ភូមាប្រកាសរើរុះគណៈរដ្ឋមន្ត្រី ថ្ងៃបើកសម័យប្រជុំសភាពេញអង្គ
ការរុះរើគណៈរដ្ឋមន្ត្រី នឹងប្រព្រឹត្តទៅក្នុងពេលឆាប់ៗនេះ ! នេះបើតាមប្រភពព័ត៌មានផ្លូវការភូមា។ រដ្ឋមន្ត្រី មាននិន្នាការអភិរក្សនិយមជាច្រើននាក់ នឹងត្រូវបាត់បង់តំណែង ក្នុងជួររដ្ឋាភិបាល។ ការនេះបញ្ជាក់យ៉ាងច្បាស់ ពីភាពប្រទាញប្រទង់គ្នារវាងក្រុមអ្នកកំណែទម្រង់និយម និងក្រុមស្រឡាញ់អំណាចផ្តាច់ការ។ ទន្ទឹមគ្នានេះសភាភូមាបានប្រកាសពីការលាលែងតំណែងរបស់អនុប្រធានសភាម្នាក់។ សភាភូមាដែលនៅថ្ងៃនេះបានបើកសម័យប្រជុំពេញអង្គ ជាលើកដំបូង ក្រោយការបោះឆ្នោតសភាខែមេសាមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ទំនងជាមានរដ្ឋមន្ត្រីបីនាក់ ដែលត្រូវខ្ទាតចេញពីតំណែង ក្នុងការរុះរើគណៈរដ្ឋមន្ត្រីនេះ ! ប្រភពព័ត៌មានផ្លូវការភូមាបានគូសបញ្ជាក់បន្ថែមទៀតថា ឥស្សរជនទាំងបីនាក់នោះ មាននិន្នាការអភិរក្សនិយម មិនពេញចិត្តនយោបាយធ្វើកំណែទម្រង់របស់ប្រធានាធិបតីភូមាឡើយ។
ចំណែកកៅអីអនុប្រធានសភា ក៏នៅទំនេរ ព្រោះអនុប្រធានម្នាក់ក្នុងចំណោមអនុប្រធានទាំងពីរ បានលាលែងចេញពីតំណែង។ អនុប្រធានលាលែងចេញពីតំណែងរូបនោះក៏មានជំហរប្រឆាំងនឹងការធ្វើកំណែទម្រង់ដែរ។ ពេលនេះ សមាជិកសភាភូមាត្រូវជ្រើសរើសអនុប្រធានថ្មី ស្របតាមរបៀបវារៈរបស់សភា ដែលបានសម័យប្រជុំពេញអង្គរបស់ខ្លួនជាលើកទីដំបូង នៅថ្ងៃពុធទី ៤ មិថុនានេះ។
តាំងពីបានទទួលតំណែងជាប្រធានាធិបតីស៊ីវិលភូមា នៅខែមីនា ឆ្នាំ២០១១មក លោក ថេន សេន អតីតឧត្តមសេនីយ៍ បានធ្វើឱ្យពិភពលោក ភ្ញាក់ផ្អើលខ្លាំងតាមរយៈការធ្វើកំណែទម្រង់នយោបាយ សេដ្ឋកិច្ចជាបន្តបន្ទាប់ និងបានអនុញ្ញាតឱ្យលោកស្រី អ៊ុងសានស៊ូជី ជ័យលាភីរង្វាន់ណូបែលសន្តិភាព និងជាប្រមុខបក្សប្រឆាំង បានចូលប្រលូកក្នុងឆាកនយោបាយវិញ រហូតបានឈ្នះឆ្នោតសភា កាលពីខែមេសា យ៉ាងត្រចះត្រចង់។
នៅថ្ងៃពុធនេះ តំណាងរាស្ត្រជាប់ឆ្នោតថ្មីរបស់បក្សសម្ព័ន្ធជាតិដើម្បីលទ្ធិប្រជាធិបតេយ្យ បានបោះជំហាន ជាលើកទីមួយ ចូលរង្វង់សភា មានវត្តមានក្នុងសម័យប្រជុំពេញអង្គក្នុងនាមជាបក្សប្រឆាំង។ ក៏ប៉ុន្តែលោកស្រី អ៊ុងសានស៊ូជី ជាតំណាងរាស្ត្រម្នាក់ដែរនោះ បានទទួលសិទ្ធិពិសេស អវត្តមាននៅថ្ងៃនេះ ដើម្បីសម្រាកកម្លាំងមួយអាទិត្យ បន្ទាប់ពីបានបំពេញទស្សនកិច្ចមួយជុំនៅអឺរ៉ុប អស់ពីរសប្តាហ៍។ របៀបវារៈថ្ងៃនេះ គឺការពិភាក្សាលើច្បាប់វិនិយោគ ដែលក្រុមហ៊ុនបរទេសធំៗរង់ចាំបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ