ដើមបូព៌ា៖អ៊ីស្រាអែលស្វាគមន៍ផែនការសន្តិភាពរបស់អាមេរិក តែប៉ាឡេស្ទីនទាត់ចោល
ចុះផ្សាយនៅថ្ងៃ៖
ស្តាប់ - ០៧:១២
នៅថ្ងៃអង្គារ ទី២៨ មករា ប្រធានាធិបតីអាមេរិកលោកដូណាល់ ត្រាំបានបង្ហាញផែនការសន្តិភាពសម្រាប់ជម្លោះរវាងអ៊ីស្រាអែល និងប៉ាឡេស្ទីននៅក្នុងទីក្រុងវ៉ាស៊ីនតោន។ ភាគីអ៊ីស្រាអែលតំណាងដោយប្រមុខរដ្ឋាភិបាលលោកនេតាន់យ៉ាហ៊ូបានមានវត្តមាននាឱកាសនោះ តែគ្មានវត្តមានភាគីប៉ាឡេស្ទីនទេ។ លោកត្រាំបានថ្លែងក្នុងក្តីសុទិដ្ឋិនិយមដោយចាត់ទុកជាផែនការសន្តិភាពឈ្នះ ឈ្នះជាមួយនឹងដំណោះស្រាយបង្កើតរដ្ឋពីរ។ លោកនេតាន់យ៉ាហ៊ូបានស្វាគមន៍ផែនការសន្តិភាពរបស់អាមេរិកដោយទឹកមុខញញឹម តែប៉ាឡេស្ទីនប្រកាសមិនទទួលយក។ ចំណែកប្រតិកម្មពីប្រទេសផ្សេងទៀតហាក់មានការប្រយ័ត្នប្រយែង។
គោលបំណងនៃការបង្កើតឲ្យមានរដ្ឋប៉ាឡេស្ទីនឯករាជ្យមួយរស់ក្បែររដ្ឋអ៊ីស្រាអែលពិតជាការចង់បានរបស់ពលរដ្ឋប៉ាឡេស្ទីន និងក៏ជាការទាមទារចង់បានយ៉ាងទទូចរបស់សហគមន៍អន្តរជាតិតាំងពីច្រើនទសវត្ស។ តែនេះមិនមែនមានន័យថា ពលរដ្ឋប៉ាឡេស្ទីនយល់ព្រមទទួលយកការបង្កើតរដ្ឋឯករាជ្យមួយដោយបិទភ្នែក និងដោយគ្មានការពិនិត្យ ពិចារណាទេ។ លោកដូណាល់ ត្រាំបានចាត់ទុកផែនការសន្តិភាពរបស់លោកថា ជាការបោះមួយជំហានយ៉ាងធំទៅកាន់សន្តិភាព និងជាសំណាងប្រវត្តិសាស្រ្តដោយជំរុញប៉ាឡេស្ទីនឲ្យទទួលយក។ ចំណែកនាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូមិនញញើតចាត់ទុកផែនការសន្តិភាពរបស់លោកត្រាំថា ជាផែនការសតវត្ស និងជាសំណាងសតវត្ស។
តែការណ៍ដែលប៉ាឡេស្ទីនប្រកាសមិនទទួលយកក៏ដោយសារនៅក្នុងផែនការសន្តិភាពកម្រាស់ ៨០ទំព័ររបស់អាមេរិក លោកត្រាំបានតាក់តែងឡើងទៅតាមការទាមទារចង់បានរបស់អ៊ីស្រាអែល។ ជាក់ស្តែង ផែនការសន្តិភាពបានចាត់ទុកហ្សេរុយសាឡិមជាទីក្រុងផ្តាច់មុខមិនអាចចែកបានរបស់អ៊ីស្រាអែល ឬមួយក៏ការចាត់ទុកដែនដីអាណានិគមអ៊ីស្រាអែលនៅលើដែនដីប៉ាឡេស្ទីនក្នុងតំបន់ស៊ីហ្សកដានីជាដែនដីស្របច្បាប់របស់អ៊ីស្រាអែលជាដើម។ ប៉ាឡេស្ទីនបានមើលឃើញថា ផែនការសន្តិភាពរបស់អាមេរិកមួយនេះបានហុចប្រយោជន៍ច្រើនណាស់ឲ្យអ៊ីស្រាអែល។
ប៉ាឡេស្ទីនចង់បានរដ្ឋឯករាជ្យដែលមានព្រំដែនកំណត់ក្នុងឆ្នាំ ១៩៦៧
ផ្អែកតាមផែនការសន្តិភាពរបស់លោកត្រាំ អនាគតរដ្ឋប៉ាឡេស្ទីននឹងបង្កើតឡើងនៅលើដែនដីប៉ាឡេស្ទីនដែលនៅសេសសល់បច្ចុប្បន្ន មានន័យថា ដែនដីប៉ាឡេស្ទីនដែលអ៊ីស្រាអែលបានចូលកាន់កាប់ដោយខុសច្បាប់ ឬស្របច្បាប់តាំងពីក្រោយឆ្នាំ ១៩៦៧ នឹងក្លាយជាដែនដីស្របច្បាប់របស់អ៊ីស្រាអែលទាំងអស់។ ចំណែកអនាគតទីក្រុងប៉ាឡេស្ទីននឹងគ្មានឈ្មោះហ្សេរុយសាឡិមដូចដែលប៉ាឡេស្ទីនចង់បាន និងត្រូវបង្កើតឡើងនៅក្នុងតំបន់មួយស្ថិតប៉ែកខាងកើតទីក្រុងហ្សេរុយសាឡិម។ ទន្ទឹមគ្នានេះ លោកត្រាំថែមទាំងបានដាក់លក្ខខណ្ឌមួយចំនួនសង្កត់ ក ប៉ាឡេស្ទីន មុននឹងអនាគតរដ្ឋប៉ាឡេស្ទីនអាចលេចចេញជារូបរៀងបាន ក្នុងនោះ លោកត្រាំបានតម្រូវឲ្យប៉ាឡេស្ទីនបោះបង់ចោលនូវអំពើភេរវនិយម។
ទន្ទឹមនឹងការបង្កើតរដ្ឋប៉ាឡេស្ទីនឯករាជ្យមួយរស់ក្បែររដ្ឋអ៊ីស្រាអែល ផែនការសន្តិភាពរបស់លោកត្រាំក៏គ្រោងជួយលើកស្ទួយជីវភាពប្រចាំថ្ងៃរបស់ពលរដ្ឋប៉ាឡេស្ទីនដែរ។ តែបញ្ហានៅត្រង់ថា ទោះបីជាលោកត្រាំព្យាយាមពន្យល់យ៉ាងណាក៏ដោយក៏ពលរដ្ឋប៉ាឡេស្ទីនស្តាប់មិនចូលត្រចៀកដែរ។ នេះក៏ដោយសារថា ខ្លួនជាអ្នកចាញ់ប្រៀប និងជាអ្នកខាតបង់ច្រើនណាស់នៅក្នុងផែនការសន្តិភាពរបស់លោកត្រាំ។ អ្វីដែលប៉ាឡេស្ទីនចង់បានតាំងពីដើមមក គឺរដ្ឋប៉ាឡេស្ទីនឯករាជ្យមួយដែលមានខ្សែបន្ទាត់ព្រំដែនកំណត់ក្នុងឆ្នាំ ១៩៦៧ និងមានហ្សេរុយសាឡិមជាទីក្រុង។ គួរបញ្ជាក់ថា ជំហរមួយនេះរបស់ប៉ាឡេស្ទីនមានតាំងពីដើមមក ហើយក៏មានការគាំទ្រពីសហគមន៍អន្តរជាតិទូទៅដែរ។ គេអាចនិយាយបានថា ផែនការសន្តិភាពរបស់លោកត្រាំនៅមិនទាន់បានដោះស្រាយជម្រៅនៃបញ្ហានៅក្នុងជម្លោះអ៊ីស្រាអែល ប៉ាឡេស្ទីននៅឡើយទេ។
ក្រុមប្រទេសអារ៉ាប់បានបញ្ចេញប្រតិកម្មដោយប្រយ័ត្នប្រយែង
ប្រតិកម្មនឹងផែនការសន្តិភាពរបស់លោកត្រាំមានចម្រុះ តែមិនបានគាំទ្រ និងមិនថោ្កលទោសទេ។ ប្រតិកម្មរួមដូចគ្នា គឺការទទួលស្គាល់ពីកិច្ចខិតខំប្រឹងប្រែងរបស់លោកត្រាំក្នុងការស្វែងរកដំណោះស្រាយឲ្យជម្លោះអ៊ីស្រាអែល ប៉ាឡេស្ទីនដ៏ស្មុគស្មាញ និងរ៉ាំរ៉ៃ។ ដោយមិនធ្វើអត្ថាធិប្បាយអ្វីលើផែនការសន្តិភាពរបស់លោកត្រាំ អង្គការសហប្រជាជាតិបានបញ្ជាក់ពីការបន្តគោរពសេចក្តីសម្រេចរបស់អង្គការសហប្រជាជាតិ និងកិច្ចព្រមព្រៀងទ្វេភាគីស្តីពីការបង្កើតរដ្ឋពីរ អ៊ីស្រាអែល ប៉ាឡេស្ទីនរស់នៅក្បែរគ្នាក្នុងសន្តិភាព និងសន្តិសុខដោយផ្អែកលើខ្សែបន្ទាត់ព្រំដែនឆ្នាំ ១៩៦៧។ ចំណែកប្រតិកម្មពីក្រុមប្រទេសអារ៉ាប់ហាក់មានការប្រយ័ត្នប្រយែង។
ប្រទេសហ្សកដានីបានបញ្ជាក់ពីការគាំទ្រលើកិច្ចខិតខំប្រឹងប្រែងស្មោះត្រង់ដែលសំដៅទទួលបានសន្តិភាពមួយយុត្តិធម៌ និងទាំងស្រុង។ ត្រង់ចំណុចនេះ ហ្សកដានីក៏បានស្នើឲ្យបង្កើតរដ្ឋប៉ាឡេស្ទីនឯករាជ្យមួយដោយផ្អែកលើខ្សែបន្ទាត់ព្រំដែនឆ្នាំ ១៩៦៧ ដោយហ្សេរុយសាឡិមខាងកើតជាឈ្មោះទីក្រុង។ ប្រតិកម្មដូចគ្នានេះក៏មានពីប្រទេសកាតារដែលទទួលស្គាល់កិច្ចខិតខំប្រឹងប្រែងរបស់លោកត្រាំសម្រាប់ដំណោះស្រាយឲ្យជម្លោះអ៊ីស្រាអែល ប៉ាឡេស្ទីន។ តែក៏ទទូចឲ្យមានការបង្កើតរដ្ឋប៉ាឡេស្ទីនមួយដោយផ្អែកលើកិច្ចព្រមព្រៀងព្រំដែនឆ្នាំ ១៩៦៧។ ប្រទេសអេហ្ស៊ីបតាមរយៈក្រសួងការបរទេសបានអំពាវនាវភាគីពាក់ព័ន្ធឲ្យសិក្សា ពិនិត្យមើលលើទស្សនវិស័យរបស់អាមេរិកដើម្បីឈានទៅសម្រេចបានសន្តិភាព និងការបើកផ្លូវចរចា។
ប្រទេសអេមីរ៉ាតអារ៉ាប់រួមក៏បានអំពាវនាវដូចគ្នានេះដោយចាត់ទុកផែនការសន្តិភាពរបស់លោកត្រាំថា ជាចំណុចចេញមួយសំខាន់ដើម្បីត្រឡប់ចូលតុចរចា។ ចំណែកអារ៉ាប៊ីសាអូឌីតបានត្រឹមឲ្យតម្លៃលើការប្រឹងប្រែងរបស់លោកត្រាំ។ ដោយឡែក ប្រទេសអង់គ្លេសបានទុកឲ្យអ៊ីស្រាអែល និងប៉ាឡេស្ទីនជាអ្នកសម្រេចថា តើផែនការសន្តិភាពរបស់លោកត្រាំពិតជាបានឆ្លើយតបនឹងការចង់បានរបស់ពលរដ្ឋពួកគេដែរឬទេ។ រីឯបារាំងបានសាទរកិច្ចខិតខំប្រឹងប្រែងរបស់លោកត្រាំ និងសន្យាសិក្សាដោយយកចិត្តទុកដាក់លើផែនការសន្តិភាពរបស់លោកត្រាំ។ តែក្រុងប៉ារីសបានបញ្ជាក់ថា ដំណោះស្រាយរដ្ឋពីរដែលផ្អែកលើច្បាប់អន្តរជាតិជារឿងចាំបាច់ក្នុងការកសាងសន្តិភាពមួយយុត្តិធម៌ និងយូរអង្វែងសម្រាប់តំបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ