ឥណ្ឌូណេស៊ីរងរលកជនភៀសខ្លួនរ៉ូហ៊ីងយ៉ាតាមសមុទ្រជាថ្មី
រលកជនភៀសខ្លួនរ៉ូហ៊ីងយ៉ាតាមសមុទ្ទចាប់ផ្តើមកម្រើកជាថ្មី។ ក្នុងរយៈពេលមិនដល់មួយសប្តាហ៍ផង មានជនភៀសខ្លួនរ៉ូហ៊ីងយ៉ាប្រមាណជាង៨០០នាក់បានមកតោងដល់ឆ្នេរឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
តែមួយថ្ងៃអាទិត្យទី១៩វិច្ឆិកានេះសោះ មានជនភៀសខ្លួនរ៉ូហ៊ីងយ៉ាជាង៥០០នាក់ ធ្វើដំណើរតាមទូកបីគ្រឿងបានមកដល់ឆ្នេរឥណ្ឌូណេស៊ី។ បើតាមភ្នាក់ងារទទួលបន្ទុកជនភៀសខ្លួនអង្គការសហប្រជាជាតិUNHCR ទូកដឹកជនភៀសខ្លួនរ៉ូហ៊ីងយ៉ាទីមួយដែលធ្លាប់ត្រូវបានប្រជាពលរដ្ឋឥណ្ឌូណេស៊ីច្រានចេញទៅវិញកាលពីថ្ងៃព្រហស្បតិ៍បានមកតោងឆ្នេរខេត្តអាឆេរបស់ឥណ្ឌូណេស៊ីបាន ដោយមានផ្ទុកមនុស្សប្រមាណ២៥៦នាក់ ក្នុងនោះ១១០នាក់ជាស្ត្រីនិង៦០នាក់ជាកុមារ។ ទូករខេករខាកពីរទៀត មួយមានផ្ទុកជនរ៉ូហ៊ីងយ៉ា២៣៩នាក់ និងមួយទៀត៣៦នាក់ ក៏បានមកដល់តំបន់ ពីឌី Pidie និងតំបន់ប៉ែកខាងកើតអាឆេ។
រលកជនភៀសខ្លួនតាមទូក បានមកដល់ឥណ្ឌូណេស៊ីជាថ្មី ចាប់តាំងពីថ្ងៃអង្គារមកចំនួន ប្រមាណ១៩៦នាក់ និង១៤៧នាក់នៅថ្ងៃបន្ទាប់។ ជាសរុបមិនដល់សប្តាហ៍ផង តំបន់អាឆេឥណ្ឌូណេស៊ីត្រូវទទួលជនភៀសខ្លួនរ៉ូហ៊ីងយ៉ាដល់ទៅជាង៨០០នាក់។ ក្នុងពេលរង់ចាំសេចក្តីសម្រេចរបស់អាជ្ញាធរ ជនរ៉ូហ៊ីងយ៉ាដែលភាគច្រើនមានសុខភាពល្អត្រូវបញ្ជូនទៅមណ្ឌលឃុំឃាំងជាបណ្តោះអាសន្នសិន។
ជារៀងរាល់ឆ្នាំ មានជនភៀសខ្លួនរ៉ូហ៊ីងយ៉ារាប់ពាន់នាក់ (ជាងពីរពាន់នាក់នៅឆ្នាំ ២០២២) បានប្រថុយជីវិតឆ្លងគ្រោះថ្នាក់ធ្វើដំណើរតាមសមុទ្រ តាមទូកគ្មានសុវត្ថិភាព ដើម្បីបានមកដល់ម៉ាឡេស៊ីឬឥណ្ឌូណេស៊ី។ បើតាមUNHCR យ៉ាងហោច២០០នាក់បានស្លាប់ឬបាត់ខ្លួន ក្នុងពេលផ្សងព្រេងឆ្លងសមុទ្ទ។ ជនរ៉ូហ៊ីងយ៉ាទាំងនោះ ភាគច្រើនជាជនភៀសខ្លួនរស់នៅក្នុងជំរំជនភៀសខ្លួនក្នុងប្រទេសបង់ក្លាដែស។ តាំងពីផ្ទុះអំពើហិង្សាប្រឆាំងជនជាតិភាគតិចកាន់សាសនាអ៊ីស្លាមនៅភូមាក្នុងឆ្នាំ២០១៧មក បង់ក្លាដែសបានក្លាយជាជម្រកថ្មីរបស់ជនភៀសខ្លួនរ៉ូហ៊ីងយ៉ាប្រមាណជិតមួយលាននាក់ តែលក្ខខណ្ឌរស់នៅក្នុងជំរំត្រដាបត្រដួសនិងលំបាកខ្លាំង ទើបពួកគេចង់ស្វែងរកទឹកដីថ្មីមានស្ថានភាពប្រសើរជាង។
របាយការណ៍អង្កេតរបស់ទីភ្នាក់ងារAFP ឆ្នាំ២០២០បានបង្ហាញឱ្យឃើញថាជំនួញនាំជនភៀសខ្លួនចេញពីជំរំបង់ក្លាដែសទៅម៉ាឡេស៊ីឬឥណ្ឌូណេស៊ី មានទំហំរាប់លានដុល្លារ និងរីកលូតលាស់កាន់តែខ្លាំងជាលំដាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ