នៅឥណ្ឌូណេស៊ី ស្លាប់មនុស្ស យ៉ាងតិច ១៣ នាក់ ព្រោះឆេះរោងចក្រចម្រាញ់រ៉ែមួយកន្លែង
យ៉ាងហោច មនុស្សស្លាប់ ចំនួន ១៣ នាក់ ព្រោះតែភ្លើងឆេះរោងចក្រផលិតរ៉ែនីកែល នៅកោះស៊ូឡាវេស៊ី ប៉ែកខាងកើតប្រទេសឥណ្ឌូណេស៊ី។ ក្នុងចំណោមមរណជនទាំងនោះ មានជនជាតិចិន ៤ នាក់ និងឥណ្ឌូណេស៊ី ៩ នាក់។ ហេតុការណ៍នេះ បានកើតឡើងនៅថ្ងៃសៅរ៍ ទី២៣ធ្នូ វេលាម៉ោង ជាង ៩ យប់។ នេះបើតាមអ្នកទទួលខុសត្រូវតំបន់សេដ្ឋកិច្ចឧស្សាហកម្មឥណ្ឌូណេស៊ី-ម៉ូរូវ៉ាលី ដែលបានបញ្ជាក់ទៀតថា ក្នុងគ្រោះថ្នាក់អគ្គិភ័យនេះ មានមនុស្ស រងរបួស ចំនួន ៤៦ នាក់ ត្រូវបញ្ជូនទៅមន្ទីរពេទ្យ។
ចុះផ្សាយនៅថ្ងៃ៖
ស្តាប់ - ០២:៥៧
ពេលកើតហេតុដំបូងៗឡើយ មានសាក្សីខ្លះបានប្រាប់ព័ត៌មានក្នុងស្រុកថា គ្រោះថ្នាក់នេះពីព្រោះតែមានផ្ទុះអ្វីមួយ។ តែទីបំផុតទៅ បន្ទាប់ពីធ្វើកោសល្លវិនិច្ឆ័យកន្លែងកើតហេតុរួច អ្នកទទួលខុសត្រូវតំបន់សេដ្ឋកិច្ចឧស្សាហកម្មនោះ បានចេញមុខកែតម្រូវព័ត៌មាន និងបញ្ជាក់ថា គ្រោះថ្នាក់នេះ គឺដើមហេតុមកពីឆេះម៉ាស៊ីនចម្អិនចំណីអាហារ និងពុំមែនមកពីផ្ទុះអ្វីឡើយ។ ថ្នាក់ដឹកនាំតំបន់សេដ្ឋកិច្ចនេះ ក៏បានបង្ហាញឆន្ទៈសហការជាមួយអាជ្ញាធរសមត្ថកិច្ចនិងភាគីពាក់ព័ន្ធ ដើម្បីបើកការស៊ើបអង្កេតជាបន្ត ហើយនិងថា ក្រុមហ៊ុនស្ម័គ្រចិត្តជួយចេញថ្លៃព្យាបាល និងបង់សំណងការខូចខាតចំពោះក្រុមគ្រួសារជនរងគ្រោះ។
សូមជ្រាបថា រោងចក្រចម្រាញ់រ៉ែនីកែលដែលរងគ្រោះថ្នាក់អគ្គិភ័យនេះ គឺបានជួលទីតាំងរបស់ តំបន់សេដ្ឋកិច្ចឧស្សាហកម្ម ឥណ្ឌូណេស៊ី-ម៉ូរូវ៉ាលី ជាតំបន់សេដ្ឋកិច្ចដ៏ធំ សហការរវាងក្រុមហ៊ុន ចិន និងក្រុមហ៊ុនក្នុងស្រុកឥណ្ឌូណេស៊ី។ ឥណ្ឌូណេស៊ី ជាប់ឈ្មោះជាប្រទេស ទី១ នៅលើពិភពលោក ដែលចម្រាញ់ផលិតរ៉ែនីកែល សម្រាប់នាំចេញទៅទីផ្សារអន្តរជាតិ ដែលគេកំពុងពេញនិយមត្រូវការរ៉ែនីកែល។ ដ្បិតថា រ៉ែនីកែល ជាវត្ថុធាតុមានសារៈសំខាន់ណាស់ សម្រាប់ផលិតដែកអ៊ីណុក និងសម្រាប់ផលិតអាគុយ ផ្គត់ផ្គង់ឧស្សាហកម្មផលិតរថយន្តដើរដោយចរន្តអគ្គិសនី។
សូម្បីតែប្រធានាធិបតីឥណ្ឌូណេស៊ី លោក ចូកូ វីដូដូ ចង់អភិវឌ្ឈវិស័យនេះឲ្យកាន់តែជឿនលឿនខ្លាំងទៀតដែរ ប៉ុន្តែ ត្រូវប្រឈមមុខនឹងបញ្ហាបរិស្ថាន និងសន្តិសុខសុវត្ថិភាព។ បញ្ហាបរិស្ថាន គឺក្នុងដំណើរការផលិតរ៉ែនីកែល ត្រូវការធ្យូងថ្ម ច្រើនណាស់ ដែលនេះនាំឲ្យប្រែប្រួលអាកាសធាតុ កើនកម្តៅផែនដី។ ឥណ្ឌូណេស៊ី ជាប្រទេសទី៣ ដែលប្រើធ្យូងថ្ម ច្រើនជាងគេ បន្ទាប់ពី ចិន និងឥណ្ឌា។ បញ្ហាសុវត្ថិភាព គឺរោងចក្រឥណ្ឌូណេស៊ី ជួបគ្រោះថ្នាក់ញឹកញយណាស់ដែរ។ កាលពីខែមករា ដើមឆ្នាំនេះ នៅរោងចក្ររ៉ែនីកែលក្នុងតំបន់ឧស្សាហកម្មដដែលនេះ គឺកម្មករ ២ នាក់ ចិនម្នាក់ឥណ្ឌូណេស៊ីម្នាក់ បានស្លាប់បាត់បង់ជីវិត ព្រោះតែកុបកម្មទាមទារដំឡើងប្រាក់ខែនិងលក្ខខណ្ឌការងារល្អ។ នៅខែមិថុនា ឆ្នាំនេះដែរ គ្រោះថ្នាក់១ទៀត បានសម្លាប់មនុស្សម្នាក់ និងរបួស ៦ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ