ប៉េកាំងបញ្ជាឱ្យពលរដ្ឋចិនចាកចេញភ្លាមពីតំបន់ភាគខាងជើងភូមា
ពលរដ្ឋចិនដែលកំពុងស្នាក់នៅក្នុងស្រុកឡូកី នៃតំបន់ភាគខាងជើងភូមា ត្រូវតែរួសរាន់ចាកចេញឱ្យបានឆាប់បំផុត ដើម្បីគេចពីអំពើហិង្សាប្រយុទ្ធគ្នារវាងកងទ័ពភូមានិងក្រុមប្រដាប់អាវុធជនជាតិភាគតិច។ នេះជាសេចក្តីថ្លែងការណ៍របស់ស្ថានទូតចិនប្រចាំភូមា ចេញផ្សាយនៅថ្ងៃព្រហស្បតិ៍ទី ២៨ធ្នូ២០២៣។
ចុះផ្សាយនៅថ្ងៃ៖
ស្តាប់ - ០២:២៩
រដ្ឋShan តំបន់ព្រំដែនភាគខាងជើងបំផុតនៃប្រទេសភូមា បានក្លាយជាសមរភូមិប្រយុទ្ធយ៉ាងសន្ធោរសន្ធៅបំផុត តាំងពីសម្ព័ន្ធប្រដាប់អាវុធជនជាតិភាគតិចបីក្រុម គឺយោធាអារ៉ាកាន(AA) យោធាសម្ព័ន្ធប្រជាធិបតេយ្យជាតិភូមា(MNDAA) និងយោធារំដោះជាតិតាអាង (TNLA) ចងសម្ព័ន្ធភាពគ្នាប្រយុទ្ធប្រឆាំងនឹងកងទ័ពរដ្ឋាភិបាលភូមាមក។ តាំងពីខែតុលាមក សម្ព័ន្ធប្រដាប់អាវុធជនជាតិភាគតិចដណ្តើមបានទីតាំងយោធា ព្រមទាំងបានដណ្តើមកាន់កាប់ច្រកព្រំដែនដែលដង្ហើមពាណិជ្ជកម្មនាំចេញដ៏សំខាន់របស់ភូមាជាមួយចិន។
គោលដៅបន្ទាប់គឺដណ្តើមយកស្រុកឡូកី ដែលស្ថិតនៅជាប់ព្រំដែនចិន ល្បីខ្លាំងខាងមានកាស៊ីណូ បនស្រីពេស្យា និងជាមណ្ឌលរកស៊ីឆបោកអនឡាញ ហើយគ្រប់គ្រងដោយក្រុមយុទ្ធជនស្និទ្ធនឹងយោធាភូមា។ សម្ព័ន្ធប្រដាប់អាវុធជនជាតិភាគតិចបានអះអាងថាការប្រយុទ្ធនៅតែបន្តក្នុងរដ្ឋShan ហើយពួកគេដណ្តើមបានភូមិពីរថ្មីទៀតនាប៉ុន្មានថ្ងៃចុងក្រោយនេះ។
ហេតុដូច្នេះហើយបានជាស្ថានទូតចិនប្រចាំភូមា បានតឿនរំលឹកជាថ្មីឱ្យប្រជាពលរដ្ឋចិនទាំងអស់ត្រូវចាកចេញពីស្រុកឡូកីឱ្យបានឆាប់រហ័សបំផុតតាមដែលអាចធ្វើទៅបាន ដើម្បីធានាសុវត្ថិភាពនិងសន្តិសុខ។ ហានិភ័យជាប់កុនក្នុងស្រុកឡូកីខ្ពស់ខ្លាំងណាស់។ សម្រាប់ក្រសួងការបរទេសចិន ស្ថានភាពនៅស្រុកឡូកីនៃតំបន់កូកង់អាក្រក់និងស្មុគស្មាញខ្លាំងណាស់ ព្រោះកងទ័ពរដ្ឋាភិបាលភូមាបានចាប់ផ្តើមវាយប្រហារ តាមផ្លូវអាកាសលើតំបន់កូកង់ដែលមានព័ទ្ធជុំវិញស្រុកឡូកីនិងផ្លោងទម្លាក់គ្រាប់បែកលើកទីរួមស្រុក។
នៅចំពោះមុខស្ថានភាពនេះ អ្នកនាំពាក្យចិន លោកស្រី ម៉ៅ នីង វិញ បានប្រកាសថា ការពារផលប្រយោជន៍របស់គ្រប់ភាគីនៅភូមា ត្រូវតែមានបទឈប់បាញ់និងការចរចាសន្តិភាព។ ទំនាក់ទំនងរវាងរបបសឹកភូមានិងចិនជាសម្ព័ន្ធមិត្តដ៏ចម្បង ហាក់រយាលគ្នាបន្តិចនាពេលថ្មីៗនេះដោយហេតុតែកងទ័ពភូមាគ្មានសមត្ថភាពកម្ចាត់មណ្ឌលរកស៊ីឆបោកអនឡាញ ទាក់យកពលរដ្ឋចិនឱ្យក្លាយជាជនរងគ្រោះ។ បើតាមអ្នកវិភាគ ចិនក៏មានទំនាក់ទំណងល្អជាមួយក្រុមប្រដាប់អាវុធជនជាតិភាគតិចភាគខាងជើងភូមាដែរ ព្រោះពួកគេខ្លះកាន់ប្រពៃណីនិងវប្បធម៌ដូចចិន ហើយមានប្រើប្រាស់លុយព្រមទាំងបណ្តាញទូរស័ព្ទចិនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ