លោកហ្សេឡេនស្គី៖ការរារែករបស់អឺរ៉ុប និងអូតង់ក្នុងការទទួលអ៊ុយក្រែនជាការទុកឲ្យរុស្ស៊ីបន្តសង្រ្គាមនៅអឺរ៉ុប
នៅថ្ងៃព្រហស្បតិ៍ ទី ១ មិថុនា ម៉ុលដាវីបានធ្វើម្ចាស់ផ្ទះរៀបចំកិច្ចប្រជុំកំពូលនៃសហគមន៍នយោបាយអឺរ៉ុប។ មានប្រមុខរដ្ឋ និងប្រមុខរដ្ឋាភិបាលអឺរ៉ុបជិត ៥០នាក់បានចូលរួមនៅកិច្ចប្រជុំកំពូលសហគមន៍នយោបាយអឺរ៉ុប។ តែវត្តមានដែលមិនអាចកំបាំងភ្នែកអ្នកផ្សេងនាឱកាសនោះ គឺប្រធានាធិបតីអ៊ុយក្រែនលោកហ្សេឡេនស្គី។ នៅលើវេទិកានៃកិច្ចប្រជុំកំពូលសហគមន៍នយោបាយអឺរ៉ុបដែលជាកិច្ចប្រជុំកំពូលលើកទី២ លោកហ្សេឡេនស្គីបានទាមទារឲ្យសហភាពអឺរ៉ុប និងអង្គការអូតង់រួសរាន់ទទួលយកសមាជិកភាពរបស់អ៊ុយក្រែន។ តាមលោកហ្សេឡេនស្គី គ្រប់ការរារែករបស់អឺរ៉ុប និងអូតង់ក្នុងការបញ្ចូលអ៊ុយក្រែនជាសមាជិកជាការទុកឲ្យរុស្ស៊ីបន្តសង្រ្គាមនៅក្នុងប្រទេសអឺរ៉ុបផ្សេងទៀត។
ចុះផ្សាយនៅថ្ងៃ៖
ស្តាប់ - ០១:៣១
« យើងត្រូវចងចាំថា រាល់ភាពអល់អែកដែលយើងបង្ហាញទីនេះនៅអឺរ៉ុប គឺជាលេណដ្ឋានដែលរុស្ស៊ីនឹងព្យាយាមកាន់កាប់។ រាល់ការរារែកនាំមកនូវអសន្តិសុខកាន់តែច្រើន។ នៅពេលដែលគ្មានការធានាសន្តិសុខ គឺមានតែការធានាឲ្យមានសង្គ្រាម។ យើងត្រូវការត្រឹមតែសន្តិភាពប៉ុណ្ណោះ។ ហេតុដូច្នេះហើយបានជាបណ្តាប្រទេសអឺរ៉ុបទាំងអស់ដែលមានព្រំដែនជាប់ជាមួយរុស្ស៊ី និងដែលមិនចង់ឃើញរុស្ស៊ីលេបត្របាក់យកទឹកដីរបស់ខ្លួនត្រូវតែក្លាយជាសមាជិកពេញសិទ្ធិរបស់សហភាពអឺរ៉ុប និងរបស់អង្គការអូតង់។
អនាគតរបស់យើងគឺនៅក្នុងសហភាពអឺរ៉ុប នេះជារឿងសំខាន់ខ្លាំងណាស់។ អ៊ុយក្រែនបានត្រៀមខ្លួនរួចជាស្រេចដើម្បីចូលជាសមាជិករបស់អង្គការអូតង់ ហើយយើងកំពុងរង់ចាំការត្រៀមខ្លួនរបស់អូតង់។ ការធានាសន្តិសុខគឺសំខាន់ខ្លាំងណាស់។ មិនមែនតែសម្រាប់អ៊ុយក្រែនដោយសារតែមានការឈ្លានពានពីរុស្ស៊ីប៉ុណ្ណោះទេ តែក៏សម្រាប់បណ្តាប្រទេសអឺរ៉ុបផ្សេងដែរ។ មានជម្រើសតែ ២គត់ដែលត្រូវជ្រើសរើសនៅក្នុងបញ្ហានេះ ឬមួយសង្រ្គាមបើកចំហរ ឬមួយក៏ការកាន់កាប់របស់រុស្ស៊ី។
ពេលវេលាបានឈានមកដល់ហើយ។ ចំណែករាល់ភាពអល់អែក រារែកត្រូវតែរលាយបាត់។ ការសម្រេចចិត្តវិជ្ជមានចំពោះអ៊ុយក្រែននឹងក្លាយជាការសម្រេចចិត្តវិជ្ជមានសម្រាប់ទាំងអស់គ្នា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ