អនុប្រធានចារកិច្ចអ៊ុយក្រែនថា ដល់ពេលមួយ អ៊ុយក្រែនត្រូវចរចាជាមួយរុស្ស៊ីដើម្បីបញ្ចប់សង្រ្គាម
កងទ័ពរុស្ស៊ីបានអះអាងថា វាយដណ្តើមយកភូមិអ៊ុយក្រែនជាបន្តបន្ទាប់នៅក្នុងតំបន់ភាគខាងកើត។ នៅ ថ្ងៃទី ៣ឧសភា រដ្ឋមន្រ្តីការពារជាតិរុស្ស៊ី លោកសេហ្គេយ ស្ហ័ហ្គូ និយាយនៅក្នុងកិច្ចប្រជុំក្នុងទីក្រុងម៉ូស្គូថា គិតចាប់តាំងពីដើមឆ្នាំនេះ កងទ័ពរុស្ស៊ីវាយយកបានដីអ៊ុយក្រែន ប្រមាណ ៥៤៧គីឡូម៉ែត្រការ៉េ។ ដោយសារការវាយប្រហារដ៏សន្ធប់របស់រុស្ស៊ី ទៅលើទីក្រុង ហេដ្ឋារចនាសម្ព័ន្ធរបស់អ៊ុយក្រែន និងការបោះជំហាន រុលទៅមុខរបស់រុស្ស៊ីក្នុងសមភូមិប្រយុទ្ធ អនុប្រធានក្រុមស៊ើបការណ៍សម្ងាត់អ៊ុយក្រែន លោកវ៉ាឌីម ស្គីប៊ីតស្គីបាននិយាយប្រាប់ទស្សនាវដ្តីThe Economist ថា នៅពេលណាមួយ អ៊ុយក្រែនត្រូវចរចាជាមួយរុស្ស៊ីដើម្បីបញ្ចប់សង្រ្គាមជាង២ឆ្នាំមកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៣
ចាញ់ប្រៀបរុស្ស៊ី ទាំងចំនួនកងទ័ព និងសព្វាវុធ ដោយសារសម្ព័ន្ធមិត្តអាមេរិក និងអឺរ៉ុបមិនបានប្រគល់តាមចំនួនសន្យា អ៊ុយក្រែនកំពុងស្ថិតនៅលើផ្លូវមួយដ៏ពិបាក។ ដោយសារការវាយដ៏សន្ធប់របស់រុស្ស៊ី តាមផ្លូវអាកាស និងផ្លូវគោក នៅសមរភូមិមុខ កងទ័ពអ៊ុយក្រែនចាំតែទប់ទល់ ការពារខ្សែប្រយុទ្ធ ប៉ុន្តែ មិនអាចវាយរុញច្រានកងទ័ពរុស្ស៊ីចេញពីទឹកដីរបស់ខ្លួន។
នៅក្នុងកិច្ចប្រជុំនៅទីក្រុងម៉ូស្គូ ប្រមុខការពារជាតិរុស្ស៊ីលោក Sergei Shoigu បានអះអាងថា កងទ័ពអ៊ុយក្រែនព្យាយាមទប់ទល់នៅខ្សែការពារ ប៉ុន្តែ ដោយសារកម្លាំងខ្លាំងក្លារបស់កងទ័ពរុស្ស៊ី ទាហានអ៊ុយក្រែនបោះបង់ចោលទីតាំង និងដកថយនៅគ្រប់សមភូមិនៅតាមបណ្តោយ ខ្សែប្រយុទ្ធពីជើងទៅត្បូង នៅតំបន់ភាគខាងកើត។ បើតាមរដ្ឋមន្រ្តីការពារជាតិរុស្ស៊ី នៅ៤ខែមកនេះ កងទ័ពរុស្ស៊ីវាយយកបានដីអ៊ុយក្រែន ប្រមាណ៥៤៧គីឡូម៉ែត្រការ៉េបន្ថែមទៀត។
ដោយសារសមរភូមិប្រយុទ្ធកាន់តែស្មុគស្មាញ ពិបាកយកប្រៀបលើកម្លាំងទ័ពរុស្ស៊ី អនុប្រធានក្រុមស៊ើបការណ៍សម្ងាត់របស់អ៊ុយក្រែន លោក វ៉ាឌីម ស្គីប៊ីតស្គី បាននិយាយថា នៅពេលណាមួយ អ៊ុយក្រែនត្រូវចរចាជាមួយរុស្ស៊ីដើម្បីបិទបញ្ចប់សង្រ្គាមបង្ហូរឈាម ជាង២ឆ្នាំមកនេះ។ នៅក្នុងបទសម្ភាសន៍ជាមួយទស្សនាវដ្តីអង់គ្លេស The Economist អ្នកទទួលខុសត្រូវស៊ើបការណ៍សម្ងាត់អ៊ុយក្រែនបញ្ជាក់ថា ការចរចាគឺជារឿងចាំបាច់ដែលត្រូវតែមាន ដូចនៅក្នុងសង្រ្គាមដទៃទៀត។ បើតាមមតិផ្ទាល់របស់អនុប្រធានក្រុមស៊ើបការណ៍សម្ងាត់អ៊ុយក្រែន លោកមិនឃើញផ្លូវដែលអ៊ុយក្រែនឈ្នះសង្រ្គាមនៅក្នុងសមរភូមិ។ ទោះជាកងទ័ពអ៊ុយក្រែនអាចវាយរុញច្រានរុស្ស៊ីទៅដល់ព្រំដែនដូចដើម (ក្តីសង្ឃឹមដែលមានពន្លឺកាន់តែតូច) ក៏វាមិនអាចបញ្ចប់សង្រ្គាមបានដែរ។ នេះបើតាមការចុះផ្សាយរបស់ទស្សនាវដ្តីអង់គ្លេស The Economist។
គ្រប់សង្រ្គាមនឹងត្រូវបញ្ចប់ដោយសន្ធិសញ្ញាណាមួយ។ ប៉ុន្តែ ក្នុងដំណាក់កាលសព្វថ្ងៃនេះ ភាគីទាំងពីរ អ៊ុយក្រែន និងរុស្ស៊ី ប្រឹងប្រយុទ្ធរៀងៗខ្លួន ដើម្បីមានកម្លាំង មានប្រៀបនៅក្នុងពេលចរចា។ បើតាមការវាយតម្លៃរបស់អនុប្រធានក្រុមស៊ើបការណ៍សម្ងាត់អ៊ុយក្រែន ការចរចាពិតប្រាកដ រុស្ស៊ី អ៊ុយក្រែននឹងអាចចាប់ផ្តើម នៅឆមាសទី២នៅ ២០២៥ ឬអាចលឿនជាងនេះ។
ការលើកឡើងរបស់អនុប្រធានស៊ើបការណ៍សម្ងាត់អ៊ុយក្រែន ហាក់ផ្ទុយនឹងជំហររបស់លោកប្រធានាធិបតីអ៊ុយក្រែន លោកវ្លូឌីមៀរ ហ្សេឡិនស្គីដែលបានទាត់ចោលជាច្រើនសារ ការចរចាណាមួយជាមួយរុស្ស៊ី។ នៅឆ្នាំ ២០២២ ប្រធានាធិបតីអ៊ុយក្រែននៅបានចេញក្រឹត្យជាផ្លូវការ បិទផ្លូវចរចាជាមួយរុស្ស៊ី។
ប៉ុន្តែ នៅមុនសន្និសីទស្តីពីសន្តិភាពនៅអ៊ុយក្រែន ដែលនឹងរៀបចំធ្វើនៅប្រទេសស៊្វីសនៅខែមិថុនា រដ្ឋមន្រ្តីការបរទេសអ៊ុយក្រែនពន្លយឲ្យដឹងថា សន្និសីទមានគោលដៅប្រមូលផ្តុំប្រទេសដែលមានគោលការណ៍ គោលជំហរដូចគ្នានឹងអ៊ុយក្រែន។ បន្ទាប់មក គេអាចទាក់ទងជាមួយរុស្ស៊ីដើម្បីឲ្យរុស្ស៊ីអាចចូលរួមក្នុងតុការចរចា។ ព្រោះថា ដូចគ្រប់គ្នាបានដឹង នៅចុងបញ្ចប់ទៅ គេមិនអាចបិទបញ្ចប់សង្រ្គាមមួយ ដោយគ្មានការចូលរួមពីភាគីជម្លោះនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ