លោកម៉ាក្រុង អំពាវនាវថាត្រូវតែប្រគល់ឲ្យអ៊ុយក្រែន នូវការការពារ ទំរាំដល់ពេលអ៊ុយក្រែនចូលជាសមាជិកអូតង់
សង្គ្រាមនៅអ៊ុយក្រែន នៅតែបន្តឆេះងំ ខណៈប្រទេសអឺរ៉ុបខាងកើតកាន់តែច្រើន បានព្រួយបារម្ភពីសុវត្ថិភាពសន្តិសុខ ប្រឈមជាមួយនឹងការគំរាមជាប្រចាំ ពីសំណាក់រុស្ស៊ី។ ថ្លែងពីទីក្រុងប្រាទីស្លាវ៉ា ប្រទេសស្លូវ៉ាគី កាលពីថ្ងៃពុធម្សិលមិញ លោកម៉ាក្រុងបានអំពាវនាវ ថាសហភាពអឺរ៉ុប ត្រូវតែរកវិធីធានាប្រាប់អ៊ុយក្រែនឲ្យមានទំនុកចិត្ត ទំរាំដល់ពេលដែលអ៊ុយក្រែន ក្លាយជាសមាជិករបស់អូតង់ពេញសិទ្ធិ។ ទន្ទឹមគ្នានេះ លោកម៉ាក្រុង បានលើកឡើងផងដែរ ថាអឺរ៉ុបត្រូវតែគូសវាផែនការថ្មី ដើម្បីជួយបណ្តាប្រទេសប្រទេសផ្សេងទៀត ដែលរងចាំចង់ចូលជាសមាជិកអឺរ៉ុប ហើយដែលពួកគេបច្ចុប្បន្ន ភ័យបារម្ភណាស់ ដោយសារតែការគំរាមរបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០៣:០០
លោកប្រធានាធិបតីម៉ាក្រុង បានអំពាវនាវ ឲ្យសហភាពអឺរ៉ុប ត្រូវតែពិចារណាគិតគូរឡើងវិញ អំពីអភិបាលកិច្ច ការគ្រប់គ្រងដឹកនាំ ព្រមទាំងរិះរកគំនិតថ្មីៗ ដើម្បីឆ្លើយតបទៅនឹងសេចក្តីប្រាថ្នា ចង់ចូលរូមនៅក្នុងមហាគ្រួសារសហភាពអឺរ៉ុប ពីសំណាក់បណ្តាប្រទេសអឺរ៉ុបខាងកើត និងនៅតំបន់បាល់កង់។
លោកម៉ាក្រុងបានលើកឡើងបែបនេះ នៅក្នុងឱកាសទៅទស្សនកិច្ច នៅទីក្រុងប្រាទីស្លាវ៉ា ប្រទេសស្លូវ៉ាគី កាលពីថ្ងៃពុធ ទី៣១ឧសភា មុននឹងបន្តដំណើរទៅកាន់ទីក្រុងគីស៊ីណោ ប្រទេសមុលដាវី ជាទីដែលនឹងមានជំនួបកំពូល "សហគមន៍នយោបាយអឺរ៉ុប" ទាំង៤៧ប្រទេស។
លោកប្រធានាធិបតីបារាំង អះអាងថា ការពិចារណារកគម្រូដឹកនាំថ្មីពីសំណាក់សហភាពអឺរ៉ុប វាគឺជាមធ្យោបាយតែមួយគត់ ដើម្បីឆ្លើយទប ទៅនឹងសេចក្តីរំពឹងដ៏ត្រឹមត្រូវបំផុត របស់បណ្តាប្រទេសតំបន់បាល់កង់ខាងលិច ប្រទេសមុលដាវី និងអ៊ុយក្រែនជាដើម ដែលនឹងក្លាយជាសមជិករបស់អឺរ៉ុបនៅថ្ងៃអនាគត។ វាក៏ជាវិធីដើម្បីធ្វើឲ្យអឺរ៉ុបមានសមត្ថភាពយុទ្ធសាស្ត្រដែលមានប្រសិទ្ធភាពផងដែរ។
នៅប្រាទីស្លាវ៉ា លោកម៉ាក្រុង បានលើកឡើងថា ក្រុមសម្ព័ន្ធមិត្តលោកខាងលិច ត្រូវតែប្រគល់ទៅឲ្យអ៊ុយក្រែន នូវការធានាសន្តិសុខ ដ៏រឹងមាំ និងប្រកបដោយទំនុកចិត្ត។ លោកអះអាង នេះគឺជាកម្មវត្ថុដ៏ធំ ដែលគេនឹងលើកយកមកនិយាយគ្នានៅក្នុងសប្តាហ៍ខាងមុខ ពីនេះរហូតដល់ជំនួបកំពូលអូតង់ នៅក្នុងខែកក្កដា។ លោកម៉ាក្រុងបានសង្កត់បន្ថែមថា រាល់ថ្ងៃនេះ អ្នកដែលកំពុងតែការពារអឺរ៉ុបទាំងមូល គឺអ៊ុយក្រែន ហើយដោយសារតែអ៊ុយក្រែន ពឹងផ្អែកខ្លាំងលើជំនួយសព្វាវុធ បានពីលោកខាងលិច ដូច្នេះវាជារឿងចាំបាច់ ដែលលោកខាងលិចក្នុងក្របខណ្ឌពហុភាគី ត្រូវតែធានាប្រាប់ឲ្យអ៊ុយក្រែន ស្ងប់ចិត្ត ថាខ្លួននឹងមិនត្រូវគេបោះបង់។
បន្ថែមពីនេះ លោកម៉ាក្រុង បានអំពាវនាវថា អឺរ៉ុបខ្លួនឯង ត្រូវតែដើរតួជាសរសរគ្រិះដ៍រឹងមាំ នៅក្នុងអង្គការសម្ព័ន្ធមិត្តអូតង់ ដើម្បីការពារសន្តិសុខ។ មានន័យថា ប្រទេសអឺរ៉ុបត្រូវតែពង្រឹងសមត្ថភាពវាយប្រហារ ឲ្យបានឆ្ងាយ តាមរយៈការប្រើប្រាស់គ្រឿងសព្វាវុធ ដែលផលិតដោយអឺរ៉ុបខ្លួនឯង។ លោកបន្ថែមទៀតថា ទោះបីជាយ៉ាងណា រុស្ស៊ី នឹងនៅតែជារុស្ស៊ី រុស្ស៊ីនៅតែមានព្រំដែនជាប់អឺរ៉ុប ហើយដែលតម្រូវឲ្យអឺរ៉ុប ត្រូវតែរិះរកវិធី ធ្វើយ៉ាងណារស់ដោយសុខសាន ជាមួយប្រទេសក្បែរខាងមួយនេះ តែដោយមិនរស់នៅ ជាមួយភាពឆោតល្ងង់នោះទេ។
ដោយឡែក យោងតាមប្រភពពីមន្ត្រីទូតបារាំង គឺក្រុមហ៊ុនបារាំង Framatome បានចុះហត្ថលេខាយល់ព្រមផ្គត់ផ្គង់សារធាតុចម្រាញ់ សម្រាប់យកទៅដុតប្រើក្នុងរ៉េអាក់ទ័រនុយក្លេអ៊ែរ ឲ្យទៅរោងចក្រថាមពលនុយក្លេអ៊ែរស្លូវ៉ាគី។ ពីមុនមក សារធាតុទាំងនេះគឺស្លូវ៉ាគីទិញពីរុស្ស៊ី។ ចំណែកក្រុមហ៊ុនបារាំង EDF នឹងចូលរួមក្នុងការដេញថ្លៃ ដើម្បីទទួលសាងសង់រោងចក្រថាមពលនុយក្លេអ៊ែរថ្មីមួយនៅស្លូវ៉ាគី។ នៅក្នុងសន្និសីទកាសែត ក្រោយជួបជាមួយលោកម៉ាក្រុង លោកប្រធានាធិបតីស្លូវ៉ាគី បានបញ្ជាក់ថា ស្លូវ៉ាគីត្រូវតែពង្រឹងភាពជាម្ចាស់ការ ឈប់ពឹងផ្អែកលើរុស្ស៊ីតទៅទៀត។ លោកបន្ថែមថា ក្នុងវិស័យនុយក្លេអ៊ែរ បារាំងគឺជាដៃគូឈានមុខគេ សម្រាប់ស្លូវ៉ាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ