ម៉ូស្គូរងការវាយប្រហារដ្រូន២លើកក្នុងរយៈពេលតែ១ខែ ខណៈពេលកៀវរងស្រោចដោយមីស៊ីលរុស្ស៊ី៣ថ្ងៃជាប់គ្នា
ចុះផ្សាយនៅថ្ងៃ៖
គិតចាប់តាំងពីផ្ទុះសង្រ្គាមរុស្ស៊ីឈ្លានពានអ៊ុយក្រែន វាជារឿងដ៏កម្របំផុត ដែលទីក្រុងម៉ូស្គូ របស់ រុស្ស៊ី និងទីក្រុងកៀវ របស់អ៊ុយក្រែន រងការវាយប្រហារដ្រូន នៅក្នុងថ្ងៃតែមួយដូចគ្នា។ ខណៈពេលដែល រដ្ឋធានីកៀវរបស់អ៊ុយក្រែនបានរងការវាយប្រហារផ្លូវអាកាសពីសំណាក់រុស្ស៊ី ចាប់តាំងពីថ្ងៃសៅរ៍ រហូតដល់ថ្ងៃអង្គារនេះ អាជ្ញាធរក្រុងម៉ូស្គូវិញ អះអាងថា គេបានបាញ់ទម្លាក់ដ្រូន ៨គ្រឿង ដែលអ៊ុយក្រែនបញ្ជូនទៅវាយប្រហារម៉ូស្គូ។ តាមអភិបាលក្រុងម៉ូស្គូ ការវាយប្រហារដ្រូន ទៅលើអគារលំនៅឋាន នៅក្នុងក្រុងម៉ូស្គូ នៅព្រឹកព្រលឹមថ្ងៃអង្គារនេះ បានធ្វើឲ្យប្រជាជនរុស្ស៊ី ២នាក់រងរបួសស្រាល និងបង្កឲ្យមានការខូចខាតតិចតួចប៉ុណ្ណោះ។ អ្នកនាំពាក្យរបស់វិមានក្រេមឡាំងបានធានាអះអាងប្រាប់ប្រជាជនក្រុងម៉ូស្គូកុំឲ្យភ័យខ្លាច ព្រោះថា ម៉ូស្គូមិនរងការគំរាមកំហែងវាយប្រហារដ្រូននោះទេ។ ក្នុងរយៈពេលតែមួយខែ ម៉ូស្គូរងការវាយប្រហារដ្រូនដល់ទៅ២ដង។
ទីក្រុងម៉ូស្គូបានរងការវាយប្រហារដ្រូន នៅព្រឹកព្រលឹមថ្ងៃអង្គារនេះ។ ការវាយប្រហារលើក្រុងម៉ូស្គូ ជារឿងដ៏កម្រ ព្រោះថា កន្លងមក គេលឺតែព័ត៌មានដែលថា ក្រុងកៀវរបស់អ៊ុយក្រែនដែលរងការវាយប្រហារដ្រូន និងមីស៊ីលរបស់រុស្ស៊ី។
តាមក្រសួងការពារជាតិរុស្ស៊ី នៅម៉ោង ប្រមាណ ២ទាបភ្លឺ នៅថ្ងៃអង្គារទី ៣០ឧសភា មានដ្រូនចំនួន៨ដោះដៅ វាយប្រហារម៉ូស្គូ ប៉ុន្តែ ដ្រូនចំនួន៥ត្រូវប្រព័ន្ធខែលការពារបាញ់ទម្លាក់ ចំណែក ៣គ្រឿងទៀត ត្រូវខូច មិនដំណើរការ ដោយសារការរំខានរបស់ប្រព័ន្ធសញ្ញាអេឡិចត្រូនិករបស់រុស្ស៊ី។ ចៅហ្វាយក្រុងម៉ូស្គូវិញ អះអាងថា ការវាយប្រហារដ្រូន នៅថ្ងៃអង្គារនេះ បានធ្វើឲ្យមនុស្សរបួស២នាក់ ចំណែកមនុស្សរស់នៅក្នុងអគារដែលរងការបំផ្លាញ របស់ដ្រូន ត្រូវបានអាជ្ញាធរចាប់ជម្លៀសចេញ ជាបណ្តោះអាសន្ន ក្នុងពេលបោសសម្អាតដ្រូនដែលអាចមានគ្រឿងផ្ទុះ។
នៅក្រោយការវាយប្រហារដ្រូនសំដៅក្រុងម៉ូស្គូ រុស្ស៊ីបានចង្អុរចោទប្រកាន់ភ្លាមៗ ថា ជាស្នាដៃភេរវកម្មរបស់អ៊ុយក្រែន។ តាមអ្នកនាំពាក្យរបស់វិមានក្រេមឡាំង លោកឌីមីទ្រី ប៉េស្កូវ អ៊ុយក្រែនបញ្ជូនដ្រូនមកវាយប្រហារក្រុងម៉ូស្គូ ដើម្បីសងសឹកនឹងរុស្ស៊ីដែលបានបើកការវាយប្រហារផ្លូវអាកាសដ៏សន្ធឹក ទៅលើទីក្រុងកៀវ។ តាំងពីថ្ងៃសៅរ៍ នៅមួយថ្ងៃ មុនដែលអ៊ុយក្រែនប្រារព្ធខួប១៥៤១ឆ្នាំ នៃការបង្កើតទីក្រុងកៀវ រុស្ស៊ី បានបើកការវាយប្រហារផ្លូវអាកាសយ៉ាងសន្ធឹក មិនថាយប់ ឬថ្ងៃ ធ្វើឲ្យប្រជាជនអ៊ុយក្រែនភ័យខ្លាច រត់ចូលជ្រក នៅក្នុងរោងផ្លូវក្រោមដី។ ការវាយប្រហារមីស៊ីលនិងដ្រូនរបស់រុស្ស៊ី មិនលោះថ្ងៃយ៉ាងដូច្នេះ ជារឿងដ៏កម្រ គិតចាប់តាំងពីរុស្ស៊ីធ្វើសង្រ្គាមឈ្លានពានអ៊ុយក្រែន ក្នុងរយៈពេលជិត ១ឆ្នាំកន្លះ។ ជាក់ស្តែង នៅក្នុងរយៈពេលតែ២៤ម៉ោងចុងក្រោយនេះ រុស្ស៊ីបានបាញ់មីស៊ីល ស្រោចទៅលើក្រុងកៀវ និងតំបន់ជុំវិញ ដល់ទៅ ៣លើក។
តាមក្រសួងការពារជាតិអ៊ុយក្រែន នៅព្រឹកថ្ងៃអង្គារ រុស្ស៊ីបានបញ្ជូនដ្រូនផលិត នៅអ៊ីរ៉ង់ចំនួន ៣១គ្រឿង មកវាយប្រហារទីក្រុងកៀវ ប៉ុន្តែ កងទ័ពអ៊ុយក្រែនបានបាញ់ទម្លាក់ដ្រូន និងមីស៊ីលរបស់រុស្ស៊ី សឹងទាំងអស់ ដោយត្រូវអរគុណដល់ប្រព័ន្ធខែលមីស៊ីលដែលប្រទេសលោកខាងលិចបានផ្តល់ទៅឲ្យអ៊ុយក្រែន។
អ៊ុយក្រែនមិនចេញមុខទទួលស្គាល់ការវាយប្រហារដ្រូននៅម៉ូស្គូ
រុស្ស៊ីចោទប្រកាន់អ៊ុយក្រែន ប៉ុន្តែ អ៊ុយក្រែនវិញ មិនថា ការវាយប្រហារនៅថ្ងៃអង្គារនេះ ឬការវាយប្រហារដ្រូន ទៅលើវិមានក្រេមឡាំង កាលពីដើមខែឧសភា និយាយឲ្យចំ រាល់ការវាយប្រហារដ្រូន នៅទឹកដីរុស្ស៊ី អ៊ុយក្រែន មិនដែលចេញមុខមកប្រកាសថា ជាស្នាដៃរបស់ខ្លួនម្តងណានោះទេ។ ឧទាហរណ៍ នៅពេលរុស្ស៊ីចោទអ៊ុយក្រែនថា បញ្ជូនដ្រូន២គ្រឿងទៅវាយប្រហារវិមានក្រេមឡាំង ដើម្បីធ្វើឃាតលោកពូទីន កាលពីដើមខែនេះ អ៊ុយក្រែនវាយបកវិញថា វាអាចជាឆាកល្ខោន រៀបចំដោយម៉ូស្គូខ្លួនឯង ដើម្បីបំផុសទឹកចិត្តប្រជាជនរុស្ស៊ី ឲ្យស្អប់អ៊ុយក្រែន និងចូលរួមដើរតាមផ្លូវរបស់លោកពូទីនដើម្បីធ្វើសង្រ្គាមប្រឆាំងអ៊ុយក្រែន។
ប្រធានាធិបតីអ៊ុយក្រែន លោកហ្សេឡេនស្គីផ្ទាល់ ធ្លាប់បាននិយាយថា អ៊ុយក្រែនគ្មានជាប់ពាក់ព័ន្ធនឹងការវាយប្រហារដ្រូនទៅលើវិមានក្រេមឡាំង ដើម្បីប៉ងធ្វើឃាតមេដឹកនាំរុស្ស៊ី ដូចការចោទប្រកាន់របស់ម៉ូស្គូ ព្រោះថា កម្មវត្ថុ ទិសដៅតែមួយគត់របស់អ៊ុយក្រែន គឺប្រយុទ្ធការពារទឹកដី និងប្រជាជន ពីការរំលោភឈ្លានពានរបស់ប្រទេសជិតខាង ដូចជារុស្ស៊ី។
ទោះជាអ៊ុយក្រែនមិនចេញមុខ ទទួលខុសត្រូវ ប៉ុន្តែ ការលើកឡើងរបស់អ្នកនាំពាក្យរបស់វិមានក្រេមឡាំងអាចសមហេតុផលម្យ៉ាងដែរ ដែលថា វាជាស្នាដៃសងសឹករបស់អ៊ុយក្រែន។ ត្រូវដឹងថា ការវាយប្រហារទៅលើក្រុងមូស្គូ ជាពិសេស អគាររស់នៅរបស់ប្រជាជនរុស្ស៊ី នៅក្នុងក្រុងម៉ូស្គូ កើតឡើងនៅចំពេលដែលទីក្រុងកៀវកំពុងរងបាញ់ស្រោចដោយមីស៊ីល និងដ្រូនរបស់រុស្ស៊ី។
ម្យ៉ាង ការវាយប្រហារដ្រូនសំដៅម៉ូស្គូ កើតឡើងនៅមួយថ្ងៃក្រោយ ដែលចៅហ្វាយក្រុងកៀវ ពន្លយពាក្យថា ប្រជាជនអ៊ុយក្រែន ក្នុងទីក្រុងកៀវ ត្រូវរស់នៅក្នុងភាពភ័យខ្លាច ដោយសារ ការវាយប្រហារដ្រូន និងគ្រាប់មីស៊ីល របស់រុស្ស៊ី។ ហេតុអ្វីប្រជាជនរុស្ស៊ី នៅក្រុងម៉ូស្គូអាចរស់នៅ គេងស្ងប់សុខនោះ។ រឿងដែលកើតឡើងនៅអ៊ុយក្រែន គួរតែកើតឡើងនៅម៉ូស្គូ ដើម្បីឲ្យប្រជាជនរុស្ស៊ីដឹងថា តើការរស់នៅក្នុងភាពភ័យខ្លាច ស្លាប់ដោយសារការវាយប្រហារមីស៊ីល វាពិបាកវេទនាយ៉ាងណា។
សង្រ្គាមអ៊ុយក្រែនកំពុងរាលដាលចូលដល់ក្រុងម៉ូស្គូ?
នៅក្រោយការវាយប្រហារដ្រូនទៅលើលំនៅឋានរបស់អ្នករស់នៅក្រុងម៉ូស្គូ អ្នកនាំពាក្យរបស់វិមានក្រេមឡាំងបាននិយាយធានាថា ម៉ូស្គូមិនអាចគ្រោះថ្នាក់ រងការគំរាមកំហែងដ្រូនបាននោះទេ ព្រោះថា ម៉ូស្គូមានបំពាក់ដោយប្រព័ន្ធការពារមីស៊ីលជាច្រើនកន្លែង។
ប៉ុន្តែ ការអះអាងរបស់អ្នកនាំពាក្យរបស់លោកពូទីន ទំនងមិនអាចទៅបញ្ចុះបញ្ចូល មនុស្សគ្រប់គ្នានៅម៉ូស្គូនោះទេ។ កាលពីមុន ប្រហែលជាគេអាចមានប្រសិទ្ធិភាពទៅបញ្ចុះបញ្ចូលមែន ប៉ុន្តែ សង្រ្គាមអ៊ុយក្រែន ដែលប្រជាជនរុស្ស៊ី គិតថា វាកើតឡើងនៅតែក្នុងទឹកដីអ៊ុយក្រែន នៅពេលនេះ បានរាលដាល ចូលមកដល់ម៉ូស្គូ បេះដូងរបស់រុស្ស៊ី។ ម៉ូស្គូទើបរងការវាយប្រហារជាលើកទី២ និងអាចរឿងដ៏កម្រមែន ប៉ុន្តែ តាមពិតទៅ ទឹកដី និងទីតាំងផលប្រយោជន៍សេដ្ឋកិច្ច ទីតាំងយោធារបស់រុស្ស៊ី ជាច្រើនកន្លែងធ្លាប់រងការវាយប្រហារដ្រូន។ រុស្ស៊ីតែងចោទអ៊ុយក្រែន ប៉ុន្តែ អ៊ុយក្រែន ដូចទម្លាប់ បដិសេធការចោទប្រកាន់របស់រុស្ស៊ី និងផ្ទុយទៅវិញ ចោទបករុស្ស៊ីថា ជាអ្នករៀបចំខ្លួនឯង ដើម្បីយកលេស វាយប្រហារសងសឹកអ៊ុយក្រែន។
រដ្ឋមន្រ្តីការពារជាតិអ៊ុយក្រែន៖ អ៊ុយក្រែនត្រៀមខ្លួន ដើម្បីវាយបកទៅលើស្ស៊ី
នៅក្នុងបទសម្ភាសន៍ ជាមួយប្រព័ន្ធផ្សព្វផ្សាយនៅបារាំង អាមេរិក ឬអង់គ្លេស រដ្ឋមន្រ្តីការពារអ៊ុយក្រែនធ្លាប់បាននិយាយថា អ៊ុយក្រែនបានត្រៀមខ្លួនបើកសមរភូមិប្រយុទ្ធវាយបកទៅលើកងទ័ពរុស្ស៊ី និងសង្ឃឹមវាយ រុលទៅមុខ នៅក្នុងអំឡុងរដូវក្តៅខាងមុខ។
សម្រាប់ប្រមុខការពារជាតិអ៊ុយក្រែន ជាមួយការបើកសមរភូមិប្រយុទ្ធ នាពេលខាងមុខ អ៊ុយក្រែនមានសុទិដ្ឋិនិយមថា នឹងអាចឈ្នះសង្រ្គាមរុស្ស៊ី ដែលចង់លេបយកទឹកដីរបស់អ៊ុយក្រែន។ ប៉ុន្តែ សាជាថ្មីម្តងទៀត រដ្ឋមន្រ្តីការពារជាតិអ៊ុយក្រែន អំពាវនាវឲ្យសម្ព័ន្ធមិត្តលោកខាងលិចប្រគល់សព្វាវុធដែលគេបានសន្យាផ្តល់ទៅឲ្យអ៊ុយក្រែន ជាពិសេសយន្តហោះចម្បាំងរបស់ប្រទេសលោកខាងលិច ប្រមាណ ១០០គ្រឿងដែលអ៊ុយក្រែនត្រូវការចាំបាច់ សម្រាប់វាយរុញច្រានកងទ័ពរុស្ស៊ី នៅតំបន់ខាងកើតអ៊ុយក្រែន។ សម្រាប់រដ្ឋមន្រ្តីអ៊ុយក្រែន ពីឡុត កងទ័ពអ៊ុយក្រែនបានទទួលការបណ្តុះបណ្តាលរួចរាល់អស់ហើយ ដោយនៅតែចាំតែយន្តហោះចម្បាំងរបស់អាមេរិកតែប៉ុណ្ណោះ ដើម្បីបើកសមរភូមិប្រយុទ្ធទ្រង់ទ្រាយធំ បណ្តេញកងទ័ពរុស្ស៊ីចេញពីទឹកដីអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ