តុលាការវៀតណាមកាត់ទោសមហាសេដ្ឋីនីអចលនទ្រព្យ និងកំពុងតាមចាប់ខ្លួនចិន២នាក់ទៀត
ថ្ងៃអង្គារ ទី៥មីនា តុលាការក្រុងហូជីមិញ បានបើកសវនាការកាត់ទោសមហាសេដ្ឋីនីអចលនទ្រព្យ លោកស្រី ជឿង មី ឡាន ដែលជាប់ចោទពីបទលួចគៃបន្លំហិរញ្ញវត្ថុធនាគារ ចំនួន ១២,៥ ពាន់លានដុល្លារ ដើម្បីផលប្រយោជន៍ផ្ទាល់ខ្លួន។ ជនសង្ស័យ ៧៨ នាក់ ក៏ជាប់ក្នុងសំណុំរឿងនេះដែរ រួមទាំងជនជាតិចិន ២ នាក់ទៀត ដែលរដ្ឋវៀតណាមកំពុងតាមចាប់ខ្លួន។
ចុះផ្សាយនៅថ្ងៃ៖
ស្តាប់ - ០២:៣២
មហាសេដ្ឋីនី ជឿង មី ឡាន ត្រូវនគរបាលវៀតណាម ចាប់ឃុំខ្លួន នៅខែតុលាឆ្នាំ២០២២ ដោយជាប់បទចោទប្រកាន់ ជាច្រើនករណី រួមមានបទល្មើសគៃបន្លំហិរញ្ញវត្ថុ បទប្រព្រឹត្តអំពើពុករលួយ និង បទរំលោភច្បាប់ធនាគារ។ បើតាមបទចោទប្រកាន់របស់រដ្ឋអាជ្ញាវៀតណាម លោកស្រី ជឿង មី ឡាន ធ្លាប់បានធ្វើសំណើបន្លំខ្ចីប្រាក់ធនាគារ ពីធនាគារពាណិជ្ជកម្មសៃហ្គន (SCB) ដែលក្រុមហ៊ុនរបស់លោកស្រី មានភាគហ៊ុនគ្រប់គ្រង ជាង ៩០%។
ចន្លោះពី ឆ្នាំ២០១៨ ដល់ឆ្នាំ២០២២ លោកស្រីបានបញ្ជាឲ្យធ្វើសំណើបន្លំខ្ចីប្រាក់ ចំនួន ៩១៦ លើក ដែលសរុបស្មើនឹងទំហំទឹកប្រាក់ ៣០៤ ០០០ ពាន់លានដុង (ស្មើនឹងប្រហែល ១២,៥ ពាន់លានដុល្លារ)។ ទឹកប្រាក់នេះ ស្ទើរតែស្មើនឹង ៣% នៃទំហំប្រាក់ចំណូលសរុបក្នុងស្រុកវៀតណាម។
ក្នុងអង្គសវនាការ នៅថ្ងៃអង្គារ ទី៥មីនា ជនជាប់ចោទ ជនឃុបឃិតរួមផ្សំគំនិត និង អ្នកពាក់ព័ន្ធក្នុងសំណុំរឿងពុករលួយនេះ មានចំនួន ៧៨ នាក់ ត្រូវបង្ហាញខ្លួនជាមួយលោកស្រី ជឿង មី ឡាន។ កាសែតរដ្ឋវៀតណាម ផ្សាយថា ជនសង្ស័យ ៨ នាក់ទៀត កំពុងរត់គេចខ្លួន ក្នុងនោះមានជនជាតិចិន ២ នាក់ផង ជាអតីតបុគ្គលិកធនាគារពាណិជ្ជកម្មសៃហ្គន ដែលតម្រួតនគរបាលវៀតណាម ចេញដីកាចាប់ខ្លួនអន្តរជាតិ តាមឃាត់ខ្លួន។
តាមកាសែតក្នុងស្រុកវៀតណាម ករណីគៃបន្លំហិរញ្ញវត្ថុនេះ ជាសំណុំរឿងដ៏ធំជាងគេក្នុងប្រវត្តិសាស្ត្រវៀតណាមកុម្មុយនិស្ត។ ដ្បិតថា ឯកសារបណ្តឹងនិងភស្តុតាង មានទម្ងន់ ៦ តោន។ រដ្ឋអាជ្ញា ១០ នាក់ និង មេធាវីប្រមាណ ២០០ នាក់ ចូលរួមជែកតតាំងក្តី ហើយ តុលាការក្រុងហូជីមិញ (ក្រុងព្រៃនគរ) នឹងរៀបចំឲ្យមនុស្ស ៣ ០០០ នាក់អាចចូលរួមស្តាប់ការជម្រះក្តីក្នុងអង្គសវនាការ។ ការជំនុំជម្រះក្តី គ្រោងប្រើរយៈពេល២ ខែ។
មហាសេដ្ឋីនី ជឿង មី ឡាន ម្ចាស់ក្រុមហ៊ុន វ៉ាន់ ធីញ ហ្វាត់ ដែលបានបង្កើតតាំងពីឆ្នាំ១៩៩២ ដោយមានជំនួញវិនិយោគជាច្រើន រាប់ទាំងវិស័យសណ្ឋាគារ ភោជនីយដ្ឋាន សំណង់ និង អចលនទ្រព្យ ព្រមទាំងវិស័យហិរញ្ញវត្ថុធនាគារ ទៀតផង។ ស្វាមីរបស់លោកស្រី ជាចិនហុងកុង ឈ្មោះ អេរីក ចូវ។
នាងប៉ុន្មានឆ្នាំចុងក្រោយនេះ រដ្ឋកុម្មុយនិស្តវៀតណាម បានធ្វើយុទ្ធនាការកម្ចាត់អំពើពុករលួយ យ៉ាងសកម្ម។ ជាលទ្ធផល ចាប់ពីឆ្នាំ២០២១មក មានមនុស្ស ៤ ៤០០ នាក់ ត្រូវជាប់បទចោទប្រកាន់ក្នុងសំណុំបទល្មើសពុករលួយ ១ ៣០០ ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ