លោកប្រធានាធិបតីហ្សេឡេនស្គី រន្ធាន់ឲ្យអូតង់ប្រញាប់ទទួលអ៊ុយក្រែនចូលជាសមាជិក
លោកអគ្គលេខាធិការអង្គការអូតង់ បានទៅដល់ក្រុងកៀវ កាលពីរសៀលថ្ងៃព្រសហ្បតិ៍ម្សិលមិញ ដើម្បីជួបប្រជុំជាមួយលោកប្រធានធិបតីហ្សេឡេនស្គី។ ក្នុងជំនួបនេះ លោកហ្សេឡេនស្គី បាននិយាយរន្ធាន់សាជាថ្មី ឲ្យអូតង់ ត្រូវតែប្រញាប់ទទួលយកអ៊ុយក្រែនជាសមាជិកពេញសិទ្ធិ ព្រោះវាគឺជាការធានាសន្តិសុខសម្រាប់អ៊ុយក្រែន ប្រឈមនឹងការឈ្លានពានរបស់រុស្ស៊ី។ លោកហ្សេឡេនស្គី ក៏បានអំពាវនាវសុំគ្រឿងសព្វាវុធបន្ថែមទៀតដែរ ពីក្រុមប្រទេសសម្ព័ន្ធមិត្តលោកខាងលិច។
ចុះផ្សាយនៅថ្ងៃ៖
ស្តាប់ - ០២:២២
ក្នុងពេលជួបជាមួយលោក Jens Stoltenberg អគ្គលេខាធិការអូតង់ លោកហ្សេឡេនស្គី បាននិយាយសង្កត់សាជាថ្មីថា ដល់ពេលហើយ ដែលអូតង់ត្រូវតែគិតគូ សម្រេចឲ្យអ៊ុយក្រែនក្លាយជាសមាជិកពេញលេញ ព្រោះវាគឺជាការធានាការពារសន្តិសុខដ៏ចាំបាច់បំផុត សម្រាប់អ៊ុយក្រែន។ លោកហ្សេឡេនស្គី បន្ថែមថា លោកនឹងបានឮដំណឹងល្អនេះ នៅក្នុងជំនួបកំពូលអូតង់ នៅក្រុងវីលនុស នៅខែកក្កដាខាងមុខ។
ឆ្លើយតបទៅនឹងសំដីបែបរន្ធាន់ របស់លោកប្រធានាធិបតីអ៊ុយក្រែន លោកអគ្គលេខាធិការអូតង់ បានអះអាងថា អូតង់គឺពិតជាមិនជំទាស់ទេ ក្នុងការចូលជាសមាជិករបស់អ៊ុយក្រែន។ តែកម្មវត្ថុធំរបស់អូតង់ និងប្រទេសសម្ព័ន្ធមិត្តនាពេលនេះ គឺធ្វើយ៉ាងជួយអ៊ុយក្រែនឲ្យយកឈ្នះសង្គ្រាមឲ្យបាន។ យ៉ាងណាក៏ដោយ លោក Jens Stoltenberg បានធានាប្រាប់លោកហ្សេឡេនស្គីថា ក្នុងជំនួបកំពូលនៅក្រុងវីលនុស នៅខែកក្កដា គឺអូតង់នឹងផ្តល់អាទិភាព ដល់ការជជែកគ្នាទាក់ទិននឹងបេក្ខភាពជាសមាជិករបស់អ៊ុយក្រែន ហើយលោកសង្ឃឹមថាលោកហ្សេឡេនស្គី នឹងមានវត្តមានក្នុងកិច្ចប្រជុំនោះដែរ។
ដោយឡែក កាលពីថ្ងៃព្រហស្បតិ៍ទី២០មេសាដែរ លោក Dmitri Peskov អ្នកនាំពាក្យវិមានក្រេមឡាំង បានលើកឡើងថា កម្មវត្ថុធំមួយនៃប្រតិបត្តិការយោធារបស់រុស្ស៊ីនៅអ៊ុយក្រែន គឺដើម្បីរារាំងមិនឲ្យអ៊ុយក្រែន ចូលជាសមាជិកអូតង់។ ការពង្រីកសមាជិកដែលរុស្ស៊ីចាត់ទុកថាជាបន្ទាត់ក្រហម។
គួរកត់សំគាល់ថា សង្គ្រាមជាង១ឆ្នាំមកនេះ បានបង្ហាញថារុស្ស៊ីស្ថិតនៅឆ្ងាយពីកម្មវត្ថុរបស់ខ្លួនខ្លាំងណាស់។ ដោយសារតែបរាជ័យនេះ ភាគីរុស្ស៊ីបានងាកមកស្រែកបរិហារថា គឺអូតង់ និង និងក្រុមសម្ព័ន្ធមិត្តលោកខាងលិច កំពុងតែប្រើដីអ៊ុយក្រែន ធ្វើសង្គ្រាមជាមួយរុស្ស៊ី ទាំងដែលធាតុពិតគឺរុស្ស៊ីខ្លួនឯង ដែលជាអ្នកចាប់ផ្តើមសង្គ្រាមនេះ។
ទាក់ទិននឹងការវាយប្រយុទ្ធនៅសមរភូមិ ក្នុងពេលជួបជាមួយលោកអគ្គលេខាធិការអូតង់ លោកហ្សេឡេនស្គី បានអំពាវនាវសុំគ្រឿងសព្វាវុធបន្ថែមទៀត។ លោកលើកឡើងថា កងទ័ពអ៊ុយក្រែនកំពុងត្រូវការជាបន្ទាន់ នូវយន្តហោះចម្បាំងទំនើប រថពាសដែក កាំភ្លើងធំចំងាយឆ្ងាយ ដើម្បីឈានទៅដណ្តើមយកទឹកដីត្រលប់មកវិញ។ លោក Jens Stoltenberg បានបង្ហើបឲ្យដឹងថា ក្រុមប្រទេសសម្ព័ន្ធមិត្តនឹងបើកការប្រជុំនៅមូលដ្ឋានទ័ព Ramstein នៅថ្ងៃសុក្រ ដើម្បីនិយាយគ្នាពីការបញ្ជូនសព្វាវុធបន្ថែម តែដោយមិនបញ្ជាក់ថាអ្វីខ្លះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ