡើងដោយរុស្ស៊ីបានមើលសកម្មភាពរបស់អង្គការអូតង់ នៅប្រទេសលីប៊ី។ រុស្ស៊ីធ្លាប់រាងចាលម្តង ព្រោះនៅពេលរុស្ស៊ីមិនធ្វើវេតូ លើរឿងលីប៊ី អូតង់បានអនុវត្តសេចក្តីសម្រេចរបស់ក្រុមប្រឹក្សាសន្តិសុខ ដោយបើកប្រតិបត្តិការយោធាផ្តួលរំលំរបបកាដាហ្វី ដែលធ្លាប់ជាដៃគូរកស៊ី ជាមួយទីក្រុងម៉ូស្គូ។ រុស្ស៊ីដែលធ្លាប់លក់អាវុធតម្លៃរាប់លានដុល្លារ បានខាតបង់ប្រយោជន៍ច្រើន ដូច្នេះ លើកនេះ រុស្ស៊ីមិនចាញ់បោកប្រទេសលោកខាងលិច ដូចមុន។
រុស្ស៊ីដែលជាសម្ព័ន្ធមិត្ត មិនងាយនឹងបោះបង់ចោលស៊ីរីទេ គឺមិនងាយនឹងបោះចោលប្រយោជន៍ដែលខ្លួនមានជាមួយនៅស៊ីរី។ ស៊ីរីនេះ ជាអតិថិជនទិញអាវុធដ៏ច្រើនពីរុស្ស៊ី ហើយស៊ីរីក៏បានផ្តល់កំពង់ផែដែលរុស្ស៊ីបានប្រើសម្រាប់ធ្វើមូលដ្ឋានតាំងទ័ពខ្លួន នៅតំបន់ដើមបូព៌ា។ រុស្ស៊ីបង្ហាញជំហរថា ខ្លួននឹងនៅតែប្រឆាំងរាល់ការប៉ុនប៉ង់ទាំងឡាយដែលចង់ឲ្យក្រុមប្រឹក្សាសន្តិសុខឲ្យចេញទណ្ឌកម្ម ដើម្បីផ្តួលរំលំមេដឹកនាំរបស់ប្រទេសគេផ្សេង ដោយរួមទាំងស៊ីរីផង។
រុស្ស៊ីយល់ថា សេចក្តីសម្រេចចិត្តស្នើឡើងដោយប្រទេសនៅអឺរ៉ុប នឹងបើកផ្លូវឲ្យមានប្រតិបត្តិការយោធា នៅស៊ីរី ដូចជានៅលីប៊ី។ លើសពីនោះ ការដាក់ទណ្ឌកម្មទៅលើរដ្ឋាភិបាលស៊ីរីនឹងអាចលើកទឹកចិត្តក្រុមអ្នកតវ៉ាប្រើហិង្សា ដើម្បី ប្រឆាំងនឹងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ