ការចាប់ឃុំនិស្សិតគឺជាជំហានដើរថយក្រោយនៃការផ្សះផ្សាជាតិ
ចុះផ្សាយនៅថ្ងៃ៖
ស្តាប់ - ០៥:២៧
ប្រមុខដឹកនាំនិស្សិតភូមាបានទាមទារនៅថ្ងៃសៅរ៍ទី៧កក្កដាឆ្នាំ២០១២នេះ ឲ្យអាជ្ញាធរភូមាដោះលែងជាបន្ទាន់ ក្រុមនិស្សិតជាមិត្តរបស់ពួកគេដែលបានត្រូវចាប់ឃុំខ្លួនកាលពីម្សិលមិញ។ ទាំងនេះជាការដើរថយក្រោយក្នុងការផ្សះផ្សាជាតិនិងការឈានទៅរកលទ្ធិប្រជាធិបតេយ្យ ចាប់តាំងពីរបបគ្រប់គ្រងផ្តាច់ការយោធាភូមាបានត្រូវរំលាយនៅខែមីនាឆ្នាំ២០១១មក។
បើយោងតាមការថ្លែងឲ្យដឹងដោយក្រុមនិស្សិតភូមា មានយ៉ាងតិចមេដឹកនាំនិស្សិតប្រមាណ២០នាក់បានត្រូវអាជ្ញាធរចាប់ឃុំខ្លួនកាលពីថ្ងៃសុក្រទី៦កក្កដាឆ្នាំ២០១២ម្សិលមិញនៅក្នុងប្រទេសភូមា។ ទាំងនេះបានប្រព្រឹត្តទៅមួយថ្ងៃ មុនពិធីរំលឹកខួបឆ្នាំទី៥០នៃថ្ងៃទី៧កក្កដាឆ្នាំ១៩៦២ ដែលជាថ្ងៃចាប់ផ្តើមរបបគ្រប់គ្រងផ្តាច់ការយោធាភូមារបស់ឧត្តមសេនីយ ណេ វិន ដែលមានរយៈកាលកន្លះសតវត្សរ៍។
ទោះបីជាមានការចាប់ឃុំខ្លួននិស្សិតដោយអាជ្ញាធរនិងមានវត្តមានប៉ូលិសស៊ីវិលរង់ចាំថតរូបយ៉ាងណាក្តី ក៏គេកត់សម្គាល់ឃើញមានមនុស្សប្រមាណជាង៣០០នាក់បានជួបប្រជុំគ្នានៅក្នុងទីក្រុងរ៉ង់ហ្គូន នៅ“ទីស្នាក់ការជំនាន់ឆ្នាំ៨៨” អង្គការរបស់និស្សិតភូមាដែលជាប្រភពនៃការងើបបះបោរប្រឆាំងនឹងរបបគ្រប់គ្រងផ្តាច់ការយោធាភូមានៅឆ្នាំ១៩៨៨ ដែលបានត្រូវក្រុមយោធាភូមាវាយបង្ក្រាបយ៉ាងសែនឃោរឃៅ។
នៅថ្ងៃសៅរ៍ទី៧កក្កដានេះ ប្រមុខដឹកនាំនិស្សិតភូមាបានទាមទារ ឲ្យអាជ្ញាធរភូមាដោះលែងជាបន្ទាន់ ក្រុមនិស្សិតជាមិត្តរបស់ពួកគេដែលបានត្រូវចាប់ឃុំខ្លួនកាលពីម្សិលមិញ ហើយពួកគេបានចោទរដ្ឋាភិបាលភូមាថា បានបោះជំហានដើរថយក្រោយក្នុងការស្វែងរក. “ផ្សះផ្សាជាតិ”។
គួរគូសបញ្ជាក់ថា ថ្ងៃទី៧កក្កដាឆ្នាំ១៩៦២មកទល់ថ្ងៃសៅរ៍ទី៧កក្កដាឆ្នាំ២០១២នេះ គឺមានរយៈកាលហាសិបឆ្នាំគត់ដែលក្រុមនិស្សិតភូមាបាននាំគ្នាងើបបះបោរប្រឆាំងនឹងការឡើងមកកាន់កាប់អំណាចរបស់ឧត្តមសេនីយ ណេ វិន ដោយធ្វើរដ្ឋប្រហារ។ ឧត្តមសេនីយ ណេ វិនបានក្តោបក្តាប់អំណាចផ្តាច់ការគ្រប់គ្រងប្រទេសភូមារហូតដល់ឆ្នាំ១៩៨៨។
សម្រាប់ក្រុមនិស្សិតភូមា ការចាប់ឃុំខ្លួននិស្សិតដោយអាជ្ញាធរភូមាបែបនេះ គឺពិតជាបង្កើតឲ្យមានឧបសគ្គនៅលើមាគ៌ាដើម្បីឈានទៅរកធ្វើការផ្សះផ្សាជាតិនិងឈានទៅរកលទ្ធិប្រជាធិបតេយ្យនៅក្នុងប្រទេសភូមា។ ហេតុដូច្នេះហើយបានជាក្រុមនិស្សិតភូមានិងអង្គការជំនាន់ឆ្នាំ៨៨បាននាំគ្នាស្រែកទាមទារ ឲ្យរដ្ឋាភិបាលភូមាដោះលែងជាបន្ទាន់ ក្រុមនិស្សិតជាមិត្តរបស់ពួកគេដែលបានត្រូវចាប់ឃុំខ្លួនកាលពីម្សិលមិញ។ ក្រុមនិស្សិតនិងសកម្មជនដែលគ្រោងរៀបចំគោរពវិញ្ញាណក្ខណ្ធនិស្សិតនិងសកម្មជនដែលបានស្លាប់ដោយការវាយបង្ក្រាបរបស់យោធាភូមានៅពេលងើបប្រឆាំងនៅថ្ងៃទី៧កក្កដាឆ្នាំ១៩៦២។
គួរកត់សម្គាល់ថា ការចាប់ឃុំខ្លួនមេដឹកនាំនិស្សិតប្រមាណ២០នាក់ដោយអាជ្ញាធរភូមា កាលពីថ្ងៃសុក្រទី៦កក្កដាឆ្នាំ២០១២ម្សិលមិញនេះ ពិតជាហេតុការណ៍មួយដ៏ចម្លែក ដោយហេតុថា នៅថ្ងៃអង្គារកន្លងទៅថ្មីៗនេះសោះ របបគ្រប់គ្រងភូមាទើបនឹងបានដោះលែងអ្នកទោសនយោបាយប្រមាណម្ភៃប្លាយនាក់ ក្រោយពីបានធ្វើការដោះលែងប្រមាណ៥០០នាក់កាលពីខែតុលានិងខែមករាកន្លងទៅ ដែលក្នុងនោះមានប្រមុខដឹកនាំចលនា១៩៨៨ជាច្រើននាក់ផងទៀត។
រដ្ឋាភិបាលភូមាចាប់ឃុំខ្លួននិស្សិត នៅថ្ងៃសុក្រទី៦កក្កដាឆ្នាំ២០១២ម្សិលមិញយ៉ាងដូច្នេះ មកពីរដ្ឋអំណាចភូមាបារម្ភខ្លាងក្រែងពិធីបុណ្យខួបទី៥០ឆ្នាំរំលឹកដល់ថ្ងៃងើបបះបោរនៅថ្ងៃទី៧កក្កដាឆ្នាំ១៩៦២ អាចនាំឲ្យកើតមានការបាត់បង់សណ្តាប់ធ្នាប់នៅក្នុងទីក្រុង ហើយជាពិសេសអាចបណ្តាលឲ្យកើតមានចលនាបះបោរ។
បើយោងតាមអ្នកទទួលខុសត្រូវរដ្ឋាភិបាលភូមាម្នាក់បានឲ្យដឹងថា “មេដឹកនាំនិស្សិតជាប់ឃុំឃាំងទាំងនោះ នឹងត្រូវគេដោះលែងនៅពេលដ៏ខ្លីខាងមុខនេះ”។
សម្រាប់ប្រមុខដឹកនាំនិស្សិតភូមាវិញ ការចាប់ឃុំខ្លួននិស្សិតបែបនេះគឺពិតជាជំហានដើរថយក្រោយរបស់រដ្ឋាភិបាលដែលនារយៈពេលចុងក្រោយនេះ បានធ្វើកំណែទម្រង់សំខាន់ៗជាច្រើន ក្រោយពីបានរំលាយរបបគ្រប់គ្រងផ្តាច់ការយោធានៅខែមីនាឆ្នាំ២០១១។ ប៉ុន្តែនិស្សិតភូមាខ្លះយល់ថា “វាគ្រាន់តែជាឧប្បត្តិហេតុចៃដន្យមួយតែប៉ុណ្ណោះ”។
គួរបញ្ជាក់ថា លោកប្រធានាធិបតីភូមា ថេន សេន ដែលបានធ្វើកំណែទម្រង់សំខាន់ៗជាច្រើន និងទទួលបានជោគជ័យក្នុងការចាប់ផ្តើមសម្រាលទណ្ឌកម្មពីសំណាក់ប្រទេសលោកខាងលិច ប្រាកដជាគ្មានមូលហេតុអ្វីងាកមកបំផ្លិចបំផ្លាញសមិទ្ធិកម្មរបស់ខ្លួនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ