ក្រុមបះបោរដើម្បីប្រជាធិបតេយ្យនៅភូមាប្តេជ្ញាវាយដណ្តើមយកទីក្រុងរបស់រដ្ឋភាគខាងកើត ពីដៃរបបសឹក
ឆ្លៀតឱកាសដែលកងទ័ពរបស់របបសឹកភូមាធ្លាក់ដៃប្រយុទ្ធនៅសមរភូមិភាគខាងជើងជាប់ព្រំដែនចិន ក្រុមបះបោរប្រដាប់អាវុធដើម្បីប្រជាធិបតេយ្យ បើកការវាយប្រហារទៅលើកងទ័ពភូមា នៅក្នុងរដ្ឋមួយទៀត រដ្ឋKayah ដែលជាប់ព្រំដែនជាមួយប្រទេសថៃ។ កងកម្លាំងការពារប្រជាជន ដែលលេចចេញរូបរាងឡើង នៅក្រោយរដ្ឋប្រហារយោធា នៅដើមឆ្នាំ ២០២១ បានប្រកាសប្តេជ្ញាវាយដណ្តើមកាន់កាប់រដ្ឋធានី Loikaw របស់រដ្ឋKayah ភាគខាងកើតប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៧
ភូមាកាន់តែលង់ជ្រៅទៅក្នុងជម្លោះប្រដាប់អាវុធហិង្សារវាងកងទ័ពរបបសឹក និងសម្ព័ន្ធក្រុមជនជាតិភាគតិច ប្រដាប់អាវុធ ដែលផ្តុំដោយចលនាឧទ្ទាមជាច្រើនក្រុម ដែលនៅក្នុងនោះ មានផងដែរ កងកម្លាំងការពារជាតិ ដើម្បីប្រជាធិបតេយ្យ ដែលកើតចេញពីចលនាប្រឆាំងរដ្ឋប្រហារយោធានៅភូមា។
នៅរដ្ឋKayah ភាគខាងកើតប្រទេស ដែលជាប់ព្រំដែនជាមួយប្រទេសថៃ ក្រុមបះបោរប្រដាប់អាវុធដើម្បីប្រជាធិបតេយ្យ ដែលបើកការប្រយុទ្ធតទល់ជាមួយកងទ័ពរបបសឹកតាំងពីចុងខែតុលា ចង់ឆ្លៀតឱកាសដែលរបបសឹកធ្លាក់ដៃប្រយុទ្ធនៅភាគខាងជើងប្រទេស ដើម្បីវាយដណ្តើមយកទីក្រុងសំខាន់របស់រដ្ឋ Kayah។ នៅចុងសប្តាហ៍នេះ ពួកគេកំពុងត្រៀមវាយសម្រុកចូលទីក្រុង Loikaw ជាទីដែលកងទ័ពភូមាដកថយទៅបោះទីតាំងរង់ចាំប្រយុទ្ធ។
បើតាមក្រុមបះបោរដើម្បីប្រជាធិបតេយ្យ នៅក្នុងរដ្ឋធានី Loikaw កងទ័ពភូមាកំពុងស្ថិតក្នុងលក្ខណៈត្រៀមការពារខ្លួនតែប៉ុណ្ណោះ។ បើនិយាយពីការប្រយុទ្ធជើងគោក ក្រុមប្រឆាំងមានប្រៀបជាងកងទ័ពភូមា ប៉ុន្តែ យ៉ាងណានៅតែត្រូវប្រឈមនឹងការទម្លាក់គ្រាប់បែក ការវាយប្រហារផ្លូវអាកាសរបស់របបសឹក។ ខ្សែវីដេអូរបស់ទីភ្នាក់ងារព័ត៌មានបារាំង AFP បង្ហាញថា ដោយសារការទម្លាក់គ្រាប់បែករបស់របបសឹក និងការប្រយុទ្ធគ្នាហិង្សា នៅប៉ុន្មានសប្តាហ៍មកនេះ រដ្ឋធានីដែលមានប្រជាជនរស់នៅជាង ៥ម៉ឺននាក់ បានស្ងាត់ជ្រងំ។
គិតត្រឹមថ្ងៃសៅរ៍ កងកម្លាំងការពារជនជាតិការ៉ែន ដែលជាក្រុមប្រឆាំងប្រដាប់អាវុធមួយក្រុមទៀត ចូលកាន់កាប់ផ្លូវសំដៅរដ្ឋធានី Loikaw។ គឺក្រុមជនជាតិការ៉ែននេះឯង ដែលបានបង្ហោះផ្សាយវីដេអូ កាលពី២សប្តាហ៍ ដែលនៅក្នុងទាហានរបស់របបសឹកភូមាទម្លាក់អាវុធចុះចាញ់ បន្ទាប់ពីរត់ចូលជ្រកលាក់ខ្លួន នៅក្នុងសកលវិទ្យាល័យ។
នៅប៉ុន្មានសប្តាហ៍មកនេះ ក្រុមប្រដាប់អាវុធការ៉ែន និងក្រុមសម្ព័ន្ធមិត្តបានព្យាយាមជាច្រើនលើក ដើម្បីវាយបំបែកពន្ធនាគារដ៏ធំរបស់ទីក្រុង ប៉ុន្តែ មិនបានសម្រេច។ មេដឹកនាំរបបសឹក មីន អ៊ុងឡាំងផ្ទាល់ទទួលស្គាល់ កាលពីថ្ងៃពុធកន្លងទៅថា ការប្រយុទ្ធជាច្រើនសប្តាហ៍មកនេះ នៅទីក្រុងLoikaw សបញ្ជាក់ពីកម្លាំងប្រយុទ្ធដ៏សម្បើមរបស់ក្រុមសត្រូវ ប៉ុន្តែ លោកអះអាងថា ទីក្រុង Loikaw នៅតែស្ថិតក្នុងដៃរបស់រដ្ឋាភិបាល។ អង្គការសហប្រជាជាតិវិញ បានជម្លៀសបុគ្គលិករបស់ខ្លួនចេញពីទីក្រុង Loikaw និងអះអាងថា ការប្រយុទ្ធគ្នាដ៏ហិង្សា នៅមួយរយៈពេលចុងក្រោយនេះ បានធ្វើឲ្យមនុស្សជិត ៣សែននាក់ផ្លាស់ទី រត់ចោលផ្ទះសម្បែងរបស់ខ្លួន នៅក្នុងទូទាំងប្រទេសភូមា។
ក្រុមប្រឆាំងប្រដាប់អាវុធផ្តើមការវាយប្រហារដ៏សន្ធប់ ដើម្បីវាយដណ្តើមយកទីក្រុង Loikaw ក៏ព្រោះតែឃើញកងទ័ពរបបសឹកភូមាកំពុងធ្លាក់ដៃប្រយុទ្ធ និងរបូតបាត់ទីក្រុងជាច្រើន នៅក្នុងរដ្ឋស្ហាន ភាគខាងជើង ដែលនៅជាប់ព្រំដែន ជាមួយប្រទេសចិន។ ចាប់តាំងពីបើកការវាយប្រហារទៅលើកងទ័ព ភូមា នៅរដ្ឋស្ហាន នៅចុងខែតុលា កងទ័ពអារ៉ាខាន ដែលចាប់ដៃគ្នាជាមួយ ទាហានសម្ព័ន្ធប្រជាធិបតេយ្យ ជាតិ ភូមា និងកងទ័ពរំដោះជាតិ Ta’ang បានវាយដណ្តើមបានប៉ុស្តទាហានជាង១០កន្លែង។
បន្ទាប់ពីក្រុមប្រដាប់អាវុធ សម្ព័ន្ធជនជាតិភាគតិច វាយបណ្តេញកងទ័ពភូមា ចេញពីទីក្រុង តំបន់ដែលជាច្រកពាណិជ្ជកម្ម សំខាន់របស់ចិននិងភូមា កងទ័ពចិន កាលពីសប្តាហ៍មុនបានធ្វើលំហាត់សឹក ជាមួយការបញ្ចេញសកម្មភាពប្រយុទ្ធពិតៗ នៅតាមបណ្តោយព្រំដែនជាមួយភូមា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ