ភូមា៖ មេដឹកនាំរបបសឹក ជួប ប្រេសិតពិសេសអាស៊ាន ដោះស្រាយជម្លោះប្រដាប់អាវុធ
មេដឹកនាំរបបសឹកភូមា ឧត្តមសេនីយ មីន អ៊ុងឡាំង និង ប្រេសិតពិសេសអាស៊ាន លោក អរុណកែវ កិត្តិគុណ (អាលុនកែវ គិទ្ទិឃុន) បានជួបសំណេះសំណាលគ្នា តាមបែបការទូត ហើយនិង «ជជែកពិភាក្សាគ្នាអំពីការខំប្រឹងប្រែងរបស់រដ្ឋាភិបាលភូមា ក្នុងការរកដំណោះស្រាយ ដើម្បីសន្តិភាព និងស្ថិរភាព»។ នេះបើតាមការទម្លាយផ្សាយឲ្យដឹងពីកាសែតរដ្ឋភូមា The New Global Light of Myanma និងដែលបញ្ជាក់ថា ជំនួបនេះ បានធ្វើឡើង នៅថ្ងៃពុធ ទី១០ មករា នៅក្នុងរដ្ឋធានីណៃពិដោរ ។
ចុះផ្សាយនៅថ្ងៃ៖
ស្តាប់ - ០២:៥៦
អ្នកវិភាគកិច្ចការតំបន់អាស៊ាន បានប្រមើលមើលឃើញថា មេដឹកនាំរបបសឹកភូមា សម្រេចទទួលជួប ប្រេសិតពិសេសអាស៊ាន គឺក្នុងបរិបទពិសេស។ ពិសេសម្យ៉ាង ដ្បិតថា ពួកយោធាភូមា កំពុងតែប្រឈមមុខខ្លាំងឡើងៗ ទល់នឹង សម្ព័ន្ធប្រដាប់អាវុធជនជាតិភាគតិច។ ការប្រយុទ្ធគ្នាមានភាពស្រួលស្រាល់ខ្លាំង តាំងពីខែតុលាមក គឺ សម្ព័ន្ធប្រដាប់អាវុធជនជាតិភាគតិច ដែលមានកម្លាំងចលនា ៣ រួមបញ្ចូលគ្នា បានកាន់កាប់ទីតាំងយោធាមួយចំនួន ព្រមទាំងបានដណ្តើមត្រួតត្រាច្រកព្រំដែន ដែលជាដង្ហើមពាណិជ្ជកម្មនាំចេញដ៏សំខាន់របស់របបសឹកភូមា ជាមួយចិន។ បរិបទពិសេសម្យ៉ាងទៀត គឺ ជំនួបរវាងមេដឹកនាំរបបសឹកភូមា និងប្រេសិតពិសេសអាស៊ាន នេះ គឺធ្វើឡើងនៅមុនពេលកិច្ចប្រជុំកំពូលអាស៊ាន ដែលត្រូវរៀបចំធ្វើឡើងចុងខែនេះ នៅប្រទេសឡាវ ក្បែរខាងភូមា។
របបសឹកភូមា ឡើងកាន់អំណាចដោយរដ្ឋប្រហារយោធា តាំងពីឆ្នាំ២០២១ ហើយអំពើហិង្សា និង ស្ថានការណ៍ជម្លោះចេះតែបន្តបង្ហូរឈាមគ្នា។ ចំណែក ការរឹតបណ្តឹងសិទ្ធិមនុស្សមានជាហូរហែរ ហើយពន្លឺប្រជាធិបតេយ្យ កាន់តែខិតទៅឆ្ងាយ។
រហូតមកទល់នឹងពេលនេះ សមាគមប្រជាជាតិអាស៊ីអាគ្នេយ៍ នៅពុំទាន់អាចនឹងជំរុញ ភូមា ឲ្យ អនុវត្តតាមកិច្ចព្រមព្រៀងជាឯកច្ឆ័នទាំង ៥ ចំណុច ដើម្បីនាំមកនូវស្ថិរភាព សន្តិភាព នៅភូមា។ ភូមា ក៏នៅតែត្រូវគេផាត់ចេញពីកិច្ចប្រជុំធំៗទាំងឡាយរបស់អាស៊ាន។ ជាក់ស្តែង កិច្ចប្រជុំអាស៊ាន-ជប៉ុនថ្មីៗនេះ នៅរាជធានីតូក្យូ គ្មានឡើយវត្តមានដឹកនាំកំពូលភូមា។
សំណុំរឿងភូមា គឺធ្វើឲ្យរដ្ឋសមាជិកអាស៊ានឈឺក្បាលមិនតិចទេ ហើយនិងមិនអាចរកសំឡេងរួមគ្នាតែមួយ។ កម្ពុជា កាលពីរដ្ឋអំណាចក្រុងភ្នំពេញធ្វើជាប្រធានផ្លាស់វេនអាស៊ាន ក៏បានជ្រោមជ្រែងជំរុញ ភូមា ឲ្យដើរផ្លូវត្រូវមកវិញ ហើយ រដ្ឋអំណាចចិន វិញ ក៏បានសម្រុះសម្រួលដែរ ក៏ប៉ុន្តែ ស្ថានការណ៍ភូមា ហាក់នៅទ្រឹង។ ពេលកន្លងទៅ ថៃ បានជួបរដ្ឋមន្ត្រីការបរទេសភូមា និងចង់រកច្រកផ្លូវបើកឲ្យ ភូមា ចូលរួមប្រជុំក្នុងកម្រិតការទូត។ ផ្ទុយទៅវិញ ឥណ្ឌូណេស៊ី ម៉ាឡេស៊ី ហើយ សិង្ហបុរី បានជំទាស់។ សិង្ហបុរី បានបដិសេធថា ភូមា គ្មានភាពចាស់ទុំគ្រប់គ្រាន់ នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ