អូតង់រួមប្រជុំប្រមុខការទូតដោយផ្តោតសំខាន់លើសង្រ្គាមរុស្ស៊ី និងអ៊ុយក្រែន
ប្រមុខការទូតរបស់អង្គការអូតង់រួមប្រជុំគ្នាក្នុងទីក្រុងព្រុចសែល ប្រទេសបែលហ្ស៊ិកនាថ្ងៃអង្គារ ទី២៨ វិច្ឆិកា។ កិច្ចប្រជុំនេះធ្វើឡើងនៅក្នុងបរិបទនៃសង្រ្គាមរុស្ស៊ី អ៊ុយក្រែន និងសង្រ្គាមអ៊ីស្រាអែល ហាម៉ាស។ ទាក់ទងនឹងសង្រ្គាមរុស្ស៊ី អ៊ុយក្រែនត្រូវបានប្រមុខអង្គការអូតង់លោកយែន ស្តុលទែនប៊ែរអំពាវនាវឲ្យសមាជិកអូតង់បន្តគាំទ្រអ៊ុយក្រែនដោយមិនបន្ធូរដៃ ពិសេសសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០៣:១៧
« ខ្ញុំជឿជាក់ថា សហរដ្ឋអាមេរិកនឹងបន្តផ្តល់ការគាំទ្រដល់អ៊ុយក្រែនព្រោះវាជាផលប្រយោជន៍របស់អាមេរិកដើម្បីធ្វើដូច្នេះ » នេះជាការថ្លែងរបស់លោកយែន ស្តុលទែនប៊ែរទៅកាន់ក្រុមអ្នកកាសែតមុននឹងកិច្ចប្រជុំចាប់ផ្តើម។ គួរបញ្ជាក់ថាមកទល់ពេលនេះ អាមេរិកបានផ្តល់ជំនួយយោធាដល់អ៊ុយក្រែនក្នុងទឹកប្រាក់ចំនួន ៤០ ០០០លានដុល្លារ និងគ្រោងផ្តល់បន្ថែមទៀតនាពេលខាងមុខ។ តែជំនួយបន្ថែមនេះកំពុងជាប់គាំងនៅសភាដោយសារតែមានការជំទាស់ពីអ្នកតំណាងរាស្រ្តមួយចំនួនមកពីគណបក្សសាធារណរដ្ឋ។ ទោះជាយ៉ាងនេះក្តី ប្រមុខការទូតអាមេរិកលោកអង់តូនី ប៊្លីនកិនបានបញ្ជាក់ជាថ្មីពីការគំាំទ្ររបស់អាមេរិកចំពោះអ៊ុយក្រែន។
ពីខាងសហភាពអឺរ៉ុប ជំនួយបន្ថែមចំពោះអ៊ុយក្រែនក៏កំពុងជាប់គាំងដោយសារតែមានប្រទេសសមាជិកច្រើនមិនចង់ឲ្យលុយបន្ថែម។ តែសម្រាប់បារាំង ប្រមុខការទូតលោកស្រី Catherine Colonna បានបញ្ជាក់ម្តងទៀតពីការគាំទ្ររបស់បារាំងចំពោះអ៊ុយក្រែន។ ការបញ្ជាក់ស្រដៀងគ្នានេះក៏មានពីសមភាគីឡេតូនីលោកគ្រីសយ៉ានីស ការីន្សដែរ។ « វាជាប្រយោជន៍ផ្ទាល់របស់យើងដែលធានាថា រស្ស៊ីនឹងមិនឈ្នះសង្រ្គាមនេះទេ » នេះជាការបន្ថែមរបស់ការីន្ស។ ចំណែកប្រមុខអង្គការអូតង់លោកស្តុលទែនប៊ែរបានអំពាវនាវឲ្យសម្ព័ន្ធមិត្តបន្តជួយអ៊ុយក្រែនដែលលោកចាត់ទុកជាកាតព្វកិច្ចរបស់អូតង់។
តាមលោកស្តុលទែនប៊ែរ បស្ចិមលោកគ្មានជម្រើសផ្សេងទេ ព្រោះការទុកឲ្យប្រធានាធិបតីរុស្ស៊ីលោកពូទីនឈ្នះសង្រ្គាមជាសោកនាដកម្មចំពោះអ៊ុយក្រែន និងជាគ្រោះថ្នាក់ចំពោះអូតង់។ ដោយឡែក ប្រមុខការទូតអាល្លឺម៉ង់លោកស្រី Annalena Baerbock បានបកស្រាយតាមការយល់ឃើញរបស់លោកស្រីថា ជួយអ៊ុយក្រែនមិនមែនចង់ដឹងថាតើអ៊ុយក្រែនអាចមានប្រៀបនៅលើសមរភូមិសង្រ្គាមឬអត់ទេ។ តែគឺដើម្បីស្រោចស្រង់ជីវិតមនុស្ស ហើយស្រោចស្រង់ជីវិតមនុស្សមានន័យថា គឺពន្លឿនជំនួយរបស់សម្ព័ន្ធមិត្តចំពោះអ៊ុយក្រែនដើម្បីឲ្យអ៊ុយក្រែនអាចបញ្ចប់សង្រ្គាមមួយនេះឲ្យបានឆាប់បំផុតដែលអាចធ្វើទៅបាន។
ក្រៅពីការអំពាវនាវឲ្យបន្តជួយគាំទ្រអ៊ុយក្រែនដើម្បីប្រឈមនឹងការឈ្លានពានរបស់រុស្ស៊ី បណ្តាប្រមុខការទូតអូតង់បានសម្តែងការខកចិត្តជាមួយតួកគីដែលយឺតយ៉ាវក្នុងការផ្តល់សច្ចាប័នដល់សមាជិកភាពរបស់ប្រទេសស៊ុយអែតចូលអូតង់។ នៅក្នុងជំនួបដាច់ដោយឡែកជាមួយប្រមុខការទូតតួកគីលោក Hakan Fidan ប្រមុខការទូតអាមេរិកលោកអង់តូនី ប៊្លីនកិនបានរំលឹកប្រាប់លោក Fidan ថា តួកគីត្រូវឲ្យឲ្យសច្ចាប័នដល់សមាជិកភាពរបស់ស៊ុយអែតឲ្យបានឆាប់បំផុតដែលអាចធ្វើបាន។ ការរម្លឹកដូចគ្នានេះក៏មានពីប្រមុខការទូតបារាំងលោកស្រី Catherine Colonna ដែរ។ ចំណែកប្រមុខអង្គការអូតង់លោកស្តុលទែនប៊ែរមើលឃើញថា នីតិវិធីមួយនេះកំពុងទៅមុខ តែលោកចង់ឃើញទៅមុខឲ្យបានលឿនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ