ម៉ូស្គូ មិនគាំទ្រទេ ទណ្ឌកម្មដែលសហភាពអឺរ៉ុប ដាក់ទល់នឹងស៊ីរី
គោលជំហរនេះ ទើបរំលេចឲ្យឃើញ ដោយលោកប្រធានាធិបតីរុស្ស៊ី មេដវេដេវ ក្នុងសម្ភាសន៍ឲ្យទៅកាណាល់ទូរទស្សន៍ Euronews ក្នុងក្របខ័ណ្ឌនៃ “វេទិកានយោបាយពិភពលោក” លើកទី៣ ដែលល្ងាចម្សិលមិញ បានបិទបញ្ចប់ការងារខ្លួន អស់រយៈពេល២ថ្ងៃ នៅក្រុងរុស្ស៊ី Yaroslavl ចម្ងាយប្រមាណ៤៥០ឝ.ម.ខាងជើងពីរដ្ឋធានីម៉ូស្គូ ដោយមានការចូលរួមនៃប្រតិភូ ៦០០នាក់ មកពី៣០ប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
សំណួរអ្នកឆ្លើយឆ្លងរបស់ Euronews លោក Shashkov គឺថា ៖ “រដ្ឋមន្ត្រីការបរទេសបារាំង លោក Alain Juppé ពេលបំពេញទស្សនកិច្ចនៅម៉ូស្គូកាលពីថ្ងៃ៧កញ្ញា តាមខ្ញុំដឹង គឺ បានស្នើសុំរុស្ស៊ីឲ្យគាំទ្រដល់ទណ្ឌកម្មរបស់សហភាពអឺរ៉ុប ទល់នឹងថ្នាក់ដឹកនាំស៊ីរីសព្វថ្ងៃ។ តើរុស្ស៊ី ប្រកាន់យកនយោបាយ យ៉ាងណាដែរចំពោះរឿងនេះ?”។
ចម្លើយលោកប្រមុខរដ្ឋរុស្ស៊ី Medvedev ៖ “ជាការពិតដែលខ្ញុំបានពិភាក្សាបញ្ហាដែលមានទាំងជាមួយលោករដ្ឋមន្ត្រីការបរទេស Alain Juppé ទាំងជាមួយលោករដ្ឋមន្ត្រីការពារជាតិបារាំង Gerard Longuet។ ប៉ុន្តែសាច់រឿង គឺនៅត្រង់រុស្ស៊ីមិនពេញចិត្តទេនឹងការបំពេញដោយហួសជ្រុល លើអាណត្តិប្រគល់ដោយសេចក្តីសម្រេចលេខ១៩៧៣ នៃក្រុមប្រឹក្សាសន្តិសុខអ.ស.ប.។
ទោះបី ស្ថានការណ៍នៅលីប៊ីបានផ្លាស់ប្តូរក្តី ក៏រុស្ស៊ីមិនចង់ឃើញព្រឹត្តិការណ៍ នៅប្រទេសស៊ីរីវិវឌ្ឍទៅតាមសេណារីយ៉ោដូចនៅលីប៊ីឡើយ”។
លោក Medvedev ទទួលស្គាល់ថា ៖ នៅប្រទេសស៊ីរីមានមែនការប្រើកម្លាំងខ្លាំងហួសទាល់តែមានអ្នកធ្លាក់ខ្លួនស្លាប់យ៉ាងច្រើន ហេតុដែលនាំឲ្យរុស្ស៊ីមិនពេញចិត្តដែរ។ ខ្ញុំតែងបានរំលឹកអំពីរឿងនេះ ទៅលោកប្រធានាធិបតី Assad។ ប៉ុន្តែ តាមយោបល់ខ្ញុំ សេចក្តីសម្រេចណាក៏ដោយ គឺត្រូវមានន័យជាសារព្រមានយ៉ាងតឹងរ៉ឹង ទៅកាន់ថ្នាក់ដឹកនាំស៊ីរីផង ទៅកាន់ភាគីប្រឆាំងផង ដ្បិតស្ថានការណ៍នៅទីនោះមិនមែនសុក្រិត ឥតខ្ចោះឡើយ។ ក្នុងក្រុមប្រឆាំងនៅស៊ីរី មិនមែនមានសុទ្ធតែពួកដែលនិយមប្រជាធិបតេយ្យអឺរ៉ុប ដ៏ហ្មត់ហ្មងឡើយ។ ពួកគេខ្លះជាអ្នកជ្រុលនិយម និងថែមទាំងជាភេរវជនទៅផង។
លោក Medvedev គូសបញ្ជាក់ថា រុស្ស៊ីត្រៀមគាំទ្រដល់សំណើណា ដែលមិនត្រូវឈរតែលើការថ្កោលទោសជាឯកតោភាគី ទៅលើរដ្ឋាភិបាលនិងប្រធានាធិបតីស៊ីរីប៉ុណ្ណោះឡើយ។
គោលដៅរុស្ស៊ី គឺឲ្យគ្រប់ភាគីបដិបក្ខនៅស៊ីរី អង្គុយចរចាគ្នា ហើយបញ្ឈប់ការបង្ហូរឈាម។ នេះជាក្តីប្រាថ្នារបស់រុស្ស៊ី ក្នុងឋានៈជាមិត្តដ៏ធំរបស់ស៊ីរី ដែលជាមួយប្រទេសនេះ រុស្ស៊ីមានទំនាក់ទំនងសេដ្ឋកិច្ច និងនយោបាយសម្បូណ៌បែប - លោកប្រធានាធិបតីរុស្ស៊ីបញ្ចប់សេចក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ