សេដ្ឋីនីអចលទ្រព្យវៀតណាមត្រូវតុលាការកាត់ទោសប្រហារជីវិត ក្នុងបទប្រព្រឹត្តអំពើពុករលួយ
បន្ទាប់ពីបើកសវនាការXXLអស់មួយខែ តុលាការក្រុងហូជីម៉ិញ នៅថ្ងៃព្រហស្បតិ៍ទី ១១មេសានេះបានសម្រេចកាត់ទោសប្រហារជីវិត សេដ្ឋីនី អចលនទ្រព្យវៀតណាម អ្នកស្រី ជឿង មីឡាន នៅក្នុងបទចោទប្រកាន់គៃបន្លំហិរញ្ញវត្ថុ ដ៏មហាសាល ២៥ពាន់លានអឺរ៉ូ។ តាមការវាយតម្លៃរបស់គណៈវិនិច្ឆ័យ ដែលដកស្រង់ចុះផ្សាយដោយកាសែតក្នុងស្រុកវៀតណាម មហាសេដ្ឋីនីដែលជាប្រធានក្រុមហ៊ុនវ៉ាន់ធីញហ្វាត់បានបន្លំឯកសារដើម្បីបោកប្រាស់យកលុយពីមនុស្សជាង ៤ម៉ឺននាក់ សេដ្ឋីនី អចលនទ្រព្យ ជឿង មីឡានបានប្រព្រឹត្តអំពើពុករលួយសូកប៉ាន់ ដែលជាហេតុផលធ្វើឲ្យប្រជាជនបាត់បង់ជំនឿលើការដឹកនាំរបស់បក្សកុម្មុយនិស្ត។
ចុះផ្សាយនៅថ្ងៃ៖
ស្តាប់ - ០៤:១៨
នៅក្នុងសវនាការ XXL ដែលតុលាការក្រុងហូជីមិញបានបើកក្នុងរយៈពេលមួយខែមកនេះ ជាមួយនឹងកេសឯកសារ ភស្តុតាងចំនួន១០៤ ទម្ងន់៦តោន និងរដ្ឋអាជ្ញាជាង ១០នាក់ សេដ្ឋីនី អចលនទ្រព្យ ជឿង មីឡាន និងអ្នកពាក់ព័ន្ធ ផ្សំគំនិត៨៥នាក់ មិនអាចគេចវេសពីការទទួលខុសត្រូវរបស់ខ្លួន។
នៅក្នុងសវនាការដែលផ្តោតទៅលើរឿងអាស្រូវគៃបន្លំហិរញ្ញវត្ថុដ៏ធំជាងគេមិនធ្លាប់មាននៅក្នុងប្រវត្តិវៀតណាម គណៈវិនិច្ឆ័យរបស់តុលាការវៀតណាមបានសម្រេចនៅថ្ងៃព្រហស្បតិ៍ទី ១១មេសា កាត់ទោសប្រហារជីវិតស្រ្តីមហាសេដ្ឋីអចលនទ្រព្យ ជឿង មីឡាន ក្នុងបទចោទប្រកាន់ប្រព្រឹត្តអំពើពុករលួយ រំលោភច្បាប់ធនាគារ និងគៃបន្លំហិរញ្ញវត្ថុ ២៥ពាន់លានដុល្លារ។
ការសម្រេចរបស់គណៈវិនិច្ឆ័យឆ្លើយតបទៅនឹងការចង់បានរបស់រដ្ឋអាជ្ញាវៀតណាម ដែលធ្លាប់បានទាមទារ កាលពីថ្ងៃទី១៩មីនា ឲ្យគេផ្តន្ទាទោសប្រហារជីវិតលោកស្រី ជឿង មីឡាន ដែលនៅតែចចេស មិនព្រមទទួលស្គាល់កំហុស និងបន្តឆ្លើយទម្លាក់កំហុសលើអ្នកធ្វើការក្រោមបង្គាប់។
នៅក្នុងសវនាការ លោកស្រី ជឿង មីឡាន អតីតប្រធានក្រុមហ៊ុនវ៉ាន់ធីញហ្វាត់ បដិសេធសាជាថ្មីម្តងទៀត មិនទទួលស្គាល់ការចោទប្រកាន់របស់រដ្ឋអាជ្ញា។ នៅក្នុងសំដីចុងក្រោយរបស់លោកស្រី នៅក្នុងសវនាការ លោកស្រីជឿង មីឡានគ្រាន់តែនិយាយសារភាពថា លោកស្រីធ្លាប់គិតចង់សម្លាប់ខ្លួន នៅពេលអស់សង្ឃឹមខ្លាំងពេក។ តាមការចុះផ្សាយរបស់កាសែតក្នុងស្រុកវៀតណាម លោកស្រីបានត្រឹមនិយាយ នៅចំពោះមុខអង្គវិនិច្ឆ័យ ថា លោកស្រីខឹងខ្លាំង ដែលល្ងង់ឆោត ចូលខ្លួនទៅពាក់ព័ន្ធនឹងវិស័យធនាគារ ដែលតាមពិតលោកស្រីមានចំណេះដឹង ស្គាល់តិចតួច។
ធ្លាប់ជាអ្នកលក់ដូរតាមផ្លូវ ដូចជាលក់គ្រឿងម្សៅជាមួយម្តាយ នៅទីក្រុងហូជីម៉ិញ លោកស្រី ជឿង មីឡានចាប់ផ្តើមមានបានជាមួយការទិញលក់ដី និងអចលទ្រព្យ នៅក្នុងសម័យដែលបក្សកុម្មុយនិស្តវៀតណាមធ្វើកំណែទម្រង់សេដ្ឋកិច្ចក្នុងទសវត្សរ៍ឆ្នាំ ១៩៨៦។ នៅឆ្នាំ ១៩៩០ លោកស្រីបានក្លាយជាមហាសេដ្ឋីនី ម្ចាស់ភោជនីយដ្ឋាន សណា្ឋគារជាច្រើនកន្លែងនៅក្នុងប្រទេសវៀតណាម។
ប៉ុន្តែ នៅខែតុលា ឆ្នាំ ២០២៣ លោកស្រីត្រូវប៉ូលិសវៀតណាមចាប់ខ្លួន នៅក្នុងបទចោទប្រកាន់គៃបន្លំលុយ ជាង១១ពាន់លានដុល្លារ ដើម្បីយកទៅប្រើក្នុងជីវិតរស់នៅដ៏ហ៊ឺហារបស់ខ្លួន និងដើម្បីចិញ្ចឹមមន្រ្តីពុករលួយ។
ទោះវៀតណាមត្រូវគេទទួលស្គាល់ថា ជាប្រទេសរីកចម្រើនឆាប់រហ័សដោយសារវិស័យវាយនភណ្ឌ និងរោងចក្រផ្គត់ផ្គង់ទៅប្រទេសចិន ប៉ុន្តែ ប្រជាជនវៀតណាមមួយភាគធំ ចាប់មានទ្រព្យសម្បត្តិ ដោយមកពីមានការទិញដូរដីធ្លី និងអចលនទ្រព្យ។ ជាផ្លូវការ ដីធ្លីភាគច្រើនជាកម្មសិទ្ធិរបស់រដ្ឋ។ ប៉ុន្តែ អ្នកជំនួញថ្មីតែងទទួលបានសិទ្ធិចូលគ្រប់គ្រងដីរដ្ឋ ដោយសារពួកគេមានទំនាក់ទំនងជាមួយមន្រ្តីក្នុងរដ្ឋាភិបាល។ អំពើពុករលួយបានរីករាលដាលសឹងក្លាយជាជំងឺរាតត្បាត។
នៅក្នុងសេចក្តីសម្រេចរបស់ខ្លួន គណៈវិនិច្ឆ័យវៀតណាមវាយតម្លៃថា ការប្រព្រឹត្តអំពើពុករលួយ និងការគៃបន្លំហិរញ្ញវត្ថុ ដោយរំលោភច្បាប់ធនាគារ របស់លោកស្រីជឿង មីឡានបានធ្វើឲ្យមនុស្សជាច្រើននាក់រងគ្រោះ និងបានទៅបំផ្លាញការជឿទុកចិត្តរបស់ប្រជាជនវៀតណាមលើការដឹកនាំរបស់បក្សកុម្មុយនិស្តវៀតណាម។
នៅវៀតណាម ទោសប្រហារជីវិតតែងអនុវត្តសម្រាប់ទោសឧក្រិដ្ឋកម្មជួញដូរគ្រឿងញៀន ប៉ុន្តែ កម្រនឹងមានសម្រាប់ទោសឧក្រិដ្ឋកម្មសេដ្ឋកិច្ច។ ការសម្រេចរបស់តុលាការកាត់ទោសប្រហារជីវិត សេដ្ឋីនីអចលនទ្រព្យលើកនេះសបញ្ជាក់ថា រដ្ឋាភិបាលក្រោមការដឹកនាំរបស់បក្សកុម្មុយនិស្តវៀតណាមមិនយោគយល់ អត់ឱនឲ្យអ្នកជាប់ពាក់ព័ន្ធឃុបឃិត រួមផ្សំគំនិតក្នុងសំណុំរឿងពុករលួយ។ អគ្គលេខាបក្សកុម្មុយនិស្តវៀតណាម លោក ង្វៀន ភូជុងធ្លាប់និយាយថា កំហឹងរបស់ប្រជាជនដោយសារតែអំពើពុករលួយ អាចគំរាមកំហែងអំណាចដឹកនាំរបស់បក្សកុម្មុយនិស្តវៀតណាម។ យុទ្ធនាការប្រយុទ្ធប្រឆាំងអំពើពុករលួយ ដែលលោកង្វៀន ភូជុងចាប់ផ្តើមតាំងពីឆ្នាំ ២០១៦ បានធ្វើឲ្យប្រធានាធិបតីពីររូប និងឧបនាយករដ្ឋមន្រ្តី ២រូប លាចេញពីមុខតំណែង ចំណែក មន្រ្តីរាប់ពាន់នាក់ ត្រូវចាប់ដាក់ពន្ធនាគារ ឬត្រូវបញ្ជូនទៅសាលាលត់ដំ។ សេដ្ឋីនី អចលនទ្រព្យ ជឿង មីឡានគ្រាន់តែជាអ្នកជំនួញធំម្នាក់ទៀត ដែលជាប់ក្នុងសំណាញ់បោសសម្អាតអំពើពុករលួយរបស់បក្សកុម្មុយនិស្តវៀតណាម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ