៥០ប្រទេសថ្កោលទោសរុស្ស៊ីដែលរៀបចំការបោះឆ្នោតក្នុងទឹកដីអ៊ុយក្រែន ប៉ុន្តែ រុស្ស៊ីថាកុំចេះលូកដៃ
ការបោះឆ្នោតប្រធានាធិបតីរុស្ស៊ីនៅក្នុងទឹកដីអ៊ុយក្រែនបានបង្កឲ្យមានរលករិះគន់ និងថ្កោលទោសពីសំណាក់អគ្គលេខាធិការអង្គការសហប្រជាជាតិ និងប្រទេសជាង៥០សមាជិករបស់ស្ថាប័នអន្តរជាតិមួយនេះ។ នៅក្នុងកិច្ចប្រជុំរបស់ក្រុមប្រឹក្សាសន្តិសុខនៅទីក្រុងញូវយ៉ក កាលពីថ្ងៃសុក្រ អគ្គលេខាធិការរងទទួលបន្ទុកកិច្ចការនយោបាយរបស់អង្គការសហប្រជាជាតិប្រកាសថា ការបោះឆ្នោតប្រធានាធិបតីរុស្ស៊ី នៅក្នុងទឹកដីអ៊ុយក្រែនដែលស្ថិតក្រោមការគ្រប់គ្រងរបស់រុស្ស៊ី គឺជារឿងដែលមិនអាចទទួលយកបាន។ ប៉ុន្តែ អ្នកតំណាងរុស្ស៊ីនិយាយការពារជំហររបស់រុស្ស៊ី និងថារុស្ស៊ីនឹងមិនអត់ឱនរាល់ការប៉ុនប៉ងលូកដៃចូលកិច្ចការផ្ទៃក្នុងរបស់រុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
ទៅតាមសំណើរបស់ប្រទេសស្លូវេនី ក្រុមប្រឹក្សាសន្តិសុខអង្គការសហប្រជាជាតិបានបើកកិច្ចប្រជុំបន្ទាន់នៅថ្ងៃសុក្រទី ១៥មីនា ដើម្បីនិយាយពីការរៀបចំបោះឆ្នោតប្រធានាធិបតីរុស្ស៊ី នៅក្នុងទឹកដីអ៊ុយក្រែនដែលកំពុងស្ថិតក្រោមការគ្រប់គ្រងរបស់រុស្ស៊ី។ សម្រាប់លោកស្រីrosemary dicarlo អគ្គលេខាធិការរងអង្គការសហប្រជាជាតិទទួលបន្ទុកកិច្ចការនយោបាយ ទង្វើរបស់រុស្ស៊ីដែលរៀបចំការបោះឆ្នោតនៅក្នុងទឹកដីអ៊ុយក្រែន គឺជារឿងដែលគេមិនអាចទទួលយកបាន។ បើតាមលោកស្រី បេសកកម្មតាមដានសិទ្ធិមនុស្សរបស់អង្គការសហប្រជាជាតិនៅទឹកដីអ៊ុយក្រែនធ្លាប់បង្ហាញហើយថា ការបោះឆ្នោតប្រជាមតិកន្លងមកដើម្បីភ្ជាប់ទឹកដីបួនបន្ថែមទៀតរបស់អ៊ុយក្រែនទៅក្នុងផែនទីរុស្ស៊ីធ្វើឡើងនៅក្នុងបរិយាកាសបំភិតបំភ័យ និងចាប់បង្ខំ។ ដូច្នេះលោកស្រីទាមទារឲ្យប្រទេសមហាអំណាចដូចជាសហព័ន្ធរុស្ស៊ីគោរពច្បាប់អ៊ុយក្រែន នៅក្នុងទឹកដីដែលខ្លួនកំពុងគ្រប់គ្រង។
អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយទែរស្ក៍វិញថ្កោលទោសការព្យាយាមរបស់រុស្ស៊ីនៅក្នុងការរៀបចំការបោះឆ្នោតប្រធានាធិបតីរុស្ស៊ីនៅក្នុងទឹកដីអ៊ុយក្រែនដែលរុស្ស៊ីបានរំលោភយកមកកាន់កាប់នៅក្នុងពេលធ្វើសង្រ្គាមឈ្លានពានអ៊ុយក្រែន ជាង២ឆ្នាំមកនេះ។ សម្រាប់ប្រមុខអង្គការសហប្រជាជាតិ ការកាត់យកទឹកដីអ៊ុយក្រែនមកដាក់ក្នុងផែនទីរបស់រុស្ស៊ីនឹងគ្មានសុពលភាពទេ នៅក្នុងច្បាប់អន្តរជាតិ។ អង្គការសហប្រជាជាតិនៅតែទាមទារឲ្យមានការគោរពឯករាជ្យ និងអធិបតេយ្យភាពរបស់អ៊ុយក្រែន។ នេះបើតាមអ្នកនាំពាក្យរបស់អគ្គលេខាធិការអង្គការសហប្រជាជាតិ។
នៅថ្ងៃសុក្រ ដោយសារតែក្រុមប្រឹក្សាសន្តិសុខអង្គការសហប្រជាជាតិជាប់ចំណងមិនអាចចេញសេចក្តីសម្រេច ដោយសារវេតូប្រឆាំងណាមួយរបស់រុស្ស៊ី ដែលជាសមាជិកអចិន្ត្រៃយ៍របស់ក្រុមប្រឹក្សា ក្រុមប្រទេសជាង៥០ នាំមុខដោយអង់គ្លេស អាមេរិក ជប៉ុន អូស្ត្រាលី បារាំង កូរ៉េខាងត្បូង និងអ៊ុយក្រែនផ្ទាល់បានចេញសេចក្តីថ្លែងការណ៍រួម ថ្កោលទោសរុស្ស៊ីដែលរៀបចំការបោះឆ្នោតនៅក្នុងតំបន់ទាំង៤របស់អ៊ុយក្រែន ដែលរុស្ស៊ីបានកាត់យកដោយខុសច្បាប់ កាលពីឆ្នាំ២០២២។ សម្រាប់ប្រទេសទាំងជាង៥០ ដោយរៀបចំការបោះឆ្នោតរបស់ខ្លួននៅក្នុងទឹកដីរបស់ប្រទេសមួយទៀតដែលជាសមាជិកមួយរបស់អង្គការសហប្រជាជាតិ និងដោយគ្មានការយល់ព្រមព្រៀងពីម្ចាស់សាមីខ្លួន រុស្ស៊ីកំពុងរំលោភពេញទំហឹងគោលការណ៍ដែនបូរណភាព និងអធិបតេយ្យភាពរបស់ប្រទេសអ៊ុយក្រែន។
នៅអង្គការសហប្រជាជាតិ នៅចំពោះមុខការប្រមូលគ្នារិះគន់រុស្ស៊ីយ៉ាងដូច្នេះ អ្នកតំណាងរុស្ស៊ី លោកឌីមីទ្រី ប៉ូលីយ៉ាន់ស្គីទាត់ចោលរាល់ការប៉ុនប៉ងលូកដៃចូលកិច្ចការផ្ទៃក្នុងរបស់រុស្ស៊ី។ សម្រាប់លោក ដែនដីទាំង៤របស់អ៊ុយក្រែនកំពុងស្ថិតក្រោមការគ្រប់គ្រងនយោបាយ និងរដ្ឋបាលរបស់រុស្ស៊ី។ ទោះអ្នកណាយល់ឃើញយ៉ាងម៉េច ពេញចិត្តឬអត់ គឺរុស្ស៊ីមិនខ្វល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ