ចិនបើកប្រតិបត្តិការយោធានៅតាមព្រំដែនជាប់ប្រទេសភូមា
នៅថ្ងៃសៅរ៍ទី ២៥វិច្ឆិកានេះ ចិនបានផ្តើមលំហាត់សឹកនៅតាមបណ្តោយព្រំដែនជាប់ជាមួយប្រទេសភូមា និងបានអំពាវនាវឱ្យប្រជាពលរដ្ឋចិនទាំងអស់ចាកចេញជាបន្ទាន់ពីភាគខាងជើងភូមា។
ចុះផ្សាយនៅថ្ងៃ៖
ស្តាប់ - ០២:៣៦
ជាផ្លូវការជាលំហាត់សឹកទេ។ ប៉ុន្តែយោធាចិនបានបើកសមយុទ្ធ នៅថ្ងៃសៅរ៍នេះ ដោយបញ្ចេញសកម្មភាពប្រយុទ្ធដោយពិតៗនៅតាមបណ្តោយព្រំដែនជាមួយប្រទេសភូមា។ នេះបើតាមការអះអាងរបស់មេបញ្ជាការកងទ័ពតំបន់ខាងត្បូងនៅក្នុងសេចក្តីថ្លែងការណ៍ ដោយមិនបញ្ជាក់ថាអំពីរយៈពេលនៃប្រតិបត្តិការ ឬអំពីចំនួនទាហានចូលរួមក្នុងយុទ្ធនការនេះទេ។ ក្នុងកម្មវត្ថុសាកល្បងមើលសមត្ថភាពរបស់កងកម្លាំងយោធាចិន ក្នុងការត្រួតពិនិត្យនិងបិទការពារព្រំដែន ព្រមទាំងសមត្ថភាពវាយប្រហារដោយអាវុធប្រកបដោយមហិទ្ធិរិទ្ធ ប្រភពយោធាចិនដដែលបានបញ្ជាក់ថា លំហាត់សឹកនេះជាការស្តែងឱ្យឃើញអំពីការត្រៀមលក្ខណៈជាស្រេចនឹងបញ្ចេញសកម្មភាពប្រដាប់អាវុធប្រឆាំងទល់នឹងគ្រប់ទម្រង់នៃការវាយប្រហារទាំងអស់។
តាំងពីមួយខែកន្លងមកនេះ សម្ព័ន្ធក្រុមជនជាតិភាគតិចប្រដាប់អាវុធភូមា ផ្តុំដោយចលនាឧទ្ទាមជាច្រើនក្រុម បានបើកប្រតិបត្តិការវាយប្រហារមកលើកងកម្លាំងរដ្ឋាភិបាលសឹកភូមា យ៉ាងខ្លាំងនៅតាមតំបន់ជាប់ព្រំដែនជាមួយប្រទេសចិន។ ពួកឧទ្ទាមជនជាតិភាគតិចដណ្តើមបានទីតាំងជាច្រើនពីដៃយោធាភូមា ព្រមទាំងចូលកាន់កាប់ក្រុងយុទ្ធសាស្ត្រនៅភាគខាងជើងប្រទេសដែលមានទំនាក់ទំនងពាណិជ្ជកម្មសកម្មជាមួយចិនទៀតផង។ ហើយរដ្ឋាភិបាលភូមាក៏បានទទួលស្គាល់បរាជ័យនៅតំបន់នេះដែរ។
បើតាមអង្គការសហប្រជាជាតិអំពើហិង្សាប្រដាប់អាវុធដ៏សន្ធាប់ និងឥតស្រាកស្រាន្ត នៅតំបន់ភាគខាងជើងនៃរដ្ឋShanរបស់ភូមានេះ បានបណ្តាលឱ្យពលរដ្ឋក្នុងមូលដ្ឋានជាង៨ម៉ឺននាក់ត្រូវបង្ខំចិត្តរស់ភៀសខ្លួនចេញពីផ្ទះសម្បែង។ ក្រុមឧទ្ទាមអាវុធជនជាតិភាគតិចបន្តប្រយុទ្ធប្រឆាំងនឹងយោធារដ្ឋាភិបាលសឹកភូមា បានទាំងប្រើដ្រូនសម្រាប់ទម្លាក់គ្រាប់បែកលើក្រុងតាមព្រំដែនផង។ នេះបើតាមការចុះផ្សាយរបស់សារព័ត៌មានផ្លូវការភូមា ដោយបញ្ជាក់ថា កាលពីថ្ងៃព្រហស្បតិ៍ការវាយប្រហារដោយដ្រូនបានបំផ្លាញយានយន្តដឹកវត្ថុប្រើប្រាស់ក្នុងផ្ទះ ស្បៀងអាហារ សម្លៀកបំពាក់និងគ្រឿងសំណង់អស់១២០គ្រឿង។ ការផ្តោះប្តូរពាណិជ្ជកម្មភូមា-ចិនមួយចំណែកធំត្រូវឆ្លងកាត់តំបន់នេះ និងត្រូវគាំងរអាក់រអួលអស់ជាច្រើនសប្តាហ៍មកហើយដែលបង្កឱ្យមានការខាតបង់ដ៏ធំសម្រាប់រដ្ឋាភិបាលសឹកភូមា។
នៅចំពោះមុខស្ថានភាពសន្តិសុខចុះដុនដាបជាលំដាប់ដូច្នេះ ចិនបានអំពាវនាវនៅថ្ងៃម្សិលមិញឱ្យពលរដ្ឋចិនទាំងអស់ចាកចេញជាបន្ទាន់ពីតំបន់ភាគខាងជើងប្រទេសភូមា និងស្ថិតនៅឱ្យឆ្ងាយពីជម្លោះប្រដាប់អាវុធ។ ចិនក៏បានប្រាប់រដ្ឋាភិបាលសឹកភូមាដែរជុំវិញការបើកប្រតិបត្តិការយោធានៅតាមព្រំដែនថ្ងៃនេះ។ នេះបើតាមអ្នកនាំពាក្យរដ្ឋាភិបាលភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ