គ្មានឡើយសេចក្តីសម្រេចចិត្តរបស់អ.ស.បប្រឆាំងនឹងស៊ីរី
ក្រុមប្រឹក្សាសន្តិសុខរបស់អង្គការសហប្រជាជាតិបានទទួលបរាជ័យ ក្នុងការអនុម័តសេចក្តីសម្រេចចិត្តមួយប្រឆាំងនឹងរបបស៊ីរីរបស់ Bachar el-Assad។ ចិននិងរុស្ស៊ីបានប្រើសិទ្ធិវេតូខ្ទប់មិនឲ្យសេចក្តីសម្រេចចិត្ត នេះចេញរួច ជាហេតុបណ្តាលឲ្យសហរដ្ឋអាមេរិកខឹងសម្បា។ រីឯបារាំងវិញ អះអាងថា ឥរិយាបថបែបនេះរបស់ចិននិងរុស្ស៊ី មើលងាយបដិវត្តន៍អារ៉ាប់និងចលនាទាមទារសេរីភាពព្រមទាំង លទ្ធិប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:២៦
លើកនេះចិននិងរុស្ស៊ីមិនមែនប្រឆាំងដើម្បីតែប្រឆាំងទេ តែបានប្រើសិទ្ធិវេតូដំណាលគ្នាតែម្តង ដើម្បីច្រានចោលសេចក្តីសម្រេចចិត្តដែលត្រូវបានតាក់តែងឡើងដោយប្រទេសបារាំង អាល្លឺម៉ង់ អង់គ្លេស និងព័រទុយហ្កាល់។ ប្រាំបួនប្រទេសបានបោះឆ្នោតគាំទ្រ រីឯបួនប្រទេសទៀតគឺអាហ្វ្រិកខាងត្បូង ឥណ្ឌា ប្រេស៊ីល និងលីបង់ បានបោះឆ្នោតអនុបវាទ។
ជំហរដាច់ខាតរបស់មហាយក្សចិននិងមហាយក្សរុស្ស៊ីតាមរយៈការប្រើសិទ្ធិវេតូ គឺជាសារមួយខ្លាំងនិងប្រកបទៅដោយអត្ថន័យដែលប្រទេសមហាអំណាចទាំងពីរនេះបានបញ្ជូនទៅបស្ចិមលោក ទៅកាន់ថ្នាក់ដឹកនាំអាមេរិកនិងអឺរ៉ុប។ គេអាចបកស្រាយឥរិយាបថរបស់ចិននិងរុស្ស៊ីបានច្រើនយ៉ាង។ ម្យ៉ាង វាអាចជាប្រតិកម្មសងសឹកលោកខាងលិចវិញ។ សូមជម្រាបថា ចិននិងរុស្ស៊ីយល់ឃើញថា ពួកគេបានចាញ់បោកអាមេរិកនិងអឺរ៉ុបក្នុងវិបត្តិប្រទេសលីប៊ី ដ្បិតកាលពីខែមីនាកន្លងទៅ នៅអង្គការសហប្រជាជាតិ ពួកគេបានបោះឆ្នោតអនុបវាទ ដែលជាហេតុបានបើកដៃឲ្យអង្គការNatoធ្វើអន្តរាគមន៍យោធាតាមផ្លូវអាកាសនៅលីប៊ី រហូតដល់បានបណ្តាលឲ្យរបបរបស់Kadhafi ដួលរលំ។
ម្យ៉ាងទៀត តាមរយៈការប្រើសិទ្ធិវេតូដំណាលគ្នាបែបនេះ ចិននិងរុស្ស៊ីប្រហែលជាចង់ប្រាប់បស្ចិមលោកថា៖កុំប៉ះពាល់ប្រទេសស៊ីរីឲ្យសោះ និងតទៅថ្ងៃមុខពួកអ្នកឯងមិនចាំបាច់រៀបចំគម្រោងសេចក្តីសម្រេចចិត្តអ្វីផ្សេងទៀតទេដើម្បីប្រឆាំងនឹងស៊ីរី ពីព្រោះយើងចិននិងរុស្ស៊ីនឹងចាំតែខ្ទប់ប៉ុណ្ណោះ។
ការពិត នៅក្នុងគម្រោងសេចក្តីសម្រេចចិត្តប្រឆាំងនឹងស៊ីរី គ្មានឡើយការសុំធ្វើអន្តរាគមន៍យោធា គ្មានឡើយការដាក់ទណ្ឌកម្មមានតែការថ្កោលទោសនិងពាក្យ«គំរាមដាក់ទណ្ឌកម្ម» បើសិនជារបបស៊ីរីនៅតែបន្តវាយបង្ក្រាបក្នុងថ្លុកឈាម ពួកបាតុករតទៅទៀត។
មែនទែនទៅ អាមេរិកនិងអឺរ៉ុបមិនបានរង់ចាំការបោះឆ្នោតគាំទ្រពីចិននិងពីរុស្ស៊ីទេ ឲ្យតែប្រទេសទាំងពីរព្រមបោះឆ្នោតអនុបវាទទៅ វាជាការគ្រប់គ្រាន់ហើយ។ ដោយឡែក បស្ចិមលោក ក៏គ្មានបំណងចង់ធ្វើអន្តរាគមន៍យោធានៅស៊ីរីដែរ ពីព្រោះស៊ីរីមិនមែនលីប៊ីទេ។ ស៊ីរីជាមហាអំណាចយោធាមួយនៅក្នុងតំបន់ភូមិភាគដើមបូព៌ា ជាប្រទេសដែលមានរថក្រោះច្រើនពាន់គ្រឿង និងមានកាំជ្រួចមីស្ស៊ីលទៅទៀត។
មិនតែប៉ុណ្ណោះ បស្ចិមលោកដឹងជាមុនថា ការសុំធ្វើអន្តរាគមន៍យោធានៅស៊ីរីនឹងច្បាស់ជាត្រូវចិននិងរុស្ស៊ីប្រឆាំង បស្ចិមលោកដឹងជាមុនថារាល់អន្តរាគមន៍យោធានៅស៊ីរី នឹងអាចធ្វើឲ្យក្រឡាប់ចាក់តំបន់ទាំងមូល ពីព្រោះនៅពេលនោះ ស៊ីរីដែលក្លាយជាខ្លារបួសនឹងអាចវាយប្រហារទៅលើប្រទេសជិតខាង ដូចជា ហ៊្សកដានី តួកគី និងអៀរ៉ាក់ជាដើម។
និយាយរួមលើកនេះ ចិននិងរុស្ស៊ីបានសម្រេចចិត្តប្រឆាំង និងប្រឆាំងខ្លាំងតែម្តង ពីព្រោះសម្រាប់ប្រទេសមហាអំណាចទាំងពីរ មិនត្រូវអនុញ្ញាតឲ្យស៊ីរីក្លាយជាលីប៊ីទីពីរទេ សម្រាប់ប្រទេសមហាអំណាចទាំងពីរ អ្វីដែលសំខាន់គឺមិនមែនលក្ខណៈធ្ងន់ឬស្រាល ធូរឬតឹងនៃសេចក្តីសម្រេចចិត្តទេ។ អ្វីដែលសំខាន់គឺគោលការណ៍ បានន័យថា សហគមន៍អន្តរជាតិត្រូវតែគោរពទាំងស្រុង អធិបតេយ្យ ឯករាជភាព និងបូរណភាពទឹកដីរបស់ប្រទេសស៊ីរី។
ចូរកុំភ្លេចថា ជិតប្រាំពីរខែកន្លងមកហើយ ដែលមានការបះបោរនៅស៊ីរី ជិតប្រាំពីរខែកន្លងមកហើយដែលកងទ័ពស៊ីរី បាញ់សម្លាប់ពួកបះបោរ។ តុល្យាការនៃការវាយបង្ក្រាបនៅស៊ីរីធ្វើឲ្យព្រឺឆ្អឹងខ្នង៖ មានស្លាប់ជាង២ ៧០០នាក់ បាត់ខ្លួនរាប់ពាន់នាក់និងជាប់គុកជិត២ ០០០នាក់ នេះបើយោងទៅតាមអង្គការសហប្រជាជាតិ។
មិនតែប៉ុណ្ណោះ គេត្រូវរង់ចាំជិតប្រាំពីរខែ ទើបឃើញគម្រោងសេចក្តីសម្រេចចិត្តលើកទីមួយបង្អស់ប្រឆាំងនឹងស៊ីរីលេចចេញជារូបរាង។ គម្រោងសេចក្តីសម្រេចចិត្តដំបូងគេបង្អស់នេះទៀតសោតដែលគ្មានលក្ខណៈធ្ងន់ធ្ងរពេកសោះសម្រាប់ស៊ីរី មិនទាំងត្រូវបានក្រុមប្រឹក្សាអន្តរជាតិអនុម័តផងនៅទីបំផុត។ ម្ល៉ោះហើយ Bachar el-Assad អាចបន្តកាប់សម្លាប់ពួកបាតុករប្រឆាំង យូរថ្ងៃតទៅទៀត ដោយមានចិននិងរុស្ស៊ីជាអ្នកធានាការពារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ