លោកហ្សេឡេនស្គីជួបអូតង់ដើម្បីសុំការធានា និងអាវុធសម្រាប់បន្តសង្រ្គាមទល់នឹងរុស្ស៊ី
ប្រធានាធិបតីអ៊ុយក្រែនលោកហ្សេឡេនស្គីបានចូលរួមប្រជុំជាមួយរដ្ឋមន្រ្តីការពារជាតិរបស់អង្គការអូតង់ក្នុងទីក្រុងព្រុចសែលនាថ្ងៃពុធ ទី១១ តុលា។ វត្តមានផ្ទាល់របស់លោកហ្សេឡេនស្គីនៅទីស្នាក់ការអូតង់ជាវត្តមានមិនបានគ្រោងទុក និងមានគោលដៅធានាថា ក្រុមសម្ព័ន្ធមិត្តនៅបន្តគាំទ្រអ៊ុយក្រែននៅចំពោះមុខការឈ្លានពានរបស់រុស្ស៊ី។ អ្វីដែលលោកហ្សេឡេនស្គីបារម្ភ គឺខ្លាចក្រុមសម្ព័ន្ធមិត្តបង្វែរការចាប់អារម្មណ៍ទៅលើសង្រ្គាមរវាងអ៊ីស្រាអែល និងចលនាប៉ាឡេស្ទីនហាម៉ាសពេលនេះ។
ចុះផ្សាយនៅថ្ងៃ៖
ស្តាប់ - ០៣:០៧
« យើងត្រូវការការគាំទ្រពីថ្នាក់ដឹកនាំ អ៊ីចឹងហើយបានជាខ្ញុំនៅទីនេះ » នេះជាការថ្លែងរបស់លោកហ្សេឡេនស្គីនៅចំពោះមុខរដ្ឋមន្រ្តីការពារជាតិរបស់អង្គការអូតង់។ ការថ្លែងរបស់លោកហ្សេឡេនស្គីត្រូវបានរដ្ឋមន្រ្តីការពារជាតិអាមេរិកលោកឡយដ៍ អូស្ទីនថ្លែងធានាប្រាប់លោកហ្សេឡេនស្គីភ្លាមៗថា អូតង់បន្តផ្តល់ឲ្យអ៊ុយក្រែននូវអ្វីដែលអ៊ុយក្រែនត្រូវការ ទោះក្នុងរយៈពេលយូរក៏ដោយ។ ទន្ទឹមគ្នានេះ លោកឡយដ៍ អូស្ទីនបានប្រកាសផ្តល់ជំនួយយោធាថ្មីរបស់អាមេរិកចំពោះអ៊ុយក្រែនចំនួន ២០០លានដុល្លារក្នុងទម្រង់ជាជំនួយប្រព័ន្ធការពារដែនអាកាស។ គិតជាសរុប ជំនួយយោធារបស់អាមេរិកចំពោះអ៊ុយក្រែនមានជិត ៤៤ ពាន់លានដុល្លារ។
សម្រាប់អ៊ុយក្រែន ជំនួយប្រព័ន្ធការពារដែនអាកាសជាជំនួយដែលខ្លួនត្រូវការខ្លាំង ខណៈដែលរដូវត្រជាក់ខិតជិតមកដល់។ កាលពីរដូវត្រជាក់ឆ្នាំ ២០២២ រុស្ស៊ីបានបាញ់មីស៊ីលកម្ទេចហេដ្ឋារចនាសម្ព័ន្ធថាមពលដែលបានធ្វើឲ្យប្រជាជនអ៊ុយក្រែនគ្មានភ្លើងអគ្គិសនីប្រើប្រាស់ ពិសេសសម្រាប់ម៉ាស៊ីនកម្តៅ។ នេះជាស្ថានភាពមួយដែលអ៊ុយក្រែន និងសម្ព័ន្ធមិត្តមិនចង់ឃើញកើតមានជាថ្មីនារដូវត្រជាក់ឆ្នាំ ២០២៣ នេះ។ « សង្រ្គាមអ៊ុយក្រែនមានការយកចិត្តទុកដាក់ពីយើង ហើយអ៊ុយក្រែនមានការគាំទ្រពេញទំហឹងពីយើង » នេះជាការថ្លែងរបស់ប្រមុខការពារជាតិហូឡង់លោកស្រី Kajsa Ollongren។
ចំណែកប្រមុខអង្គការអូតង់លោកយែន ស្តុលទែនប៊ែរបានថ្លែងនៅក្នុងសន្និសីទកាសែតជាមួយលោកហ្សេឡេនស្គីយ៉ាងដូច្នេះថា « ការប្រយុទ្ធរបស់លោកជាការប្រយុទ្ធរបស់យើង សន្តិសុខរបស់លោកជាសន្តិសុខរបស់យើង »។ ពិតណាស់ លោកហ្សេឡេនស្គីមិនអាចបន្តការតាំងនឹងរុស្ស៊ីដោយគ្មានការគាំទ្រពីសម្ព័ន្ធមិត្តបានទេ ពិសេសអាមេរិក។ ចូរកុំភ្លេចថា នៅក្នុងជំនួយទាំងអស់ដែលអ៊ុយក្រែនបានទទួលពីប្រទេសសមាជិកអូតង់ អាមេរិកម្នាក់ឯងមានចំណែកដល់ទៅពាក់កណ្តាលឯណោះ។ សូម្បីតែអឺរ៉ុបក៏បានទទួលស្គាល់ខ្លួនឯងថា គ្មានបំណង និងគ្មានសមត្ថភាពទៅបំពេញកន្លែងជំនួយដែលអាមេរិកផ្តល់ឲ្យអ៊ុយក្រែនទេ។
អ្វីដែលលោកហ្សេឡេនស្គីបារម្ភពេលនេះ គឺខ្លាចអាមេរិកបង្វែរជំនួយយោធាខ្លះទៅជួយអ៊ីស្រាអែលក្រោយពីអ៊ីស្រាអែលបានរងការវាយប្រហារពីចលនាប៉ាឡេស្ទីនហាម៉ាស។ តើការប្រកាសបង្កើនការគាំទ្រផ្លូវយោធារបស់អាមេរិកចំពោះអ៊ីស្រាអែលពេលនេះអាចធ្វើឲ្យប៉ះពាល់ដល់ការគាំទ្រផ្លូវយោធារបស់អាមេរិកចំពោះអ៊ុយក្រែន ឬទេ?។ ឯកអគ្គរដ្ឋទូតអាមេរិកប្រចាំអូតង់លោកស្រី Julianne Smith បានបញ្ជាក់ក្នុងថ្ងៃអង្គារ ទី១០ តុលាថា អាមេរិកមិនរំពឹងមានបញ្ហាណាមួយចំពោះរឿងនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ