លោកស៊ី ជីនពីង មកទស្សនកិច្ចនៅបារាំង ក្នុងបរិបទនៃភាពតានតឹងរវាងចិននិងអឺរ៉ុប
តាមការគ្រោងទុក លោកប្រធានាធិបតីចិន ស៊ី ជីនពីង ត្រូវធ្វើដំណើរមកដល់ទីក្រុងប៉ារីសប្រទេសបារាំង នៅរសៀលថ្ងៃអាទិត្យ ទី៥ឧសភា។ ទស្សនកិច្ចនៅបារាំង របស់លោកស៊ី ជីនពីង គឺធ្វើឡើងក្នុងឱកាសខួប៦០ឆ្នាំ នៃទំនាក់ទំនងការទូត រវាងបារាំងនិងចិន។ បើគិតពីឆ្នាំ២០១៩មក ពោលគឺមុនវិបត្តិកូវីដ១៩ គឺនេះជាលើកទី១ហើយ ដែលហើយ ដែលលោកស៊ី ជីនពីង ធ្វើដំណើរមកទស្សនកិច្ចនៅអឺរ៉ុប។ មានសំណុំរឿងជាច្រើន ដែលចិននិងអឺរ៉ុប ត្រូវនិយាយគ្នា ក្នុងនោះមានបញ្ហាសេដ្ឋកិច្ចពាណិជ្ជកម្ម និងបញ្ហាសិទ្ធិមនុស្សនៅចិន ហើយជាពិសេសនោះ គឺសំណុំរឿងសង្គ្រាមនៅអ៊ុយក្រែន ដែលគ្រប់គ្នាដឹងច្បាស់ ថាចិនគឺជាសម្ព័ន្ធមិត្តជួយរុស្ស៊ីពីក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៩:៣៦
បញ្ហារកាំរកូសមុនលោកស៊ី ជីនពីងមកដល់ប៉ារីស
តាមពិតទស្សនកិច្ចរបស់លោកប្រធានាធិបតីចិន ស៊ី ជីនពីង នៅបារាំង គឺធ្វើឡើងក្នុងឱកាសបុណ្យគម្រប់ខួប៦០ឆ្នាំ នៃការភ្ជាប់ទំនាក់ទំនងការទូត រវាងបារាំង និងសាធារណរដ្ឋប្រជាមានិតចិន។ លោកប្រធានាធិបតីបារាំង អេម៉ានុយអែល ម៉ាក្រុង ចង់ឆក់ឱកាសនេះទទួលលោកស៊ី ជីនពីង ឲ្យបានអធិកអធំបំផុត។ តែទន្ទឹមគ្នានេះ លោកម៉ាក្រុង ស្ថិតនៅក្នុងត្រង់ចំណុចមួយដែលលំបាក ព្រោះថាមានសំណុំរឿងច្រើនណាស់ ដែលបារាំងត្រូវនិយាយជាមួយចិនដោយត្រង់ៗ ហើយសុទ្ធតែជាសំណុំរឿងរសើបៗ តួយ៉ាង ដូចជាបញ្ហាសិទ្ធិមនុស្សបញ្ហាពាណិជ្ជកម្ម និងជាពិសេសគឺបញ្ហាសង្គ្រាមនៅអ៊ុយក្រែន។
បញ្ហារកាំរកូសមួយចំនួនទៀតបានកើតឡើង ប៉ុន្មានថ្ងៃចុងក្រោយនេះ មុនពេលលោកស៊ី ជីនពីងចុះយន្តហោះដល់ប៉ារីស។ កាលពីថ្ងៃ៣០មេសា មានកម្មវិធីបំពាក់មេដាយមួយ ត្រូវបានធ្វើឡើងនៅឯវិមានប្រធានាធិបតីបារាំង ក្រោមអធិបតីរបស់លោក ប្រធានាធិបតីម៉ាក្រុង។ ហើយឱកាសនោះ ក៏មានវត្តមានរបស់លោក Penpa Tsering ប្រធានរដ្ឋាភិបាលភៀសខ្លួនក្រៅប្រទេសរបស់ទីបេដែរ។ លោកម៉ាក្រុងបានថែមទាំងចាប់ដៃសំណេះសំណាល ជាមួយលោក Penpa Tsering ថែមទៀត។ ទង្វើនេះបានធ្វើភាគីចិនខឹងខ្លាំងណាស់ ព្រោះរដ្ឋាភិបាលចិន ចាត់ទុករដ្ឋាភិបាលភៀសខ្លួនក្រៅប្រទេសរបស់ទីបេ ជាអង្គភាពបះបោរបំបែកទឹកដី។
បន្ទាប់មកទៀត នៅថ្ងៃទី២ឧសភា កម្មវិធីទូរទស្សន៍បារាំងមួយឈ្មោះ Envoyé Spécial បានផ្សព្វផ្សាយរូបភាព បង្ហាញអំពីសកម្មភាព ចាប់បញ្ជូនសកម្មជនប្រឆាំងចិនដែលភៀសខ្លួនមករស់នៅបារាំង យកទៅស្រុកចិនវិញ។ ជាសកម្មភាពដែលធ្វើឡើង ដោយមានការចូលរួមពីមន្ត្រីទូតចិនប្រចាំនៅបារាំងថែមទៀតផង។ ផ្អែកតាមការផ្សាយនេះ គឺអាជ្ញាធរចិនមិនត្រឹមតែបំបិទមាត់និងសំឡេងប្រឆាំងក្នុងស្រុកប៉ុណ្ណោះទេ តែអាជ្ញាធរចិនបានថែមទាំងរៀបចំផែនការជាប្រព័ន្ធ ដើម្បីចាប់បញ្ជូនសកម្មជនប្រឆាំងដែលនៅក្រៅប្រទេស យកទៅដាក់ឃុំក្នុងស្រុកចិនថែមទៀតផង។ បើគិតពីឆ្នាំ២០១៤មក អាជ្ញាធរចិនបានចាប់បញ្ជូនសកម្មជនប្រឆាំងនៅបរទេស ចំនួនយ៉ាងហោច១២០០០នាក់ យកទៅស្រុកចិនវិញ ដើម្បីកុំឲ្យពួកគេធ្វើសកម្មភាពស្រែកតវ៉ារិះគន់ចិននៅក្រៅប្រទេស។
បន្ថែមពីនេះទៀត មានដំណឹងពីសមាជិកព្រឹទ្ធសភាបារាំងម្នាក់ ឈ្មោះOlivier Cadic ដែលបានអះអាងថាលោកត្រូវបានកម្លាំងចារកិច្ចចិន លួចឈ្លបយកការណ៍តាមប្រព័ន្ធបច្ចេកវិទ្យា។ ទីភ្នាក់ងារ FBI បានជូនដំណឹងនេះមកកាន់លោក Olivier Cadic ថាលោកគឺជាជនរងគ្រោះម្នាក់ក្នុងចំណោមសមាជិកសភាទាំងអស់ ១១៦នាក់ នៅតាមបណ្តាប្រទេសធំៗ ដែលត្រូវចារកិច្ចចិនឈ្លបយកការណ៍ ប្រមូលទិន្នន័យកាលពីឆ្នាំ២០២១។ លោក Olivier Cadic បានយកបញ្ហានេះទៅថ្លែងនៅមុខអង្គប្រជុំព្រឹទ្ធសភា នឹងបានទាមទារឲ្យរដ្ឋាភិបាលបារាំង ត្រូវតែធ្វើអ្វីម្យ៉ាង ដើម្បីថ្កោលទោសចិន។
សំណុំរឿងសិទ្ធិមនុស្សនៅខេត្តស៊ីនជាំង
នៅថ្ងៃអាទិត្យនេះ ស្របពេលដែលលោកស៊ី ជីនពីងមកដល់ នៅប៉ារីសគឺមានបាតុកម្មប្រឆាំងនឹងអំពើរំលោភសិទ្ធិមនុស្ស ធ្វើឡើងទៅលើប្រជាជនអ៊ុយហ្កួរនៅខេត្តស៊ីនជាំង។ លោកស្រី Dilnur Reyhan ស្ថាបនិកវិទ្យាស្ថានអ៊ុយហ្កួរបារាំង បានថ្លែងនៅក្នុងសន្និសីទកាសែត កាលពីថ្ងៃទី៣ឧសភា ថាសហគមន៍ជនជាតិអ៊ុយហ្កួរសូមប្រឆាំងដាច់ខាត ដែលលោកម៉ាក្រុងទទួលប្រធានាធិបតីចិនបែបនេះ ព្រោះថាគឺលោកស៊ី ជីនពីងដែលជាអ្នកបញ្ជា ឲ្យមានអំពើប្រល័យពូជសាសន៍ ធ្វើទៅលើជនជាតិអ៊ុយហ្គួរ និងអ្នកកាន់សាសនាអ៊ីស្លាមផ្សេងទៀតនៅខេត្តស៊ីនជាំង។ ស្ត្រីសកម្មជនអ៊ុយហ្កួររូបនេះ ថ្លែងថា ទង្វើដែលលោកម៉ាក្រុងទទួលឃាតករសម្លាប់ប្រជាជនអ៊ុយហ្កួរ វាប្រៀបបីដូចជាការទះកំផ្លៀងមកលើប្រជាជនអ៊ុយហ្គួរដូច្នោះដែរ។
ដោយឡែក អង្គការ Amnesty International បានចេញលិខិតប្រកាសមួយកាលពីថ្ងៃទី២ឧសភា ដោយបានអំពាវនាវ ឲ្យលោកម៉ាក្រុង ត្រូវតែកុំភ្លេចនូវគោលជំហរ ក៏ដូចជាការសន្យាកន្លងមករបស់បារាំង នៅក្នុងការទាមទារការគោរពសិទ្ធិមនុស្សនៅចិន។ Amnesty International អំពាវនាវឲ្យលោកម៉ាក្រុង ត្រូវតែដាក់កំហិតទៅលើលោកស៊ី ជីនពីង ឲ្យដោះលែងបញ្ញវន្តអ៊ុយហ្កួរដ៏សំខាន់មួយរូប គឺលោក Ilham Tohti ព្រមទាំងអ្នកទោសនយោបាយផ្សេងទៀតនៅស៊ីនជាំង ហើយត្រូវតែទាមទារឲ្យចិនបិទបញ្ចប់ គោលនយោបាយធ្វើទុក្ខបុកម្នេញ សម្លាប់ចាប់ចង ប្រជាជនអ៊ុយហ្កួរ និងកាហ្សាក់រាប់ម៉ឺននាក់។ អង្គការនេះ ទាមទារផងដែរ ឲ្យបារាំងដាក់សំពាធ ឲ្យចិនលុបចោលវិញ នូវច្បាប់សន្តិសុខជាតិ ដែលមានកម្មវត្ថុបំបិទសិទ្ធិសេរីភាពនយោបាយ និងសិទ្ធិបញ្ចេញមតិនៅហុងកុង។
សំណុំរឿងសិទ្ធិមនុស្ស គឺជាចំណុចរសើបខ្លាំងណាស់ ហើយដែលបារាំងតែងតែព្យាយាមប្រកាន់គោលជំហរការពារ។ តែទន្ទឹមគ្នានេះ ដូចយើងដឹងហើយ ចិនមិនអនុញ្ញាតឲ្យនរណារិះគន់ខ្លួនជាដាច់ខាត ដោយលើកឡើងថា កុំមកលូកដៃកិច្ចការផ្ទៃក្នុងរបស់ចិន។ ប្រការនេះ បង្ហាញឲ្យឃើញថា លោកម៉ាក្រុង ច្បាស់ជាតឹងតែងក្នុងចិត្តមិនតិចទេ ប្រសិនបើត្រូវលើកយករឿងសិទ្ធិមនុស្ស ទៅនិយាយជាមួយលោកស៊ី ជីនពីង នៅក្នុងពេលទស្សនកិច្ចនេះ។
លោកម៉ាក្រុងចង់ពឹងលោកស៊ី ជីនពីងឲ្យទៅនិយាយជាមួយលោកពូទីន
សំណុំរឿងសង្គ្រាមនៅអ៊ុយក្រែនសំខាន់ខ្លាំងណាស់ ព្រោះវាប៉ះពាល់ដោយផ្ទាល់ ទៅលើសន្តិសុខរបស់បារាំង និងរបស់អឺរ៉ុបទាំងមូល។ នៅថ្ងៃចន្ទស្អែកនេះ កិច្ចប្រជុំពិសេសមួយ នឹងត្រូវរៀបចំនៅប៉ារីស រវាងលោកម៉ាក្រុង និងលោកស៊ី ជីនពីង និងដោយមានវត្តមានរបស់លោកស្រី អៀរស៊ូឡា វុន ឌឹឡេយេន ប្រធានគណៈកម្មការអឺរ៉ុប ចូលរួមដែរ។ ប្រភពពីវិមានប្រធានាធិបតីបារាំង គឺលោកម៉ាក្រុងបានអញ្ជើញលោកអូឡាហ្វ ស្ហុល ឲ្យចូលរួមប្រជុំដែរ ព្រោះថាបារាំងនិងអាល្លឺម៉ង់ គឺជាកម្លាំងចលករក្បាលម៉ាស៊ីនអឺរ៉ុប មិនថាលើបញ្ហាសន្តិសុខ និងបញ្ហាសេដ្ឋកិច្ចពាណិជ្ជកម្ម។ តែលោកអធិកាបតីអាល្លឺម៉ង់ មិនអាចមកបានដោយត្រូវធ្វើដំណើរទៅលីទុយអានី និងឡេតូនី។
លោកម៉ាក្រុង ដឹងច្បាស់ណាស់ ថាចិនគឺជាដៃគូសហការរបស់រុស្ស៊ី ហើយចិនបានបន្តជួយរុស្ស៊ីជាប់រហូត ដោយមិនខ្វល់ពីទណ្ឌកម្មដែលសហគមន៍អន្តរជាតិបានដាក់ទៅលើរុស្ស៊ីទេ។ ក្នុងបរិបទនេះយោងតាមវិមានអេលីហ្សេ លោកម៉ាក្រុង មានបំណងចង់បញ្ចុះបញ្ចូលលោកស៊ី ជីនពីង ឲ្យប្រើប្រាស់ឥទ្ធិពលដែលខ្លួនមានទៅលើរុស្ស៊ី ដើម្បីនិយាយជាមួយលោកពូទីន រកច្រកផ្លូវបញ្ចប់សង្គ្រាម។ យ៉ាងណាមិញ កាលពីឆ្នាំមុន នៅពេលលោកម៉ាក្រុងនិយាយជាមួយលោកស៊ី ជីនពីងពីបញ្ហាសង្គ្រាមនៅអ៊ុយក្រែន ស្រាប់តែលោកស៊ី ជីនពីង បានទូរស័ព្ទទៅនិយាយជាមួយលោកហ្សេឡេនស្គីភ្លាមដែរ។
តែយ៉ាងណា បើផ្អែកតាមការវិភាគរបស់លោកស្រី Valérie Niquet អ្នកវិភាគនៅមូលនិធិដើម្បីការស្រាវជ្រាវយុទ្ធសាស្ត្រ FRS គឺលោកស៊ី ជីនពីង ប្រហែលជានឹងមិនដូរគោលជំហរទេ ទាក់ទិននឹងសំណុំរឿងអ៊ុយក្រែន។ ពោលគឺចិនប្រកាន់ជំហរអព្យាក្រិត្យជាផ្លូវការ តែនៅពីក្រោយគឺចិនជួយរុស្ស៊ីតាមរយៈការមិនថ្កោលទោសរុស្ស៊ី មិនដាក់ទណ្ឌកម្មរុស្ស៊ី។ នៅក្នុងខែឧសភានេះដែរ លោកពូទីននឹងទៅទស្សនកិច្ចនៅប៉េកាំងជួបលោកស៊ី ជីនពីង ដែលនេះវាកាន់តែសបង្ហាញថាចិននៅខាងណា។ ដូចគ្នាដែរ យោងតាមលោក Ding Chun នាយកមជ្ឈមណ្ឌលសិក្សាអឺរ៉ុបនៅសកលវិទ្យាល័យ Fudan សៀងហៃ គឺគេសង្ឃឹមតិចណាស់ ដែលចិននឹងមកចូលរួមជាមួយអឺរ៉ុបនឹងអាមេរិក ក្នុងការដាក់ទណ្ឌកម្មធ្វើបាបរុស្ស៊ី។
ចេញពីបារាំង លោកស៊ី ជីនពីង នឹងបន្តដំណើរទៅហុងគ្រី និងស៊ែប៊ី ដែលសុទ្ធតែជាប្រទេសមានទំនោរងាកទៅរុស្ស៊ីទៀត។ ហើយនៅស៊ែប៊ី ទស្សនកិច្ចរបស់លោកស៊ីជីនពីង វាជួនចំឱកាសបុណហយខួបគម្រប់២៥ឆ្នាំ នៃការទំលាក់គ្រាប់បែករបស់អូតង់ ទៅលើស្ថានទូតចិននៅក្រុងប៊ែលហ្ក្រាដ ឆ្នាំ១៩៩៩។ យោងតាមការវិភាគរបស់លោក Wang Yiwei នាយកមជ្ឈមណ្ឌលសិក្សាអឺរ៉ុបនៅសកលវិទ្យាល័យ Renmin នេះវាអាចជាសារមួយដែរ ដែលលោកស៊ី ជីនពីងចង់ផ្ញើរទៅកាន់ក្រុមប្រទេសលោកខាងលិច ថាសម្រាប់ចិន អូតង់គឺជាគ្រោះថ្នាក់គំរាមសន្តិសុខអន្តរជាតិ។
ការវិភាគប្រហាក់ប្រហែលគ្នានេះដែរ ពីលោក Marc Julienne នៅវិទ្យាស្ថានទំនាក់ទំនងអន្តរជាតិបារាំង គឺលោកស៊ី ជីនពីង នឹងមិនធ្វើជាអ្នកនាំសារពីអឺរ៉ុបប្រាប់ទៅលោកពូទីននោះទេ។ ផ្ទុយទៅវិញ បើមើលទំនោរទៅ គឺធាតុពិត លោកស៊ី ជីនពីង កំពុងតែនាំសារពីលោកពូទីន មកប្រាប់អឺរ៉ុបទៅវិញទេ តាមរយៈទស្សនកិច្ចនៅបារាំងនាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ