លោក ត្រាំ យល់ព្រមទុកពេល៤៥ថ្ងៃ ឱ្យក្រុមហ៊ុន Microsoft បន្តចរចាទិញយក Tik Tok
ចុះផ្សាយនៅថ្ងៃ៖
ស្តាប់ - ០៧:០០
ក្រោយពីប្រធានាធិបតីអាមេរិកលោក ដូណាល់ ត្រាំ យល់ព្រមទុកពេលឱ្យ៤៥ថ្ងៃ, ក្រុមហ៊ុន Microsoft បន្តចរចាទិញយក Tik Tok ដើម្បីបញ្ចៀសកុំឱ្យកម្មវិធីទូរសព្ទដៃនេះ ត្រូវរដ្ឋាភិបាលអាមេរិកហាមឃាត់មិនឱ្យប្រើក្នុងទឹកដីអាមេរិក។ Tik Tok ជាបណ្តាញសង្គម បង្កើតឡើងដោយក្រុមហ៊ុនចិន និងដែលកំពុងតែល្បីពេញនិយមសម្រាប់យុវជន វ័យក្មេងៗ បានត្រូវសហរដ្ឋអាមេរិក ចោទប្រកាន់ថា វាអាចជាគ្រោះថ្នាក់ធ្ងន់មួយដល់សន្តិសុខជាតិអាមេរិក ហើយក៏អាចជាឧបករណ៍បម្រើនយោបាយស៊ើបការណ៍សម្ងាត់របស់ចិនប៉េកាំង ព្រមទាំង អាចជាមធ្យោបាយមួយជ្រៀតជ្រែក នៅក្នុងដំណើរការបោះឆ្នោតប្រធានាធិបតីអាមេរិក នាពេលខាងមុខ ទៀតផង។
ប្រមុខរដ្ឋអាមេរិក លោក ដូណាល់ ត្រាំ កាលពីថ្ងៃសុក្រកន្លងទៅ បានលើកឡើងថាត្រូវបិទចោល និងហាមឃាត់ដាច់ខាតឱ្យមាន Tik Tok នៅអាមេរិកទេ។ ក៏ប៉ុន្តែបន្តិចក្រោយមក ប្រធានាធិបតីរូបនេះ បានផ្លាស់ប្តូរចិត្តវិញ។ តើការប្តូរចិត្តយ៉ាងរហ័សបែបនេះ មកពីហេតុអ្វី?
មានមូលហេតុសំខាន់ពីរ គឺនយោបាយ និងសេដ្ឋកិច្ច។ ក្រុមហ៊ុនTikTok មានតម្លៃទឹកប្រាក់ប្រមាណ ៥០ពាន់លានដុល្លារ។ សព្វថ្ងៃនេះ Tik Tok មានបុគ្គលិកធ្វើការ នៅអាមេរិក ១ពាន់៥នាក់ ហើយក្រុមហ៊ុននេះសន្យាថានឹងបង្កើនការងារបន្ថែម ១ម៉ឺនកន្លែង សម្រាប់ពីរបីឆ្នាំទៅមុខទៀត។ នេះនៅលើផ្នែកសេដ្ឋកិច្ចនិងវិស័យបង្កើតការងារធ្វើសម្រាប់ពលរដ្ឋអាមេរិក ដែល អ្នកជំនាញអះអាងថា បើបិទ TikTok គឺមានតែខាតបង់។
មួយទៀត ជារឿងសំខាន់សម្រាប់អនាគតនយោបាយរបស់ លោក ដូណាល់ ត្រាំ។ TikTok មានអ្នកប្រើប្រាស់ ប្រហែល៨០លាននាក់ តែបើតាមTikTokខ្លួនឯងថា មានដល់១០០លាននាក់ឯណោះ។ បើមានអ្នកប្រើប្រាស់១០០លាននាក់ គឺស្ទើរតែស្មើនឹង១ភាគ៣នៃប្រជាជនអាមេរិកទៅហើយ។
អ៊ីចឹង ការបិទTikTok នៅពេលនេះ ជារឿងខុសធ្ងន់។ ខុសធ្ងន់ព្រោះថា ការបោះឆ្នោតប្រធានាធិបតី នៅសល់ពេល តែ៣ខែទៀតប៉ុណ្ណោះ។ អ្នកប្រើTikTokនៅអាមេរិក រាប់សិបលាននាក់ នឹងបះបោរខឹងសម្បារ ហើយអាចនឹងមិនបោះឆ្នោតឱ្យលោក ត្រាំ ផងក៏ថាបាន។ ប្រសិនបើបិទ TikTok ទាំងកំរោល ទាំងទទឹងទិស ចំពេលនេះ អាចនឹងមានផលវិបាក ខាតធំ ចំពោះនយោបាយ និងសេដ្ឋកិច្ច។
ចំណុចទាំងនេះ គឺអ្នកទីប្រឹក្សាច្រើននាក់របស់លោកប្រធានាធិបតី បានពន្យល់ដាស់តឿនលោក ត្រាំ ទើបលោក ត្រាំ ប្រែចិត្ត បន្ធូរដៃបន្តិចមកវិញ។ នេះក៏ដោយសារតែថ្នាក់ដឹកនាំក្រុមហ៊ុន Microsoft បាននិយាយជជែកដោយផ្ទាល់ ជាមួយលោក ដូណាល់ ត្រាំ ទើបលោកយល់ព្រមដូរចិត្ត។
តើមានលក្ខខណ្ឌតម្រូវ យ៉ាងណាខ្លះ ក្នុងការទិញលក់ TikTok?
ប្រសិនបើការចរចាគ្នាទៅដំណើរការបានល្អ ហើយ Microsoft អាចទិញសាខា TikTok នៅអាមេរិកមែននោះ គឺក្រុមហ៊ុន Microsoft ត្រូវជាម្ចាស់កម្មសិទ្ធគ្រប់គ្រង TikTok ទាំងនៅអាមេរិកផង នៅកាណាដា អូស្រាលី និងណូវែលហ្សេឡង់ ថែមទៀត។
មិនតែប៉ុណ្ណោះ Microsoft ត្រូវតែធានាសន្យាថា ទិន្នន័យផ្ទាល់ខ្លួនរបស់អ្នកប្រើប្រាស់ មិនត្រូវផ្ទេរទៅឱ្យចិនប៉េកាំង ជាដាច់ខាត។ នេះជាលក្ខខណ្ឌចាំបាច់បំផុត ដែលរដ្ឋបាលលោក ដូណាល់ ត្រាំ ទាមទារចង់បាន។
ការចរចានេះ គឺត្រូវស្ថិតក្រោមក្រសែភ្នែក និងការចូលរួមរបស់ គណៈកម្មាការវិនិយោគបរទេសរបស់អាមេរិក ( CFIUS) ជាស្ថាប័នរបស់រដ្ឋសហពន្ធអាមេរិក ដែលអាចមានសិទ្ធិហាមឃាត់ឱ្យមានការកិច្ចព្រមព្រៀមនោះទេ បើក្រុមនេះ យល់ថា វាប៉ះពាល់ដល់សន្តិសុខជាតិអាមេរិក នោះ។
ម្តងនេះ ថ្នាក់ដឹកនាំនយោបាយ គណបក្សប្រជាធិបតេយ្យ ជាបក្សប្រឆាំង ទាំងនៅសភានិងនៅព្រឹទ្ធសភា បែរមកគាំទ្រចំណាត់ការរបស់រដ្ឋាភិបាលលោក ត្រាំ ដែរ។ ប្រធានសភាអាមេរិក លោកស្រីNancy Pelosi ថ្លែងពីម្សិលមិញនេះ ថា ក្រុមនយោបាយរបស់លោកស្រី យល់ព្រមឱ្យមានការផ្លាស់ប្តូរស្ថានភាពរបស់ TikTok គឺអាចថា ត្រូវបង្ខំឱ្យលក់មកឱ្យក្រុមហ៊ុនអាមេរិក ឬ បើមិនអ៊ីចឹងទេ ត្រូវបិទចោលតែម្តង។
ចំពោះTikTokវិញ ហាក់ត្រូវសហរដ្ឋអាមេរិក រុញឱ្យទប់នឹងជញ្ជាំង។ បើសិនជាចង់វត្តមាននៅអាមេរិកទៀត គឺមានតែត្រូវលក់សាខា។ បើមិនអ៊ីចឹងទេ មានតែបិទផ្លូវនៅអាមេរិកតែប៉ុណ្ណោះ។ ការបិទផ្លូវនៅអាមេរិក គឺច្បាស់ជារាលដាលដល់ប្រទេសផ្សេងៗទៀត ដែលជាសម្ព័ន្ធមិត្តរបស់មហាអំណាចនេះ ជាមិនខាន។
សំណុំរឿង TikTok របស់ក្រុមហ៊ុនចិន គឺក្នុងបរិបទនៃសង្គ្រាមពាណិជ្ជកម្ម និងការប្រឈមមុខតឹងតែងដាក់គ្នា រវាងអាមេរិកនិងចិន។ ក៏ប៉ុន្តែ លោកត្រាំ ខ្លួនឯង ក៏អាចនឹងមានការមិនពេញចិត្តផ្ទាល់ខ្លួនខ្លះដែរចំពោះ TikTok។
មូលហេតុខ្លះៗ ពីការប៉ះពាល់ជីវិតឯកជនរបស់អ្នកប្រើប្រាស់ ពីការប៉ះពាល់សន្តិសុខជាតិ និងការជ្រៀតជ្រែកក្នុងដំណើរការបោះឆ្នោតប្រធានាធិបតីអាមេរិក ជាដើម។ ក៏ប៉ុន្តែ បើតាមអ្នកសារព័ត៌មានស្រុកបារាំង លោក ត្រាំ ក៏ប្រកាន់ខឹង TikTok ដោយសាររឿងផ្ទាល់ខ្លួនបន្តិចដែរ។ ដ្បិតលោកឃើញគេយកសំឡេងនិងសន្ទរកថារបស់ខ្លួន ទៅដាក់ កាត់ត ជាសំឡេង និងវីដេអូ ឱ្យអ្នកប្រើ TikTok ធ្វើត្រាប់តាម។ មានវីដេអូខ្លះ គឺនិយាយញាប់លឿនៗ ដែលលោក ត្រាំ មិនចូលចិត្ត។
លោកត្រាំខឹងមួយទៀត គឺកាលពីចុងខែមិថុនា មានយុវជន ក្មេងអាមេរិក អំពាវនាវក្នុង TikTok មិនឱ្យទៅចូលរួមមេទ្ទីញឃោសនានយោបាយរបស់លោកត្រាំ នៅ អុកខ្លាហូម៉ា (Oklahoma) ដែលធ្វើឱ្យកៅអីទំនេរជាច្រើន។
បញ្ហា TikTok នេះ វាកាន់តែរាលដាលដល់ បច្ចេកវិទ្យាផ្សេងទៀត របស់ចិន ដែលគេអាចនិយាយថា ជា«សង្គ្រាមបច្ចេកវិទ្យា»ផង។
ប្រមុខការទូតអាមេរិក លោក Mike Pompeo បញ្ជាក់ប្រាប់កាសែតក្នុងស្រុកអាមេរិក ថ្មីៗនេះ ថាប្រធានាធិបតីនឹងមានចំណាត់ការទ្រង់ទ្រាយធំឆាប់ៗនេះ ចំពោះបណ្តាញសង្គម ឬឧបករណ៍ផ្សេងៗទាំងឡាយ ដែលអាចបង្កហានិយភ័យដល់សន្តិសុខជាតិអាមេរិក ហើយដែលបម្រើប្រយោជន៍ឱ្យបក្សកុម្មុយនីស្តចិនប៉េកាំង។ ក្រៅពីTikTok នៅមាន WeChat ព្រមទាំងបណ្តាញផ្សេងៗរបស់ចិន ជាច្រើនទៀត ដែលអាមេរិកត្រូវតែប្រយ័ត្ន ត្រូវតាមដាន និងចាត់វិធានការទប់ទល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ