Impeachment៖លោកដូណាល់ ត្រាំត្រូវបានព្រឹទ្ធសភាសម្រេចឲ្យរួចខ្លួន តែគណបក្សធំពីរឃ្លាតគ្នាកាន់តែខ្លាំង
ចុះផ្សាយនៅថ្ងៃ៖
ស្តាប់ - ០៦:៤៨
នៅថ្ងៃពុធ ទី៥ កុម្ភៈ ព្រឹទ្ធសភាអាមេរិកបានសម្រេចឲ្យលោកដូណាល់ ត្រាំរួចខ្លួននៅក្នុងបទចោទប្រកាន់ចំនួនពីរ គឺការរំលោភអំណាច និងការរារាំងរដ្ឋសភាមិនឲ្យធ្វើការដោយរលូន។ នីតិវិធីរបស់ព្រឹទ្ធសភាបានធ្វើឡើង បន្ទាប់ពីសភាបានអនុម័តទម្លាក់លោកដូណាល់ ត្រាំចេញពីតំណែង។ គួររម្លឹកថា លោកត្រាំជាប្រធានាធិបតីអាមេរិកទី៣ ដែលបានរួចខ្លួនពីការទម្លាក់ពីតំណែង តែជាប្រធានាធិបតីទី១ ដែលកំពុងធ្វើយុទ្ធនាការឃោសនាបោះឆ្នោតដើម្បីអាណត្តិថ្មីសម្រាប់ការបោះឆ្នោតនៅខែវិច្ឆិកាខាងមុខ។ ក្រៅពីបានរួចខ្លួនពីការទម្លាក់ពីតំណែង ប្រជាប្រិយភាពរបស់លោកត្រាំក៏កំពុងកើនឡើងដែរ។ តែអ្វីជាការកត់សម្គាល់ រឿងរ៉ាវមួយនេះបាននិងកំពុងធ្វើឲ្យគណបក្សធំពីរ គឺគណបក្សសាធារណរដ្ឋកំពុងកាន់អំណាច និងគណបក្សប្រជាធិបតេយ្យដែលជាបក្សប្រឆាំងឃា្លតគ្នាកាន់តែខ្លាំង។
ការដែលព្រឹទ្ធសភាអាមេរិកបានសម្រេចឲ្យលោកដូណាល់ ត្រាំរួចខ្លួនជាព្រឹត្តិការណ៍ដែលគ្រប់គ្នាបានរង់ចាំ សូម្បីគណបក្សប្រជាធិបតេយ្យដែលជាអ្នកដើមបណ្តឹង។ ជាព្រឹត្តិការណ៍ដែលគ្រប់គ្នាបានរង់ចាំព្រោះគណបក្សសាធារណរដ្ឋរបស់លោកត្រាំមានសំឡេងភាគច្រើននៅព្រឹទ្ធសភា។ ចំណែកគណបក្សប្រជាធិបតេយ្យមានសំឡេងភាគច្រើននៅរដ្ឋសភា។ លោកត្រាំដែលជាប្រធានាធិបតីអាមេរិកទី៤៥ ត្រូវបានព្រឹទ្ធសភាបោះឆ្នោតឲ្យរួចខ្លួនពីបទចោទប្រកាន់ក្នុងរឿងរំលោភអំណាចដោយមានសំឡេងគាំទ្រ ៥២សំឡេងលើសំឡេងសុប ១០០សំឡេងនៅព្រឹទ្ធសភា។ បន្ទាប់មក លោកត្រាំក៏ត្រូវបានព្រឹទ្ធសភាសម្រេចឲ្យរួចខ្លួនពីបទចោទប្រកាន់រារាំងដំណើរការដោយរលូនរបស់សភាដោយមានសំឡេងគាំទ្រ ៥៣សំឡេងលើ ១០០សំឡេង។
គួររម្លឹកថា រដ្ឋធម្មនុញ្ញអាមេរិកបានតម្រូវឲ្យមានសំឡេងគាំទ្រ ២ភាគ៣ ពោល ៦៧សំឡេងលើ ១០០សំឡេងនៅព្រឹទ្ធសភាទើបអាចទម្លាក់ប្រធានាធិបតីពីតំណែងបាន។ បច្ចុប្បន្ន គណបក្សសាធារណរដ្ឋរបស់លោកត្រាំមាន ៥៣អសនៈក្នុងចំណោមអសនៈទាំង ១០០ នៅព្រឹទ្ធសភា។ ដូច្នេះការស្វែងរកឲ្យបាន៦៧សំឡេងដើម្បីទម្លាក់លោកត្រាំពីតំណែងពិតជាពិបាកខ្លាំងណាស់។ តែក្នុងចំណោមសមាជិកព្រឹទ្ធសភាមកពីគណបក្សសាធារណរដ្ឋទាំង ៥៣រូប មានមួយរូបគឺលោក Mitt Romney បានបោះឆ្នោតប្រឆាំងលោកត្រាំដោយគាំទ្រលើបទចោទប្រកាន់មួយ គឺការរំលោភអំណាច។ ជំហរមួយនេះបានធ្វើឲ្យលោក Mitt Romney ក្លាយជាសមាជិកព្រឹទ្ធសភាដំបូងគេ និងទី១ នៅក្នុងប្រវត្តិសាស្ត្រអាមេរិកដែលបានបោះឆ្នោតទម្លាក់ប្រធានាធិបតីចេញពីគណបក្សខ្លួនឯង។
Impeachment បានធ្វើឲ្យលោកត្រាំ និងលោកស្រីប៉េឡូស៊ីមើលមុខកាន់តែមិនចំ
អ្នកមិនសប្បាយចិត្តនឹងការសម្រេចរបស់ព្រឹទ្ធសភាពេលនេះ គឺគ្មាននរណាក្រៅពីគណបក្សប្រជាធិបតេយ្យ ពិសេសប្រធានរដ្ឋសភាលោកស្រីណាន់ស៊ី ប៉េឡូស៊ី។ បន្ទាប់មក សារព័ត៌មានអាមេរិកភាគច្រើនបាននាំគ្នាសរសេរវាយប្រហារយ៉ាងចាស់ដៃលើគណបក្សសាធារណរដ្ឋ ពិសេសក្រុមសមាជិកព្រឹទ្ធសភាដែលបានបោះឆ្នោតឲ្យលោកត្រាំរួចខ្លួន។ រវាងលោកស្រីណាន់ស៊ី ប៉េឡូស៊ី និងលោកដូណាល់ ត្រាំ គឺដូចទឹក និងប្រេងដែលពិបាករលាយចូលគ្នា។ « ប្រធានាធិបតី និងពួកអ្នកសាធារណរដ្ឋនៅព្រឹទ្ធសភាបានរំលោភច្បាប់ » នេះជាការយល់ឃើញរបស់លោកស្រីណាន់ស៊ី ប៉េឡូស៊ីនៅក្នុងសេចក្តីប្រកាសព័ត៌មានមួយ។ ប្រធានរដ្ឋសភាមកពីបក្សប្រជាធិបតេយ្យរូបនេះមិនញញើតចាត់ទុកលោកត្រាំជាមនុស្សពាល រួមទាំងលោក Mitch McConnell ដែលជាប្រធានក្រុមសំឡេងភាគច្រើនរបស់បក្សសាធារណរដ្ឋនៅព្រឹទ្ធសភា។
« លោកត្រាំបន្តជាការគំរាមកំហែង ព្រោះគាត់ព្យាយាមដើម្បីនិយាយពីការអង្គុយលើច្បាប់ និងអាចកេងបន្លំនៅក្នុងការបោះឆ្នោត បើរូបគាត់ចង់ធ្វើ » នេះជាការបញ្ជាក់របស់លោកស្រីណាន់ស៊ី ប៉េឡូស៊ី។ ក្នុងឱកាសថ្លែងសុន្ទរកថាទៅកាន់ប្រជាជាតិរបស់លោកត្រាំនាថ្ងៃពុធ ទី៥ កុម្ភៈ លោកស្រីប៉េឡូស៊ីដែលឈរពីក្រោយលោកត្រាំលើវេទិកាក្នុងរដ្ឋសភាបានហែកក្រដាសសុន្ទរកថារបស់លោកត្រាំ។ ចំណែកសារព័ត៌មានអាមេរិកទូទៅបានទាញមេរៀនពីបរាជ័យនៃនីតិវិធីទម្លាក់លោកត្រាំពីតំណែង និងសរសេរវាយប្រហារយ៉ាងចាស់ដៃលើគណបក្សសាធារណរដ្ឋ ពិសេសក្រុមសមាជិកព្រឹទ្ធសភាដែលបានបោះឆ្នោតឲ្យលោកត្រាំរួចខ្លួន។ នីតិវិធីមួយនេះបានញែកគណបក្សនយោបាយធំទាំងពីរ គឺគណបក្សប្រជាធិបតេយ្យ និងគណបក្សសាធារណរដ្ឋឲ្យឃ្លាតគ្នាកាន់តែឆ្ងាយថែមទៀត ពោលឆ្ងាយជាងនីតិវិធីទម្លាក់ប្រធានាធិបតីលោកប៊ីល គ្លីនតុនមិនបានសម្រេចក្នុងឆ្នាំ ១៩៩៩។
« សោកនាដកម្មនៃនីតិវិធីទម្លាក់លោកត្រាំមិនបានសម្រេចបានបន្សល់ទុកស្នាមរបួសដល់ឥស្សរជនសំខាន់ទាំងពីរ គឺលោកត្រាំ និងលោកស្រីប៉េឡូស៊ីដែលមិនអាចធ្វើការជាមួយគ្នាបាន » នេះជាការយល់ឃើញរបស់កាសែត Wall Street Journal។ ចំណែកកាសែត Los Angeles Times បញ្ជាក់ថា ការដែលព្រឹទ្ធសភាបានសម្រេចឲ្យលោកត្រាំរួចខ្លួនមិនត្រឹមផ្តល់ភ្លើងខៀវឲ្យលោកត្រាំបន្តប្រព្រឹត្តបទឧក្រិដ្ឋប៉ុណ្ណោះទេ តែជាការលើកទឹកចិត្តឲ្យលោកត្រាំរំលោភច្បាប់រដ្ឋធម្មនុញ្ញជាថ្មីទៀត។ ចំណែកកាសែត Washington Post បានចាត់ទុកនីតិវីធីរបស់ព្រឹទ្ធសភាថា មានលក្ខណៈនយោបាយសុទ្ធសាធ ព្រោះសមាជិកព្រឹទ្ធសភាមកពីគណបក្សសាធារណរដ្ឋចង់គិតគូរពីអនាគតនយោបាយរបស់បក្ស។
ប្រជាប្រិយភាពលោកដូណាល់ ត្រាំបានកើនឡើង
លោកត្រាំជាប្រធានាធិបតីអាមេរិកទី៣ ដែលបានរួចផុតពីការទម្លាក់ពីតំណែង។ តែខុសពីប្រធានាធិបតីពីរមុន គឺលោករីឆាដ នីកសុន និងលោកប៊ីល គ្លីនតុន ប្រជាប្រិយភាពរបស់លោកត្រាំបានកើនឡើងក្នុងពេលដែលលោកកំពុងរងនីតិវិធីទម្លាក់ពីតំណែង ហើយលោកក៏កំពុងឈរឈ្មោះសម្រាប់អាណត្តិថ្មី។ ៤៩% ជាកម្រិតប្រជាប្រិយភាពដែលលោកត្រាំបានទទួលនៅក្រោយព្រឹទ្ធសភាបោះឆ្នោតឲ្យលោករួចខ្លួន ហើយបើគិតនៅក្នុងរង្វង់សកម្មជនរបស់គណបក្សសាធារណរដ្ឋ គឺមានដល់ទៅ ៩៤%។ គេនៅមិនទាន់ដឹងថា តើរឿងរ៉ាវទម្លាក់លោកត្រាំមិនបានសម្រេចពេលនេះកំពុងរុញលោកត្រាំឲ្យបន្តអង្គុយកៅអីប្រធានាធិបតីអាណត្តិថ្មីឬអត់ទេ។
បើសរុបទៅនៅក្នុងប្រវត្តិអាមេរិកមកទល់ពេលនេះ « impeachment » ឬនីតិវិធីទម្លាក់ពីតំណែងត្រូវបានប្រើចំនួន ៤ដង ទី១ ប្រឆាំងប្រធានាធិបតីលោកអានឌ្រូ ចនសុនក្នុងឆ្នាំ ១៨៦៨ ទី២ ប្រឆាំងប្រធានាធិបតីលោករីឆាដ នីកសុនក្នុងឆ្នាំ ១៩៧៤ ទី៣ ប្រឆាំងប្រធានាធិបតីប៊ីល គ្លីនតុនក្នុងឆ្នាំ ១៩៩៨ និងទី៤ ប្រឆាំងលោកដូណាល់ ត្រាំក្នុងឆ្នាំ ២០២០។ តែក្នុងចំណោមទាំង ៤ដង គឺមានតែករណីលោករីឆាដ នីកសុន លោកប៊ីល គ្លីនតុន និងលោកដូណាល់ ត្រាំដែលបានឡើងដល់ព្រឹទ្ធសភា តែត្រូវបានសមាជិកព្រឹទ្ធសភាបោះឆ្នោតច្រានចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ