បក្សកុម្មុយនិស្តវៀតណាមខ្លាចថា ការចាប់ដៃធ្វើជំនួញជាមួយបរទេសអាចគំរាមកំហែងដល់សន្តិសុខជាតិ
ជាប្រទេសលូតលាស់លឿនជាងគេនៅអាស៊ីអាគ្នេយ៍ វៀតណាមបានក្លាយជាគោលដៅទាក់ទាញរបស់ប្រទេសលោកខាងលិច ជាពិសេសអាមេរិក ដែលចង់ឆ្លៀតបង្កើនចំណងពាណិជ្ជកម្មដើម្បីផ្ចាញ់ផ្ចាលចិន។ ជាផ្លូវការ វៀតណាមបើកចំហ ស្វាគមការវិនិយោគរបស់ក្រុមហ៊ុនបរទេស ប៉ុន្តែ នៅពីក្រោយវាំងនន ថ្នាក់ដឹកនាំបក្សកុម្មុយនិស្តវៀតណាមបានចេញសេចក្តីណែនាំ សម្ងាត់មួយ ដែលនៅក្នុងនោះ មន្រ្តីបក្សគ្រប់ជាន់ថ្នាក់មានភារកិច្ចតាមដានរាល់គម្រោងការវិនិយោគ ការសហការជាមួយបរទេស ណាដែលគ្រោះថ្នាក់ដល់សន្តិសុខជាតិ។ នេះបើតាមការចុះផ្សាយកាលពីថ្ងៃសុក្រ ទី១មីនា របាយការណ៍របស់អង្គការការពារសិទ្ធិប្រជាជនវៀតណាមThe 88 Project។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៦
ជាប្រទេសអាស៊ីដែលមានសេដ្ឋកិច្ចរីកលូតលាស់លឿនដោយសារឧស្សាហកម្មផលិតទំនិញតម្លៃថោក វៀតណាមដៅចង់បានបច្ចេកវិទ្យាឈានមុខបន្ថែមទៀត តាមរយៈការបើកទ្វារស្វាគមក្រុមហ៊ុនវិនិយោគពីបរទេស។ ដើម្បីជំរុញសេដ្ឋកិច្ចឲ្យដើរលឿនទៅមុខ វៀតណាមមិនរារែកផ្លាស់ប្តូរនយោបាយ ដោយងាកនឹងចាប់ដៃជាមួយអាមេរិកដែលធ្លាប់ជាសត្រូវស៊ីសាច់ហុតឈាមគ្នា កាលពីអតីតកាល។ ជាក់ស្តែង នៅក្នុងអំឡុងទស្សនកិច្ចផ្លូវរដ្ឋរបស់ប្រធានាធិបតីអាមេរិក កាលពីខែកញ្ញា ឆ្នាំមុន វៀតណាមបានដំឡើងចំណាត់ថ្នាក់ទំនាក់ទំនងជាមួយអាមេរិកដល់កម្រិតមួយខ្ពស់បំផុត ស្មើនឹងរុស្ស៊ីនិងចិន ដែលជាប្រទេសកុម្មុយនិស្ត ដូចវៀតណាម។
ជាមួយការចុះកិច្ចព្រមព្រៀងដោះដូរពាណិជ្ជកម្មសេរីជាមួយអាមេរិក អឺរ៉ុប វៀតណាមសង្ឃឹមក្លាយជាប្រទេសអភិវឌ្ឍ មានប្រាក់ចំណូលខ្ពស់ នៅឆ្នាំ ២០៤៥។ នៅសំបកក្រៅ វៀតណាមបានបង្ហាញការផ្លាស់ប្តូរ ការបន្ទន់ជំហររបស់ខ្លួនដើម្បីទាក់ទាញអ្នកវិនិយោគ។ ឧទាហរណ៍ នៅឆ្នាំ ២០២០ វៀតណាមបានចុះកិច្ចព្រមព្រៀងជាមួយសហភាពអឺរ៉ុប ដែលនៅក្នុងនោះ មានចងភ្ជាប់ដោយការគោរពសិទ្ធិមនុស្ស និងច្បាប់ការងារ។ ប៉ុន្តែ នៅផ្ទៃក្នុង ស៊ីជម្រៅ បក្សកុម្មុយនិស្តវៀតណាមនៅតែរក្សាដង្កៀបដែក ដ៏រឹងមាំដើម្បីរក្សាអំណាច តាមដានរាល់ការបញ្ចេញមតិនយោបាយ នៅវៀតណាម។
ជាក់ស្តែង នៅខែកក្កដា ឆ្នាំ ២០២៣ ពោល គឺនៅតែ ២ខែ មុនទស្សនកិច្ចរបស់ប្រធានាធិបតីអាមេរិក នៅហាណូយ ថ្នាក់ដឹកនាំរបស់ការិយាល័យនយោបាយរបស់មជ្ឈឹមបក្សកុម្មុយនិស្តវៀតណាមបានចេញការណែនាំសម្ងាត់មួយ ដែលនៅក្នុងនោះ មានបទបញ្ជាចំនួន៩ ដែលថ្នាក់ដឹកនាំបក្ស និងរដ្ឋាភិបាលត្រូវអនុវត្តយ៉ាងជាប់លាប់។ នេះបើតាមរបាយការណ៍របស់អង្គការការពារសិទ្ធិមនុស្សវៀតណាម The 88 Project។
យោងតាមអង្គការការពារសិទ្ធិមនុស្សដែលមានទីស្នាក់ការនៅទីក្រុងឈីកាហ្គោ សហរដ្ឋអាមេរិក នៅក្នុងការណែនាំរបស់ខ្លួន ដែលមានឈ្មោះ ថា Directive 24 បក្សកុម្មុយនិស្តវៀតណាមបានព្រមានពីគ្រោះថ្នាក់ដល់សន្តិសុខជាតិ បង្កឡើងដោយកម្លាំងពីខាងក្រៅ តាមរយៈចំណងពាណិជ្ជកម្ម។ តាមការយល់ឃើញរបស់ថ្នាក់ដឹកនាំបក្សកុម្មុយនិស្តវៀតណាម ការដោះដូរពាណិជ្ជកម្មអន្តរជាតិនឹងបើកផ្លូវឲ្យក្រុមប្រឆាំងវៀតណាមមានឱកាសទៅបំផ្លាញនយោបាយផ្ទៃក្នុងវៀតណាម តាមរយៈការបង្កើតសង្គមស៊ីវិល បណ្តាញសហជីពឯករាជ្យ រហូតឈានទៅបង្កើតបក្សប្រឆាំងក្នុងស្រុក។ ជារួម នៅក្នុងការណែនាំរបស់បក្សកុម្មុយនិស្តវៀតណាម អាជ្ញាធរត្រូវបញ្ជាឲ្យតាមដាន ទប់ស្កាត់រាល់ការវិនិយោគ ការសហការអន្តរជាតិ ទាំងឡាយណា ដែលអាចជាការប្រើឥទ្ធិពល ដូចជាតាមផ្លូវសេដ្ឋកិច្ច សកម្មភាពវប្បធម៌ ឬសង្គម ដែលអាចប៉ះពាល់ គ្រោះថ្នាក់ដល់សន្តិសុខជាតិវៀតណាម។
នៅក្នុងការណែនាំDirective 24 អាជ្ញាធរវៀតណាមត្រូវគ្រប់គ្រងតាមដានដំណើររបស់ប្រជាជនវៀតណាមទៅបរទេស និងត្រូវអនុវត្តដ៏តឹងរ៉ឹង ច្បាប់ស្តីពីសន្តិសុខជាតិ នៅពេលនិយាយពីការវិនិយោគបរទេស និងវត្តមានរបស់អង្គការក្រៅរដ្ឋាភិបាលនៅទឹកដីវៀតណាម។ តាមអង្គការការពារសិទ្ធិប្រជាជនវៀតណាម សកម្មជនវៀតណាម ១៧៥នាក់ ត្រូវអាជ្ញាធរវៀតណាមចាប់ឃុំខ្លួន ដែលនៅក្នុងនោះ មានអ្នកការពារបរិស្ថាន ៦នាក់កំពុងជាប់ពន្ធនាគារ នៅក្នុងបទចោទប្រកាន់ទទួលហិរញ្ញវត្ថុពីក្រុមបរទេស។
សម្រាប់ The 88 Project ការណែនាំសម្ងាត់ Directive 24ជាឧបករណ៍នយោបាយដែលដ្ឋាភិបាលកុម្មុយនិស្តវៀតណាមប្រើសម្រាប់តាមដាន បង្រ្កាបសកម្មជនការពារសិទ្ធិមនុស្ស និងអង្គការសង្គមស៊ីវិលនៅវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ