ផ្ទុះភ្នំភ្លើងម៉ារ៉ាពីសម្លាប់មនុស្ស១១នាក់ នៅឥណ្ឌូណេស៊ី
នៅឥណ្ឌូណេស៊ី មនុស្ស១១នាក់ស្លាប់ ដោយសារការផ្ទុះភ្នំភ្លើង ចំណែកមនុស្ស១២នាក់ ដែលជាអ្នកដើរលេងភ្នំ នៅបន្តបាត់ខ្លួន។ នៅថ្ងៃអាទិត្យទី៣ធ្នូ២០២៣ ភ្នំភ្លើង ម៉ារ៉ាពី នៅលើកោះស៊ូម៉ាត្រា ចាប់ផ្ទុះ បញ្ចេញផ្សែង ផេះកំពស់ជាង ៣០០០ម៉ែត្រទៅក្នុងអាកាស។ អាជ្ញាធរឥណ្ឌូណេស៊ីបានបិទ ហាមមិនឲ្យប្រជាជនចូលទៅក្នុងតំបន់ ដែលស្ថិតក្នុងរង្វង់៣គីឡូម៉ែត្រ ភ្នំភ្លើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
លើកោះស៊ូម៉ាត្រា ភ្នំភ្លើងម៉ារ៉ាពីចាប់ផ្ទុះ នៅរសៀលថ្ងៃអាទិត្យ ដោយបញ្ចេញផ្សែង ផេះទៅក្នុងអាកាស កំពស់៣ពាន់ម៉ែត្រ។ តាមអាជ្ញាធរឥណ្ឌូណេស៊ី មនុស្ស១១នាក់ ស្លាប់ ចំណែក ៣នាក់ រងរបួស ដោយសារការរលាកភ្នំភ្លើង។ ពួកគេទាំងនោះស្ថិតក្នុងចំណោមអ្នកដើរលេងភ្នំ ២៦នាក់ ដែលអាជ្ញាធរស្វែងរុករកតាំងពីព្រឹកថ្ងៃអាទិត្យ។
បើតាមក្រុមអ្នកជួយសង្រ្គោះ បន្ទាប់ពីស្វែងរក អស់ពេញមួយយប់ គេប្រទះឃើញសាកសពរបស់អ្នកដើរលេង ១១នាក់ នៅមិនឆ្ងាយពីមាត់រណ្តៅភ្នំភ្លើង ចំណែក មនុស្ស៣នាក់ដែលនៅរស់ រងរបួសរលាកភ្លើងខ្លាំង។ តាមអាជ្ញាធរឥណ្ឌូណេស៊ី គេកំពុងបន្តស្វែងរកអ្នកដើរភ្នំ ១២នាក់ផ្សេងទៀត ដែលនៅបន្តបាត់ខ្លួន។
ដោយសារភ្នំភ្លើងនៅតែបន្តផ្ទុះបញ្ចេញផ្សែងផេះទៅក្នុងអាកាស ប្រតិបត្តិការជួយសង្រ្គោះមិនអាចធ្វើទៅបានតាមឧទ្ធម្ភាគចក្រ។ នៅថ្ងៃចន្ទនេះ ក្រុមជួយសង្រ្គោះត្រូវសែងបណ្តាក់គ្នា យកសាកសព ចុះភ្នំ ចំណែក អ្នករបួសទាំង៣នាក់ ត្រូវបន្តរង់ចាំ មិនទាន់អាចចុះពីលើភ្នំ ដោយសារតែស្ថានភាពដីមិនអំណោយផល។
ភ្នំភ្លើងម៉ារ៉ាពីស្ថិតក្នុងកម្រិតប្រកាសអាសន្នលេខពីរ ក្នុងចំណោមកម្រិតចំនួន៤របស់អាជ្ញាធរគ្រប់គ្រងគ្រោះមហន្តរាយឥណ្ឌូណេស៊ី។ ចាប់តាំងពីថ្ងៃអាទិត្យ អាជ្ញាធរបានបិទតំបន់ជុំវិញ ចម្ងាយ៣គីឡូម៉ែត្រពីភ្នំភ្លើងម៉ារ៉ាពី។ តាមការិយាល័យតាមដានភ្នំភ្លើង នៅក្រោយ ផ្ទុះភ្នំភ្លើងម៉ារ៉ាពី ផ្សែងផេះរបស់វាបានអណ្តែតធ្លាក់ទៅដល់ទីក្រុងធំទី៣របស់កោះស៊ូម៉ាត្រា ដែលមានប្រជាជនរស់នៅប្រមាណ ១សែននាក់។
ឥណ្ឌូណេស៊ីមានស្ថានភាពភូមិសាស្ត្រ ស្ថិតលើខ្សែក្រវ៉ាត់ភ្លើងរបស់ប៉ាស៊ីហ្វិក ដែលជាចំណុចប្រសព្វនៃស្រទាប់សំបកផែនដី ដែលរុញបុកគ្នាទៅវិញទៅមកជាប្រចាំ។ ស្នាមប្រេះ បង្កឡើងដោយកម្លាំងរុញច្រាន នៃស្រទាប់ផែនដី បានធ្វើឲ្យតំបន់នេះ ឧស្សាហ៍កើតមានគ្រោះរញ្ជួយដី និងផ្ទុះភ្នំភ្លើងញឹកញាប់បំផុត។ ជ្រោយកោះឥណ្ឌូណេស៊ីមានភ្នំភ្លើងប្រមាណ ១៣០ដែលនៅសកម្មខ្លាំង ដែលនៅក្នុងនោះមានភ្នំភ្លើង ម៉ារ៉ាពី ដែលបានបញ្ចេញផ្សែងផេះក្នុងកំពស់ ៦០០០ម៉ែត្រទៅក្នុងអាកាស កាលពីពាក់កណ្តាលឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ