ដំណើរឆ្ពោះទៅដល់ការសម្រេចបង្កើតថ្នាំបង្ការជំងឺគ្រុនចាញ់
ក្តីសង្ឃឹមថានឹងមានថ្នាំវ៉ាក់សាំង បង្ការជំងឺគ្រុនចាញ់ ប្រកបដោយប្រសិទ្ធិភាពខ្ពស់ នឹងអាចក្លាយជាការពិតបាន ! ការសិក្សាស្រាវជ្រាវផ្នែកវេជ្ជសាស្ត្ររបស់ ទីពិសោធអង់គ្លេស GlaxonSmithKline ក្រោមការឧបត្ថម្ភពីមូលនិធិ Bill Gates បានសម្រេចរកឃើញថ្នាំវ៉ាក់សាំង ប្រឆាំងនឹងជំងឺគ្រុនចាញ់ ប្រកបដោយប្រសិទ្ធិភាព អាចកាត់បន្ថយគ្រោះ កើតជំងឺនេះបាន ប្រមាណ៥០%។ លទ្ធផលនៃការសាកល្បងផ្នែកវេជ្ជសាស្ត្រដំណាក់កាលទីបី -ជាដំណាក់កាលចុងក្រោយមុននឹងឈានដល់ការធ្វើចរាចរណ៍លើទីផ្សារនេះ ទើបត្រូវប្រកាសឲ្យដឹងនៅល្ងាចមិញ នៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០១:២៥
បើតាមការធ្វើតេស្តសាកល្បង លើទារកនិងកុមារតូចៗ ចំនួន៦០០០នាក់ អាយុពី៦ ទៅ១៧ខែ បានបង្ហាញថា ជាមួយនឹងការចាក់បង្ការ ក្នុងបរិមាណ បីកំរិតថ្នាំ (បីdoses) រយៈពេល១២ខែ គេអាចបង្ការជំងឺគ្រុនចាញ់ បាន៥៦% និងអាចទប់ស្កាត់ទម្រង់ធ្ងន់ធ្ងរនៃជំងឺ ដូចជាកុំឲ្យជំងឺវាយលុកដល់ខួរក្បាល ឬតម្រងនោម បានប្រមាណ៤៧%។
RTS,S ជាថ្នាំវ៉ាក់សាំងបង្ការជំងឺគ្រុនចាញ់ ដែលត្រូវបានសិក្សាសាកល្បង តាមបែបវិទ្យាសាស្ត្រ ! ដូច្នេះ ការប្រកាសលទ្ធផលដំបូង ដែលធ្វើឡើងនៅចំពោះមុខអ្នកឯកទេសខាងជំងឺគ្រុនចាញ់ និងអ្នកទទួលខុសត្រូវក្នុងរដ្ឋាភិបាលជាងបីរយនាក់ ក្នុងវេទិកាស្តីពីជំងឺគ្រុនចាញ់ លើកទីពីរ នៅសហរដ្ឋអាមេរិក ជាដំណាក់កាលសំខាន់បំផុត បញ្ជាក់ពីលទ្ធភាពបង្កើតថ្នាំវ៉ាក់សាំងបង្ការរោគ និងឈានឆ្ពោះទៅដល់ជ័យជម្នះលើជំងឺគ្រុនចាញ់បាន។
ជំងឺគ្រុនចាញ់ ដែលបង្កឡើងដោយពពួកបរាសិតម្យ៉ាង សម្លាប់ជីវិតមនុស្ស ជារៀងរាល់ឆ្នាំ អស់ជាង ៧សែន៨ម៉ឺននាក់ ក្នុងនោះ៨៥%ជាកុមារ អាយុក្រោម៥ឆ្នាំ នៅទ្វីបអាហ្វ្រិក។ លោកមហាសេដ្ឋី Bill Gates សហប្រធានមូលនិធិGates ប្រឆាំងនឹងជំងឺគ្រុនចាញ់ បានអំពាវនាវឲ្យសហគមន៍អន្តរជាតិ ជួយជ្រោមជ្រែងបន្ថែមទៀត ព្រោះតាំងពីឆ្នាំ២០០១មក គេអាចកាត់បន្ថយអត្រាស្លាប់ព្រោះតែជំងឺនេះបាន២០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ