ឥណ្ឌូណេស៊ី៖បាតុករទាមទារលក្ខខណ្ឌការងារល្អ បន្ទាប់ពីអគ្គិភ័យស្លាប់មនុស្ស ១៨ នាក់
នៅឥណ្ឌូណេស៊ី ថ្ងៃពុធ ទី២៧ ខែធ្នូ កម្មករប្រមាណ ៣០០ នាក់ ធ្វើបាតុកម្មនៅមុខក្រុមហ៊ុនចិនចម្រាញ់រ៉ែ ដើម្បីទាមទារឲ្យគោរពច្បាប់ពាក់ព័ន្ធនឹងសុខភាព និងសុវត្ថិភាពនៅកន្លែងធ្វើការ។ ការជួបគ្នាសម្តែងមតិ ដោយអហិង្សានេះ គឺបន្ទាប់ពី គ្រោះថ្នាក់អគ្គិភ័យឆេះស្លាប់មនុស្ស ១៨ នាក់ កាលពីចុងសប្តាហ៍មុន។ ប៉ូលីសឥណ្ឌូណេស៊ី ថា ជនរងគ្រោះជាង ៣០ នាក់ទៀត កំពុងតែបន្តដេកសម្រាកព្យាបាលនៅមន្ទីរពេទ្យ។
ចុះផ្សាយនៅថ្ងៃ៖
ស្តាប់ - ០២:៤០
នៅក្នុងញ្ញាតិទាមទារដែលផ្ញើទៅក្រុមហ៊ុនចិននិងអាជ្ញាធរឥណ្ឌូណេស៊ី គឺក្រុមសហជីពតំណាងកម្មករ បានទាមទារលក្ខខណ្ឌការងារល្អប្រសើរជាងមុន មានវិធានការជួសជុលម៉ាស៊ីននិងប្តូរផ្លាស់គ្រឿងឧបករណ៍ចាស់ៗ ហើយមានមធ្យោបាយសង្គ្រោះបន្ទាន់បានត្រឹមត្រូវ។ មិនតែប៉ុណ្ណោះ ចំពោះកម្មករជាជនជាតិ ចិន គឺត្រូវតែមានកាតព្វកិច្ចរៀនភាសាឥណ្ឌូណេស៊ី ជាដាច់ខាត។
ពីទីក្រុងប៉េកាំង ក្នុងសន្និសីទសារព័ត៌មានប្រចាំថ្ងៃ អ្នកស្រី ម៉ៅ នីង អ្នកនាំពាក្យក្រសួងការបរទេសចិន បញ្ជាក់ថា កម្មករជនជាតិចិន ចំនួន ៨ បានស្លាប់បាត់បង់ជីវិត ក្នុងហេតុការណ៍ផ្ទុះឆេះនៅរោងចក្រចម្រាញ់រ៉ែនីកែល ប្រទេសឥណ្ដូណេស៊ី។ អ្នកស្រី ម៉ៅ នីង អះអាងថា រដ្ឋាភិបាលចិន បានយល់ព្រមជំរុញឲ្យបង្កើនសន្តិសុខសុវត្ថិភាពខ្ពស់ នៅក្នុងគម្រោងអាជីវកម្មរកស៊ីទាំងឡាយរបស់ចិន នៅបរទេស។
បើតាមទីភ្នាក់ងារព័ត៌មានបារាំងអាអេហ្វប៉េ គ្រួសារជនរងគ្រោះមួយ ដែលមានសមាជិកម្នាក់ស្លាប់ នៅក្នុងគ្រោះថ្នាក់អគ្គិភ័យនោះ បានប្រាប់ ថា ក្រុមហ៊ុនបានផ្តល់សំណងជំងឺចិត្ត ចំនួន ៦០០ លានរូពី (ប្រមាណ ៣ ម៉ឺនអឺរ៉ូ)។ គ្រួសារនេះ សង្ឃឹមថានឹងពុំមានអ្នកផ្សេងទៀតស្លាប់នៅក្នុងគ្រោះថ្នាក់បែបនេះទៀតឡើយ នៅថ្ងៃខាងមុខ។
គួររំឭកថា ថ្ងៃសៅរ៍ ទី២៣ធ្នូ ហេតុការណ៍ផ្ទុះឆេះមួយកើតឡើង ពេលកម្មករជួសជុលឡចម្រាញ់រ៉ែនីកែល នៅកោះស៊ូឡាវេស៊ី ប៉ែកខាងកើតប្រទេសឥណ្ឌូណេស៊ី។ រោងចក្រនេះ ជួលទីតាំងរបស់តំបន់ឧស្សាហកម្មឥណ្ឌូណេស៊ី-មូរូវ៉ាលី ជាជំនួញវិនិយោគរបស់ក្រុមហ៊ុនចិន លាតសន្ថឹកលើផ្ទៃដី ៣ ០០០ ហិកតា មានក្រុមហ៊ុនជាង ១០ ហើយនិងអ្នកធ្វើការ ជាង ៧ ម៉ឺននាក់។
អ្នកនាំពាក្យតំបន់ឧស្សាហកម្មឥណ្ឌូណេស៊ី-មូរូវ៉ាលី លោក ដេដី កុរណាវ័ន បានប្រាប់អ្នកកាសែតទីភ្នាក់ងារព័ត៌មានអាអេហ្វប៉េ ថា ក្រុមហ៊ុនបានរៀបចំបំពេញតាមសំណើរបស់បាតុករ តាំងតែ ២ ថ្ងៃមុននេះមកម្ល៉េះ ហើយក្រុមហ៊ុនសង្ឃឹមថា បាតុករនឹងមិនធ្វើបាតុកម្មបន្តទៀតទេ។ ចំណែក អនុរដ្ឋមន្ត្រីម្នាក់របស់រដ្ឋាភិបាលឥណ្ឌូណេស៊ី ក៏បានសន្យាប្រាប់អ្នកកាសែតដែរថា រដ្ឋាភិបាលនឹងរឹតបន្តឹងពង្រឹងច្បាប់ ដើម្បីធានាសុវត្ថិភាពសន្តិសុខនៅកន្លែងការងារ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ